Jọshụa 24 - Kịrịkẹnị Baịbụl

Shẹkẹm ḅie Jọsụwa Ḅe Oria Kuluma Ọkwẹịn Kọn Tomoni Ma Pịrịmẹ

¹ Gbọrị ene Shẹkẹm mị ḅie Jọsụwa ḅe Izrẹl sẹ mamgba chịn koḅirimamẹ. Ọ̀ sẹnịapụma chịnmẹ, tịḅịnịma na, ḅẹrẹkọn apụma na, pịkị Izrẹl mị ḅie fịrịtịḅịdapụ ma na, se ini ḅo Tamụnọ Ḅe tọrụkuḅu ḅụ iniaḅụ ḍiepakụmamẹ.

² Jọsụwa ḅe nwọse bebe tomoni mamgba ḅẹmẹ, “Mị anị Nyanaḅọ, Izrẹl Tamụnọ Ḅe nyana se ḍukoḅịaye-ẹ. Ḅọlọsa sịkị ḅụ ọ́mịna olomu-a ḍapụma, Yufretis Tọrụ mị ḅụ ísí saḅamanga ini angamẹ pịkị jịn-a oru ma tẹkẹmẹ. Olomu-a ḍapụma ḅie gbọrịḅọ anị Tira, Ebraham ḅe na Nehọ ḅe na ḍaḅe-ẹ.

³ Anịsịkị àrị Ebraham ọ́mịna olomu ḍaḅọ ḅe ọkịmẹ, Yufretis mị ḅụ saḅamanga sime ama mị ḅie, se ò seni nwẹngị bebe Kenan ama mị mgba kelemamẹ. Tọn-a awọ à nwọse ọ̀ pịrịmẹ. Àrị Aịzịk ḅe se ọ̀ pịrịmẹ,

⁴ à pịkị Jekọb ḅe na Isọ ḅe na se Aịzịk ḅe pịrịmẹ. Idọm chịngị ọgọnọ sẹ mẹ à se Isọ ḅe pịrịmẹ anị oriaye ḅaraḅụ, ọkụma ọ́mịna olomu ḍaḅọ Jekọb ḅe na oria awọma na ini so Ijipt mị mun mẹ.

⁵ Ọḅụkọ à Moziz ḅe na Erọn ḅe na fịrịmamẹ, à pịkị opu ḅụfụka ọkịḅo Ijipt mị ọgọnọ gbanamẹ. Ọkụma àrị ómine ọkị pakasomẹ;

⁶ ọ́mịna olomu-a ḍapụma à nwọ ọkị pakasomẹ Ijipt mị ḅieḅụ, se Ijipt apụma kporokporo-owuni-arụ ma na pịkị asụn-ọgọnọ-owuni ma na se ini ḍukomẹ. Ọkụma ọ́mịna olomu-a ḍapụma ini ḅo Awụwụ-Opu-Tọrụ mị lasịkị

⁷ ini ị̀ chịn owumẹ à ḅarachụa ini pịrịḅịa ẹrẹchị, se à kanakana se ini na Ijipt apụma na ogboku koromamẹ. À mịẹmẹ tọrụ mị ḅo Ijipt apụma gbẹịn se ini simbi ḅaamẹ. À seni Ijipt mị mịẹye ó nemimẹ. “‘Ḅọlọsa sịkị ḅụ onwun ele mị ḅie ómine angamẹ.

⁸ Anịsịkị àrị ómine ọkịḅo Amọraị apụ ama mị ḅie koromamẹ, anị Jọdan mị ḅụ ịrụapakapaka nyọ daọrụ ḅụ anga apụma. Ini owu se ọ́ pakamẹ, ọkụma àrị anị mịẹ sarasarama ọ́ pịrị se ómine ini nẹngịmaḅịa. Ómine inia ama mị ọkịmẹ, se ọ́ nwẹngị sọmun àrị sịkị àrị ini ḅaasinmẹ.

⁹ Anịsịkị Moab amanyanaḅọ Belak, Zipọ yaḅe ori owuse-ọ́ pakamẹ. Ori oku se Belam, Beọ yaḅe fịrịma se nwọse ọ̀ ḅẹmẹ na ò worinime se ọ́ pịrị.

¹⁰ Ọkụma Belam ḅe àrị ò poki ḍụkụkẹ, anịẹrẹchị ọ̀ ḅẹlẹma se ọ́ pịrịmẹ, se mị ḅara mị ḅụ àrị ọ́ ḍụaḅọrọmamẹ Belak ḅe ḅara ḅie.

¹¹ Ọ́ Jọdan mị saḅa se ḅo Jẹriko mị lamẹ. Jẹriko apụma ini owuse ọ́ pakamẹ, anị Amọraị apụma na, Pẹrizaị apụma na, Kenan apụma na, Hitaị apụma na, Gagashaị apụma na, Hivaị apụma na, pịkị Jebus apụma na mịẹ ọkụ mị. Ọkụma inimgba ḅụ àrị anị mịẹ sarasarama ọ́ pịrị se ómine ini nẹngịmamẹ.

¹² Ọ́ nwẹngị sọmun-arị sịkị, tẹmẹ taịntaịn à nwọse ini pịrịmẹ mịẹse Amọraị mama amanyanapụma à nwọ desinḅịa ẹrẹchị. Ọ́mịna kongo ma na lubu ma na árị mịẹye ofori-ẹ.

¹³ Ọ́ fịaye ḍipika kiri à nwọse ọ́ pịrịmẹ pịkị ómine namaka opuamama na. Mịọkụ ómine anịju ḅụ anga se ó ḍipika iru-mịẹ-chịn ma na tụmgbakị elelenda ma na fịaḅẹ, pịkị oliv ma na chịnma ḅụ ómine ḍipikaye ma.’

¹⁴ “Anịẹrẹchị mịọkụ, Jọsụwa ḅe nwọse ini ḅẹmẹ, ómine osi se Nyanaḅọ Ḅe pịrị, kuḅie se ḅụgbana gbẹịn ḅara na pịkị ọ̀ ḅụ ḅereni nyana ḅara na se fịrịnwẹngị ọ̀ pịrị. Ọ́mịna olomu-a ḍapụma Mẹsopotemịa mị na Ijipt mị na ḅie tẹkẹ sime oru mamgba ọ́ nwọ wokuma, se fịrịnwẹngị Nyanaḅọ Ḅe kẹngẹ nwọ pịrị.

¹⁵ Ó nemikase fịrịnwẹngị ọ̀ pịrị ḅikẹ ḅẹḅẹ, mịmgba ọ́ fịrịnwẹngị pịrịḅịaḅọ ọ́ nwọ sẹlẹọkị, anị ḅọrọ ọ́mịna olomu-a ḍapụma Mẹsopotemịa mị ḅie tẹkẹ sime oru ma-o anịkanịka ḅọrọ Amọraị apụ oru ma-o, anị mịọkụ inia ama ḅie ómine anga apụma. Ị̀rị̀ na ị̀ furo mị na kẹngẹ ọkụma, Nyanaḅọ Ḅe anị wa fịrịnwẹngị pịrịḅịaye-ẹ.”

¹⁶ Se tomonima nwọse ọ̀ pẹkẹrẹmẹ, “Ngịsị wa Nyanaḅọ Ḅe wẹrịso se mun fịrịnwẹngị oru ma pịrị ẹkẹ!

¹⁷ Nyanaḅọ mịna Tamụnọ Ḅe, mịna ḍapụma na mine na ḍụapakụmaḅomẹ omonisọ ḅụ Ijipt mị ḅie, wa pịkị ọ̀ nwẹngị ḅụgbiripuma fịrịma sọnị nwọ ọrịmẹ. Wa mun-anga goyegoye ọ̀ wa kokomẹ, ye wa laka ḅaraḅụ, wa toluḅọrọ sẹ mamgba ḅie.

¹⁸ Wa nwẹngị sọ mị ama mị ḅie ḅoarị sịkị, Nyanaḅọ Ḅe mị nyọ mị ḅụ anga Amọraị apụ mamgba ò desinmẹ. Anịẹrẹchị mine sọnị wa fịrịnwẹngị Nyanaḅọ Ḅe pịrịḅịa; ori anị mịna Tamụnọ Ḅe-ẹ.”

¹⁹ Jọsụwa ḅe nwọse tomonima ḅẹmẹ, “Ọkụma ómine ineda fịrịnwẹngị Nyanaḅọ Ḅe pịrị ẹkẹ. Ori anị fịafịa ḅụ sime Tamụnọ-ẹ, ori ọ́mịna sima wẹrịso ọ́ pịrị ẹkẹ. Sime ọ̀ pịrị osi se jịnye pịrị ọ̀ ḅụḅẹlẹḅẹlẹkẹ,

²⁰ se ó nemikase ọ̀ wẹrịso mun fịrịnwẹngị kịrị oru ma pịrịmẹ ḅẹḅẹ, ò vinpịkị ọ́ dapaka se fomuḅara seni ọ́ pịrịḅịa. Ori ọ́ ḅaafamaḅịa, ori iḅi se ọ́ mịẹ ḅọrọsam nwọḅẹ sọnị.”

²¹ Tomonima nwọse Jọsụwa ḅe ḅẹmẹ, “Ẹn-ẹn! Wa fịrịnwẹngị Nyanaḅọ Ḅe pịrịḅịa.”

²² Jọsụwa ḅe nwọse ini ḅẹmẹ, “Ómine ḅarana onyechịẹ ọ́mịnaḅụ pịrịmẹ na fịrịnwẹngị Nyanaḅọ Ḅe pịrị mị ọ́ nwọ sẹlẹọkịsam.” Ini nwọ ḅẹmẹ, “Iin,” “mine onyechịẹ apụ-ẹ.”

²³ “Anịọkụma kịrị oru mamgba ó wokuma fama, se nyana ḅereni Nyanaḅọ Ḅe pịrị, anị Izrẹl Tamụnọ Ḅe,” ọ̀ nwọse ini ḅẹmẹ.

²⁴ Tomonima nwọse Jọsụwa ḅe ḅẹmẹ, “Wa fịrịnwẹngị Nyanaḅọ mịna Tamụnọ Ḅe pịrịḅịa. Wa oria olokoma kokoḅịa.”

²⁵ Anịẹrẹchị Jọsụwa ḅe ori ọḅọkụ mịẹ tomonima pịrịmẹ anị ene ḅụ, se anịju Shẹkẹm mị ḅie ori oloko na ini ḍuko nwẹngịḅịaye ma na se ini pịrịmẹ.

²⁶ Jọsụwa ḅe ọ̀ ma olokoma se Tamụnọ Ḅe Oloko Ḍiri mị ḅie gịẹịnmẹ. Anịsịkị ọ̀ gbọrị opu ḍụparị nwọ deki se anị seni kuru chịn mị chuku ḅie chịẹma koromamẹ Nyanaḅọ Ḅe warị mị ḅie ḅụ.

²⁷ Ọ̀ nwọse tomoni mamgba ḅẹmẹ, “Mị ḍụparị mị anị onyechịẹ wa pịrịḅịaye-ẹ. Nyanaḅọ Ḅe kọn se wa pịrị ọkwẹịn mamgba anị naasam. Anịẹrẹchị anị onyechịẹ ọ́ dapakaḅịa, mịẹse ó nyana ḅereni ọ́mịna Tamụnọ Ḅe pịrịkapụ sọ ẹka ḅara.”

²⁸ Anịsịkị Jọsụwa ḅe tomonima ḅe se ini somẹ, se ọrụḅọḅọ so ama mị ḅie nụḅọ pẹkẹrẹ mị mun mẹ.

Jọsụwa Ḅe Na Ẹleaza Ḅe Na Fịmẹ

²⁹ Anị ḅọrọ se so, Nyanaḅọ Ḅe fịrịnwẹngịḅọ Jọsụwa, Nọn yaḅe, fịmẹ kụra sọnọasi oyi fịnjị ḅiri ḅụ.

³⁰ Ini ò seni oria kiri ḅie ḍipimẹ Timnat Sera mị ḅie Ifrem chịngị-ọgọnọ-sẹ mị ḅie Geash Tụndụ mị ḅụ ọgọnọju daọrụ mị.

³¹ Jọsụwa ḅe oria ḍumo ene mamgba ḅie Izrẹlapụma ini fịrịnwẹngị Nyanaḅọ Ḅe pịrịmẹ, pịkị ọ̀ fị ḅọrọ so sọnị ini pa anị gbọrị ḅara mị mịẹmẹ anị nwọ ḅarana tọrụ se Nyanaḅọ Ḅe mịẹ Izrẹl mị pịrịaye goyegoye ọrị tịḅịnịma ḍumo sime sịkị mị ḅụ.

³² Josẹf oju mị, anị ini Izrẹlapụma Ijipt mị ḅie ọkịḅoye mị, Shẹkẹm mị ḅie ini anị ḍipimẹ, anị Jekọb ḅe Hemọ awọma ḅara fẹ kịrị mị ḅie, anị Shẹkẹm ḍaḅe, seleḅa pẹkẹrẹ-a sọnọasi ọ̀ nwọse anị fẹmẹ. Mị kiri mị Josẹf furo ḅie apụma anị ḍiaọkịmẹ.

³³ Ẹleaza, Erọn yaḅe ọ̀ fịmẹ, se Gibia mị ḅie ini ò ḍipimẹ, anị Ifrem chịngị-ọgọnọ-sẹ mị ḅie sime ama mị, anị ini se yayo Fịnehas ḅe pịrị ama mị-ẹ.