Jọn Iḅi Ḅẹrẹ Mị 16 - Kịrịkẹnị Baịbụl

¹ “À gose mị ḍuko ọ́ pịrịye, anị mịẹse ọ́mịna ḅereni mị ḅụ ọ́ ḅịkị ẹka ḅara.

² Ini tẹkẹwarịma ḅie ó depakụmaḅịa. Se sịkị ḅo ḅịa, ọ́ ḅaaḅịa ḅọ goyegoye nwọ koromaḅịa na, iniḅọ fịrịnwẹngị Tamụnọ Ḅe pịrịaḅẹ.

³ Mayema ini nwọse ọ́ mịẹḅịa anịatịḅị ma ini Ḍaḅọ Ḅe na ị̀rị̀ na nemikẹ.

⁴ Ọkụma à gose mịn mị ḍuko ọ́ pịrịye, anị mịẹse ini mayema mịẹḅịa sịkị ó se ḅiekoromaḅịa ọkụ na àrị anị ḍuko ọ́ pịrị ḅọrọsam. “Sakị mị ḅụ à mayema ḍuko ọ́ pịrịkẹ, anịatịḅị àrị ómine na omi-ẹ.

Fịafịa Tẹmẹ Ḅe Fịrị Mị Sime Ọkụ

⁵ Ọkụma mịọkụ à so ị̀ se fịrịmaḅọ ḅe damamun-aḅẹ, anị sọnị ọ́mịna ḅụ gbọrịḅọ sọnị ma ị̀ gbelakẹ, àrị nde anga mun-ao.

⁶ Mịọkụ à nwọ ḍuko ọ́ pịrịsa sịkị, kururu ọ́mịna kuḅiemgbọlụma ḅie ḅeinsam.

⁷ Ọkụma kọkọmaye mị à nwọ ḍuko ọ́ pịrịmẹ anị iḅitẹịn ọ́ pịrịmẹ na à so, anịatịḅị à nemikase so ka ọkụma, Ḅarachụaḅọ Ḅe ori ọ́ damaḅo ẹkẹ. Ọkụma à nemikase ó koroma somẹ ḅẹḅẹ, anịsịkị àrị ò se ọ́ fịrịmaḅịa.

⁸ Se ò ḅo lasịkị, ò ye mịẹpakụma tomonikiri mị ḅe apụma ḍieḅịa si gbolomaye ḅụ na, karakaraye gbolomaye ḅụ na, pịkị Tamụnọ ḅẹrẹkọn gbolomaye ḅụ na, ini mịẹkuramakẹ.

⁹ Si gbolomaye ḅụ ini mịẹkuramakẹ anịatịḅị ini ị̀ ḅerenikẹ;

¹⁰ karakaraye gbolomaye ḅụ, anịatịḅị à so Ḍaḅọ Ḅe damamun-aḅẹ, ọ́ ḅarị pịkị ị̀ ọrị ẹkẹ;

¹¹ ḅẹrẹkọn gbolomaye ḅụ, anịatịḅị mị tomonikiri mị ḅie ḅẹrẹtọnḅọ ḅe ini ḅẹrẹpẹlẹ ọ̀ pịrịsam.

¹² “À ḍuko ọ́ pịrị ḍọkị tọn-aye omi-ẹ, ọkụma mịọkụ ọ́ ḅarị ineda inema àrị poki ẹkẹ.

¹³ Ọkụma anị simeọkụ simeọkụ sọnị, kọkọmaye mị Tẹmẹ Ḅe ò ḅoḅịa sịkị, anị Tamụnọ Ḅe ḅụ kọkọmaye nwọ ḍieḅelemaḅịaḅọ ḅe, ori ò se mun kọkọmaye mamgba ḅie chuḅịa. Ori ọ̀ ḅarakuḅu kụrọ se ọkwẹịn kọn ẹkẹ, ọkụma ọ̀ naaye mị ò ḍukoḅịaye-ẹ, ọ̀ pịkị tọrọkọju pakaḅịaye ḍuko ọ́ pịrịḅịa.

¹⁴ Ò boma seni ị̀ pịrịḅịa, anịatịḅị ori ị̀ ḅịpị oku mị nwọ daḅọrọma ọ́ pịrịḅịa.

¹⁵ Ị̀ Ḍaḅe nyanaye mamgba ị̀yaye-ẹ, anị mị à gose ḅẹye-ẹ na Tẹmẹ Ḅe ị̀ ḅịpị oku daḅọrọma ọ́ pịrịḅịa.

Kururu Na Ḅieḅẹlẹ Na Simeḅịa

¹⁶ “Boka kala sịkị ḅụ ọ́ ḅarị jịn sịkị se ị̀ ọrị ẹkẹ, anịsịkị sịkị kalaye ḅọrọḅịa sịkị, ómine ị̀ ọrịḅịa.”

¹⁷ Oria ọḅụḍukoapụma ḅie dapụ nwọse iniaḅụ gbelamẹ, “Mịn mị anị che fie? Ò ḍuko wa pịrịmẹ na boka kala sịkị ḅụ wa ori ọrị ẹkẹ, se anịsịkị boka kala sịkị ḅọrọḅịa sịkị wa pịkị ori ọrịḅịa; ọ̀ pịkị nwọ ḅẹmẹ, ‘Anịatịḅị à so Ḍaḅọ Ḅe damamun-aḅẹ.’

¹⁸ Nde mị ‘boka kala sịkị’ mị fieye? Ò ḍukoarịye wa nemikẹ!”

¹⁹ Jizọs Ḅe nemimẹ na ini ò gbela ḅimẹ, anịẹrẹchị ọ̀ nwọse ini ḅẹmẹ, “À nwọ ḅẹmẹ, ‘Boka kala sịkị ḅụ ómine ị̀ ọrị ẹkẹ, se anịsịkị boka kala sịkị ḅụ ọ́ pịkị ị̀ ọrịḅịa.’ Mịn mị anị ó seni ọ́mịna ḅụ gbelarịye?

²⁰ À kọkọmaye ḍuko ọ́ pịrịaḅẹ: ómine oloku se owuḅịa, ọkụma tomonikiri mị ḅieḅẹlẹḅịa; ó kururuḅịa, ọkụma ọ́mịna kururu mị vinpịkịḅo ḅieḅẹlẹ sọḅịa.

²¹ Eremeniḅọ tọkụ yiḅịa sịkị á kururuḅịa, anịatịḅị árịa tọrụsiọrị sịkị mị lasam, ọkụma á tọkụ mị yi koromasa ḅẹḅẹ, árịa tọrụsiọrị mị á se ḅieḅaramasam, anịatịḅị á ḅieḅẹlẹmẹ na árị ịwọ tọkụ yi tomonikiri mị ḅie koromasam.

²² Anị mịọkụ anị ómine na simeọkụ-ẹ: mịọkụ ó kururuaḅẹ, ọkụma à pịkịna ómine ọrịḅịa, ọ́mịna kuḅiemgbọlụma pịkị ḅieḅẹlẹ na ḅeinḅịa, gbọrịḅọ sọnị ineda ọ́mịna ḅara ọkịso ẹka ḅieḅẹlẹ.

²³ “Anị ene mị ḅo laḅịa sịkị, ị̀ ḅara ó gbọrịye sọnị ḅi ẹkẹ. À kọkọmaye ḍuko ọ́ pịrịaḅẹ: na ị̀ya ẹrẹ ḅụ ó ḅiye goyegoye Ḍaḅọ Ḅe ò seni ọ́ pịrịḅịa.

²⁴ Ọkịḅo mịọkụ la sọnị, ómine ị̀ya ẹrẹ ḅụ ḅisa gbọrịye sọnị ofori-ẹ; ó ḅi anị pịkị ọ́ ḅara laḅịa, mịẹse ọ́mịna ḅieḅẹlẹ mị karaḅịa ọkụ.

À Tomonikiri Mị Nẹngịmasam

²⁵ “À kaḅo ḅụ mayema nwọ ḍuko ọ́ pịrịsam. Ọkụma sịkị mị anị ḅoḅịa à ḅarị kaḅo se ọkwẹịn ọ́ pịrị ẹkẹ, ọkụma à ḅelema Ḍaḅọ Ḅe gbolomaye nwọ ḍuko ọ́ pịrịḅịa.

²⁶ Anị ene lasịkị, ómine ị̀ya ẹrẹ ḅụ ọ̀ ḅara ye ḅiḅịa; à pịkị ḅẹkẹ na àrị ọ́mịna tịḅị gose ọ̀ ḅara ye ḅiḅịa,

²⁷ anịatịḅị Ḍaḅọ Ḅe na mịnaḅụ na ori ọ́ ḅẹlẹmamẹ. Ori ọ́ ḅẹlẹmamẹ ómine ị̀ ḅẹlẹmaye gose, ọ́ pịkị ḅerenimẹ na Tamụnọ Ḅe ḅụ à wẹrị ḅomẹ.

²⁸ Ḍaḅọ Ḅe ḅụ à wẹrị ḅomẹ, à tomonikiri mị ḅie ḅomẹ; à pịkị mịọkụ tomonikiri mị koromaso Ḍaḅọ Ḅe damamun-aḅẹ.”

²⁹ Anịsịkị oria ọḅụḍukoapụma nwọse ọ̀ ḅẹmẹ, “Mịọkụ ị́ ḅelema ọkwẹịn-aḅẹ, kaḅo se ọkwẹịnka ḅara ḅụ.

³⁰ Mịọkụ wa nemisam na ye mamgba ị́ nemimẹ: tomoniḅọ se ị́ gbelaḅịaye ofori-ẹ. Mịn mị mịẹse wa ḅerenisam na Tamụnọ Ḅe ḅụ ị́ ḅomẹ.”

³¹ Jizọs Ḅe ini pẹkẹrẹmẹ, “Mịọkụ ó ḅerenisa?

³² Sịkị mị anị ḅoaḅẹ, anị ḅo lasam, ómine mgba galagalaḅịa sịkị, ḅẹḅọ ḅẹḅọ iniḅọ warị munḅịa, se ị̀rị̀ ngẹrị ngẹrị kọnḅịa. Ọkụma ị̀rị̀ ngẹrị kọkọma kọn ẹkẹ, anịatịḅị Ḍaḅọ Ḅe ori ị̀rị̀ na omi-ẹ.

³³ À mịn mị nwọ ḍuko ọ́ pịrịsam, mịẹse ó deinma nyanaḅịa ḅara ị̀rị̀ na gboloma gbọrịye mịẹ mị ḅụ. Tomonikiri mị mịẹse ọ́ tọrụsiọrịḅịa. Ọkụma ọ́ kụrọ kuḅie nyana! À tomonikiri mị nẹngịmasam!”