Jona 4 - Kịrịkẹnị Baịbụl

Jona Ḅe Anị Ò Ḅụo Sọmẹ Na Tamụnọ Ḅe Ḍikiḅụgerere Nyanamẹ

¹ Jona ḅe ò ḅie ḅarị iḅiọkụma ḅẹlẹkẹ, anị iḅiọkụma ori ịganịmamẹ.

² Anịḅụ ọ̀ tẹkẹmẹ, “Nyanaḅọ, tẹrẹmẹ àrị ama wẹrịso, à ḍukoka na mị anị ị́ pa mịẹḅịa ọkụ-ẹ? Mịn anị à gose ị̀ya ịnyọ mgba se mangị so Tashịs mun ye-ẹ! À nemimẹ na ị́rị́ anị ḅẹlẹma na ḍikiḅụgerere na nyana Tamụnọ-ẹ, sịkịmamgba inema nyana, iḅiyemịẹ, pịkị ḅụkarakarama ị́ kuḅie ḍinma, ḅarị fomuḅara pịrịka ḅụ.

³ Anịẹrẹchị mịọkụ, ye à fị. À fị mị iḅitẹịn à ḍumo mị nẹngịmẹ.”

⁴ Nyanaḅọ Ḅe nwọ pẹkẹrẹmẹ, “Cheye gose ị́ ịganị-ao?” Ị́ kọn-arị ịganị mị kura?

⁵ Jona ḅe pa paka mun opuama mị ḅụ ịrụapakapaka nyọ ḅụ gbọrị nyọ ḅụ kpọnjị simemẹ. Ọ̀ gbọrị tịḅị kikimaye nama ọ̀ ḅụ pịrịmẹ se anịnyọ kpọnjị simemẹ, se tọrụ se Ninivẹ mị ḅụ pakaḅịaye ḍikiaḅẹ.

⁶ Anị Nyanaḅọ Tamụnọ Ḅe gbọrị chịn mịẹ pakụma se anị tịḅịkikimaye sọ Jona ḅe pịrịmẹ, mịẹso sịkị ọ̀ ḅụ deinḅịa ọkụ. Jona ḅe ori opuma ḅieḅẹlẹmẹ chịn mị gose.

⁷ Ọkụma jịn eneḅaḅịa sịkị Tamụnọ Ḅe kụrọ pịrị ḅaraḅụ atamgbalamgbala chịn mị gborimẹ, se anị fị ḅaamẹ.

⁸ Ịrụa mị sakị pakaḅo sịkị, Tamụnọ Ḅe ọfịrị fọrụ se sẹịnmẹ ịrụapakapaka nyọ mị ḅụ, se Jona ḅe ọ̀ fụmụ-ẹtọnmẹ, anị ịrụa mị ḅụ ḅo ọfịrị mị ò tịḅị ọgọnọ sararị ḅara gose. “À fị mị iḅitẹịn ḍumo mị nẹngịmẹ,” ọ̀ nwọ ḅẹmẹ.

⁹ Ọkụma Tamụnọ Ḅe nwọse ọ̀ ḅẹmẹ, “Che karakara ị́ nwọ nyana ị́ gose chịn mị ḅụ ịganịarịye?” Jona ḅe pẹkẹrẹmẹ, “À jokoma ịganị gbẹịnmẹ—ḅakama ịganị ḅụ sime fị!”

¹⁰ Nyanaḅọ Ḅe ọ̀ ḅẹmẹ, “Mịn chịn mị gbọrị ḍin ḅụ anị sẹnịpakaḅomẹ, se eneḅa ḅụ, nweni ḅarị anị ọrịkẹ, ị́rị́ mịẹ anị pịrịye ofori-ẹ, ị́rị́ pịkị anị mịẹ sẹnịmakẹ—ọkụma ị́ ḍikitịḅịfoin nyana anị pịrịmẹ!

¹¹ Anịọkụma nde ị̀rị̀ à gose ḅakatẹịn ḍikitịḅịfoin nyana anị ḍụḅa opuama, Ninivẹ mị pịrị-ẹkaye? Anịmgba nẹngịye, ma siye mịẹka awọ jie-a poku nẹngịye na ḅaka nama na anịa ḅie omi-ẹ!”