Jọshụa 18 - Kịrịkẹnị Baịbụl

Izrẹlapụ Ma Kirikọn Kiri Ma Ḍie Mẹ

¹ Ini ama mị nẹngịma so sịkị, bebe Izrẹl sẹ mị mgba mun Shịlo mị ḅie ḅụ koḅirima se Nyanaḅọ Ḅe tọrụkuḅu sime Ikowarị ma pike chịẹmamẹ.

² Sọnọma furo Izrẹlapụma ḅụ pa kọn waraḅẹ anị inia ḍiekiri ma ḅara laka apụ ama mị ḅụ.

³ Anịẹrẹchị Jọsụwa ḅe nwọse Izrẹlapụma ḅẹmẹ, “Ó koru mun chesịkị la se ó mun Nyanaḅọ Ḅe, anị ọ́mịna olomu-a ḍapụma Tamụnọ Ḅe se ọ́ pịrịsa ama mị ọkị ḅe?

⁴ Ye gbọrị furo tẹrẹ apụ, tẹrẹ apụ à nwọ ọkị. Àrị ini fịrịma pakụmaḅịa se ini mun bebe sẹ mị mgba ḍiki kelema, inia ḅụḅẹlẹ se ini ọkị ḅịa eke mị se ḍiri ḅie gịẹịn ḅịa anị iniaye ḅaraḅụ. Anịsịkị ini vinpịkị ị̀ damaḅoḅịa.

⁵ À kiri mị se sọnọma kiri ḍie ini pịrịḅịa; Juda mị anịa eke ḅụ simeḅịa chukuju daọrụ ḅụ, se Josẹf furo mị pịkị anịa eke ḅụ simeḅịa ọgọnọju daọrụ ḅụ.

⁶ Ma sọnọma ḍiekiri ma sime ḅara ọ́ nwọse ḍiri ḅie gịẹịn, se anị se ḅo ị̀ pịrị. Anịsịkị àrị ịkịan wakị se Nyanaḅọ mịna Tamụnọ Ḅe ḅịpị gbela ọ́ pịrịḅịa.

⁷ Livaị apụma, anị sime ḅaraḅụ, ini ómine kirikọn apụma na ama mị ḍia ẹkẹ, anịatịḅị inia ḍiekiri anị Nyanaḅọ Ḅe agbamịẹ apụ ḅaraḅụ fịrịnwẹngị ọ̀ pịrị mị-ẹ. Ini Gadị na, Rubẹnị na, pịkị Manasẹ na awọma ọkụma inia ama ini ọkị ḅọrọsam Jọdan mị ḅụ ịrụapakapaka nyọ daọrụ ḅụ, anị Moziz, Nyanaḅọ Ḅe fịrịnwẹngịḅọ ḅe se ini pịrịye mị.”

⁸ Jọsụwa ḅe ini mịẹḅịaye ma ḍuko ini pịrị so sịkị, owuapụma ini paka somun kiri mị ḍikimẹ, se ḍiri ḅie gịẹịnḅịa ẹrẹchị; “Ó mun bebe kiri mị mgba ḍiki kelema, se anị seni ḍiri ḅie gịẹịn, se vinpịkị ị̀ damaḅo. Anịsịkị mịanga Shịlo mị ḅie ḅụ àrị ịkịan wakị Nyanaḅọ Ḅe ḅịpị gbela ọ́ pịrịḅịa.”

⁹ Anị owuapụma ini somun bebe kiri mị mgba ḍiki kelema se anị seni ḍiri ḅie gịẹịnmẹ ini wẹrị anị seni sọnọma kiri ḍie ọkụ mị, pịkị amama ẹrẹ ma se ḍiri ḅie chụamẹ. Anịsịkị ini vinpịkị Jọsụwa ḅe damamunmẹ ini ikowarịma pike sime nyọ mị ḅụ Shịlo mị ḅie.

¹⁰ Jọsụwa ḅe ori ịkịan wakị se Nyanaḅọ Ḅe ḅịpị gbela ini pịrịmẹ, se Izrẹl mị ḅie kirikọn furoma inia ḍiekiri seni ini pịrịmẹ kọn kirima ḅụ.

Sime Bẹnjamin Pịrị Eke Mị

¹¹ Sime Bẹnjamin sẹ furo ḅie awọma pịrị eke mị anị ini tatarị ḍieḅịaye-ẹ. Inia kiri mị Juda na Josẹf na furoma ogboku ḅụ anị anị simeye-ẹ.

¹² Ọgọnọju daọrụ mị ḅụ inia eke mị Jọdan mị ḅụ anị sakịmẹ se anị ọkịmun Jẹriko mị ḅụ ọgọnọju daọrụ mị lamẹ, anị tukoro nyọ mị; se ịrụasọsọ nyọ daọrụ ḅụ chịngị-ọgọnọ-sẹ mị tolu ḅọrọ ọkịmun Bẹt-Avẹn onwun ele mị la.

¹³ Eke mị pịkị mun tukoro nyọ mị ḅụ chukuju daọrụ ḅụ Lụz mị lamẹ (anị Bẹtẹl ini nwọse chịn nyọ mị), pịkị somun Atarọt Ada mị la, tụndụ mị ọgọnọ ḅụ chukuju daọrụ, Bẹt Horọn ḅụ ideri koro nyọ mị.

¹⁴ Eke mị pịkị so jịn pẹkẹrẹ damẹ, anị kanama chukuju daọrụ ḅụ ịrụasọsọ nyọ daọrụ ḅụ mị gbọrị tụndụ mị ḅụ sakị mun Kiriat Beal mị lamẹ (anịkanịka Kiriat Jearim mị-ẹ), sime Juda furo mị pịrịye mị. Mị anị ịrụasọsọ nyọ daọrụ eke mị-ẹ.

¹⁵ Chukuju daọrụ mị ḅụ eke mị Kiriat Jearim mị aka ḅụ anị sakịmẹ pịkị ọkịmun Nẹftoa Iderimengi mị tịḅị lamẹ.

¹⁶ Anị pịkị ideri mun tụndụ mị chuku lamẹ anị Hinọm Pẹsịkiri mị tọrọkọ simeye mị. Rifeim Pẹsịkiri mị ọgọnọju daọrụ mị kuluma ḅụ. Anị pịkị chukuju daọrụ ḅụ toluḅọrọ mun Hinọm Pẹsịkiri mị lamẹ, Jebus apụ chịngị mị ḅụ chukuju daọrụ mị, Ẹnrogẹl mị damun ọrụ ḅụ.

¹⁷ Anị pịkị kanama ọgọnọju daọrụ ḅụ mun Ẹnshimẹsh mị la pịkị somun Gelilọt mị lamẹ. Adumim Ḅọrọnyọ mị na damadamaye mị. Eke mị pịkị tukoro mun Bohan Ḍụparị mị lamẹ (Bohan ḅe Rubẹnị ya-ẹ)

¹⁸ se ọgọnọju daọrụ chịngị mị ḅụ somun Jọdan Pẹsịkiri mị lamẹ. Anịsịkị anị tukoro mun pẹsịkiri mị ḅie sọmẹ,

¹⁹ Bẹt Hogla chịngị mị ḅụ ọgọnọju daọrụ ḅụ ḅọrọ, se mun Jikeka Opu Tọrụ ḅụ ọgọnọju daọrụ ḅụ kulumamẹ. Mị anị chukuju daọrụ mị ḅụ eke mị-ẹ.

²⁰ Jọdan mị anị ịrụapakapaka nyọ daọrụ mị ḅụ eke mị-ẹ. Mà eke ma anị ama mị ḅụ Bẹnjamin furo ḅie awọma ḍiaọkị aye ma-ẹ iniaye ḅaraḅụ.

²¹ Sime Bẹnjamin sẹ ḅie furo awọma pịrị amama anị Jẹriko na, Bẹt Hogla na, Emek Keziz na,

²² Bẹt Araba na Zẹmaraịm na Bẹtẹl na,

²³ Avim na, Para na, Ọfra na,

²⁴ Kẹfaramoni na, Ọfnaị na pịkị Giba na, oyimaịn opuama fịnjị, pịkị àrị kelema amama na.

²⁵ Pịkị Gibiọn na, Rema na, Bierọt na,

²⁶ Mizpa na, Kẹfaịra na, Moza na,

²⁷ Rekẹm na, Apiẹl na, Tarala na,

²⁸ Zila na, Haẹlẹf na, Jebus na (anịkanịka Jerusalẹm mị-ẹ), Gibia na pịkị Kiriat Jearim na; oyi inein opuama fịnjị, pịkị àrị kelema amama na. Mị anị Bẹnjamin sẹ mị ḅie sime furoma ḍiaọkị kiri mị-ẹ iniaye ḅaraḅụ.