Jọn Iḅi Ḅẹrẹ Mị 18 - Kịrịkẹnị Baịbụl

Jizọs Ḅe Kun Mị Pakaḅara

¹ Jizọs Ḅe mịn tẹkẹ mị kọn so sịkị, ori oria ọḅụḍukoapụma na Kidrọn Ideri mengi mị saḅamẹ. Anịanga gbọrị ozu omi-ẹ, Jizọs Ḅe na oria ọḅụḍukoapụma na anịa ḅie sọmunmẹ.

² Judas, ịbafịḅọ ḅe, anị sime anga ò nemimẹ, anịatịḅị tọn-a sịkị Jizọs Ḅe na oria ọḅụḍukoapụma na anịnyọ sime simesam.

³ Anị Judas ḅe Rom owuni gbọrị kpo na tịḅịnị agbamịẹapụma na, se sẹịn da Oputẹkẹwarị koruapụma na ọkị ọ̀ ḅụ chụa se ozu mị ḅie sọmunye-ẹ, owuniaye inia ḅara omi-ẹ pịkị tọnjie ma na pọnjị tọnjie ma na ini nwọ ọlọmẹ.

⁴ Jizọs Ḅe ọ̀ ḅụ pakaḅịaye mamgba nemi so se, nwẹngị ini damamun se, nwọse ini gbelamẹ, “Ọ́ tụḅọ ḍọkị-ao?”

⁵ Ini nwọ pẹkẹrẹmẹ, “Jizọs Nazarẹtḅọ Ḅe-ẹ.” Ọ̀ nwọse ini ḅẹmẹ, “Ị̀rị̀ ori-ẹ.” Judas, ịbafịḅọ ḅe, anịnyọ ini na chịẹsimemẹ.

⁶ Jizọs Ḅe nwọse ini ḅẹ sịkị, “Ị̀rị̀ ori-ẹ,” ini ọḅụ da, se ḅịkị koromẹ.

⁷ Jizọs Ḅe pịkịna ini gbelamẹ, “Tụḅọ ọ́ nwọ ḍọkị-ao?” Ini nwọ ḅẹmẹ, “Jizọs, Nazarẹtḅọ Ḅe-ẹ.”

⁸ Jizọs Ḅe nwọ ḅẹmẹ, “À ḍuko ọ́ pịrị ḅọrọsam na ị̀rị̀ ori-ẹ, ó nemikase ị̀ ḍọkịaḅẹ ḅẹḅẹ, ye ísíapụma so.”

⁹ (Ọ̀ mịn mị nwọ ḅẹmẹ, mịẹse ò ḍuko ḅọrọsaye mị ḅo kọkọmaye sọḅịa ḅara; na “Ḍaḅọ ị́ se ị̀ pịrịapụ ma ḅụ à gbọrịḅọ sọnị famakẹ.”)

¹⁰ Saịmọn Pita ḅe, okola-agiji ọ̀ nwọ nyanamẹ, ori anị wọrọ pakụma, se Gele Agbamịẹḅọ ḅe omoniḅọ ḅe gbogbo se oria amaḅara anga ḅeri nwọ pẹlẹsinmẹ. Omoniḅọ ḅe ẹrẹ anị Malkọs.

¹¹ Jizọs Ḅe nwọse Pita ḅe ḅẹmẹ, “Ị́ya okola-agiji mị se pịkị anị pakaḅo anga chụa! Ị́ koroma na ị̀ Ḍaḅe se ị̀ pịrị tọrụsiọrị ọmọngọ mị àrị anị ḅu ẹka?”

Jizọs Ḅe Anas Ḅe Tọrọkọ Chịẹmẹ Ḅẹrẹkọn Gose

¹² Rom owuni kpo na inia tịḅịnịḅọ ḅe na, pịkị Juapụ nyọ koruapụma na Jizọs Ḅe kun se ọ̀ fịna kpemẹ,

¹³ se tatarị ò se Anas ḅe damamunmẹ. Ori anị Kayafas ta ma ḍawu ḅe-ẹ, anị kụra mị ḅie Gele Agbamịẹḅọ sọ ḅọ ḅe.

¹⁴ Kayafas ḅe mị anị ḍuko Ju ḅẹrẹtọn apụma tọrụ finjiye-ẹ na tomoni mamgba tịḅị gose gbọrịḅọ fị mị iḅitẹịnmẹ.

Pita Ḅe Jizọs Ḅe Pikimẹ

¹⁵ Saịmọn Pita ḅe na jịn ọḅụḍukoapụ na Jizọs Ḅe ḍukomẹ. Gele Agbamịẹḅọ ḅe iḅi ḅara nwọse ísí ọḅụḍukoḅọ ḅe nemimẹ, anị ọ̀ gose Jizọs Ḅe ḍuko Gele Agbamịẹḅọ ḅe ḅẹrẹkọn warị mị ḅe odo mị ḅie sọmunye-ẹ,

¹⁶ Pita ḅe nụngọ ḅụ, odoḅọkọ anga chịẹsimemẹ. Anị ísí ọḅụḍukoḅọ ḅe ọḅụ paka se, ọkwẹịn odoḅọkọ mị koru sime eremenitọkụ ma pịrị se Pita ḅe ọkị ḅẹrẹkọn warị mị odo mị ḅie chuye-ẹ.

¹⁷ Odoḅọkọ mị koruarị eremenitọkụ ma nwọ seni Pita ḅe ḅẹmẹ, “Ị́rị́ ori ḅọ ḅe ọḅụḍukoapụma ḅie gbọrịḅọ ka?” Pita ḅe nwọ pẹkẹrẹmẹ, “Ẹn-ẹn, ị̀rị̀kẹ.”

¹⁸ Oḅoku sịkị-ẹ, se fịrịnwẹngịapụma na nyọ koruapụma na fịnị nwọ tọnọ se chịẹ anị kelema se anị temiaḅẹ, Pita ḅe saḅa mun se ini na chịẹ sime, se fịnị mị temiaḅẹ.

Gele Agbamịẹḅọ Ḅe Ḅẹrẹ Se Jizọs Ḅe Gbelamẹ

¹⁹ Gele Agbamịẹḅọ ḅe ḅẹrẹ se Jizọs Ḅe gbelamẹ, oria ọḅụḍukoapụma na oria ḍieye na gbolomaye ḅụ.

²⁰ Jizọs Ḅe pẹkẹrẹmẹ, “À sịkịmamgba amaogbo ọkwẹịn ḅẹḅọ ḅẹḅọ pịrịpịrịmẹ; ị̀ya ḍieye mamgba tẹkẹwarịma na Oputẹkẹwarị ḅie na mị à sime àrị ḍieḍieye-ẹ tomoni mamgba ḅo koḅirima anga. À kikima nyọ ngịsị ḍukosaye ofori-ẹ.

²¹ Nde anịọkụma, ị́ gose ḅẹrẹ seni ị̀ gbelarịye? À ḍukoye naa apụma nwọ gbela. À ḍuko ini pịrịye nwọse ini gbela—à ḍukoye ini nemi waraḅẹ.”

²² Jizọs Ḅe mịn mị nwọ ḍuko sịkị anịnyọ sime nyọ koruapụma ḅie gbọrịḅọ Jizọs Ḅe ḅụrọ se nwọ ḅẹmẹ, “Nde ị́ gose dadama mị ḅara nwọse ọkwẹịn Gele Agbamịẹḅọ ḅe pịrịye!”

²³ Jizọs Ḅe ọ̀ pẹkẹrẹmẹ, “À ḍuko irimaye nemikase omi-ẹ ḅẹḅẹ, anị mị ḍuko mịnyọ simeḅọ goyegoye nwọ pịrị. Ọkụma à ḍukoye mị nemikase karakaraye ọkụma nde ị́ gose ị̀ ḅụrọye?”

²⁴ Ini pa ọ̀ fịna kịkịma se, Anas ḅe ò se Kayafas Gele Agbamịẹḅọ ḅe fịrịmamẹ.

Pita Ḅe Pịkịna Jizọs Ḅe Pikimẹ

²⁵ Pita ḅe pa anịnyọ chịẹ se fịnị mị temi simarịogbo anị ísíapụma nwọse ọ̀ ḅẹye-ẹ, “Ị́rị́ ori ḅọ ḅe ọḅụḍukoapụma ḅie gbọrịḅọka?” Ọkụma Pita ḅe anị pikimẹ, “Ẹn-ẹn, ị̀rị̀kẹ.”

²⁶ Gele Agbamịẹḅọ ḅe omonima ḅie gbọrịḅọ, Pita ḅe ḅeri pẹlẹsinḅọ ḅe na pakụmaḅọ ḅo kụrọ pụkọ ḅụ nwọse Pita ḅe gbelamẹ, “Anị ozu mị ḅie àrị ị́ ọrịka, ị́ ori na simearị sịkị?”

²⁷ Pita ḅe pịkịna nwọ ḅẹmẹ, “Ẹn-ẹn”—se anị kirikiri gbọrị owoi ọḅọkọ paịnmẹ.

Jizọs Ḅe Paịlet Ḅe Tọrọkọ Chịẹmẹ Pa Ḅẹrẹkọn-aḅẹ

²⁸ Dede funfun ḅụ ini Kayafas warị Jizọs Ḅe ọkị se so Gọvịna warị mun mẹ. Ju ḅẹrẹtọn apụma warị mị ḅie ini sọkẹ, anịatịḅị ini inia ḅụ ma se tọnḅụ wẹrị ḅimẹ mịẹse ini ineda Saḅaḅọrọ Alalị fịye mị nwọ fịḅịa ọkụ.

²⁹ Anị Paịlet ḅe paka nụngọ ini damamun se ini gbelaye-ẹ, “Ḅe ḅọ ḅe ò che si mịẹmẹ ọ́ nwọ ḅẹ?”

³⁰ Ini nwọ pẹkẹrẹmẹ, “Wa ori ọkịḅo ị́ pịrịḅịa ọkụ ofori-ẹ, Ò nemikase oloko kanye mịẹka ọkụma.”

³¹ Paịlet ḅe nwọse ini ḅẹmẹ, “Anịọkụma ọ́ ḅarana ori ọkịmun ọ́mịna oloko mị sime ḅara se ḅẹrẹkọn ọ̀ pịrị.” Ini pẹkẹrẹmẹ, “Oloko mị anị ḅereni wa pịrịkẹ, wa tomoniḅọ ḅaa.”

³² (Mịn mị pakamẹ mịẹse Jizọs Ḅe ọ̀ kọnḅịa fị ḅara mị ḅụ Ò ḍukoye mị ḅo kọkọmaye sọḅịa ḅara.)

³³ Paịlet ḅe pịkịna vinpịkị mun amanyanaḅọ warị mị sọ se Jizọs Ḅe chịnmẹ, ọ̀ nwọse ò gbelamẹ, “Juapụ Amanyanaḅọ ḅe ị́rị́?”

³⁴ Jizọs Ḅe pẹkẹrẹmẹ, “Ị́rị́ ngẹrị mịn mị gbela mụnọ se jịn apụ ị̀ ḅụ ḍuko ị́ pịrịye?”

³⁵ Paịlet ḅe pẹkẹrẹmẹ, “Ị́ koroma ḅara ị̀rị̀ Juḅọ? Ị́ya tomonima na inia tịḅịnị agbamịẹapụma na, mị ị́ ḅọrọma ḅo ị̀ pịrịye-ẹ. Cheye ị́ nwọ mịẹ?”

³⁶ Jizọs Ḅe nwọ ḅẹmẹ, “Ị̀ya amanyanakiri mị sime mị tomonikiri mị pịrịkẹ; ị̀ya amanyanakiri mị nemikase sime mị tomonikiri mị pịrịmẹ nwọ ḅẹ ọkụma, mgbọkụ ị̀ ḍukonwẹngịapụma ini owusọḅịa, ini ḍụkụ ẹkẹ ini ị̀ ḅọrọma Ju ḅẹrẹtọn apụma pịrị. Ẹn-ẹn, ị̀ya amanyanakiri sime mị tomonikiri mị pịrịkẹ!”

³⁷ Anị Paịlet ḅe ò gbelaye-ẹ, “Ị́rị́ amanyanaḅọ, anịọkụma?” Jizọs Ḅe pẹkẹrẹmẹ, “Ị́rị́ nwọ ḅẹmẹ na Ị̀rị̀ amanyanaḅọ-ẹ. Mị gbọrịye mị gose ini ị̀ yimẹ, se à pịkị mị tomonikiri mị ḅomẹ, kọkọmaye mị gbolomaye nwọ ḍukoḅịa ẹrẹchị. Sime kọkọmaye mị pịrịḅọ goyegoye iniḅọ ị̀ pokiḅịa.”

³⁸ Paịlet ḅe nwọ gbelamẹ, “Kọkọmaye anị cheye?” Paịlet ḅe pịkị nụngọ tomonima damamun se nwọse ini ḅẹmẹ, “À gose ḅẹrẹsi pẹlẹ ọ̀ pịrịḅịaye ofori-ẹ.

Ini Fị Ḅẹrẹ Pẹlẹ Jizọs Ḅe Pịrịmẹ

³⁹ Ọkụma ọ́ nyana ama mịẹmịẹye ḅara ḅụ, à sịkịmamgba gbọrị ikoliḅọ ḅụ ḅarasin ọ́ pịrịpịrịmẹ Saḅaḅọrọ Alalị mị ḅie. Ó ḅi, à Juapụma amanyanaḅọ ḅe ḅụ ḅarasin ọ́ pịrị?”

⁴⁰ Oloku tịḅị ini nwọse ọ̀ pẹkẹrẹmẹ, “Ẹn-ẹn, ọrịkẹ! Barabas ḅe mị wa ḅiye-ẹ!” (Barabas ḅe angaranịḅọ-ẹ.)