Jọn Iḅi Ḅẹrẹ Mị 12 - Kịrịkẹnị Baịbụl

Bẹtani Ḅie Ini Pulo Se Jizọs Ḅe Tịḅị Saramẹ

¹ Sonio-a ḍin kọnmẹ Saḅaḅọrọ Alalị mị la, Jizọs Ḅe Bẹtani mun mẹ, Lazụrọs ḅe oria ama mị, anị fịḅụ ọ̀ sịsẹma ḅọ ḅe.

² Anịnyọ ini sasofịye karakarama ọ̀ pịrịmẹ, se Mata ma ḅarachụa fịrịnwẹngịmẹ Lazụrọs ḅe dẹbụl ḅụ Jizọs Ḅe na simearịogbo.

³ Anịsịkị Meri ma opuma kụnụ yela nad se mịẹ bebe olo ololo nwọse Jizọs Ḅe ḅụọma ḅụ saramẹ, se á tịḅị inime se àrị sinmẹ. Anịa iḅi kụnụ ḅara mị bebe warị mị kelemamẹ.

⁴ Jizọs Ḅe ọḅụḍukoapụma ḅụ gbọrịḅọ, Judas Ịskarịọt ḅe—ò se ịbafịḅịa ḅọ ḅe—nwọ ḅẹmẹ,

⁵ “Nde ini gose mị kụnụ olo mị se naịra jieasi dẹrị se anịḅe igbiki se igwein apụ pịrịkaye?”

⁶ Ò gose mịn mị ḅẹye, anị ori igwein apụ abalamẹ nwọ ḅẹyekẹ, ọkụma ori furuḅọ-ẹ. Ori igbiki akpa mị nwọ ọlọmẹ, anịa ḅie simeye mị ọ̀ nwọse ḅarachụa ọ̀ ḅụ pịrịḅịaye ẹrẹchị-ẹ.

⁷ Ọkụma Jizọs Ḅe nwọ ḅẹmẹ, “Ómine á wẹrịso! Ye á nyanaye mị á nwọse wẹrị ị̀ya ḍipi ene mị koru.

⁸ Igwein apụma sịkịmamgba ini ómine na omi-ẹ, ọkụma ị̀rị̀ ma à sịkịmamgba ómine na sime ẹkẹ.”

Ḅia Lazụrọs Ḅe Pịrị Si Ḅẹrẹ

⁹ Juapụma ḅụ ḅaka apụ naamẹ na Jizọs Ḅe Bẹtani ḅie ori omi-ẹ, anị ini anịnyọ mun ye-ẹ, Jizọs Ḅe ọrịḅịa ye kẹngẹkẹ, ọkụma Lazụrọs ọ̀ fịḅụ sịsẹmaḅọ ḅe ọrịḅịaye gose.

¹⁰ Anị tịḅịnị agbamịẹapụma ḅẹrẹḅiaye-ẹ mịẹse ini Lazụrọs ḅe sọ nwọ ḅaaḅịa ḅara,

¹¹ anịatịḅị ọ̀ tịḅị gose tọn-a Juapụ ini koroma so se Jizọs Ḅe nwọ ḅereniaḅẹ.

Ọmụḅaraiḅi Ḅara Se Jerusalẹm Sọ Mị Simeọkụ

¹² Anịḅe ene ḅa Saḅaḅọrọ Alalị mị gose ḅo opu tomonikpo mị mgba naamẹ na Jizọs Ḅe Ò Jerusalẹm ḅoaḅẹ.

¹³ Anị ini kọrọ ḅarama nwọ ọlọ pakamun Ori na ịrịa-e mun ye-ẹ, oloku se nwọ ḅẹaḅẹ, “Ọ́ Tamụnọ Ḅe tokoni! Tamụnọ Ḅe ọ̀ ḅẹlẹma, nwọ Nyanaḅọ Ḅe ẹrẹ ḅụ ḅo ḅọ ḅe! Tamụnọ Ḅe Izrẹl Amanyanaḅọ Ḅe ḅẹlẹma!”

¹⁴ Jizọs Ḅe ayamburama asụn nwọ ọkị se oria ọgọnọ kpọlị se nwẹngịmẹ, fịafịa ḍiri mị ḍuko ḅara ḅụ na,

¹⁵ “Ḅalafa ma, Zaịyọn opuama! Ị́ya amanyanaḅọ ḅe ò ḅosam, ayamburama asụn ọgọnọ ò sime se ḅoaḅẹ.”

¹⁶ Anịsịkị oria ọḅụḍukoapụma mịn mị ini kaịnḅokẹ; ọkụma ini Jizọs Ḅe sịsẹma mun boma ḅie sọ sịkị, mị ini se ḅiekoromaye na fịafịa ḍiri mị Ọ̀ ḅụ mịn mị gbolomaye nwọ ḍukomẹ, na ini pịkị anị mịẹ Ọ̀ pịrịsam.

¹⁷ Jizọs Ḅe iḍupu ḅie Lazụrọs ḅe fịḅụ nwọ chịn sịsẹma sịkị ḅụ kiri sime apụma, pakaye mị ḍuko wasamamẹ.

¹⁸ Anị gose mị tomonikpo mị mun Ori na ịrịaye-ẹ—anịatịḅị ini naamẹ na Ọ̀ nwọ sime ḅụgbiripumaye mịẹsam.

¹⁹ Farisiapụma nwọse jịnḅọ-jịnḅọ ḅẹmẹ, “Ómine ọrịsam na ngịsị mịna ḅara sọ anga ḅarị ofori-ẹ! Ḍiki, bebe tomonikiri mị mgba Ò ḍuko nwẹngịaḅẹ!”

Tọn-a Grik Apụ Jizọs Ḅe Ḍọkịmẹ

²⁰ Da Grik apụ mun Jerusalẹm ḅie Tamụnọ tẹkẹ-ẹ mun apụma ḅie omi-ẹ, anị alalị sịkị mị ḅụ.

²¹ Ini Filip ḅe damaḅomẹ, (Galili ḅie sime Bẹtsaịda ḅụ ḅo ḅọ-ẹ) se nwọ ḅẹmẹ, “Sẹnịḅọ, wa Jizọs Ḅe ọrị ḅimẹ.”

²² Filip ḅe mun ḍuko Andru ḅe pịrịmẹ, se ini mama apụma mun ḍuko Jizọs Ḅe pịrịmẹ.

²³ Jizọs Ḅe ini pẹkẹrẹmẹ, “Ini opu boma nwọse Tomoniḅọ Tọkụ Ḅe pịrịḅịa sịkị mị lasam.

²⁴ À kọkọmaye ḍuko ọ́ pịrịaḅẹ na: ịpịamgba mgbọlụ mị anị sokoro kiri koro se fịkẹ ḅẹḅẹ anị ngẹrị omi-ẹ. Anị fịmẹ ḅẹḅẹ, anịsịkị mị anị tọn-a mgbọlụ chụaḅịaye-ẹ.

²⁵ Mịna ḍumo nwọ ḅẹlẹma ḅọ goyegoye anị famaḅịa, mị tomonikiri mị ḅie taraka se iniḅọ ḍumo wẹrịma ḅọ goyegoye iniḅọ anị koko mun simegbaso ḍumo mị laḅịa.

²⁶ Fịrịnwẹngị ị̀ pịrị ḅi ḅọ goyegoye iniḅọ ị̀ ḍukoḅịa, mịẹse ị̀ya fịrịnwẹngịḅọ ḅe à sime nyọ simeḅịa ḅara. Ị̀ Ḍaḅe ori osi se fịrịnwẹngị ị̀ pịrịḅọ goyegoye pịrịḅịa.

Jizọs Ḅe Oria Fị Mị Gboloma Ḅẹrẹ Nwọ Ḍukomẹ

²⁷ “Ị̀ kuḅiemgbọlụ mịọkụ ị̀ ḅụ fụkamasam—se à che ḍuko ḅe? À nwọ ḅẹḅịa mụnọ, ‘Ḍaḅọ, ḅereni ma mị sịkị mị ḅo ị̀ ọgọnọ gbana’? Ọkụma anị mị à gose ḅoye-ẹ—mị tọrụsiọrị sịkị mị ḅie toluḅọrọḅịa ẹrẹchị.

²⁸ Ḍaḅọ, boma ọkịḅo ị́ya ẹrẹ pịrị!” Anịsịkị pụkọ soḅie ḅụ nwọ ḅẹmẹ, “Àrị anị boma ḅọrọsam, à pịkị anị bomaḅịa.”

²⁹ Anịnyọ chịẹ sime tomonikpo mị pụkọ mị naa sịkị inia ḅụ dapụ nwọ ḅẹmẹ, soalagba fiemẹ, anịsịkị dapụ pịkị nwọ ḅẹmẹ, “Enjẹlapụ ọkwẹịn Ọ̀ pịrịmẹ!”

³⁰ Ọkụma Jizọs Ḅe nwọse ini ḅẹmẹ, “Ị̀ gose mị pụkọ mị ọkwẹịnkẹ, ọkụma ómine gose-ẹ.

³¹ Mịọkụ anị ḅẹrẹkọn tomonikiri mị pịrịḅịa sịkị mị-ẹ; mịọkụ mị ini ḅẹrẹtọn tomonikiri mị pịrịarịḅọ ḅe nwọ suma gbinḅịa sịkị mị-ẹ.

³² Ini mị sẹkiri ị̀ dekichịẹmaḅịa sịkị, à tomoni mamgba nwọ jine ị̀ ḅụ pịrịḅịa.”

³³ (Mịn mị ọ̀ nwọ ḍukomẹ se ọ̀ kọnḅịa fị ḅara mị ḍiepakụma gose.)

³⁴ Tomonikpo mị pịkị ọ̀ pẹkẹrẹmẹ, ḅẹ na, “Mịna Oloko mị nwọ ḍukomẹ na Mẹsaya Ḅe ò ḍumo gbamasoḅịa. Nde anịọkụma, ị́ ineda nwọ ḅẹḅịa ọkụ na ini Tomoniḅọ Tọkụ Ḅe nwọ dekichịẹmaḅịa? Ḅe Tomoniḅọ Tọkụ Ḅe tụḅọ?”

³⁵ Jizọs Ḅe pẹkẹrẹmẹ, “Enekuḅu mị anị kele ọ́mịna ogboku simeḅịa. Ómine ọ́mịna ateli ḅie simema mun, ómine enekuḅu mị nwọ nyana warasịkị, mịẹse kanakana mị ḅo ọ́ gbẹịn ẹka ḅara; anịatịḅị kanakana ḅie nwẹngịarịḅọ ò mun-arị nyọ ò nemikẹ.

³⁶ Anịẹrẹchị ómine enekuḅu mị ḅereni, ómine anị nyana warasịkị, mịẹse ómine enekuḅu tomoni nwọ sọḅịa ḅara.” Jizọs Ḅe mịn mị ḍuko so sịkị, ori inia ḅụ sikima se ọ̀ ḅụ ḅọịmẹ.

Tomoni Ma Ḅe Ḅereni Nyanaka Mị Sime Ḅara

³⁷ Ori inia tọrụkuḅu ḅụ ma ḅụgbiripumaye ma mịẹsam nwọ ḅẹ sọnị, ini ò ḅerenikẹ,

³⁸ mịẹse Aịzaya ịkịankoroḅọ ḅe ḍukoye mị ḅo kọkọmaye sọḅịa ḅara na: “Nyanaḅọ, tụḅọ wa ḍuko oku mị ḅereni? Nyanaḅọ Ḅe oria kụrọ mị ò se tụḅọ ḍie?”

³⁹ Mịn mị gose ini ineda ḅerenikẹ, anịatịḅị Aịzaya ḅe pịkịna nwọ ḅẹmẹ,

⁴⁰ “Tamụnọ Ḅe inia tọrụmgbọlụma pụnmamẹ pịkị inia kuḅiema gbẹịnsam, mịẹse inia tọrụmgbọlụma ye ọrị ẹka ḅara, inia kuḅiema ye kaịnḅo ẹka ḅara, se ini vinpịkị ị̀ damaḅo ẹkẹ, Tamụnọ Ḅe nwọ ḅẹmẹ, ḅofa àrị ini gwọ.”

⁴¹ Aịzaya ḅe mịn mị nwọ ḍukomẹ, anịatịḅị ò Jizọs Ḅe boma mị ọrịmẹ se ò gbolomaye nwọ ḍukomẹ.

⁴² Anị sọnị, tọn-a Ju ḅẹrẹtọn apụ Jizọs Ḅe ḅerenimẹ ọkụma Farisiapụma gose, ini ḅelema anị gbolomaye ḍukokẹ, mịẹse ini tẹkẹwarị mị ḅie ini depakụma ẹka ḅara.

⁴³ Ini tomoni ḅẹlẹma ọkịye nwọ ḅẹlẹmatẹịn Tamụnọ Ḅe ḅẹlẹma ọkịye nwọ nẹngịmẹ.

Jizọs Ọkwẹịn Ma Ḅe Ḅẹrẹkọn Mị Gbolomaye

⁴⁴ Jizọs Ḅe gele pụkọ ḅụ nwọ ḅẹmẹ, “Ị̀ ḅereniḅọ goyegoye ị̀rị̀ kẹngẹ nwọ ḅerenikẹ, ọkụma pịkị ị̀ seni fịrịmaḅọ ḅe nwọ ḅerenimẹ.

⁴⁵ Ị̀ ọrịḅọ goyegoye, pịkị ị̀ se fịrịmaḅọ ḅe nwọ ọrịmẹ.

⁴⁶ Enekuḅu ḅara à nwọse tomonikiri mị ḅie ḅosam, mịẹse ị̀ ḅereniḅọ ḅereniḅọ kanakana ḅie sime ẹka ḅara.

⁴⁷ Ị̀ya oku naa se anị ḍukoye mịẹkaḅọ goyegoye à ḅẹrẹkọn iniḅọ pịrị ẹkẹ. À ḅo ḅẹrẹkọn tomonikiri mị pịrị-ẹ ḅokẹ, ọkụma anị ḍụaḅọrọmaḅịa ẹrẹchị-ẹ.

⁴⁸ Ị̀ sịkị se ị̀ya oku mị ọkịka ḅọ goyegoye, ḅẹrẹkọn iniḅọ pịrịḅịa gbọrịḅọ à nwọ nyanamẹ. À kọn sa ọkwẹịnma iniḅọ ḅẹrẹkọnḅọ nwọ sọḅịa kuluma ene mị ḅụ!

⁴⁹ Mịn mị kọkọmaye-ẹ, anịatịḅị ị̀ya kụrọ ḅụ à wẹrị ọkwẹịnkẹ, ị̀ se fịrịma Ḍaḅọ ḅe à ḍukoḅịaye na, à kọnḅịa ọkwẹịnma na nwọ tọn ị̀ pịrịsam.

⁵⁰ À pịkị nemimẹ na oria oloko mị simegbaso ḍumo ọkịḅoḅịa. Anịọkụma à ḍukoye mị, anị Ḍaḅọ Ḅe ị̀ ḅẹ na à ḍuko nwọ ḅẹye mị-ẹ.”