Joẹl 1 - Kịrịkẹnị Baịbụl

¹ Mị anị Nyanaḅọ Ḅe se Pẹtuẹl tọkụ Joẹl ḅe pịrị oku mị-ẹ.

Tomoni Ma Ini Ngịrịmẹ Fịaye Ma Fị Ḅara Mị

² Ó ḅeri gbẹlẹma poki ómine sẹnịapụma; Juda ḅie simeḅọ goyegoye, poki. Nwọ simeye jịnsịkị pakasa ọ́mịna sịkị ḅụ anịkanịka ọ́mịna ḅieju-aḍapụma sịkị ḅụ?

³ Anịa ḅụ ḅẹrẹ ọ́ nwọ ḍuko ọ́mịna awọma pịrị; ini ma pịkị ḍuko inia awọma pịrị, ini ma pịkị anị ḍuko ísí ḅoḅịa ḅụọ mị pịrịḅịa.

⁴ Igurube ḅụ kpokpo fịayema ọgọnọ chịẹmẹ; gbọrị kpo fịkọnmaye, ísí kpo mị ḅo fị sinmẹ.

⁵ Ọ́ sịsẹ owu, ómine iruḅu tọrụḅaamaḅaama apụ; ómine owu, ómine iru ḅuḅu apụ; ịwọ irumịẹ tụmgbakị elelenda mamgba si sosam.

⁶ Igurube ogbo owu seni mịna ama mị pakasam; àrị opuma kụrọmẹ pịkị ineda àrị kịẹnḅịa ọkụ ofori-ẹ; arịa aka ma chịrịḅa ḅe aka ma oḅu ọkụ oḅumẹ.

⁷ Wa seni iru mịẹmịẹ tụmgbakị elelenda ozuma àrị fịsosam mịna irumịẹ figi chịnmgbọlụma àrị tokuru famasam. Àrị chịn apụra ma fị sinsam, ọkị nweni chịn ịkpangị ma ḅo ḅịaḅịama simemẹ.

⁸ Ómine owu, ómine tomoni, iremeniḅọ á simeḅịa owuḅọ fịse owu ngịrị ọkụ.

⁹ Ó se Oputẹkẹwarị ḅie ḍiepịrịaye agba mịẹḅịa ịpịamgba anịkanịka iru ofori-ẹ; agbamịẹapụma ini ngịrịmẹ anịatịḅị ini se ḍiepịrịaye agba mịẹ Nyanaḅọ Ḅe pịrịḅịa aye ofori-ẹ.

¹⁰ Ozu ma ḅie ye ofori-ẹ, kiri mị anị ḅarị ineda fịye pakụmakẹ, ịpịamgba ma sisosam, tụmgbakị elelenda ma samịnasam, oliv chịnma samịna fịaḅẹ.

¹¹ Ómine ngịrị, ozu kọrịapụ; ómine owu, irumịẹ chịnmgbọlụ ozuma ḍikiḍikiarịapụ, anịatịḅị fịturu mịẹ ịpịamgba ma na irumịẹ chịnmgbọlụma na, iin jịn fịaye mamgba na sisosam.

¹² Tụmgbakị elelenda ozuma na figi ejema na samịna fịsam; chịnmgbọlụ chụa chịn mamgba ịnyọ arịa ḅụ oforiḅụ àrị sokoro sokoro fịsam. Tomonima ḅe ḅieḅẹlẹ mị ḅarị ofori-ẹ.

Pịkị Ma Nyanaḅọ Ḅe Damaḅo

¹³ Ómine okuru ḅiriaye ḅiri se owu, ómine agbamịẹ ẹbẹ ḅụ fịrịnwẹngị-nwẹngị agbamịẹapụ, ómine ị̀ Tamụnọ Ḅe agbamịẹapụma! Ó mun Oputẹkẹwarị ḅie ḍin mị mgba nwọse ngịrị! Anịatịḅị ó se Oputẹkẹwarị ḅie ḍiepịrịaye agba mịẹ ọ́mịna Tamụnọ Ḅe pịrịḅịa ịpịamgba anịkanịka iru ofori-ẹ.

¹⁴ Ḅurukụma ḅịa ene ọ́ nwọ tọn pakụmaḅo; ómine ọ́ ḅụ ma mịẹfịafịama, tomonima koḅiri! Tịḅịnị ma koḅiri pịkị Judapụ mamgba na koḅiri ómine Nyana Tamụnọ Ḅe Oputẹkẹwarị ḅie chu se ómine oloku owupakụma ọ̀ pịrị!

¹⁵ Yei anị ḅalafama ene mị anị kpekisa-o! Kụrọmamgba Nyanaḅọ Ḅe yesima se ḅoḅịa ene mị. Anị ene mị nde anị ḅalafamaye sọḅịa ọkụ!

¹⁶ Ḍiki mịna fịaye mamgba fịsosam. Ḅieḅẹlẹ ofori-ẹ mịna Tamụnọ Ḅe oria Oputẹkẹwarị ḅie.

¹⁷ Ḍipi-a chịnmgbọlụma kiri mị ḅie àrị samịna se nyọnịmẹ. Koko wẹrịḅịa fịayemgbọlụ ofori-ẹ, ye ḅie ofori fịayemgbọlụ koko warịma siaḅẹ.

¹⁸ Ḍiki-o! Nambulo ma arịa ḅalaḅala ḅụ kụrọma olokuaḅẹ anịatịḅị àrị fịḅịa osuein ofori-ẹ; anana ogboma sọ àrị tọrụsiọrịmẹ.

¹⁹ Yei Nyanaḅọ, àrị oloku owu ị́ pịrịmẹ, anịatịḅị, ḍiki osueinma na chịnma na samịna sosam, fịnị dọkịmaye sime ọkụ anị àrị sime ọkụ-ẹ.

²⁰ Piri ḅie owoi namama sọ oloku owu pakụma ị́ pịrịmẹ anịatịḅị ideri mengi ma sọnị samịnasam. Nama sime osuein fịfị nyọ mamgba fịnị dọkịma sosam.