Biblia Todo Logo
Bìoball air-loidhne

- Sanasan -

Jọshụa 7 - Kịrịkẹnị Baịbụl


Ekan Ḅe Ò Si Mịẹse Tamụnọ Ḅe Dapakamẹ

1 Nyanaḅọ Ḅe chụa Izrẹlapụma pịrị na, simaḅịaye goyegoye dekima nwọḅẹ oloko mị ini kokokẹ. Ekan nwọ chịn gbọrị owuḅọ anị oloko mị koromẹ, anịẹrẹchị Nyanaḅọ Ḅe Izrẹl mị ḅụ ori opu ịganị nyanamẹ. (Ekan ḅe Kamaị ya-ẹ se Zabdaị ḅe anị oria opuḍaḅọ-ẹ Zira sẹ ḅie ḅọ-ẹ, anị Juda sẹ mị ḅie ḅụ.)

2 Jọsụwa ḅe Jẹriko mị ḅie ḅụ ò nweni se Eaị mị fịrịmamẹ, Bẹtẹl mị ḅụ ịrụapakapaka nyọ daọrụ ḅụ sime opuama mị, Bẹt-Avẹn mị na anị na kpekimẹ, ini mun ama mị ẹnyẹ kelema. Ini munse ḅo sịkị,

3 ini ḍuko Jọsụwa ḅe pịrịmẹ; “Nweni mamgba mun Eaị mị na owusọḅịa ḅara anị nwọ simekẹ. Anị ḅọrọ kịnị sọnọ ẹndẹ anịkanịka sọnọma ẹndẹ oyiasi fịnjị kẹngẹ nwọse fịrịma mun. Bebe ọmụogbo mị mgba fịrịma se ini mun anịju owusọma, opuma ḍụḅa amakẹ.”

4 Anịẹrẹchị Izrẹlapụma ḅie kịnị-a sọnọma ẹndẹ oyiasi fịnjị anị mun owu mị pakaye-ẹ, ọkụma ini ini de ọḅụ damẹ.

5 Eaị apụma opuama mị ḅọkọ ngịsị sakị ini ḍuko mun ḍụparịma lamẹ pịkị iniaḅụ ineinfa kịnị-a mesi laḅịa apụ nwọ ḅaamẹ ini chịngị mị ọgọnọ tukoroarịogbo, se Izrẹlapụma inia kuḅie lọkọmẹ inia ḅala pịkị famẹ.

6 Jọsụwa ḅe na Izrẹl ama sẹnịapụma na kururu ḅụ inia ḅụchụayema kanmẹ, Nyanaḅọ Ḅe Ọḅọkụ Igbe mị tọrọkọ ḅụ iniaḅụ se chama kiri gbin, se anịju ḅụ iḅosime mun saso lamẹ, fọn se inia tịḅị ọgọnọ sara se inia kururu mị ḍiepakụma ḅụ.

7 Se Jọsụwa ḅe nwọ ḅẹmẹ, “Yei Nyanaḅọ Tamụnọ! Nde ị́ gose wa ọkị se Jọdan mị saḅaḅoye? Ị́ wa se Amọraị apụma pịrịḅịaye gose mụnọ? Se ini wa ḅaasin ḅara? Nde wa gose Jọdan mị ḅụ ísí saḅamanga simekaye?

8 Cheye à nwọ ḍukoḅe, Yei Nyanaḅọ, Izrẹl mị mịọkụ nwọ mangị tarakapụma pịrịsa sịkị?

9 Kenan apụma na pịkị sẹ mị ḅie simeḅọ goyegoye anị naaḅịa. Ini wa ḍẹkị kelema se wa ḅaafamaḅịa! Anịsịkị nde ị́ mịẹse ị́ya osi mị papaye sọ ẹka ḅara?”

10 Nyanaḅọ Ḅe nwọse Jọsụwa ḅe ḅẹmẹ, “Sịsẹ! Nde ị́ gose nwọse kiri iḅosimeye?

11 Izrẹl mị anị si mịẹsam! Àrị ini na nyana ḅịpịogbosọ mị ini kansam, anị ini koko à nwọḅẹye mị. Simaḅịaye ma ḅie daye ini nwọ deki ọkịsam. Ini àrị furu se iniaye ma ḅie chụa se, anịaḅụ iruo kọnmẹ.

12 Mịn mị anị mịẹse Izrẹlapụma gose ineda inina-tarakapụma tọrọkọ chịẹkaye-ẹ. Ini vinpịkị se mangịmẹ anịatịḅị ini ḅo ḅẹrẹḅarasi nyanasam mịọkụ! À ḅarị ọ́mịna ḅụ sime ẹkẹ, dekima nwọḅẹaye ma ọ́mịna ogboku ọ́ nwọ simaka simeogbo!

13 Sịsẹ! Tomonima mịẹfịafịama se ḅụkarakarama ini se ị̀ tọrọkọ ḅo. Ḍuko ini pịrị na ini ḅụkarakarama ḅa mị ḅụ, anịatịḅị Ị̀rị̀ Izrẹl mị Nyana Tamụnọ Ḅe, à ḍukoḅịaye omi-ẹ: ‘Àrị ọ́ ḅẹ na ó sima nwọḅẹaye ma ḅụ daye ọ́mịna ḅara omi-ẹ! Ómine na tarakapụma tọrọkọ ómine ineda chịẹ ẹkẹ ma ayema ọ́mịna ogboku soka simeogbo!’

14 Anịẹrẹchị ḍuko ini pịrị na dede ḅie ómine mgba ọ́ pakaḅoḅịa gbọrị sẹ gbọrị sẹ ḅie à sẹlẹ sikima sẹ mị, pịkị ḅo chịẹḅịa gbọrị warịkuḅu gbọrị warịkuḅu ḅụ. À sẹlẹ sikimaḅịa warịkuḅu mị pịkị ḅo chịẹḅịa, gbọrị furo gbọrị furo ḅụ. À sẹlẹ sikimaḅịa furo mị pịkị ḅo chịẹḅịa gbọrịḅọ gbọrịḅọ ḅụ.

15 À nwọ sẹlẹ sikima se ó sima-ẹ nwọḅẹaye ma ḅara pakaḅo ḅọ ḅe, oria furo mị-na-ori-na pịkị ọ̀ nyanaye goyegoye mamgba ọ́ dọkịma, anịatịḅị ḅalafama pịkị ḅụgereremaye ọ̀ nwọ ọkịḅo Izrẹl mị tọrụ chụasam pịkị ị̀ya ọḅọkụ mị kansam.”

16 Anịḅe eneḅa dede funfun ḅụ Jọsụwa ḅe ori Izrẹlapụma chịn pakụmaḅomẹ, sẹsẹ ḅụ, se Juda sẹ mị anị ini sẹlẹ sikimaye-ẹ.

17 Ò Juda sẹ mị ọkịḅo chịẹmamẹ warịkuḅu, warịkuḅu ḅụ, Zira warịkuḅu mị anị ini sẹlẹ sikimaye-ẹ. Anịsịkị ò Zira warịkuḅu mị ọkịḅo chịẹmamẹ. Zabdaị furo mị anị ini sẹlẹ sikimaye-ẹ.

18 Anị ọ̀ Zabdaị ḅe furo mị ọkịḅo chịẹmaye-ẹ, gbọrị owuḅọ gbọrị owuḅọ ḅụ, se Ekan Kamaị yaḅe anị ini sẹlẹ sikimaye-ẹ, oria opuḍaḅọ anị Zabdaị ḅe-ẹ.

19 Jọsụwa ḅe nwọse ọ̀ ḅẹmẹ, “Ị̀ya tọkụ, mịanga Nyanaḅọ Izrẹl Tamụnọ Ḅe tọrọkọ si go pakụma se karakaraye mị ḍuko. Ị́ mịẹye mị mịọkụ anị ḍuko pakụma ị̀ pịrị gbọrịye sọnị se ị̀ ḅọịmama.”

20 Ekan ḅe pẹkẹrẹ se nwọse ọ̀ ḅẹmẹ, “Kọkọmaye-ẹ,” “Nyanaḅọ Ḅe ḅụ à simịẹsam anị Izrẹl Tamụnọ Ḅe, mịn à mịẹ si mị-ẹ.

21 Wa ọfọịn ayema ḅie ḅụ gbọrị ḍikitọrụgbẹịn Babilọn apụ koroḅụchụaye à nwọ ọrịmẹ, seleḅa sọnọ-a okpokpo na, pịkị nangwọ iku gbọrị goli chịn na, anị kele pịkị iḅiọkụma ikumẹ. Àrị ị̀ pụkọsọlịmaso ọkụma àrị àrị dekiọkịmẹ. Ómine àrị ọrịḅịa ị̀ya ikowarị mị ḅie à àrị soku ḍipi anga ḅụ seleḅa mị chuku damẹ.”

22 Anị Jọsụwa ḅe nweni fịrịmaye-ẹ se mịna owuapụma mangị mun ikowarị mị ḅie sima-ẹ nwọḅẹaye ma ọrịmẹ àrị kọkọma ḍipi sime anga mị ḅụ, seleḅa mị chuku damẹ.

23 Ikowarị mị ḅie ini àrị ọkị pakụmaḅomẹ, àrị deki mun Jọsụwa ḅe na bebe Izrẹlapụ mamgba na pịrị, se àrị seni Nyanaḅọ Ḅe tọrụkuḅu sara koromamẹ.

24 Jọsụwa ḅe na bebe Izrẹlapụ mamgba na gịsapụma Ekan ḅe kun se, seleḅa ma na, koroḅụchụaye mị na, goli chịn mị na, pịkị Ekan owuapụ awọma na eremeni awọma na, pịkị ananama na, oria ikowarị mị na, pịkị oriaye layelaye mamgba nwọ ọkị; se ini se Ḅụfụka Pẹsịkiri mị mun mẹ.

25 Jọsụwa ḅe nwọ ḅẹmẹ, “Nde ị́ gose nwọ sime ḅụfụka ọkịḅo mịna ọgọnọ gbanaye? Nyanaḅọ Ḅe mịọkụ ọ̀ ḅụfụka ọkịḅo ị́ya ọgọnọ gbanaḅịa!” Nweni mamgba ḍụparị se Ekan ḅe gbin ḅaamẹ; ini pịkị ò furo ḅie apụma gbin pịkị ini na oriaye mamgba na dọkịmamẹ.

26 Ini ḍụparịma se oria ọgọnọ sara tundurumamẹ mịmgba sọnị anịju ḅụ àrị pa omi-ẹ. Anịẹrẹchị ini nwọse anị nyọ mị chịnmẹ Ḅụfụka Pẹsịkiri. Anịsịkị Nyanaḅọ Ḅe ọ̀ ḅarị ịganị nyana ini pịrịkẹ.

The Bible Society of Nigeria

Bible Society of Nigeria
Lean sinn:



Sanasan