Jọshụa 20 - Kịrịkẹnị Baịbụl

Tịḅịḅọị Ḅịa Opuama Nwọ Tọn Pakụmaḅo Mẹ

¹ Gbọrị ene Nyanaḅọ Ḅe nwọse Jọsụwa ḅe ḅẹmẹ

² na ḍuko Izrẹlapụma pịrị, “À tọn Moziz ḅe pịrị na ḍuko ọ́ pịrị nwọḅẹ tịḅịḅọịḅịa opuamama ọ́ nwọ sẹlẹ sikima.

³ Bẹkẹma ḅaraḅụ nweniḅaaḅọ ineda sowuḅi ḍọkịarịḅọ ḅe ḅara pẹlẹma so anịju munḅịa tịḅịḅọịḅịa ẹrẹchị.

⁴ Ori ineda mangị mun ma opuamama ḅụ gbọrịye ḅie sọḅịa, se so ḅẹrẹkọn nyọ mị mun se pakaye mị ḍuko tịḅịnịma pịrịḅịa opuama mị ḅọkọ ḅụ. Ini ọ̀ wẹrịso se ori opuama mị ḅie sọḅịa pịkị anga nyọ se ọ̀ pịrịḅịa, mịẹse ori anịju simeḅịa ọkụ.

⁵ Nemikase sowuḅi ḍọkịarịḅọ ḅe ò ḍuko mun anịju lamẹ ḅẹḅẹ, opuama mị ḅie anga apụma ngịsị ini ò seni ọ̀ pịrị ẹkẹ. Ini ò ḍikiḍikiḅịa anịatịḅị bẹkẹma ḅaraḅụ ò tomoniḅọ ḅe ḅaamẹ, ịganị ḅụkẹ.

⁶ Ori opuama mị ḅie sime mun ini ḅelema ḅẹrẹkọn ọ̀ pịrị sịkị laḅịa pịkị ọkịmun anị sịkị Gele Agbamịẹḅọ ḅe fị ḅọrọ sịkị laḅịa. Anịsịkị tomoniḅọ ḅe ori ineda vinpịkị so ò sime mangị so, oria ama mị munḅịa.”

⁷ Anịẹrẹchị, Jọdan mị ḅụ ịrụasọsọ nyọ daọrụ ḅụ ini Kedẹsh mị sikima koromamẹ Galili mị ḅie, anị Naftalaị chịngị ọgọnọ sẹ mị ḅie; Shẹkẹm mị na Ifrem chịngị ọgọnọ sẹ mị na ḅie; pịkị Hibrọn mị na, Juda chịngị ọgọnọ sẹ mị ḅie.

⁸ Jọdan mị ḅụ ịrụapakapaka nyọ daọrụ ḅụ, Jẹriko gele onwun ele sẹrẹrẹ kiri mị ḅụ ịrụapakapaka nyọ daọrụ, ini Biza mị sẹlẹ sikimamẹ Rubẹnị eke mị ḅụ; Remọt Giledị mị na, Gadị eke mị ḅụ; pịkị Golan mị na Bashan mị ḅie, Manasẹ eke mị ḅụ.

⁹ Mà opuamama anị ini sẹlẹ sikima koroma tịḅịḅọịḅịa ama ma-ẹ Izrẹlapụma na pịkị inia ḅie anga igoniapụma na pịrịye-ẹ. Bẹkẹma ḅaraḅụ nweni ḅaaḅọ goyegoye ineda mun anịju ḅụ ịnyasọḅịa, sowuḅiḅịa ẹrẹchị ḍọkịarịḅọ ḅe ọ̀ ḅaa ẹka ḅara; ini ḅelema ḅẹrẹkọn ọ̀ pịrịka simeogbo ini ọ̀ ḅaa ẹkẹ.