Jọshụa 6 - Kịrịkẹnị Baịbụl

Jọsụwa Ḅe Jẹriko Opuama Ma Mị Inuma Mẹ

¹ Ọkụma mị Jẹriko opuama mị onu-a ḅọkọ ma ini palịmẹ, Izrẹlapụma gose. Mịẹso ọkụma gbọrịḅọ sọnị ineda opuama mị ḅie sọmun-ẹkẹ pịkị paka-ẹkẹ.

² Se Nyanaḅọ Ḅe nwọse Jọsụwa ḅe ḅẹmẹ, “à mịẹḅịa Jẹriko mị na anịa amanyanaḅọ ḅe na pịkị kụrọ kuḅie nyana owuni mamgba na ị́ nwọ inuma.

³ Ị́rị́ na ị́ya owunima na ene gbọrị sịkị, gbọrị sịkị ọ́ nwọse opuama mị nwẹngị kelema mun sonio-a ḍin nwọ laḅịa.

⁴ Sọnọma agbamịẹapụ, gbọrịḅọ gbọrị epelepe, gbọrị epelepe nwọ ọlọḅịa, se ini Ọḅọkụ Igbe mị tọrọkọ ḅụ nwẹngịḅịa. Sọnọma ḍin karama ene mị ḅụ ị́rị́ na ị́ya owunima na sọnọma sịkị nwọse opuama mị nwẹngị kelemaḅịa anịsịkị agbamịẹapụma ini epelepe ma ofuroaḅẹ.

⁵ Se ini epelepe mị ofuro ḅọlọmasa ḅẹḅẹ. Ọ́ nwọ anị naa kirikiri tomoni mamgba kụrọma olokuḅịa, se opuama mị onu ma arịmgba ḅịkị saraḅịa. Anịsịkị bebe ọmụogbo mị mgba gbọrị kpoḅụ dada opuama mị ḅie sọmunḅịa.”

⁶ Jọsụwa ḅe ori agbamịẹapụma chịn se nwọse ini ḅẹmẹ, “Ómine Ọḅọkụ Igbe mị deki, se ọ́mịna ḅie sọnọma apụ anịa tọrọkọda, epelepe inia ḅara simeḅịa.”

⁷ Anịsịkị ori oria tomonima ḅẹmẹ na ini sakị nwẹngị opuama mị kelema, se ọmụaye ma ḅara sime apụma Nyanaḅọ Ḅe Ọḅọkụ Igbe mị tọrọkọ daḅịa.

^8-9 Se Jọsụwa ḅe tọn ini pịrịsa ḅaraḅụ, ọmụaye ma ḅara sime apụma, epelepe ma ofuroarị sọnọma agbamịẹapụma anị sọnọma epelepe ọlọ apụma tọrọkọda mun mẹ; Ọḅọkụ Igbe mị deki agbamịẹapụma inia ọḅụju ini ḍukomẹ, se ọḅụju ḅụ ọmụaye ma ḅara sime apụma pịkị ini ḍukomamẹ. Anịsịkị mị mgba epelepe ma àrị pa fieaḅẹ.

¹⁰ Jọsụwa ḅe tọn oria tomonima pịrịmẹ na ini olokuma, ini pịkị gbọrị ọkwẹịn sọnị kọnma ọkịmun ọ̀ kụrọ pịrị sịkịla.

¹¹ Anị ọ̀ nwọse oria tomoni kpo mị ḅẹye-ẹ na ini Nyanaḅọ Ḅe Ọḅọkụ Igbe mị deki gbọrị sịkị se nwẹngị opuama mị kelema. Anịsịkị ini vinpịkị ḅo ikowarịma pike sime nyọ mị ḅụ simemẹ ḍin mị ḅụ.

^12-13 Anịḅe eneḅa dede funfun ḅie Jọsụwa ḅe ọ̀ sịsẹmẹ maịn karama sịkị mị ḅụ agbamịẹapụma na owunima na gbọrị sịkị nwọse nwẹngị opuama mị kelemamẹ, tatarị ene mị ḅie ini sime mun ọkụ mị, agbamịẹapụma na ọmụgbin apụma na; tatarịapụ anị ọmụaye ma ḅara sime apụ ma-ẹ; ini ḍukoma apụ, anị sọnọma agbamịẹapụ ma-ẹ, sọnọma epelepe ma ofuroarị sọnọma agbamịẹapụma ini damẹ; anịsịkị Nyanaḅọ Ḅe Ọḅọkụ Igbe mị deki agbamịẹapụma ini ḍukomamẹ; se ọḅụkuluma apụma anị pịkị ọmụaye ma ḅara sime apụ ma-ẹ. Anịsịkị mị mgba epelepe ma àrị pa fieaḅẹ.

¹⁴ Mịn maịn karama ene mị ḅie sọnị gbọrị sịkị mị ini se nwẹngị opuama mị kelema se vinpịkị mun ikowarịma pike sime nyọ mị ḅụ simeye-ẹ. Sonio-a ḍin ini nwọse mị ḅara mị mịẹmẹ.

¹⁵ Sọnọma ḍin karama ene mị ḅie ene mị ḅa dede ḅie ini sịsẹ sakị nwẹngị sọnọma sịkị se opuama mị kelemamẹ anị gbọrị ḅara mị ḅụ—anị ene mị kẹngẹ mị ini sọnọma sịkị se nwẹngị anị kelemaye-ẹ.

¹⁶ Sọnọma sịkị karamaye mị ḅụ, agbamịẹapụma epelepe ma ofuro-ẹ tọn sịkị, Jọsụwa ḅe nwọse oria tomonima ḅẹmẹ na ini oloku, ọ̀ pịkị nwọ ḅẹmẹ, “Nyanaḅọ Ḅe opuama mị ò se ọ́ pịrịsam!

¹⁷ Opuama mị na anịa ḅie sime aye mamgba wa simafamaḅịa se agbamịẹ Nyanaḅọ Ḅe pịrịḅịa ẹrẹchị. Rehab sẹ fị ḅọ ma na arịa warị kpo mị na kẹngẹ anị ḅarala-ẹkaye-ẹ, anịatịḅị mịna tomoni ama ẹnyẹ apụma á nwọ ḅọịmẹ.

¹⁸ Ọkụma simaḅịaye goyegoye ó dekima; ó nemikase ye deki ọkụma, ọ́ ḅụfụka na fị na ọkịḅo Izrẹlapụma ikowarịma pike sime nyọ mị pịrịḅịa.

¹⁹ Ini seleḅa na, goli na, alapẹlẹka na, anịkanịka ikulele se mịẹye goyegoye ó sikima koroma Nyanaḅọ Ḅe pịrị. Nyanaḅọ Ḅe oria ngọ koko nyọ mị ḅie árị simeḅịa.”

²⁰ Se agbamịẹapụma epelepe ma ofuromẹ. Tomonima anị naa kirikiri ini kụrọma oloku, se onu ma ḅịkị saramẹ. Anịsịkị ọmụogbo mị kpoḅụ chịngị mị tanjị mun opuama mị ḅie sọ se anị ọkịmẹ.

²¹ Inia kongo ma ini nwọse opuama mị ḅie sime ḅọ goyegoye ḅaafamamẹ, owuapụ na eremeni na, ịwọ awọmẹnị na olomuapụ na. Ini pịkị nambuloma na, ananama na, yepụra asụnma.

²² Anịsịkị Jọsụwa ḅe nwọse mun ama mị ẹnyẹ mama owuapụma ḅẹmẹ, “Ómine sẹ fị ḅọ ma warị mun se árị na á furo mị na ọkịpakụmaḅo anị ó yeḅereni á pịrịsa ḅaraḅụ.”

²³ Anị ini mun Rehab ma ọkị pakụmaḅoye-ẹ, pịkị ḍawu ḅe na, nyọngọrọma na, árịa mịnapụ owuapụma na pịkị ísí á furo ḅie apụma na. Inimgba ini ini ọkịmẹ, furo mị na omoniapụ ma na, ḅara ini laka ḅaraḅụ Izrẹlapụma ikowarịma pike sime nyọ mị ḅụ ini kpekima simemẹ.

²⁴ Anịsịkị ini fịnị tọnjị opuama mị ḅie chu se anị dọkịma kiri saramẹ, pịkị anịa ḅie sime aye mamgba na, anị ini goli na, seleḅa na, alapẹlẹka na, pịkị ikulele na se mịẹaye ma sikima ọkụma, anị ini se Nyanaḅọ Ḅe oria ngọ koko warị mị ḅie koroma ayema.

²⁵ Ọkụma Jọsụwa ḅe ò Rehab sẹ fị ḅọ ma na pịkị á paka furo apụ mamgba wẹrịsomẹ, ọ̀ ḅara se ini lamakẹ, anịatịḅị ò se Jẹriko mị fịrịma mama ama ẹnyẹ apụ árị ini se ḅọịmẹ. (Á furo ḅie apụma Izrẹl mị ḅie ini anga ḅo mịmgba la waraḅẹ.)

²⁶ Anịsịkị mị ḅụ Jọsụwa ḅe ò yekarị se inia ḅerijinemẹ nwọ ḅẹ na “Nyanaḅọ Ḅe ò worinime se Jẹriko opuama mị kpoto nwọ nama ḍọkịḅọ goyegoye pịrịḅịa. “Iniḅọ anịa chuku sẹkẹ ḍụparị mị saraḅịa sịkị nụḅọ tatarị owutọkụ fịḅịa; Iniḅọ anịa onu ḅọkọ ma pike ḅịa sịkị nụḅọ furopẹlẹ tọkụ fịḅịa.”

²⁷ Nyanaḅọ Ḅe Jọsụwa ḅe ḅụ simeye ẹrẹchị, oria ẹrẹso mị pịkị wasama mun bebe sẹ mị mgba kelemamẹ.