Jọshụa 22 - Kịrịkẹnị Baịbụl

Jọsụwa Ḅe Ịrụapakapaka Nyọ Da Sẹ Ma Se Ama Fịrịmamẹ

¹ Anịsịkị Jọsụwa ḅe Rubẹnị na, Gadị na, pịkị Ịrụapakapaka nyọ da Manasẹ sẹ ḅie apụ mamgba na chịn koḅirimamẹ.

² Ọ̀ nwọse ini ḅẹmẹ, “Moziz Nyanaḅọ Ḅe fịrịnwẹngịḅọ ḅe tọn ọ́ pịrịye goyegoye ọ́ mịẹsam, ọ́ pịkị à tọn ọ́ pịrịaye mamgba kokomẹ.

³ Ọkịḅo mịọkụ la sọnị, ọ́mịna juo Izrẹlapụma ọ́ nwọ koromaso gbọrị sịkị ofori-ẹ. Ómine ọ́ tọrụkweinma Nyanaḅọ ọ́mịna Tamụnọ Ḅe oria olokoma kokomẹ.

⁴ Mịọkụ, ò yeḅerenisa ḅaraḅụ, Nyanaḅọ ọ́mịna Tamụnọ Ḅe ò deinma se ó juo Izrẹlapụma pịrịsam. Anịẹrẹchị ó vinpịkị so ómine ọkị ọḅụ pịrị ama mị mun, Jọdan mị ḅụ ịrụapakapaka nyọ daọrụ ama mị, anị Moziz, Nyanaḅọ Ḅe fịrịnwẹngịḅọ ḅe se ọ́ pịrị ama mị.

⁵ Ómine ọrị na Moziz ḅe chụa ọ́ pịrị oloko mị ó kokomẹ: ị́ Nyana Tamụnọ Ḅe ḅẹlẹma, ò ḅiye nwọ mịẹ, oria olokoma koko, ọ̀ ḅụ ḅereni nyana, pịkị ị́ kuḅie na ị́ tẹmẹ mgba na se fịrịnwẹngị ọ̀ pịrị.”

^6-8 Jọsụwa ḅe ori oria ḅẹlẹma mị se ini pịrị pịkị ma ọkwẹịn ma kọn ini pịrịmẹ: “Ọ́ ḅakama ngọ kọn se so ama mun aḅẹ, tọn-a nama na, seleḅa na, goli na, alapẹlẹka na, ikulele na, pịkị tọn-a ḅụchụaye na. Ómine na tarakapụma ḅara ómine ọkịaye ma ó se ọ́mịna gbọrị sẹ ḅie apụma na ḍia.” Anịsịkị ini so inia ama mun mẹ. Moziz ḅe ò kiri se Manasẹ sẹ mị ḅụ gbọrị pẹkẹrẹ pịrịmẹ Jọdan mị ḅụ ịrụapakapaka nyọ daọrụ ḅụ, ọkụma ísí gbọrị pẹkẹrẹ mị na, pịkị ísí-a sẹma na Jọsụwa ḅe anị kiri se ini pịrịye-ẹ ịrụasọsọ nyọ daọrụ ḅụ.

⁹ Anị Rubẹnị na Gadị na sẹma pịkị Ịrụapakapaka nyọ da Manasẹ mị na vinpịkị so inia ama mun ye-ẹ Shịlo mị ḅụ Kenan ama mị ḅie, ini kirikọn Izrẹlapụma wẹrịso se so inia ama Giledị mị mun mẹ, anị Nyanaḅọ Ḅe Moziz ḅe ḅụ ḅọrọ tọnsa ḅaraḅụ ini ḍiaọkị ama mị.

Jọdan Mị Ḅụ Agbamịẹ Ẹbẹ Mị

¹⁰ Rubẹnị na, Gadị na sẹma, pịkị Ịrụapakapaka nyọ da Manasẹ sẹ mị na mun Gilaịlọt mị lasịkị, pa Jọdan mị ḅụ ịrụasọsọ nyọ daọrụ mị ḅụ, ini gbọrị ḍụḅa ḍikitọrụgbẹịn agbamịẹ ẹbẹ namamẹ tọrụ mị aka ḅụ.

¹¹ Ísí Izrẹlapụma, nweni ḍuko ini pịrịmẹ, “Poki! Rubẹnị na, Gadị na sẹma pịkị Ịrụapakapaka nyọ da Manasẹ sẹ mị na, ini agbamịẹ ẹbẹ namasam Gilaịlọt ḅụ, Jọdan ḅụ mịna pẹkẹrẹ daọrụ mị ḅụ.!”

¹² Izrẹlapụma mịn mị naa sịkị, bebe sẹ mị mgba ḅo Shịlo mị ḅie koḅiriamẹ mun owu se ịrụapakapaka nyọ da sẹma pakaḅịa ẹrẹchị.

¹³ Anị Izrẹlapụma Ẹleaza agbamịẹḅọ ya Fịnehas ḅe fịrịma ịrụapakapaka nyọ daọrụ, Rubẹnị na Gadị na pịkị Manasẹ sẹma ḅie apụma sẹịnye-ẹ Giledị ama ḅie.

¹⁴ Tịḅịnị ma ḅie oyi apụ Fịnehas ḅe ḅụsọ mun mẹ, ịrụasọsọ nyọ da sẹma ḅie gbọrị furo gbọrịḅọ gbọrịḅọ, pịkị sẹ mị ḅie furo furoma tịḅịda apụma ḅụ gbọrịḅọ gbọrịḅọ na.

¹⁵ Ini ḅo Giledị ama mị la, se Rubẹnị na, Gadị na, pịkị Ịrụapakapaka nyọ da Manasẹ apụma na dama mun,

¹⁶ se Nyanaḅọ Ḅe oria tomoni kpo mị tịḅị gose ọkwẹịn kọn ini pịrịmẹ, ini nwọse ini ḅẹmẹ, “Ó che gose nwọ sime siye mịẹ Izrẹl Tamụnọ Ḅe ḅụ? Ọ́ ḅarị ò ḍuko nwẹngịkẹ!

¹⁷ Piọ mị ḅụ wa mịẹ si mị ọ́ nwọse ḅiekoroma, anị Nyanaḅọ Ḅe obi se oria tomonima gbin sịkị mị? Mịọkụ sọnị wa pa anịa tọrụsiọrị ọrịaḅẹ. Anị si mị ọ́mịnaḅụ laka?

¹⁸ Mịọkụ ọ́ ḅarị ò ḍukonwẹngị ẹka mọnọ? Ó nemikase mịmgba nyana ḅereni Nyanaḅọ Ḅe pịrịkẹ ḅẹḅẹ, ori ịganị nyana Izrẹl mị ḅie ḅọḅọ pịrịḅịa ḅa ḅụ.

¹⁹ Anịẹrẹchị mịọkụ, nemikase ọ́mịna ama mị ḅie ọ́ tẹkẹ gbẹịnkẹ ḅẹḅẹ, ọ́ saḅa Nyanaḅọ Ḅe ama mị ḅo, oria Ikowarị mị sime nyọ mị. Ó ḅo mịna ḅie ḅụ kiri ọkị anga. Ọkụma ọ́ nyana ḅereni Nyanaḅọ Ḅe pịrịka apụ sọma pịkị wa mịẹse wa nyana ḅerenika apụ sọma anị Nyanaḅọ mịna Tamụnọ Ḅe agbamịẹ ẹbẹ mị sikima jịn agbamịẹ ẹbẹ nama ḅụ.

²⁰ Ekan, Zira yaḅe wa sima-ẹ nwọḅẹ ayema ḅụ ḅịpị poki ḍụkụka ọkụ mị ọ́ nwọse ḅiekoroma; bebe Izrẹl sẹ mị mgba anịa fomuḅara damẹ. Ekan ḅe kẹngẹ oria si mị gose fịkẹ.”

²¹ Rubẹnị na, Gadị na sẹma pịkị Ịrụapakapaka nyọ da Manasẹ sẹ mị na nwọse ịrụasọsọ nyọ da sẹma furo tịḅịnịma pẹkẹrẹmẹ.

²² “Kụrọmamgba Nyanaḅọ Ḅe anị Tamụnọ Ḅe-ẹ! Ori anị Nyanaḅọ Ḅe-ẹ! Kụrọmamgba Nyanaḅọ Ḅe anị Tamụnọ Ḅe-ẹ! Ori anị Nyanaḅọ Ḅe-ẹ! Wa gose mịn mị mịẹye ó nemimẹ, wa pịkị ḅimẹ ómine sọnị anị nemi! Wa nemikase nyana ḅerenikẹ pịkị Nyanaḅọ Ḅe ḅụ ḅereni nyanakẹ ḅẹḅẹ, ngịsị ó ḅereni ma wa ḍumo!

²³ Wa nemikase Nyanaḅọ Ḅe ḅịpị pokikẹ se mịna ḅarakuḅu agbamịẹ ẹbẹ nama se anị ọgọnọ dọkịma agbamịẹ anịkanịka fịaye mgbọlụ ḍiepịrịaye agbamịẹ anịkanịka deinma agbamịẹ ḍiepịrịaye mịẹmẹ ḅẹḅẹ, ye Nyanaḅọ Ḅe ḅarana fomuḅara se wa pịrị!

²⁴ Ẹn-ẹn! Wa gose anị mịẹye anịatịḅị mịna ḅalafamẹ na tọrọkọju ọ́mịna awọma ini ineda nwọse mịna awọma ḅẹḅịa ‘Nyanaḅọ, Izrẹl Tamụnọ Ḅe na ómine na chemịẹgbolomaye ọ́ nwọ nyana?

²⁵ Ọ̀ Jọdan mị se mine na ómine Rubẹnị na Gadị na apụma na ogboku eke mịẹmẹ. Ọ́ Nyanaḅọ Ḅe na mịẹgbolomaye nyanakẹ.’ Anịọkụma ọ́mịna awọma mịẹse mịna awọma ḅarị Nyanaḅọ Ḅe tẹkẹ ẹkẹ.

²⁶ Anịẹrẹchị wa agbamịẹ ẹbẹ nwọ namamẹ, se dọkịma agbamịẹ, anịkanịka ḍiepịrịaye agbamịẹḅịa ẹrẹchịkẹ,

²⁷ ọkụma anịnakaraka, se elekima mịẹ koroma mịna tomonima na ọ́mịna tomonima na pịrịḅịa ẹrẹchị, pịkị mịna ḅụọ ḅọrọ se ḅoḅịa ḅụọma na, kọkọmaye ḅụ Nyanaḅọ Ḅe anị wa tẹkẹ tẹkẹye-ẹ oria Ikowarị mị tọrọkọ ḅụ mịna dọkịma agbamịẹḅịaye ma na pịkị deinma agbamịẹ ḍiepịrịayema na. Mịn mị anị se mịẹse ọ́mịna awọma ḅẹ ẹka ḅara na mịna awọma ini Nyanaḅọ Ḅe na mịẹgbolomaye nyanakẹ.

²⁸ Mịna kuḅie tọn ḅaraḅụ, mịn mị nemikase mịẹḅịa ḅẹḅẹ, mịna awọma ini ineda nwọ ḅẹḅịa, ‘Ḍiki! Mịna olomu ḍapụma ini Nyanaḅọ Ḅe agbamịẹ ẹbẹ mị kịkẹ gbọrị agbamịẹ ẹbẹ nama koromamẹ. Se dọkịma agbamịẹ anịkanịka ḍiepịrịaye agbamịẹḅịayekẹ, ọkụma se elekima mịẹ koroma mịna tomonima na ọ́mịna tomonima na pịrịḅịa ẹrẹchị-ẹ.’

²⁹ Ngịsị wa nyana ḅerenika apụ sọ Nyanaḅọ Ḅe pịrị-ẹkẹ anịkanịka mịọkụ wa ḅarị ò ḍuko nwẹngị ẹka ẹrẹchị se dọkịma agbamịẹ ḍiepịrịaye anịkanịka se fịaye mgbọlụ agbamịẹ ḍiepịrịaye anịkanịka deinma agbamịẹḅịa ḍiepịrịaye anịkanịka se agbamịẹḅịa ẹbẹ wa nwọ namakẹ. Wa ḅarị jịn agbamịẹ ẹbẹ nama ẹkẹ Nyanaḅọ mịna Tamụnọ Ḅe agbamịẹ ẹbẹ mị sikima ọkụma anị ọ̀ tọrụkuḅu sime Ikowarị mị tọrọkọ ḅụ simeye mị.”

³⁰ Fịnehas agbamịẹḅọ ḅe na ori na mun oyi-a sẹma tịḅịnịma na, ịrụasọsọ nyọ da sẹma ḅie sime furoma tịḅịdapụ ma ḅo, Rubẹnị na Gadị na sẹma na pịkị Ịrụapakapaka nyọ da Manasẹ sẹ mị ḅie apụma na ḍukoye mị naa sịkị anị inia ḅụokoromẹ.

³¹ Fịnehas Ẹleaza agbamịẹḅọ ḅe yaḅe, nwọse ini ḅẹmẹ, “Mịọkụ mị wa nemisaye-ẹ na Nyanaḅọ Ḅe ò mine na omi-ẹ. Ọ́ nyana ḅereni ọ̀ pịrịka apụ sọkẹ, anịẹrẹchị ómine Izrẹl mị ḍụaḅọrọmasam Nyanaḅọ Ḅe fomuḅara mị ḅụ.”

³² Anị Fịnehas ḅe na tịḅịnịma na, Rubẹnị na Gadị na sẹ ḅie apụma na Giledị ama mị ḅie nwẹngị soye-ẹ se vinpịkị so Kenan ḅie Izrẹlapụma damamun se ḅẹrẹ mị ḍuko ini pịrịye-ẹ.

³³ Izrẹlapụma anị inia ḅụokoromẹ se ini tokoni se Tamụnọ Ḅe pịrịmẹ. Owu se Rubẹnị na Gadị na paka se ini sime ama mị kansinḅịa ḅẹrẹ mị ini ḅarị ḍukokẹ.

³⁴ Rubẹnị na Gadị na tomonima nwọ ḅẹmẹ, “Mị agbamịẹ ẹbẹ mị anị onyechịẹ mine mgba pịrịmẹ na Nyanaḅọ Ḅe anị Tamụnọ Ḅe-ẹ.” Anịẹrẹchị ini nwọse anị chịnmẹ “Onyechịẹye.”