Jọshụa 9 - Kịrịkẹnị Baịbụl

Gibiọn Apụ Ma Oḅori Se Jọsụwa Ḅe Chama Mẹ

¹ Jọdan mị ḅụ ịrụasọsọ nyọ daọrụ ḅụ sime amanyanapụ mamgba Izrẹl ọmụḅaraiḅi mị nwọ naamẹ, anị chịngịma ọgọnọ na chuku na ḅụ sime sẹma na, pịkị Mẹditirenia Tọrụ mị aka ḅụ ḅele nyọ mamgba ḅụ sime sẹ mamgba na, ọgọnọju daọrụ ḅụ ọkịmun Lẹbanọn mị la; anị Hitaị apụ na, Amọraị apụ na, Kenan apụ na, Pẹrizaị apụ na, Hivaị apụ na, pịkị Jebus apụ na amanyanapụ mamgba na.

² Inimgba ḅo gbolomamẹ, owuse Jọsụwa ḅe na Izrẹlapụma na pakaḅịa ẹrẹchị.

³ Ọkụma Gibiọn apụma, anị Hivaị apụma, Jọsụwa ḅe se Jẹriko mị na, Eaị mị na mịẹye mị nwọ naa,

⁴ se oḅori se ọ̀ chama ḍọkịmẹ. Ini mun fịaye ọkị se olomusa akpụrụ akpa ḅie chụamẹ, ini pịkị sisa ere-iru chụa nama apụra seni inia yepụra asụn ma ọgọnọ gbanamẹ.

⁵ Ini agịpẹkẹrẹ ma se ḅụchụaye mịẹ chụamẹ pịkị kan se ini tẹlịma gbin ḍiki-akpaka na chụamẹ. Samịna pịkị oḅopuroḅa chụasa fịturu na ọkị se chụa mun mẹ.

⁶ Anịsịkị ini so ikowarịma pike sime nyọ mị mun mẹ Gilgalị mị ḅie, se nwọse Jọsụwa ḅe na Izrẹlapụma na ḅẹmẹ, “Wa sime ḅo sẹ mị ḅọlọmẹ. Wa ḅimẹ wa ómine na deinma ḅịpịogbosọ nwọ nyana.”

⁷ Ọkụma Izrẹlapụma nwọse ini ḅẹmẹ, “Nde wa gose ómine na deinma ḅịpịogbosọ nwọ nyanaḅịaye? Sosi kpeki anga ḅụ ómine omi-ẹ.”

⁸ Ini nwọse Jọsụwa ḅe ḅẹmẹ, “Mine ị́ya fịrịnwẹngịapụ-ẹ.” Jọsụwa ḅe nwọse ini gbelamẹ, “Ómine tapụ? Nde anga ó sime ḅo?”

⁹ Anị ini mị ḅẹrẹ mị ḍuko ọ̀ pịrịye-ẹ: “Mine ị́ya fịrịnwẹngịapụma sime ḅo sẹ mị opuma ḅọlọmẹ, wa Nyanaḅọ ọ́mịna Tamụnọ Ḅe gbolomaye nwọ naamẹ. Ijipt mị ḅie ọ̀ mịẹye mamgba wa naamẹ

¹⁰ ọ̀ pịkị se Amọraị mama amanyanapụma mịẹye mị sọnị, anị Jọdan mị ḅụ ịrụapakapaka nyọ daọrụ ḅụ sime apụma: Saịhọn, Hẹshbọn Amanyanaḅọ ḅe na pịkị Ọg, Bashan Amanyanaḅọ ḅe na, anị Ashtarọt mị ḅie anga apụma.

¹¹ Mịna ama sẹnịapụma na pịkị mịna sẹ mị ḅie sime apụ mamgba na nwọse wa ḅẹmẹ na wa se ateli nwẹngịḅịa fịaye wa nwọ karakarama se ḅo ómine na ịrịa. Ini nwọse wa ḅẹmẹ na wa mịnaḅụ se ọ́ ḅarachụa pịkị ómine na deinma ḅịpịogbosọ nwọ nyana.

¹² Wa ómine na ịrịaḅịa ẹrẹchị ama wẹrịso se ḅoarị sịkị fịturu ma árị ọfịrịmẹ. Ọkụma ḍiki! Mịọkụ árị samịna pịkị oḅopuroḅa chụasam.

¹³ Wa mayema se iruchụa nama apụra ma ḅie chụa sịkị, árị ịwọ waraḅẹ, ọkụma ḍiki! Árị kansam. Mịna ḅụchụayema na ḍiki akpaka ma na arịmgba olomu sosam, wa kọn ḅọlọ nwẹngị mị gose.”

¹⁴ Izrẹlapụma inia ḅara kele fịaye da ọkịmẹ, ọkụma ini Nyanaḅọ Ḅe ḅịpị gbelakẹ àrị na gbolomaye ḅụ.

¹⁵ Jọsụwa ḅe na Gibiọn apụma na deinma ḅịpịogbosọ nyana se ini ini wẹrịso se ini ḍumomẹ. Izrẹlapụma inia ama sẹnịapụma kụrọma yekarị fịmẹ na deinma ḅịpịogbosọ mị ini anị kokoḅịa.

¹⁶ Ini ḅịpịse-ogbosọ se tẹrẹ-a ḍin ḅọrọ sịkị, Izrẹlapụma ḅo anị naamẹ na ini na deinma ḅịpịse-ogbosọ mị nyana apụma ḅọlọju ḅo apụkẹ.

¹⁷ Anị Izrẹlapụma sakị nwẹngịye-ẹ, se tẹrẹ-a ḍin karama ene mị ḅụ ini mun mịna apụma anga opuamama lamẹ. Gibiọn na Kẹfaịra na Bierọt na pịkị Kiriat Jearim na.

¹⁸ Ọkụma Izrẹlapụma ini ini ḅaa ḍụkụkẹ anịatịḅị inia ama sẹnịapụma Nyanaḅọ Izrẹl Tamụnọ Ḅe ẹrẹ ḅụ kụrọma yekarịfị ini pịrịsam. Tomoni mamgba, ama sẹnịapụma se mukumukuma ọkwẹịnmẹ mịn ye mị gose,

¹⁹ ọkụma ama sẹnịapụma nwọse ini pẹkẹrẹmẹ, “Wa kụrọma yekarịfị ini pịrịsam Izrẹl mị Nyana Tamụnọ Ḅe ẹrẹ ḅụ. Mịọkụ wa ḅarị yese ini lamaḅịa ọkụ ofori-ẹ.

²⁰ Wa ini wẹrịso se ini ḍumoḅịa wa ḅereni ini pịrịsaye mị ẹrẹchị; wa ọkọ mịẹkẹ ḅẹḅẹ, Tamụnọ Ḅe ò fomuḅara se wa pịrịḅịa.

²¹ Ye ini ḍumo, ọkụma ini chịn pẹlẹ pịkị mengi ḍu wa pịrịpịrịḅịa.” Mịn ama sẹnịapụma se anị ḍuko ọkụ-ẹ.

²² Jọsụwa ḅe Gibiọn apụma chịn ọkị, se nwọse ini gbelamẹ, “Nde ó gose oḅori se wa chama se nwọ ḅẹye na ḅọlọju ḅụ ó sime ḅomẹ, ọkụma mị ómine anga nyọ mị-ẹ?

²³ Ọ́ mịn mị mịẹye gose, Tamụnọ Ḅe ò worinime se ọ́mịna ọgọnọ gbanasam. Ọ́mịna tomonima ini omoniapụsọ gbasoḅịa, ini chịn pẹlẹ pịkị mengi ḍu ị̀ Tamụnọ Ḅe warị mị pịrịpịrịḅịa.”

²⁴ Ini nwọse ọ̀ pẹkẹrẹmẹ, “Mine ị́ya fịrịnwẹngịapụma anị na kụrọmamẹ na Nyanaḅọ ọ́mịna Tamụnọ Ḅe kụrọ se oria fịrịnwẹngịḅọ Moziz ḅe pịrịmẹ na ọ̀ mị bebe sẹ mị mgba se ọ́ pịrịḅịa se anịa ḅie sime apụ mamgba ḅaasin ọ́ sọḅoarị sịkị. Wa gose ọkọ mịẹye, wa ó ḍikiḅalafamẹ; mịna ḍumo ma gose ḅalafa mịnaḅụ sọmẹ.

²⁵ Mịọkụ ị́ ḅara ḅie wa omi-ẹ, ị́ ḅụḅẹlẹḅara se wa mịẹ.”

²⁶ Anịẹrẹchị mị Jọsụwa ḅe mịẹye mị-ẹ: ori ini ḍikiḍikimẹ ọ̀ pịkị ḅerenikẹ Izrẹlapụma ini ḅaa.

²⁷ Ọkụma ori ini se omoniapụ mịẹmẹ. Ini chịn pẹlẹ pịkị mengi ḍu Izrẹlapụma pịrịpịrịmẹ pịkị Nyanaḅọ Ḅe agbamịẹ ẹbẹ mị na. Ọkịḅo mịmgba la sọnị Nyanaḅọ Ḅe sẹlẹọkị na mị ini ọ̀ tẹkẹḅịa anga-ẹ nwọḅẹ nyọ goyegoye mị fịrị mị sime ini pịrịmẹ.