Jọshụa 21 - Kịrịkẹnị Baịbụl

Livaịapụ Opuama Ma

¹ Livaị furo ḅe tịḅịnịma so Ẹleaza agbamịẹḅọ ḅe na, Jọsụwa Nọn yaḅe na, pịkị Izrẹl awọ mamgba ḅie sime sẹma ḅie tịḅịnịma na damamunmẹ.

² Anịju Shịlo mị ḅie Kenan ama mị ḅie ini nwọse ini ḅẹmẹ “Nyanaḅọ Ḅe Moziz ḅe ḅụ ḅọrọ tọnmẹ na ini wa angaḅịa opuamama se wa pịrịḅịa, pịkị àrị kelema osuein na, mịna namama fịḅịaye na.”

³ Anịẹrẹchị Nyanaḅọ Ḅe tọn ḅaraḅụ Izrẹlapụma inia eke ma ḅụ da opuama na pịkị nama fịḅịa da osuein kiri na se Livaịapụ ma pịrịmẹ.

⁴ Livaị sẹ ḅie Kohat furo ḅie awọ anị tatarị opuamama ḅụ ḍiekiri ọkịye-ẹ. Erọn agbamịẹḅọ ḅe furo ḅie apụma oyi tẹrẹ-a opuama fịnjị ini nwọse ini pịrịmẹ, Juda na, Simiọnị na, pịkị Bẹnjamin na eke ma ḅụ.

⁵ Ísí kirikọn Kohat furo mị, oyi-a opuama ini nwọse anị pịrịmẹ Ifrem na, Danị na, pịkị Manasẹ mị ḅụ Ịrụasọsọ nyọ daọrụ eke ma ḅụ na.

⁶ Gashọn sẹ mị oyi tẹrẹ-a opuama fịnjị ini nwọse anị pịrịmẹ Ịsaka na, Asha na, Naftalaị na, pịkị Manasẹ mị ḅụ Ịrụapakapaka nyọ daọrụ eke ma ḅụ na.

⁷ Mẹreraị sẹ ḅie sime furoma, Rubẹnị na, Gadị na, pịkị Zẹbụlọnị na eke ma ḅụ oyi maịn fịnjị opuama ini nwọse ini pịrịmẹ.

⁸ Ịkịan wakị ḅụ Izrẹlapụma, ma opuamama na pịkị inia namama fịḅịa osuein kirima na se Livaịapụ ma pịrịmẹ, anị Nyanaḅọ Ḅe Moziz ḅe ḅụ ḅọrọ tọnsa ḅaraḅụ.

⁹ Mà anị Juda na Simiọnị na eke ma ḅụ ini se ini pịrị opuamama ẹrẹ ma-ẹ

¹⁰ Erọn furo ḅie awọ, Kohat sẹ mị ḅie anị Livaị ḅe ḅụ pakaḅo apụ ma-ẹ. Ini anị ini tatarị nyọ tọn pịrịye-ẹ.

¹¹ Aba opuama mị ini nwọse ini pịrịmẹ (Aba ḅe anị Anak ḍaḅe-ẹ), mịọkụ ini nwọse anị chịnmẹ Hibrọn, Juda chịngị ọgọnọ sẹ mị ḅie ḅụ, pịkị anị kelema namama fịfị osuein kiri mị na.

¹² Anịẹḅẹ sọnị, opuama mị nyana ele ma na amama na ini se Kelẹb, Jẹfunẹ yaḅe pịrịmẹ oriaye ḅaraḅụ.

¹³ Erọn, agbamịẹḅọ ḅe furo ḅie apụma (tịḅịḅọịḅịa gbọrị opuama) ini nwọse Hibrọn mị ḅụ chụa ini pịrịmẹ, pịkịma opuamama na: Libna,

¹⁴ Jata na, Ẹshtẹmoa na,

¹⁵ Holọn na Diba na,

¹⁶ Aịn na Juta na, pịkị Bẹt Shimẹsh na pịkị inia namama fịfịḅịa osuein kirima na: esenie-a opuama, Juda na Simiọnị na ḅụ.

¹⁷ Bẹnjamin eke mị ḅụ inein-a opuama ini nwọse ini pịrịmẹ: Gibiọn na, Giba na,

¹⁸ Anatọt na, pịkị Almọn mị na, inia namama fịfịḅịa osuein kirima na.

¹⁹ Àrịmgba oyi tẹrẹ-a opuama fịnjị na pịkị inia namama fịfịḅịa osuein kirima na ini nwọse agbamịẹapụma pịrịmẹ, anị Erọn furo ḅie apụma.

²⁰ Livaị furo ḅie ísí Kohat sẹ apụma, Ifrem eke mị ḅụ ini da opuama se ini pịrịmẹ.

²¹ Inein-a opuama ini nwọse ini pịrịmẹ: Shẹkẹm mị na inia namama fịfịḅịa osuein kirima na, Ifrem chịngị ọgọnọ sẹ mị ḅie ḅụ (tịḅịḅọịḅịa gbọrị opuama) na, Gaza mị na,

²² Kibzeim na, pịkị Bẹt Horọn na pịkị inia namama fịfịḅịa osuein kirima na.

²³ Danị eke mị ḅụ inein-a opuama ini nwọse ini pịrịmẹ: Ẹltẹkẹ na, Gibetọn mị na,

²⁴ Aịjalọn mị na, pịkị Gat Rimọn mị na, inia namama fịfịḅịa osuein kirima na.

²⁵ Ịrụasọsọ nyọ da Manasẹ eke mị ḅụ mama opuama ini nwọse ini pịrịmẹ: Teanak mị na pịkị Gat Rimọn mị na, pịkị inia namama fịfịḅịa osuein kirima na.

²⁶ Kohat awọma ḅie, ma furoma oyi-a opuama ini nwọ ọkịmẹ, inia nama fịfịḅịa osuein kirima na.

²⁷ Livaị apụma inia jịn gbọrị kpo, anị Gashọn sẹ mị, Ịrụapakapaka nyọ da Manasẹ eke mị ḅụ mama opuama ini nwọ ọkịmẹ: Golan Bashan mị ḅie simeye mị (tịḅịḅọịḅịa gbọrị opuama) na, pịkị Bieshtira mị na, inia namama fịfịḅịa osuein kirima na.

²⁸ Ịsaka eke mị ḅụ inein-a opuama ini nwọ ọkịmẹ: Kishiọn na, Dabẹrat na,

²⁹ Jamọt mị na, pịkị Ẹnganịm mị na, inia namama fịfịḅịa osuein kirima na.

³⁰ Asha eke mị ḅụ inein-a opuama ini nwọ ọkịmẹ; Mishal na, Abdọn na,

³¹ Hẹlkat na, pịkị Rihọb na, inia namama fịfịḅịa osuein kirima na.

³² Naftalaị eke mị ḅụ tẹrẹ-a opuama ini nwọ ọkịmẹ: Kedẹsh Galili mị ḅie simeye mị na, inia namama fịfịḅịa osuein kirima na (tịḅịḅọịḅịa gbọrị opuama) na Hamọt Do mị na, pịkị Katan mị na, inia namama fịfịḅịa osuein kirima na.

³³ Gashọn sẹ mị ḅie sime furo mamgba gboloma ini oyi tẹrẹ-a opuama fịnjị nwọ ọkịmẹ, inia namama fịfịḅịa osuein kirima na.

³⁴ Ísí kirikọn Livaị apụma, anị Mẹreraị sẹ mị, Zẹbụlọnị eke mị ḅụ inein-a opuama ini nwọ ọkịmẹ: Jokneam na, Kata na,

³⁵ Dimna na, pịkị Nahalal mị na, inia namama fịfịḅịa osuein kirima na.

³⁶ Rubẹnị eke mị ḅụ inein-a opuama ini nwọ ọkịmẹ: Biza na, Jehaz na,

³⁷ Kẹdemọt na pịkị Mẹfat mị na, inia namama fịfịḅịa osuein kirima na.

³⁸ Gadị sẹ mị ḅụ inein-a opuama ini nwọ ọkịmẹ: Remọt Giledị mị ḅie simeye mị na, inia namama fịfịḅịa osuein kirima na (tịḅịḅọịḅịa gbọrị opuama) na, Mahaneim na,

³⁹ Hẹshbọn na, pịkị Jiza mị na, inia nama fịfịḅịa osuein kirima na.

⁴⁰ Arịmgba gboloma oyimaịn opuama fịnjị ini nwọse Mẹreraị sẹ mị pịrịmẹ.

^41-42 Izrẹlapụma nyana ama, maịnfa opuama mesi-oyi-fịnjị na inia nama fịfịḅịa osuein kirima na, ini nwọse Livaịapụ ma pịrịmẹ.

Izrẹl Mị Kiri Mị Ọkị Nyanamẹ

⁴³ Nyanaḅọ Ḅe, bebe kiri mị mgba ò se Izrẹl mị pịrịmẹ anị ò kụrọma yeḅereni inia olomu-a ḍapụma pịrịmẹ na ò se ini pịrịḅịa nwọḅẹ ama mị. Ini anị ọkị nyana sịkị ini anịju ḅụ simemẹ.

⁴⁴ Nyanaḅọ Ḅe ò deinma se ini pịrịmẹ bebe ama mị mgba ḅie ḅụ, anị ọ̀ wẹrị yeḅereni inia olomu-a ḍapụma pịrịsa ḅaraḅụ. Ini na tarakapụma ḅụ gbọrị apụ sọnị ineda ini dakẹ, anịatịḅị Nyanaḅọ Ḅe, ọ̀ mịẹ sarasarama Izrẹlapụma pịrịmẹ ini na tarakapụ mamgba ḅụ.

⁴⁵ Nyanaḅọ Ḅe ò ḅereni Izrẹlapụma pịrịye goyegoye ọ̀ mịẹmẹ.