Kaḅo Ma 11 - Kịrịkẹnị Baịbụl

¹ Nyanaḅọ Ḅe yedẹrị ḅụ nweni inumanuma apụma ò ḍikiḅụnwọnwọ nyana ini pịrịmẹ. Nweni inumaka apụma ori ini ḍikiḅieḅẹlẹ-ḅẹlẹmẹ.

² Ḅụdekichịẹma apụma ḅọlọka sịkịḅụ ḅụgerere inia tọrụ sọḅịa. Ḅụdekichịẹmaka mị anị nemitẹịn mị-ẹ.

³ Ị́ nemikase iḅimẹ ḅẹḅẹ, karakaraye mị anị ị́ datekeremarịye-ẹ. Tomoni ineda kuḅie-se-ḅụgbana ẹka apụma, inia juo apụ inuma mịẹmịẹaye ma ini ḅaafamaḅịa.

⁴ Ngọ se ị́ mịẹḅịa iḅi ofori-ẹ, ị́ tọrụ se fị mị daḅịa ene; ọkụma iḅimịẹmịẹye ineda ị́ ḍumo ḍụaḅịa.

⁵ Karakaraye mịẹ mị anị tomoniḅọ ḍumo mịẹ kpaịnmamẹ; ọkụma sitịḅịnyanaḅọ ḅe oria ḅịkị mị ọ̀ ḅara ḅoḅịa.

⁶ Karakaraye mị anị karakaraye mịẹḅọ ḅe ḍụaḅịa, ọkụma kuḅie se ḅụgbanaḅịa ọkụ oforiḅọ ḅe ọ̀ nyana opu kuḅie mị anị ḍẹịn sọ ò kunḅịaye-ẹ.

⁷ Sitịḅịnyanaḅọ ḅe ọ̀ fịsa ḅẹḅẹ oria koromama àrị orina fịmẹ. Ò se ḅiekpọma ngọ mamgba arịḅo yeḅụoforikaye nwọ sọmẹ.

⁸ Karakaraye mịẹ apụma, ḅụfụka ḅie ini ḍụaḅọrọma nyanamẹ; anịnakaraka sitịḅịnyanapụma re mị anị ḅo laḅịaye-ẹ.

⁹ Tamụnọ nemikapụ ma inia ọkwẹịn ineda ị́ se ḅụfụka ḅie chuḅịa, ọkụma karakaraye mịẹ apụma inia nemi mị anị ineda ị́ ḍụaḅịa.

¹⁰ Opu ama mị anị ḅieḅẹlẹ nyanaḅịa, karakaraye mịẹ apụma iḅi ngọ kọn sịkịḅụ, se ḅieḅẹlẹ oloku tịḅịḅie fieḅịa sitịḅịnyanaḅọ ḅe fị sịkị.

¹¹ Opuama ḅo opuma ẹrẹsoḅịa karakaraye mịẹ apụ ḅo inia ḅẹlẹmama se anịa ḅie chu sịkị; ọkụma sitịḅịnyanapụ ọkwẹịn mịẹse opuama mị anịḅo fa ḅie sọḅịa.

¹² Jịn apụ ḍikisima ọkwẹịn kọn mị anị yenemika-ẹ. Ị́ nemikase yekaịnḅo ọkụma ị́ yawụma simeḅịa.

¹³ Sịkịmamgba jụmḅọ se fiearịḅọ ḅe ḅọị ḅẹrẹ ḍuko ọ̀ pịrịḅịa ọkụ ofori-ẹ, ọkụma kuḅie se ḅụgbanagbẹịnḅọ ḅe ḅụ ị́ ḅie kpọ nyanaḅịa.

¹⁴ Sẹ ḅịkịḅịa anị nemikase anị datekeremaḅọ nyanaka ọkụma. Anị ḅiekpọ nyanaḅịa anị tetemapụ ḅaka ọkụma.

¹⁵ Ị́ nemikase ḅerenimẹ na igoniḅọ fị sa ị́ nwọ gbẹịnḅịa nwọ ḅẹḅẹ, anị ị́ ḅie manamatọnḅịa. Anị iḅitẹịn ị́ pịrịḅịa, ị́ ḅụ se anịa ḅie chuka ọkụma.

¹⁶ Iḅikuḅie nyana eremeniḅọ ma árị osi nyanamẹ, osi nyanaka eremeniḅọ ma ḅụgerere sime á pịrịmẹ. Ikula owuḅọ ngịsị igbiki nyana ẹkẹ, ọkụma tọrụ ọfịrị ḅọ ḅe ori ngọ nyanaḅịa.

¹⁷ Ị́ iḅi se ị́ ḅụ mịẹmẹ, ị́ iḅi se jịn apụ mịẹ sịkị; ị́ sitịḅịnyana se mbasị-mbasịmẹ ḅẹḅẹ ị́ ḅụ re mị ị́ ye se lamaḅịaye-ẹ.

¹⁸ Sitịḅịnyana apụ jokoma nyana sọye ofori-ẹ, ọkụma karakaraye mị ị́ nwọ mịẹ-aḅẹ ḅẹḅẹ pikipikiye ofori-ẹ, gbẹịnye ị́ ḅara laḅịa.

¹⁹ Kuḅie kụrọma karakaraye mịẹarịḅọ goyegoye nụḅọ ḍumoḅịa; ọkụma siye mịẹ gose ịnyọ sarakaḅọ goyegoye nụḅọ fịḅịa.

²⁰ Si kuḅie nyana apụma Nyanaḅọ Ḅe ori ini ḍikiḅụnwọnwọ mẹ; ọkụma karakaraye mịẹ apụma ori ini ḅẹlẹmaḅẹlẹmamẹ.

²¹ Ye mịn mị anị ị́ ḅụokoro na sitịḅịnyanapụma fomuḅara ini laḅịa, ọkụma karakaraye mịẹ apụma ini pọkọ soḅịa.

²² Iḅi koroma nyanaka iḅi eremeniḅọ ma ini se oporopo nini-ḅọkọ sụka goli goli iringi sime ọkụ anị á sime ọkụ-ẹ.

²³ Karakaraye mịẹ apụma sịkịmamgba iḅiḅụ ini ḅiarịyema anị pakaḅo inia ḅaralarịye-ẹ, siapụma ini ḍọkịarịayema inia ḅarala sịkị nweni mamgba ḅụosọ nyanamẹ.

²⁴ Tọn apụ inia igbiki ma se kịẹnḅịa-ọkụ-ofori ḅara se iḅi mịẹ-aḅẹ, anịsọ ini pa alakọntẹịn aḅẹ. Ísíapụma inia igbiki ngịsị fụkụkẹ, anịẹḅẹsọ ini ma igweintẹịnmẹ.

²⁵ Ḅarapakụma ye se jịn apụ pịrị, ye pịkị ị́rị́na-lọkọlọkọḅịa. Ḅarachụa jịn apụ pịrị, ḅarachụa pịkị ị́ laḅịa.

²⁶ Fịaye fẹ ḅọị se àrị ḅo opu igbiki lasịkị re àrị pakụmaḅo dẹrịdẹrịḅọ ḅe, tomoni ò woriworimẹ, ọkụma fịaye fẹ se opu igbiki koruka se dẹrịarịḅọ ḅe, tomoni ò tokoni-tokonimẹ.

²⁷ Ị́ kuḅie tọn se ị́ ḍọkịarịayema iḅiaye-ẹ ḅẹḅẹ ị́ osi nyanaḅịa, ọkụma ị́ ḅẹrẹ ḍọkịḍọkịmẹ ḅẹḅẹ ị́ anị nyanaḅịa.

²⁸ Mịna ngọma se kuḅie kụrọma apụma ịrụakpoin-ịnyanya sokoro sara ọkụ anị ini ḅịkị ḅịa ọkụ-ẹ, ọkụma karakaraye mịẹ apụma fọngụ sịkị ịnyanya ịwọ ọkụ anị ini ịwọ ḅịa ọkụ-ẹ.

²⁹ Ḅụfụka ọkịḅo mịna furoḅie chuḅọ ḅe ọ̀ nyanaḅịa sọye ofori-ẹ anịa kuluma. Yenemika apụma sịkịmamgba ini fịrịnwẹngị yenemi apụma pịrịḅịa.

³⁰ Karakaraye mị anị ḍumo pịrịmẹ, ọkụma angarafị mị anị ḍumo famafamamẹ.

³¹ Karakaraye mịẹ apụma mị tomonikiri ini inia gbẹịnye nyanamẹ, anịẹrẹchị anị ị́ ḅụokoroḅịa na sitịḅịnyanapụma na siyemịẹ apụma na fomuḅara nyanaḅịa.