Jona 1 - Kịrịkẹnị Baịbụl

Jona Ḅe Nyanaḅọ Ḅe Ḅịpị Sịkịmẹ

¹ Gbọrị ene Nyanaḅọ Ḅe ọkwẹịn Amitaị tọkụ Jona ḅe pịrịmẹ.

² Ọ̀ nwọ ḅẹmẹ, “So Ninivẹ mun anị ḍụḅa opuama mị, se ọkwẹịn anị pịrị; anịa tomonima sitịḅịnyana la-ọkụ à nemimẹ.”

³ Jona ḅe anịnakaraka, sịsẹ se pakaso jịn pẹkẹrẹ nwọ damẹ, mịẹso sịkị ọ̀ Nyanaḅọ Ḅe ḅụ wẹrị ḍarịmaḅịa ọkụ. Ò so Jọpa mun mẹ, anịanga Tashịs mun-ẹtọn-arị onwoin arụ ọ̀ nwọ ọrịmẹ. Ori igbiki mị gbẹịn se arụ mị ḅụkụlọmẹ, onwoin arụ dọkụ apụma ḅụ sọ se so Spen munḅịa ẹrẹchị Nyanaḅọ Ḅe ḅụ ọ̀ wẹrịḍarịmaḅịaye gose.

⁴ Ọkụma Nyanaḅọ Ḅe kụrọ fọrụ se tọrụ mị fịrịmamẹ, se anị chụa irisi mị kụrọ so ọkụma, onwoin arụ mị puḅịa ọkụsimemẹ.

⁵ Onwoin arụ dọkụ apụma ini ḅụḅalaḅala nyanamẹ, se ọrịḅọḅọ ḅarachụa ḍọkị ḅụ, oloku owu nụḅọ oru ḅe chịnmẹ. Se ḅụfụka mị mịẹ iderimaḅịa gose, ini ngọma tan tan tọrụ ogbo gbinmẹ. Mịn mị mịẹ-a sịkị Jona ḅe ori ideri arụ mị chuku ḅie mun ḅọlọlọ se deinma mọnọ aḅẹ.

⁶ Arụ mị tịḅịdaḅọ ḅe anị nyọ ḅụ ori ọrị se ọ̀ ḅẹmẹ, “Ịya! Nde ị́ gose nwọ sime gbun mọnọ kọn-arịye? Sịsẹ se ị́ oru ḅe tẹkẹ se ḅarachụa ḅi. Ḅụpalịka ọ̀ wa ḍikiḅụgerere se mịna ḍumo ma ḍụaḅịa.”

⁷ Onwoin arụ dọkụ apụma nwọse jụmḅọ jụmḅọ ḅẹmẹ, “Ó ye wa ịkịan wakị se wa se mị ḅụfụka mị ḅie chuarịḅọ nwọ nemi.” Ini ọkọ mịẹmẹ, se Jona ḅe ẹrẹ ḅụ anị koromẹ.

⁸ Anị ini ọ̀ ḅẹye-ẹ, “Mịọkụ ḍuko wa pịrị! Tụḅọ ḅụ mị ḅụfụka mị ḅo-ao? Nde ị́ya kọnfịye? Nde sẹ ḅie ị́ sime se ḅo-ao? Ị́ya ama nde ama?”

⁹ “Ị̀rị̀ Hibru ḅọ-ẹ.” Jona ḅe nwọ pẹkẹrẹmẹ. “À Nyanaḅọ Ḅe tẹkẹtẹkẹmẹ, soḅie Tamụnọ Ḅe, anị kiri na tọrụ mị na tẹmẹḅọ ḅe.”

¹⁰ Jona ḅe ḍuko ini pịrịmẹ na ọ̀ Nyanaḅọ Ḅe ḅụ mangị ḍarịma aḅẹ. Onwoin arụ dọkụ apụma inia ḅalafamẹ, mị ini ọ̀ ḅẹye-ẹ, “Ngịsị ị́ ọkọmịẹ na gbẹịn-a kẹ!”

¹¹ Irisi mị anị pa sitẹịn ḅara se fie aḅẹ mị sịkị mị ḅụ, mị onwoin arụ dọkụ apụma ò gbelaye-ẹ, “Wa chese ị́ mịẹ ḅe se irisi mị dachịẹ ḅe?”

¹² Jona ḅe pẹkẹrẹmẹ, “Ómine ị̀ se tọrụ ogbo gbin, anịsịkị irisi mị ḅarị fie ẹkẹ. À nemimẹ na ị̀ya mịẹirima anị mịẹso sịkị ó ḅo mị kụrọ irisi mị ḅie sọye-ẹ.”

¹³ Ini ọkọse anị mịẹ na karaka, tọrụ dọkụ apụma ḅụkụrọmamẹ ini anga agba ḅịa ọkụ. Ọkụma irisi mị anị pa sitẹịnma mun aḅẹ, ini pịkị munla nyọ sọ ofori-ẹ.

¹⁴ Mịn ini oloku Nyanaḅọ Ḅe chịnye-ẹ, “Yei Nyanaḅọ, wa ị́ tẹkẹmẹ, fị ḅe fomuḅara se wa pịrịma ḅe ḅọ ḅe ḍumo gose! Ị́rị́ Nyanaḅọ, maye mamgba anị ị́ ḅụḅẹlẹḅara anị àrị mịẹarị ọkụ-ẹ.”

¹⁵ Mịn ini Jona ḅe ọkị se ò se tọrụ ogbo gbinye-ẹ, tọrụ mị pịkị anịgbọrị kirikiri yawụmẹ.

¹⁶ Anị mịẹse onwoin arụ dọkụ apụma Nyanaḅọ Ḅe ḍikiḅalafa-so-ọkụma ini agbamịẹ ọ̀ pịrịmẹ pịkị ḅerenimẹ na ini ọ̀ tẹkẹtẹkẹḅịa.

¹⁷ Nyanaḅọ Ḅe tọnḅara ḅụ gbọrị opu inji Jona ḅe mịnịmẹ, se tẹrẹ-a enekaka na tẹrẹ-a ḍin na ọ̀ nwọse inji ḅe ḅụlọ ḅie simemẹ.