Jọshụa 3 - Kịrịkẹnị Baịbụl

Izrẹlapụ Ma Jọdan Mị Saḅamẹ

¹ Eneḅa dede funfun ḅie Jọsụwa ḅe na bebe Izrẹlapụma na, Akasia ḅie ḅụ ini ikowarịma pike sime nyọ mị ḅụ so Jọdan mị mun mẹ, anịju ḅụ ini ikowarịma pike sime se ini tọrụ mị saḅaḅịa sịkị mị korumẹ.

² Tẹrẹ-a ḍin ḅọrọ sịkị tomonima ḅe tịḅịnịma, ikowarịma pike sime nyọ mị toluḅọrọmẹ.

³ Se nwọse tomonima ḅẹmẹ, “Agbamịẹapụma Nyanaḅọ ọ́mịna Tamụnọ Ḅe Ọḅọkụ Igbe mị dekiaḅẹ ọ́ nwọ ọrịsa ḅẹḅẹ, ó pike sime ikowarịma ọ́ kansin se ini ḍuko.

⁴ Mịanga jịn sịkị ma ó ḅokẹ, anịẹrẹchị ini ma anị ọ́ ḅọrọḅịa ateli mị se ó ḍieḅịaye-ẹ. Ọkụma Ọḅọkụ Igbe mị ómine anị na kpekima; kuḅu-a mẹndẹ oyiasi fịnjị laḅịaye ọ́ nwọse anịa ọḅụju sikima sime.”

⁵ Jọsụwa ḅe nwọse tomonima ḅẹmẹ, “Ómine ọ́ ḅụ mịẹfịafịama anịatịḅị ḅa Nyanaḅọ Ḅe ọ́mịna ogboku ọ̀ ḅụgbiripuma fịrịnwẹngịḅịa.”

⁶ Anị ọ̀ nwọse agbamịẹapụma ḅẹye-ẹ na ini Ọḅọkụ Igbe mị deki se tọrọkọda tomonima pịrị. Ò ḍuko ḅara mị ini pịkị nwọ mịẹmẹ.

⁷ Nyanaḅọ Ḅe nwọse Jọsụwa ḅe ḅẹmẹ, “Mịmgba à mịẹḅịaye mị mịẹse bebe Izrẹlapụ mamgba osi se ị́ pịrịḅịa opuḅọ ḅaraḅụ, ini pịkị nemiḅịa na àrị ị́rị́ na omi-ẹ anị à Moziz ḅe na sime ọkụ mị.

⁸ Ḍuko Ọḅọkụ Igbe mị deki agbamịẹapụma pịrị na ini ḅo Jọdan mị lasa ḅẹḅẹ, ini koromun tọrụ mị aka ḅụ mengi mị ḅie chịẹ sime.”

⁹ Anị Jọsụwa ḅe nwọse tomonima ḅẹye-ẹ, “Ọ́ mịanga ḅo se Nyanaḅọ ọ́mịna Tamụnọ Ḅe ḍukoarịye mị poki.

¹⁰ Ó mun-arị sịkị, gbarịmaka ḅaraḅụ Kenan apụma na, Hitaị apụma na, Hivaị apụma na, Pẹrizaị apụma na, Gagashaị apụma na, Amọraị apụma na, pịkị Jebus apụma na ori ini desinḅịa. Mị ḅụ ọ́ ḅọrọ nemiḅịa na ḍumo gbaso Tamụnọ Ḅe ori ọ́mịna ogboku omi-ẹ

¹¹ anị bebe sẹkiri mị mgba Nyanaḅọ Ḅe Ọḅọkụ Igbe mị Jọdan mị saḅa ọ́mịna tọrọkọda mun-arị sịkị.

¹² Mịọkụ ómine oyimaịn owuapụ fịnjị nwọ sẹlẹ pakụmaḅo, gbọrịḅọ gbọrịḅọ Izrẹl oyimaịn furo fịnjịma ḅie ḅụ.

¹³ Bebe sẹkiri mị mgba Nyanaḅọ Ḅe Ọḅọkụ Igbe mị deki agbamịẹapụma ḅụọma mengi mị ḅie chịẹsa ḅẹḅẹ, Jọdan mị ḅarị seri ẹkẹ, pịkị ideri pakaḅoarị mengi mị sọnị gbọrị anga mị anị koḅirima simeḅịaye-ẹ.”

^14-15 Anịsịkị mị fịaye soku sịkị-ẹ, pịkị opu mengi sọ sịkị-ẹ. Tomonima ini ikowarịma pike sime nyọ mị ḅụ saḅa Jọdan mị sọ ḍọkịarị sịkị, agbamịẹapụma Ọḅọkụ Igbe mị deki, inia tọrọkọda mun mẹ. Agbamịẹapụma koromun tọrụ mị ḅie chịẹ kirikiri,

¹⁶ mengi mị ḅarị serikẹ anị pịkị ḅo gbọrị anga koḅirima simemẹ, Adam mị tụḅụ ḅieju ngịsị, anị Zarẹtan mị anga ḅụ sime opuama mị. Seri mun Jikeka Opu Tọrụ mị ḅie sarasara ideri mengi mị sọnị gbọtụma pẹlẹmẹ, se tomonima ini ineda tọrụ mị saḅamẹ Jẹriko mị na kpeki nyọ mị ḅụ.

¹⁷ Tomonima ini kpoinkpoin kiri ọgọnọ ḅụ nwẹngị saḅarị sịkị Nyanaḅọ Ḅe Ọḅọkụ Igbe mị deki agbamịẹapụma Jọdan mị ogboku kpoinkpoin kiri ọgọnọ ḅụ ini chịẹ simemẹ, ọkịmun tomoni mamgba saḅa ḅọrọso sịkị lamẹ.