Jọshụa 14 - Kịrịkẹnị Baịbụl

Jọdan Mị Ḅụ Ịrụasọsọ Nyọ Daọrụ Mị Ḍie Mị

¹ Mị anị Izrẹlapụma Jọdan ḅụ ịrụasọsọ nyọ daọrụ ḅụ Kenan mị ḍiama inia ḅụ pịrị ọkụ mị-ẹ. Ẹleaza agbamịẹḅọ ḅe na, Jọsụwa, Nọn yaḅe na, pịkị furo tịḅịda apụma na, Izrẹl mị ḅie furofuro ḅụ ini paka ḅaraḅụ ama mị ḍie tomonima pịrịmẹ.

² Nyanaḅọ Ḅe tọn Moziz ḅe pịrị ḅaraḅụ, Jọdan mị ḅụ ịrụasọsọ nyọ daọrụ mị ḅụ pẹkẹrẹ ma ịkịan wakị ḅụ ini árị ḍie esenie-a furoma na gbọrị pẹkẹrẹ na nwọ pịrịmẹ.

^3-4 Moziz ḅe Jọdan mị ḅụ ịrụapakapaka nyọ daọrụ mị, ò ḍie seni ísí mama furoma na pẹkẹrẹ mị na pịrị ḅọrọsam. Ọkụma Livaị awọma ò ḍiekiri seni ini pịrịkẹ. Josẹf furo ḅie apụma ini ini seni mama furo nwọ ḍiemẹ: Manasẹ na, Ifrem na, Livaị furo ḅie apụma mị inia pẹkẹrẹ-ẹ nwọḅẹ ḍiekiri ofori-ẹ ḅẹ sọnị opuamama ḅie ḅụ ini angaḅịa nyọ Moziz ḅe ọ̀ nwọse ini pịrịmẹ pịkị inia namama osuein fịḅịa ele ma na.

⁵ Izrẹlapụma ini ama mị ḍia ọkịmẹ Nyanaḅọ Ḅe tọn Moziz ḅe pịrịsa ḅaraḅụ.

Hibrọn Mị Ini Se Kelẹb Ḅe Pịrịmẹ

⁶ Gbọrị ene gbọrị apụ Juda sẹ mị ḅie ḅụ so Jọsụwa ḅe damamunmẹ Gilgalị mị ḅie ḅụ. Inia ḅụ gbọrịḅọ anị Kelẹb, Jẹfunẹ yaḅe-ẹ anị Kenịzaịḅọ ḅe, ọ̀ nwọse Jọsụwa ḅe ḅẹmẹ, “Nyanaḅọ Ḅe ị́rị́ na ị̀rị̀ na gbolomaye ḅụ Kedẹsh Banea mị ḅụ ḍuko Moziz Tamụnọ tomoniḅọ ḅe pịrịye mị ị́ nemimẹ

⁷ Kụra mesi à nwọ lasịkị ḅụ anị Nyanaḅọ Ḅe fịrịnwẹngịḅọ Moziz ḅe, ị̀ fịrịma se à ḅo mị ama mị ẹnyẹ mẹ. Kuḅie-se-ḅụgbana-gbẹịn ḅẹrẹ à nwọse ḅo ḍuko ọ̀ pịrịmẹ.

⁸ Ini ị̀rị̀ na mun apụma, mịẹse mịna tomonima inia ḅalafamẹ. Ọkụma ị̀rị̀ à ḅereni nyana ḅara se ị̀ Nyana Tamụnọ Ḅe ḅịpịpokimẹ.

⁹ Àrị ọkọ mịẹye ẹrẹchị, Moziz ḅe ò yeḅereni ị̀ pịrịmẹ na, ị̀ya awọma na ị̀rị̀ na ị̀ ḅụọ lasa kiri mị ò se wa pịrịḅịa gbarịmaka ḅaraḅụ mịna ḍiekiri-ẹ.

¹⁰ Mịọkụ, ḍiki, anị sọnọfa-kụra-mesi-oyi-fịnjị-lasam Nyanaḅọ Ḅe mịn mị ḍuko Moziz ḅe pịrị sịkị. Anị Izrẹl mị onwun ele mị nwẹngị saḅarị sịkịḅụ-ẹ, se Nyanaḅọ Ḅe ò yeḅereni ị̀ pịrịsa ḅaraḅụ, ị̀ ḍumo mị kokoḅo mịmgba lamẹ. Ị̀ ḍiki! Sọnọfa-kụra-iniasi-oyi-fịnjị à nwọ lasam,

¹¹ anị-ẹ ḅẹ sọnị, Moziz ḅe ị̀ fịrịma pakụma sịkị mị ḅụ àrị ịnyọ nyana ọkụ mị, anị à pa sime wara ọkụ-ẹ. Mịọkụ sọnị à pa ịnyọ nyana waraḅẹ ọmụgbin ḅụ pịkị ḅẹyeḅẹye ḅụ sọnị.

¹² Mịọkụ, ị̀rị̀ na mun apụma na ị̀rị̀ na, ḅo ḅẹrẹ mị ḍuko ene ḅụ, Nyanaḅọ Ḅe ḅereni ị̀ pịrị chịngị-ọgọnọ-sẹ mị se ị̀ pịrị. Wa ḍuko ọ́ pịrịmẹ na Anakim nwọ chịn opu-godoro apụ anịju ḅụ simemẹ, ḍụḅaḍụḅa onu inia opuamama gbọrị kelemamẹ. Sosi Nyanaḅọ Ḅe ori ị̀ ḅụ simeḅịa, se àrị ini desinḅịa anị Nyanaḅọ Ḅe pa ḍukosa ḅaraḅụ.”

¹³ Jọsụwa ḅe ọ̀ ḅẹlẹma se Kelẹb, Jẹfunẹ yaḅe pịrịmẹ pịkị Hibrọn opuama mị se ọ̀ pịrịmẹ na anị oriaye nwọsọ.

¹⁴ Hibrọn mị mịọkụ sọnị anị pa sime Kelẹb furo ḅie apụma pịrị waraḅẹ anị Jẹfunẹ ya, Kenịzaịḅọ ḅe, anịatịḅị ò ḅereni nyana ḅara se Nyanaḅọ Ḅe ḅịpịpokimẹ, anị Izrẹl Tamụnọ Ḅe.

¹⁵ Tatarị sịkị mị ini nwọse Hibrọn mị chịnmẹ, Aba opuama. (Aba ḅe anị Anakim apụ mamgba ḅie opuḅọ ḅe-ẹ.) Mịọkụ ama mị ḅie deinma pakasam.