Jọshụa 1 - Kịrịkẹnị Baịbụl

Tamụnọ Ḅe Tọn Jọsụwa Ḅe Pịrịmẹ Kenan Mị Kan

¹ Nyanaḅọ Ḅe fịrịnwẹngịḅọ Moziz ḅe fị ḅọrọ sịkị, Nyanaḅọ Ḅe nwọse Jọsụwa, Nọn yaḅe ḅẹmẹ, anị ḅarachụa Moziz ḅe pịrịḅọ ḅe.

² Ọ̀ nwọ ḅẹmẹ, “Ị̀ya fịrịnwẹngịḅọ Moziz ḅe ọ̀ fịsam. Mịọkụ ọ́ ḅụkarakarama, ị́rị́ na bebe Izrẹlapụ mamgba na, se ọ́ Jọdan Tọrụ mị saḅa mun à se ọ́ pịrịarị ama mị ḅie sọ.

³ À ḍuko Moziz ḅe pịrị ḅaraḅụ, ị́rị́ na ị̀ya tomoni mamgba na ḅụọ se lamaḅịa nyọ mamgba ama mị à se ọ́ pịrịḅịa.

⁴ Ọ́mịna eke onwun ele mị ḅie chuku daọrụ mị ḅụ ọkịmun Lẹbanọn Tụndụ ma laḅịa ọgọnọju daọrụ mị ḅụ; Yufretis Tọrụ mị ḅụ ịrụapakapaka nyọ daọrụ mị ḅụ, sakịmun Hitaị apụ sẹ mị toluḅọrọ, mun Mẹditirenia Tọrụ mị la, ịrụasọsọ nyọ daọrụ mị ḅụ.

⁵ Jọsụwa, ị́ya ḍumo ene mamgba ḅie ineda ị́ nẹngịmaḅịaḅọ ofori-ẹ. À Moziz ḅe na sime ọkụ anị à pịkị ị́rị́ na simeḅịa ọkụ-ẹ. Sịkịmamgba àrị ị́rị́ na simeḅịa, ngịsị àrị ị́ wẹrịso-ẹkẹ.

⁶ Ịnyọ chụa pịkị kụrọ kuḅie nyana, anịatịḅị ị́ tịḅịnịḅọ sọ mịnapụma pịrịḅịa, mị à ḅereni inia olomu-aḍapụma pịrịsa ama mị ini nwọ ọkị angaḅịa sịkịḅụ.

⁷ Ị́rị́ pa ịnyọ chụa pịkị kụrọ kuḅie nyana; pịkị ọrị na ị̀ya fịrịnwẹngịḅọ Moziz ḅe chụa se ọ́ pịrị oloko mamgba ó kokomẹ. Arịaḅụ gbọrị pẹkẹrẹ sọnị se papaye mịẹma se ị́ mun-anga-mun-anga ye ị́rị́ na iḅiḅịa.

⁸ Ọrị na oloko ḍiri mị, ọ́ tẹkẹ sịkị goyegoye ómine anị gomẹ. Anị ḍawọ, ḍin-na-enekaka na ḅụ, pịkị ọrị na anịa ḅie gịẹịn koromaye goyegoye ó kokomẹ. Anịsịkị ọ́ lọkọlọkọḅịa, ye pịkị ómine na iḅiḅịa.

⁹ Se ḅiekoroma na àrị ị́ ḅẹmẹ ịnyọ chụa pịkị kụrọ kuḅie nyana! Ḅalafama pịkị kuḅie lọkọmama, anịatịḅị ị̀rị̀ ị́ Nyana Tamụnọ Ḅe àrị ị́rị́ na omi-ẹ ị́ mun-anga-mun-anga ḅụ.”

Jọsụwa Ḅe Tomoni Ma Mịẹḅịaye Tọn Ini Pịrịmẹ

¹⁰ Anịsịkị Jọsụwa ḅe tọn Izrẹl tịḅịnịma pịrịmẹ na

¹¹ ini ikowarịma pike sime nyọ mị ḅụ ini toluḅọrọ mun nwọse tomonima ḅe, “Ó fịye karakarama koroma, anịatịḅị tẹrẹ-a ḍin ḅụ ọ́ Jọdan Tọrụ mị saḅa mun Nyanaḅọ ọ́mịna Tamụnọ Ḅe se ọ́ pịrịarị ama mị ọkị angaḅịa.”

¹² Jọsụwa ḅe nwọse Rubẹnị na Gadị furoma na pịkị Manasẹ furo mị na ḅụ gbọrị pẹkẹrẹ ḅẹmẹ. Ọ̀ nwọ ḅẹmẹ,

¹³ “Ó se ḅiekoroma, na Moziz, Nyanaḅọ Ḅe fịrịnwẹngịḅọ ḅe, ò ḍuko ọ́ pịrịmẹ na Nyanaḅọ ọ́mịna Tamụnọ Ḅe mị Jọdan mị ḅụ ịrụapakapaka nyọ daọrụ ama mị ò se ọ́ pịrịse anị ọ́mịna ama sọḅịa.

¹⁴ Ọ́mịna erema na, ọ́mịna awọma na, pịkị ọ́mịna namama na mịanga simeḅịa, ọkụma owunima ini owuniayema ọkịso ọmụ munḅịa, ini ma tatarị inia juo Izrẹlapụma tọrọkọ pẹlẹma saḅa mun ḅarachụa ini pịrịḅịa

¹⁵ ọkịmun Jọdan mị ḅụ ịrụasọsọ nyọ daọrụ ama mị ini nwọ ọkị anga sịkị laḅịa, anị Nyanaḅọ ọ́mịna Tamụnọ Ḅe se ini pịrịsaye mị. Izrẹl furo mamgba ò deinma se inia amama ḅie sosa ḅẹḅẹ, anịsịkị re, mị ómine ineda vinpịkị soḅo mị ọ́mịna ama mị ḅie angaḅịaye-ẹ, anị Jọdan mị ḅụ ịrụapakapaka nyọ daọrụ mị ḅụ anị Moziz, Nyanaḅọ Ḅe fịrịnwẹngịḅọ ḅe se ọ́ pịrịye mị.”

¹⁶ Ini nwọse Jọsụwa ḅe pẹkẹrẹmẹ, “Ị́ se wa ḅẹye goyegoye wa mịẹḅịa ị́ pịkị wa fịrịma mun nwọḅẹ nyọ goyegoye wa munḅịa.

¹⁷ Wa ị́ ḅịpị pokiḅịa, anị wa Moziz ḅe ḅịpị pokipoki ọkụ mị, ye ị́ Nyana Tamụnọ Ḅe ị́rị́ na sime anị, ò Moziz ḅe na sime ọkụ mị!

¹⁸ Tụḅọ kụrọ se ị́ pịrị nọ nwọ gbela anịkanịka ị́ ḅịpị pokikaḅọ goyegoye nụḅọ ḅaa ḅụ sọḅịa. Ịnyọ chụa pịkị kụrọ kuḅie nyana!”