Jọn Iḅi Ḅẹrẹ Mị 2 - Kịrịkẹnị Baịbụl

Kana Ḅie Ereya Mị

¹ Mama ḍin karama ene ḅụ ereya Kana ama mị ḅie kiri ọkịmẹ, anị Galili sẹ mị ḅie Jizọs nyengima anịanga ḅụ simemẹ,

² se Jizọs Ḅe na oria ọḅụḍukoapụma na ini ini chịnmẹ ereya mị ḅụ.

³ Ini iru mamgba nwọ ḅu so sịkị, Jizọs nyengima nwọse ọ̀ ḅẹmẹ, “Ini ḅarị iru nyanakẹ.”

⁴ “À mịẹḅịaye nwọ ḍuko ị̀ pịrịma,” Jizọs Ḅe nwọse á pẹkẹrẹmẹ. “Ị̀ya sịkị ma lakẹ.”

⁵ Anịsịkị Jizọs nyengima ḍuko fịrịnwẹngịapụma pịrịmẹ, “Ori ọ́ ḅẹ mịẹ nwọḅẹ yelayelaye ómine anị mịẹ.”

⁶ Juapụ inia Tamụnọ tẹkẹ-aḅara ḅe oloko nwọ nyanamẹ, ḅụ sịkịrị gbolomaye ḅụ, se anị mịẹḅịa ye gose sonio-a ḍụparị ojongo anịnyọ simemẹ, arịa ḅie gbọrịye gbọrịye ineda pa si na soi na pembe galọnị mengi ḅụ nwọ dekiḅịa.

⁷ Jizọs Ḅe nwọse fịrịnwẹngịapụma ḅẹmẹ, “Ó mengi se mà ojongo ma ḅie chụa ḅeinma.” Ini àrị chụa ḅeinma mun ḅịpị ḅọkọ lamamẹ,

⁸ ọ̀ pịkị anịsịkị ḍuko ini pịrịmẹ, “Mịọkụ ó mengi ḍu pakụmaḅo, se anị ọkịmun alalị mị tịḅịdaḅọ ḅe pịrị.” Ini mengi mị ọkịmun ọ̀ pịrịmẹ,

⁹ anị mịọkụ pịkịḅo iru sọsaye mị ọ̀ nwọse ọ̀ ḅịpị lamamẹ. Mịn iru mị ḅo anga ò nemikẹ, (ọkụma, mengi mị ḍu pakụmaḅo fịrịnwẹngịapụma ini nemimẹ); anị ori ereyaḅọ ḅe chịnye-ẹ

¹⁰ se nwọse ọ̀ ḅẹmẹ, “Tomoniḅọ goyegoye tatarị iḅitẹịn iru mị nwọse ḅoḅomẹ, anịsịkị anị iru mị igoniapụma tọrụ ḅaa so sịkị, ọ̀ papa iru mị nwọse ḅo ini pịrịḅịa. Ọkụma ị́rị́ iḅitẹịn iru mị nwọse wẹrịḅo mịọkụ lasam!”

¹¹ Galili ḅie Kana mị ḅie mị Jizọs Ḅe Oria tatarị ḅụgbiripuma fịrị mị nwọ nwẹngịye-ẹ, anịanga Ori Oria boma mị nwọ ḍiepakụmamẹ, se Oria ọḅụḍukoapụma Ò ḅerenimẹ.

¹² Mịn mị ḅọrọ sịkị, Jizọs Ḅe na nyọngọrọma na, Oria owuapụ mịnapụma na, pịkị Oria ọḅụḍukoapụma na so Kapanịọm mun mẹ, se boka ḍin seni anịnyọ simemẹ.

Jizọs Ḅe Oputẹkẹwarị Mị Mun mẹ

¹³ Kalaye kọnmẹ Saḅaḅọrọ Alalị mị ḅo la, anị Jizọs Ḅe so Jerusalẹm mun ye-ẹ.

¹⁴ Oputẹkẹwarị mị ḅie nama na, anana na, elesika na dẹrịarị owuapụ ọ̀ nwọ ọrịmẹ, pịkị igbiki ḍinmarịapụ na, inia dẹbụl ma angasịkị sime waraḅẹ.

¹⁵ Anị ò ḍiki seni fomuye mịẹ, anị seni Oputẹkẹwarị mị ḅie sime namama depakụmaye-ẹ, ananama na, ísí namama na, igbiki ḍinmarịapụ dẹbụl ma pịkị iḅo, se inia igbiki ma galagalamamẹ

¹⁶ pịkị tọn elesika ma dẹrịapụ ma pịrịmẹ, “Ọ́ mịanga àrị dekisin! Ómine ị̀ Ḍaḅe warị mị seni fẹ tuḅo nyọ mịẹ ma!”

¹⁷ Oria ọḅụḍukoapụma se ḅiekoromamẹ na fịafịa ḍiri mị nwọ ḅẹmẹ, “À nyana ị́ya warị mị pịrị iḅi kuḅie mị, Yei Tamụnọ, ị̀ ḅie fịnị kọrị ọkụ kọrịmẹ.”

¹⁸ Ju ḅẹrẹtọn apụma vinpịkị Ọ̀ damaḅo ḅẹrẹ seni Ò gbelamẹ, “Che ḅụgbiripumaye Ị́ ineda nwọ mịẹ ḅe, se ḍiepakụma na Ị́ kụrọ nyanamẹ se nwọ simeye mịẹ?”

¹⁹ Jizọs Ḅe pẹkẹrẹmẹ, “Ọ́ mị Oputẹkẹwarị mị kan koroma, tẹrẹ-a ḍin ḅụ à pịkị anị nama chịẹmaḅịa.”

²⁰ “Tẹrẹ-a ḍin ḅụ Ị́ pịkị anị nama chịẹma ḅe?” ini nwọse Ò gbelamẹ. “Ineinfa kụra mesi oyi fịnjị anị nwọ ọkịmẹ se mị Oputẹkẹwarị mị nwọ nama!”

²¹ Ọkụma Jizọs Ḅe ḅẹrẹ ḍukoarị Oputẹkẹwarị mị anị Oria oju mị-ẹ.

²² Anị mịẹse ini fịḅụ Ọ̀ sịsẹma sịkị, Oria ọḅụḍukoapụma anị se ḅiekoromamẹ na mịn mị Ò ḍuko ḅọrọsam, se ini fịafịa ḍiri mị ḅerenimẹ, pịkị Jizọs Ḅe ḍukoye na.

Jizọs Ḅe Tomoniḅọ Ḅe Simeọkụ Nemimẹ

²³ Jizọs Ḅe Jerusalẹm ḅie simearị sịkị, Saḅaḅọrọ Alalị mị ḅie, tọn-a tomoni ò ḅerenimẹ ọ̀ nwẹngị ḅụgbiripuma fịrịma ini nwọ ọrị sịkị.

²⁴ Ọkụma Jizọs Ḅe ori ọ̀ ḅụ seni ini pịrịkẹ, anịatịḅị ori iḅiọkụma inimgba nemimẹ.

²⁵ Nweniḅọ gose tomoni gbolomaye ḍuko ọ̀ pịrịḅịaye ofori-ẹ, anịatịḅị ori inia kuḅiemgbọlụma ḅie simeye nwọ nemimẹ.