Jọshụa 11 - Kịrịkẹnị Baịbụl

Jọsụwa Ḅe Jebin Ḅe Na Ọ̀ Ḅụsọ Apụ Ma Na Nẹngịmamẹ

¹ Izrẹl mị nyanasa ọmụḅaraiḅi ma, Jebin, Hezọ Amanyanaḅọ ḅe nwọ naa sịkị, ori oku se Jobab, Medọn Amanyanaḅọ ḅe fịrịmamẹ, ọ̀ pịkị oku se Shịmrọn mị na Akshaf mị na amanyanapụma fịrịmamẹ,

² pịkị chịngị ọgọnọ sẹma ḅe amanyanapụma na, ọgọnọju daọrụ, Jọdan Pẹsịkiri anị Galili Ḍapa mị ḅụ na, chuku daọrụ mị na, chịngịma chuku ma, pịkị Do tọrụ aka mị na kpekima sime nyọ mị ḅe amanyanapụ mamgba na fịrịmamẹ.

³ Ọ̀ pịkị ḅịpị se Kenan apụma fịrịmamẹ Jọdan ḅụ mama pẹkẹrẹ ma ḅụ sime apụma na, Amọraị apụma na, Hitaị apụma na, Pẹrizaị apụma na, pịkị Jebus apụma na anị chịngị ọgọnọ sẹ mị na, pịkị Hivaị apụma na anị Hamọn Tụndụ mị chuku sime ama mị, anị Mizpa sẹ mị ḅie ḅụ.

⁴ Ini inia owuni mamgba se ḅomẹ, tọrụ aka ḅụ onwun ḅaka la ọkụ anị ọmụogbo ma inia owuapụma ḅaka la ọkụ-ẹ. Ini pịkị tọn-a asụn na owuni kporokporo na nwọ nyanamẹ.

⁵ Mịna amanyanapụ mamgba inia owunima ọkịḅo gboloma se Mirọm Mengi mị nyọ ḅụ ikowarịma pike simemẹ Izrẹlapụma na ọmụgbinḅịa ẹrẹchị.

⁶ Nyanaḅọ Ḅe nwọse Jọsụwa ḅe ḅẹmẹ, “Ini ḍikiḅalafama. Ḅa nwọ pembe ḅiri laḅịa sịkị àrị inimgba ḅaa Izrẹl mị pịrị sosam. Ị́ inia asụnma mịẹse árị ikeliḅịa pịkị inia kporokporoma dọkịmaḅịa.”

⁷ Anị Jọsụwa ḅe na oria owuni mamgba na bẹkẹma owuse ini pakaye-ẹ Mirọm Mengi mị nyọ ḅụ.

⁸ Nyanaḅọ Ḅe ọ̀ mịẹ sarasarama Izrẹlapụma pịrị se ini ini nẹngịmamẹ; Izrẹlapụma owuse ini paka pịkị ini ḍuko mun ọgọnọju daọrụ ḅụ Misrẹfọt Meim mị lamẹ pịkị Saịdọn mị na, pịkị ịrụapakapaka nyọ daọrụ ḅụ mun Mizpa pẹsịkiri mị lamẹ. Ini owusọ nweni ọkịmun tarakapụma ḅụ gbọrịḅọ sọnị ḅarị kọnka sịkị lamẹ.

⁹ Jọsụwa ḅe, Nyanaḅọ Ḅe tọn ḅara mị anị ọ̀ pịkị ini mịẹ ọkụ-ẹ; inia asụnma ọ̀ mịẹse árị ikelimẹ, ọ̀ pịkị inia kporokporoma dọkịmamẹ.

¹⁰ Anịsịkị Jọsụwa ḅe ọ̀ vinpịkị mun Hezọ mị ọkị, pịkị anịa amanyanaḅọ ḅe ḅaamẹ. (Anịsịkị mị ḅụ, Hezọ mị, anị àrị ama mamgba ḅụ kụrọtẹịn ama mị-ẹ.)

¹¹ Anịju ḅụ simeḅọ goyegoye ini ḅaamẹ; gbọrịḅọ sọnị ḍumokẹ, opuama mị sọnị ini dọkịmamẹ.

¹² Jọsụwa ḅe mịna opuama mamgba na arịa amanyanapụma na ọkị, pịkị inimgba ḅaafamamẹ, anị Moziz, Nyanaḅọ Ḅe fịrịnwẹngịḅọ ḅe tọnsa ḅaraḅụ.

¹³ Ọkụma chịngịma ọgọnọ ḅụ sime opuamama ḅie Izrẹlapụma ini dọkịmaye ofori-ẹ, Hezọ mị sikima ọkụma anị Jọsụwa ḅe dọkịmaye mị.

¹⁴ Izrẹlapụma mịna opuamama ḅie yelaye ma na pịkị inia namama na ọkị se somẹ. Ọkụma tomoniḅọ goyegoye ini ḅaamẹ; ḍumo ḅụ sime gbọrịḅọ sọnị ofori-ẹ.

¹⁵ Nyanaḅọ Ḅe ori oria olokoma chụa Moziz oria fịrịnwẹngịḅọ ḅe pịrịmẹ, Moziz ḅe àrị se Jọsụwa ḅe pịrịmẹ, se Jọsụwa ḅe àrị kokomẹ. Nyanaḅọ Ḅe tọn Moziz ḅe pịrịye goyegoye ḅụ ọ̀ mịẹkaye ofori-ẹ.

Jọsụwa Ḅe Ọkị Eke Mị

¹⁶ Jọsụwa ḅe, ama mamgba ori ọkịmẹ chịngị ọgọnọ amama na, chịngị mị chuku amama na, ọgọnọju daọrụ mị na chukuju daọrụ mị na, Goshẹn pẹkẹrẹ mị mgba na pịkị anịa chukuju daọrụ ḅụ kpoinkpoin kiri amama na, pịkị Jọdan Pẹsịkiri mị na.

^17-18 Eke mị finjima mun Helak Tụndụ mị ḅụ chuku daọrụ ḅụ Idọm na kpeki nyọ mị lamẹ, anị pịkị mun ọgọnọju Bealgad mị lamẹ, Lẹbanọn Pẹsịkiri mị ḅie Hamọn Tụndụ mị ḅụ chuku daọrụ mị. Jọsụwa ḅe ọ̀ mị pẹkẹrẹ amanyanapụma na ọmụgbin mun ḅọlọ sịkị lamẹ, ọkụma inimgba ori ini kun pịkị ini ḅaafamamẹ.

¹⁹ Gibiọn mị kẹngẹ anị Izrẹl mị na deinma mịẹye-ẹ opuamama ḅie, anị Hivaị apụma na ḅụ da apụ anga ama mị-ẹ. Ísí kirikọn ama mamgba ọmụ ḅie ini árị kanmẹ.

²⁰ Nyanaḅọ Ḅe ọ̀ mịẹse ini kuḅie kụrọma Izrẹlapụma na ọmụ mị gbinmẹ mịẹse ini inimgba ḅaasinḅịa ọkụ ḍikitịḅịfoin oforika ḅaraḅụ. Mịn Nyanaḅọ Ḅe tọn se Moziz ḅe pịrị ḅara mị-ẹ.

²¹ Mịn sịkị mị ḅụ Jọsụwa ḅe mun opuma godoro apụ sẹ mị kanmẹ, anị ini Anakim nwọse chịn chịngị ọgọnọ sẹ mị ḅie anga apụma, anị Hibrọn na, Diba na, Enab na, pịkị Juda na Izrẹl na nyọ ḅụ sime chịngị ọgọnọ sẹ mị mgba na Jọsụwa ḅe gbọtụma ini ḅaa pịkị inia amama famamẹ.

²² Anakim apụma ḅụ kọn gbọrịḅọ sọ ofori-ẹ Izrẹl ama mị ḅie; kalapụ kẹngẹ anị Gaza mị na, Gat mị na pịkị Ashdọd mị na, ḅie ḅụ kọnye-ẹ.

²³ Jọsụwa ḅe ama mị mgba ori ọkị famamẹ, anị Nyanaḅọ Ḅe tọn Moziz ḅe pịrịsa ḅaraḅụ. Jọsụwa ḅe ori anị seni Izrẹlapụma pịrị se anị iniaye sọmẹ, ọ̀ pịkị anị ḍie ini pịrịmẹ, sẹ sẹ gbọrị kiri gbọrị kiri nwọ ọkịmẹ. Se tomonima ọmụgbin ḅụ ịnyọsaramẹ.