Jọshụa 23 - Kịrịkẹnị Baịbụl

Jọsụwa Ḅe Oria Ḅaḅa Ḅe Ọkwẹịn Mị

¹ Sịkị iḅiọkụ ḅọrọsam Nyanaḅọ Ḅe mịẹse Izrẹl mị dein nyanamẹ ini gbori kelema inina-tarakapụma ḅara ḅie. Anịsịkị mị ḅụ, Jọsụwa ḅe ori iḅiọkụ olomusam,

² anịẹrẹchị bebe Izrẹl mị mgba ọ̀ nwọ chịnmẹ, sẹnịapụma na, tịḅịnịma na, ḅẹrẹkọn apụma na, pịkị tomonima ḅụ fịrịtịḅịdapụ ma na, se ọ̀ nwọse ini ḅẹmẹ, “Àrị iḅiọkụ olomusam mịọkụ.

³ Nyanaḅọ ọ́mịna Tamụnọ Ḅe ọ́mịna tịḅị gose se ma sẹ mamgba mịẹye ómine ọrịsam. Nyanaḅọ ọ́mịna Tamụnọ ḅe owusọ ọ́ pịrịmẹ.

⁴ Sẹ ma ḅie ama maḅụ kọn ayema àrị àrị ḍie se ọ́mịna furoma pịrịsam pịkị àrị ọmụ gbinkansa sẹ mamgba na, Jọdan Tọrụ mị ḅụ ịrụapakapaka nyọ daọrụ ḅụ ọkịmun Mẹditirenia Opu Tọrụ mị la, ịrụasọsọ nyọ daọrụ ḅụ.

⁵ Nyanaḅọ ọ́mịna Tamụnọ Ḅe mịẹse ini ọ́ ḅụ mangị soḅịa, ọ̀ pịkị ini desinḅịa ọ́ nwẹngị sọmun-arị sịkị. Inia ama mị ómine anị ọkịḅịa, anị Nyanaḅọ ọ́mịna Tamụnọ Ḅe yeḅereni ọ́ pịrịsa ḅaraḅụ.

⁶ Anịẹrẹchị ómine ọrị na Moziz Oloko Ḍiri mị ḅie gịẹịn koromaye goyegoye ọ́ ḅịpị poki ḅaraḅụ anị mịẹmẹ. Anịaḅụ gbọrị pẹkẹrẹ sọnị ó se papaye mịẹma,

⁷ anịsịkị ini mịọkụ kọn se ọ́mịna ḅie sime apụma ómine ini na gboloma ẹkẹ, ọ́ pịkị inia oru ma ẹrẹ go ẹkẹ, anịkanịka árịa ẹrẹ ma se yekarịfị ẹkẹ, anịkanịka árịa oru ma tẹkẹ ẹkẹ, anịkanịka tịḅịtu árị pịrị ẹkẹ.

⁸ Anịnakaraka, ọ́ Nyanaḅọ Ḅe ḅụ ḅereni nyana, anị ọ́ mịẹ ḅo mịọkụ mị la ḅara mị.

⁹ Nyanaḅọ Ḅe ori opusọ pịkị kụrọ sẹma depakụmasam ọ́ nwẹngịsọ tọrọkọ mun-arị sịkị pịkị ineda ọ́mịna tọrọkọ chịẹ gbọrịḅọ sọnị ofori-ẹ.

¹⁰ Ọ́mịna ḅụ gbọrịḅọ kẹngẹ ineda kịnị-a mẹndẹ oyiasi fịnjị de mangịmaḅịa, anịatịḅị Nyanaḅọ ọ́mịna Tamụnọ Ḅe ḅara na owu mị sọ ọ́ pịrịaḅẹ, anị ó yeḅereni ọ́ pịrịsa ḅaraḅụ.

¹¹ Anịẹrẹchị ómine ọbị nyana se ọ́ Nyanaḅọ ọ́mịna Tamụnọ Ḅe ḅẹlẹma.

¹² Ó nemikase nyana ḅereni ọ̀ pịrịka se ísí kirikọn ọ́mịna ḅie sime a sẹma na gbọrịḅụ ḅọrọ se inina-ere-sime gbolomamẹ ḅẹḅẹ,

¹³ ó nemi na Nyanaḅọ ọ́mịna Tamụnọ Ḅe ma sẹma ọ̀ ḅarị árị depakụma ẹkẹ ọ́ nwẹngị sọmun-arị sịkị. Anịnakaraka, ini ḍẹịn ye se nweni lama ọkụ, se yese ọ́ lamaḅịa anịkanịka olulu ḍẹịn ini nwọ sọ ọ́ pịrịḅịa, fomuye pịkị ọ́mịna kokuogbo ọyịḅịa, anịkanịka ịga sọ ọ́ pịrịḅịa ọ́mịna tọrụmgbọlụma ḅie. Mịn mị anị ọkịmun mị Nyanaḅọ ọ́mịna Tamụnọ Ḅe se ọ́ pịrịsa mị iḅi ama mị ḅie gbọrịḅọ sọnị ḅarị ọ́mịna ḅụ kọn ẹka sịkị mị laḅịa.

¹⁴ “Mịọkụ à fịḅịa sịkị mị lasam. Ọ́mịna ḅụ ḅẹḅọ ḅẹḅọ nemimẹ nụḅọ kuḅie na pịkị tẹmẹ ḅie na ḅụ na Nyanaḅọ ọ́mịna Tamụnọ Ḅe ḅereni ọ́ pịrị iḅiaye mamgba ò se ọ́ pịrịsam. Ò ḅereniye goyegoye ọ̀ mịẹsam; mị re ọ̀ mịẹkaye ofori-ẹ.

¹⁵ Ọkụma ọ̀ nwọ ḅereni ọ́ pịrịye goyegoye mịẹọkụ mị, anị ọ̀ pịkị ḅalafamaye goyegoye mịẹḅịa ọkụ mị-ẹ.

¹⁶ Ó nemikase Nyanaḅọ ọ́mịna Tamụnọ Ḅe tọn ọ́ pịrị na ó koko nwọḅẹ ọḅọkụ mị kokokẹ ḅẹḅẹ, ọ́ pịkị nemikase fịrịnwẹngị jịn-a oru ma pịrị pịkị árị tẹkẹmẹ ḅẹḅẹ, anịọkụma oria ịganị ḅụ ò fomuḅara se ọ́ pịrịḅịa, pịkị ḅọlọka sịkị ḅụ mị ò se ọ́ pịrịsa iḅi ama mị ḅie ọ́mịna ḅụ gbọrịḅọ sọnị ḅarị kọn ẹkẹ.”