Kaḅo Ma 12 - Kịrịkẹnị Baịbụl

¹ Nemi ḅẹlẹmaḅọ goyegoye ḅimẹ, ò ye mịẹirima sịkị ini ḍuko ọ̀ pịrị. Taraka se datekerema wẹrịmaḅọ goyegoye oḅoriḅọ-ẹ.

² Iḅi apụma Nyanaḅọ Ḅe ori ini ḍikiḅieḅẹlẹ-ḅẹlẹmẹ, ọkụma sikoroma kọn àrị apụma ọ̀ ḅẹrẹsikọn ini pịrịpịrịmẹ.

³ Simịẹmịẹye mị anị ḅọị nyọ nyanakẹ, ọkụma karakaraye mịẹ apụma ini kụrọma chịẹ mẹ.

⁴ Iḅi eremeniḅọ ma anị dewu ḅe oria opu na ḅieḅẹlẹ na-ẹ, ọkụma ḅụgerere ọkịḅo deḅọ ḅe pịrị eremeniḅọ ma imgbe ḅie obi sime ọkụ anị á sime ọkụ-ẹ.

⁵ Karakaraye mịẹ apụma ini iḅi ḅara se ị́rị́ na angaḅịa; sitịḅịnyana apụma epele se ị́ tiḅịa ọkụ anị ini ḍọkịḅịaye-ẹ.

⁶ Sitịḅịnyana apụ ọkwẹịn ma nweni ḅaa apụ ọkwẹịnye-ẹ, ọkụma karakaraye mịẹ apụma ọkwẹịn ma àrị ḅalafa ḅie simeḅọ ḍụaḅịa.

⁷ Sitịḅịnyana apụma ini ḅịkị faso sịkị ini ḅarị inia ọḅụju pakaḅoḅịa awọ nyana ẹkẹ, ọkụma karakaraye mịẹ apụma inia furoma ḍumo tọrọkọ munḅịa.

⁸ Tomoni ị́ bomaḅịa, ị́ yenemi ọkụma; tomoni ị́ ḍiki iderimaḅịa ị́ yenemika ọkụma.

⁹ Papa tomoniḅọ ị́ nwọ sọ se fịrịnwẹngị se ye fị mị iḅitẹịn opuḅọ ḅara se mịna ḅụ wẹrị se ḅuruḅaa ḅie sime mị nẹngịmẹ.

¹⁰ Karakaraye mịẹḅọ ḅe oria namama ḅụ iḅi nwọ ḍọkịmẹ, ọkụma sitịḅịnyanaḅọ ḅe ò siḅara se oria namama na angangamẹ.

¹¹ Kụrọma fịrịnwẹngị ozu ḍipiḅọ ḅe ọ̀ ḅaka fịaye nyana fịḅịa, ọkụma mịna sịkị fama yeḅụoforika à mịẹye pịrịḅọ ḅe oḅoriḅọ-ẹ.

¹² Sitịḅịnyana apụma sịkịmamgba mịẹ ḍọkịarịye anị simịẹmịẹye-ẹ, ọkụma karakaraye mịẹ apụma ini kụrọma chịẹ mẹ.

¹³ Sitịḅịnyanaḅọ ḅe ọ̀ ḅịpị ḅie pakaḅo ọkwẹịn ḍẹịn sọ ori ọlọḅịa, ọkụma karakaraye ḅụ simeḅọ ḅe ọ̀ ḅụfụka ḅie ọ̀ ḅụ sinḅịa.

¹⁴ Ị́ya gbẹịnye mị ị́ ḍukoarịye na ị́ mịẹarịye na ḅụ anị omi-ẹ; sime ị́ pịrịye mị ị́ ḅara laḅịa.

¹⁵ Oḅori apụma sịkịmamgba ini koromamẹ na ini karakaraye mịẹ-aḅẹ. Yenemi apụma ini tetema poki pokimẹ.

¹⁶ Yenemikaḅọ ḅe ye oḅuosọ kirikiri ọ̀ mịẹpakụmaḅịa, ọkụma mịnaḅụ-se-yechịnḅọ ḅe ọ̀ wọlọ ḍikisimaḅịa.

¹⁷ Karakaraye ị́ nwọ ḍuko sịkị anị ị́ karakaraye nwọ mịẹsaye-ẹ, ọkụma iruokọn mị anị ḅẹrẹ simasimamẹ.

¹⁸ Koroma ḅụ oforika ọkwẹịn ma anị ye se nweni lamaḅịa okola-agiji ye se nweni lama ọkụ, ọkụma nemi ḅụ kọn ọkwẹịn ma àrị ye la nyọma gwọmẹ.

¹⁹ Iruo mị anị kpụlụ ḍumo nyanamẹ, ọkụma karakaraye mị anị ḍumo gbasoḅịa.

²⁰ Sikoroma kọn apụma ḅụnemika siaye iniaḅụ pakaḅịa, ọkụma iḅifịrịnwẹngị apụma ḅieḅẹlẹ ini nwọ ọrịḅịa.

²¹ Karakaraye mịẹmịẹapụma siaye ini dapaka ẹkẹ, ọkụma sitịḅịnyana apụma ini nyana jịnye ofori-ẹ ḅụfụka sakịsikima.

²² Nyanaḅọ Ḅe ọ̀ taraka se iruo kọnkọn apụma wẹrịmamẹ, ọkụma ḅịpị se ḍukoye mịẹ apụma ori ini ḍikiḅieḅẹlẹ-ḅẹlẹmẹ.

²³ Nwana-nwana se yenemi apụma ini nemiaye ma ḅụ ini yawụma simesimemẹ, ọkụma yenemika apụma inia yenemika mị, ini se ḍẹrị kanamẹ.

²⁴ Kụrọ fịrịnwẹngị mị mịẹse ị́ kụrọḅịa; ikula mị anị ị́ se omoniḅọ mịẹḅịa.

²⁵ Kuḅie-gbọrị-anga simeka mị anị ị́ya ḅieḅẹlẹ furu ọkịḅịa, ọkụma iḅi ọkwẹịn mị anị ị́ kuḅie kụrọmaḅịa.

²⁶ Karakaraye mịẹḅọ ḅe ọ̀ datekeremaye sọ ori ikiaḅọ ḅe pịrịmẹ, ọkụma sitịḅịnyanaḅọ ḅe oria ateli ma àrị ini dairimamẹ.

²⁷ Ị́rị́ ikulaḅọ-ẹ ḅẹḅẹ, ị́ ḅiarịye mị ngịsị ị́ ḅara la ẹkẹ, ọkụma ị́ kụrọma fịrịnwẹngịmẹ ḅẹḅẹ ị́ iḅifụḅara nyanaḅịa.

²⁸ Karakaraye mịẹ mị anị ḍumo ateli mị-ẹ; sitịḅịnyana mị anị fị ateli mị-ẹ.