Jọn Iḅi Ḅẹrẹ Mị 13 - Kịrịkẹnị Baịbụl

Jizọs Ḅe Oria Ọḅụḍukoapụ Ma Ḅụọ Ma Sịkịrịmẹ

¹ Mịọkụ gbọrị ene kọnmẹ Saḅaḅọrọ Alalị mị ḅo la. Jizọs Ḅe nemisam na ò tomonikiri mị koroma so se Ḍaḅọ Ḅe damamunḅịa sịkị mị lasam. Ọ̀ sịkịmamgba tomonikiri sime oria tomonima nwọ ḅẹlẹma ḅẹlẹmamẹ, ọ̀ pịkị ini ḅẹlẹma mun kuluma mị lamẹ.

² Jizọs Ḅe na oria ọḅụḍukoapụma na saso fịye ḅụ simemẹ. Oru ḅe Jizọs Ḅe se ịbafịḅịa koroma nwọse Judas, Saịmọn Ịskarịọt yaḅe kuḅie chụamẹ.

³ Jizọs Ḅe ò nemimẹ na Ḍaḅọ Ḅe ò ḅeinma kụrọ seni ọ̀ pịrịsam; ò nemimẹ na Tamụnọ Ḅe ḅụ ò ḅomẹ, ọ̀ pịkị so Tamụnọ Ḅe damamun-aḅẹ.

⁴ Anị Jizọs Ḅe dẹbụl ḅụ sịsẹye-ẹ, oria ọgọnọ gbana ḅụchụaye mị sin, se ḅụsin ikpo se ò ḅirikunye-ẹ.

⁵ Se ò mengi se panị ḅie sara, se sakị ọḅụḍukoapụma ḅụọma sịkịrịmẹ, se ò se ḅirikun ḅụsin ikpo mị seni inia ḅụọma sinmẹ.

⁶ Ò ḅo Saịmọn Pita ḅe lasịkị, ọ̀ nwọse Jizọs Ḅe ḅẹmẹ, “Nyanaḅọ, ị́ ị̀ ḅụọma sịkịrị ḅe?”

⁷ Jizọs Ḅe ọ̀ pẹkẹrẹmẹ, “À mịẹarịye mị mịọkụ ma ị́ nemikẹ, ọkụma ọḅụkọ ị́ nemiḅịa.”

⁸ Pita ḅe gaịnma ḍukomẹ, “Ị́ ngịsị ị̀ ḅụọma sịkịrịḅịa sịkị ofori-ẹ!” Jizọs Ḅe nwọ pẹkẹrẹmẹ, “À nemikase ị́ ḅụọma sịkịrịkẹ ḅẹḅẹ ị́ ḅarị ị̀ya ọḅụḍukoḅọ sọ ẹkẹ.”

⁹ Saịmọn Pita ḅe pẹkẹrẹmẹ, “Nyanaḅọ, ị̀ ḅụọma kẹngẹ anịọkụma nwọ sịkịrị ma! Ị̀ ḅarama na ị̀ tịḅị na nwọse chụa sịkịrị!”

¹⁰ Jizọs Ḅe nwọ ḅẹmẹ, “Mengi ḅirisaḅọ goyegoye iniḅọ gbọtụḅara fịafịasam, iniḅọ ḅarị jịn mengi ḅiri ẹkẹ, ḅụọ sịkịrị sikima ọkụma. Ómine mgba ọ́ fịafịasam ómine mgba—gbọrịḅọ sikima ọkụma.”

¹¹ (Jizọs Ḅe ò se ịbafịḅịaḅọ nwọ nemi ḅọrọsam; anị mị ò gose nwọ ḅẹye-ẹ, “Ómine mgba ọ́ fịafịasam, gbọrịḅọ sikima ọkụma.”)

¹² Jizọs Ḅe inia ḅụọma sịkịrị so sịkị, ori oria ọgọnọ gbana ḅụchụaye mị pịkị nwọ chụamẹ, se vinpịkị dẹbụl ḅụ ò sime nyọ nwọ mun mẹ. Ò gbelamẹ, “Àrị ọ́ ḅụ mịọkụ mịẹye mị ọ́ kaịnḅo?”

¹³ “Yeḍieḅọ na, Nyanaḅọ na, ọ́ nwọse ị̀ chịnmẹ, anị pịkị karakaramẹ ómine ọkọ se ị̀ chịn, anịatịḅị anị à sọye-ẹ.

¹⁴ Ị̀rị̀ ómine Nyanaḅọ-ẹ, pịkị ọ́mịna Yeḍieḅọ-ẹ, à pịkị mịọkụ ọ́mịna ḅụọma nwọ sịkịrịsam. Anịọkụma, ómine sọ ọ́ jịnḅọ jịnḅọ ḅụọ sịkịrị.

¹⁵ Ḍikiḍaḅịaye à nwọ mịẹ ó ḍiesam, mịẹse à mịẹ ọ́ pịrị ḅara mị ọ́ nwọ mịẹḅịa ḅara.

¹⁶ À kọkọmaye ḍuko ọ́ pịrịaḅẹ: ḍụḅa iniḅọ nyanaḅọ nẹngị omoniḅọ ofori-ẹ, anị okunwẹngịḅọ pịkị ḍụḅa iniḅọ se fịrịmaḅọ nẹngị ẹka ọkụ-ẹ.

¹⁷ Mịọkụ ọ́ kọkọmaye mị nemisam, ọ́mịna ḅieḅẹlẹ laḅịa ọkụ ḍiki, ó nemikase anị seni mịẹmịẹye ḅụ chuḅịa ọkụma!

¹⁸ “Ómine mgba gbolomaye à nwọ ḍukokẹ; à sẹlẹ ọkịsapụ ma à nwọ nemi waraḅẹ. Ọkụma fịafịa ḍiri mị kọkọmaye pa nwọ sọḅịa, mị ḅara mị nwọḅẹye mị na, ‘Ị̀rị̀ na ị̀ya fịye ḍia fịḅọ ḅe vinpịkị ị̀rị̀ na tụḅụrụmẹ.’

¹⁹ À mịn mị nwọ ḍuko ọ́ pịrịaḅẹ ma anị pakaka simeogbo, mịẹse anịḅo pakaḅịa sịkị, ó ḅereniḅịa ḅara, na ‘Ị̀rị̀ anị Ị̀rị̀-ẹ.’

²⁰ À kọkọmaye ḍuko ọ́ pịrịaḅẹ: à se fịrịmaḅọ ọkịḅọ goyegoye, pịkịna ị̀ ọkịmẹ, pịkị ị̀ ọkịḅọ goyegoye, pịkị ị̀ se fịrịmaḅọ ḅe nwọ ọkịmẹ.”

Jizọs Ḅe Ini Ò Se Ịbafịḅịa Ịkịan Nwọ Koromẹ

²¹ Jizọs Ḅe mịn mị nwọ ḍuko so sịkị, anị ḅakama ọ̀ ḅụfụkamamẹ, se ò ḅelema ḍukomẹ, “À kọkọmaye ḍuko ọ́ pịrịaḅẹ: ọ́mịna ḅụ gbọrịḅọ ị̀ se ịbafị-ẹ mun-aḅẹ.”

²² Ọḅụḍukoapụma jịnḅọ jịnḅọ ḍikimẹ, anị ḅakama inia ḅụḅalaḅalamamẹ se nwọ ḅẹ na ọ̀ tụḅọ ḅụ mị ḅẹrẹ mị ḍuko-ao.

²³ Ọḅụḍukoapụma ḅie gbọrịḅọ, Jizọs Ḅe ḅẹlẹma ḅọ ḅe, Jizọs Ḅe angasịkị sime waraḅẹ.

²⁴ Saịmọn Pita ḅe ọ̀ fọngụma se nwọ ḅẹmẹ, “Ọ̀ ḅẹrẹ ḍukoarịḅọ ḅe nwọse ò gbela.”

²⁵ Anị ori ọḅụḍukoḅọ ḅe Jizọs Ḅe kpekima se ò gbelaye-ẹ, “Ori ḅọ ḅe tụḅọ, Nyanaḅọ?”

²⁶ Jizọs ḅe pẹkẹrẹmẹ, “À fịturu pẹkẹrẹ mị se ọḍụ mị ḅie su se, anị se pịrịḅịaḅọ ḅe anị oriḅọ ḅe-ẹ.” Anị ò fịturu pẹkẹrẹ mị ọkị se anị se su, se anị seni Judas ḅe nwọ pịrịye-ẹ, anị Saịmọn Ịskarịọt yaḅe.

²⁷ Judas ḅe fịturu mị ọkị kirikiri, Oru ḅe ò ḅie sọmẹ. Jizọs Ḅe nwọse ọ̀ ḅẹmẹ, “Fịkịrị ị́ mịẹḅịaye mị nwọ mịẹ!”

²⁸ Dẹbụl ḅụ simeapụma ḅụ gbọrịḅọ sọnị Jizọs Ḅe gose mịn mị se ọ̀ ḅẹye nemikẹ.

²⁹ Judas ḅe nwọ igbiki akpa mị ọlọ warasịkị, ọḅụḍukoapụma ḅie dapụ nwọ koromamẹ na Jizọs Ḅe ori ọ̀ ḅẹaḅẹ na ò mun alalị mị ḅie, inia ḅụpalịmaye nwọ fẹ, anịkanịka ò mun ye se ḍie igwein apụma nwọ pịrị.

³⁰ Judas ḅe fịturu mị ọkị se kirikiri pakasomẹ. Anịsịkị ene ḍinsam.

Ịwọ Oloko Mị Gbolomaye

³¹ Judas ḅe paka sịkị, Jizọs Ḅe nwọ ḅẹmẹ, “Mịọkụ Tomoniḅọ Tọkụ Ḅe boma mị anị ḅele pakasam; mịọkụ Tamụnọ boma mị anị ọ̀ ḅụ ḅọrọ ḅele pakasam.

³² Se Tamụnọ boma mị nemikase ọ̀ ḅụ ḅọrọ ḅele pakasam ḅẹḅẹ, anịọkụma Tamụnọ Ḅe ḅarana Tomoniḅọ Tọkụ Ḅe boma mị nwọ ḍieḅelemaḅịa ò ḅie ḅụ, ọ̀ pịkị mị gbọrị sịkị mị ḅụ ọkọ mịẹḅịa.

³³ Ị̀ya awọ, àrị ómine na ḅarị sime opuma ḅọlọma ẹkẹ. Ómine ị̀ ḍọkịḅịa; à ḍuko Ju ḅẹrẹtọn apụma pịrịye mị, mịọkụ à nwọ ḍuko ọ́ pịrịḅịa, ‘Ómine ineda à mun-arị nyọ mị nwọ mun ẹkẹ.’

³⁴ Ịwọ oloko mịọkụ à nwọ seni ọ́ pịrịaḅẹ: ọ́ jịnḅọ jịnḅọ ḅẹlẹma. À nwọ ọ́ ḅẹlẹma ḅara mị, anị ómine sọnị jịnḅọ jịnḅọ ḅẹlẹmaḅịa ọkụ-ẹ.

³⁵ Ọ́ ḅọrọ nemikase ḅẹlẹma nyana jịnḅọ jịnḅọ pịrịmẹ ḅẹḅẹ, anịsịkị nweni mgba nemiḅịa na ómine ị̀ya ọḅụḍukoapụ-ẹ.”

Jizọs Ḅe Ịkịankoromẹ Na Pita Ḅe Ò Pikiḅịa

³⁶ Saịmọn Pita ḅe nwọse ò gbelamẹ, “Nyanaḅọ, nde nyọ ị́ nwọ mun-ao?” Jizọs Ḅe pẹkẹrẹmẹ, “Ị́ ineda mịọkụ ị̀ ḍuko à mun-arị nyọ mị nwọ mun ẹkẹ, ọkụma ọḅụkọ ị́ ị̀ ḍukoḅịa.”

³⁷ Pita ḅe nwọ gbelamẹ, “Nyanaḅọ, nde à gose mịọkụ ineda ị́ ḍuko ẹkaye? À ḅụkarakaramamẹ fị ị́ pịrị!”

³⁸ Jizọs Ḅe pẹkẹrẹmẹ, “Ị́ kọkọma fị ị̀ pịrịḅịa ẹrẹchị ḅụkarakarama wara-ao? À kọkọmaye ḍuko ị́ pịrịaḅẹ: na ọḅọkọ ma paịnka simeogbo tẹrẹ-a sịkị ḅụ ị́ nwọ ḅẹḅịa na ị́ ị̀ nemikẹ.”