Jerimaya 8 - Kịrịkẹnị Baịbụl

¹ “Anị sịkịḅụ Juda amanyanapụma na anịa fịrịnwẹngịapụma na ḅụ ịmgbema pịkị agbamịẹ apụma na ịkịankoroapụma na pịkị Jerusalẹm ḅie anga jịn-apụ-imgbe mamgba, inia iḍupuma ḅie ini àrị sokupakụmaḅịa.

² Ini àrị kpokponima se ḍipi na karaka, inia ịmgbema àrị kiri papa ḅụrụḅụrụ sime, fịye pakụmaye sọḅịa. Àrị ịrụa ḅie na, akalụ na, lolia ma na ḅie wasamaḅịa, anị mịnapụma ḅẹlẹma tịḅịtu pịrị pịkị tẹkẹsaye ma.

³ Mịna kọn apụma mị si sẹ ḅie, à kan gulugulumasa nyọma ḅie sime apụma, fị ḍọkịḅịa ini pa ḍumo sime na karaka. Ị̀rị̀, Kụrọmamgba Nyanaḅọ Ḅe, ọkwẹịnsam.”

Si Na Fomuḅara Na

⁴ Nyanaḅọ Ḅe ị̀ ḅẹmẹ, à ḍuko oria tomonima pịrị, “Tomoniḅọ ḅịkịkoro ọkụma, ọ̀ ḅarị sịsẹ ẹka? Nemikase gbọrịḅọ ateli iri ọkụma, ọ̀ pịkị ẹka?

⁵ Cheye gose, ị̀ya tomoni, ómine ị̀ ḅụ wẹrịḍarịma, se ngịsị ḅarị pịkịmaḅoka? Ómine ọ́mịna oru ma oḅolo se ḅarị pịkịma ị̀ damaḅo ḍọkịkẹ.

⁶ À gbẹlẹma pokimẹ, ọkụma ọ́ karakaraye ḍukokẹ. Ọ́mịna ḅụ gbọrịḅọ sọ ma mịna sitịḅị gose ngịrịkẹ; gbọrịḅọ sọ ma gbelakẹ, ‘À che si mịẹsa?’ Ọrụḅọḅọ mịna ateli da mẹ, asụn jua owu mun ọkụ.

⁷ Pịnabo ma pembe pịkịmaḅoḅịa sịkị nemimẹ; okuku ma na tịḅịpẹlẹḍụẹịn ma na kala feni awọma na nemimẹ àrị finso jịn anga munḅịa sịkị. Ọkụma, ị̀ya tomoni, à chụa se ó ḍikiḍiki àrị olokoma ó nemikẹ.

⁸ Nde ómine ineda ḅẹḅịa ọkụ na ó yenemimẹ, ọ́ pịkị olokoma nemimẹ? Ḍiki, furu ḍiri-gịẹịn-apụ ma ini olokoma ḍinmasam.

⁹ Ọ́mịna ḅie yenemi apụma, ini ḅụgerere ḅie sọsam; ini ḅụḅalaḅala nyanasam pịkị ḍẹịn ḅie korosam. Ini ị̀ya ọkwẹịn ma sịkịsam; che nemi ini nwọ nyana mịọkụ?

¹⁰ Anịgose àrị inia ozuma se ịwọ apụ pịrị se ini àrị nyanaḅịa se inia erema se jịn owuapụ pịrịḅịa. Ḅẹḅọ ḅẹḅọ, opu na kala na, furuḅọkọ ḅụ igbiki mịẹ-aḅẹ. Ịkịankoroapụ na agbamịẹ apụ na sọ tomonima inuma mẹ.

¹¹ Ini mịẹarị ḅara nweniḅọ chịnḅịa na ị̀ya tomonima laye ma papa ịsịn aye-ẹ. ‘Arịmgba iḅi waraḅẹ,’ ini nwọ ḅẹmẹ, arịmgba iḅika sịkịḅụ.

¹² Ị̀ya tomoni, ọ́ ḅụgerere nọ ọ́ ma ḅụnwọnwọ mayema mịẹ ẹrẹchị? Ẹn-ẹn, ngịsị ọ́ ḅụgererekẹ; ngịsị ọ́ pịkị ḅụgerere maye nemikẹ. Anịgose ísíapụma ḅịkị ọkụ, ọ́ ḅịkịḅịa; à fomuḅara se ọ́ pịrịso sịkị anị ọ́mịna kuluma sọḅịa. Ị̀rị̀, Nyanaḅọ Ḅe, ọkwẹịnsam.”

¹³ “À ḍọkịmẹ àrị ị̀ya tomonima koḅirima, tomoniḅọ iniḅọ sokuaye ma kpokponima ọkụ; ọkụma ini tụmgbakị elelenda nyanaka irumịẹ chịnmgbọlụ ozu kịkẹmẹ, figi ofori figi chịn kịkẹmẹ; anịa ọgọnọ sime ịnyanya mamgba ḅịasosam. Anịgose à ḅereni igoniapụ pịrịsam ini ama mị ọkị.”

¹⁴ “Wa cheye gose pa kpọnjị sime-ao?” Tamụnọ-a tomonima nwọ gbelamẹ. “Ó ḅo, wa mangị mun owuniaye sime opuamama ḅie fị. Nyanaḅọ, mịna Tamụnọ Ḅe, ọ̀ wa se ḅaa ḅie chusam; ò nweni ḅaa ḍiri se wa pịrị se wa ḅusam, anịatịḅị wa ọ̀ ḅụ simịẹsam.

¹⁵ Wa tọrụ se dein na gwọ sịkị na ḍikimẹ, ọkụma sọye ofori-ẹ, anịnakaraka ḅalafa anị ḅoye-ẹ.

¹⁶ Mine-na-tarakapụ ma, ini ḅo Danị opuama mị lasam; inia asụnma ḅe chịsa wa nwọ naa aḅẹ. Bebe ama mị jikemẹ ḅalafa ḅụ inia asụnma oloku ọkụma. Mine-na-tarakapụ ma ini ḅosam, ḅo ama mị kan se anịa ḅie sime yegoyegoye simaḅịa ẹrẹchị, mịna opuama mị na tomonima na.”

¹⁷ “Ọbị koru!” Nyanaḅọ Ḅe ọkọ ḅẹmẹ, “Àrị oruwu se ọ́mịna ogboku sẹịn-aḅẹ, nweni ḅaaḅaa oruwu tomoni ineda ḍiri se dapịkị ẹka oruwu, àrị pịkị ọ́ gbọḅịa.”

Jerimaya Ḅe Kururu Mẹ Oria Tomoni Ma Gose

¹⁸ Ị̀ya kururu mị ineda gwọ ẹkẹ; ị̀ kuḅie ị̀rị̀ na deinkẹ.

¹⁹ Poki! Bebe ama ḅie mgba àrị ị̀ya tomonima owu-a tịḅịḅie naamẹ, “Nyanaḅọ Ḅe, Zaịyọn ḅie ọ̀ ḅarị ofori? Zaịyọn amanyanaḅọ ḅe ọ̀ ḅarị anịnyọ ofori?” Nyanaḅọ, inia amanyanaḅọ ḅe pẹkẹrẹmẹ, “Ó che gose ị̀ ịganịma-ao ọ́ nwọ ọ́mịna oru ma tẹkẹ àrị sịkị pịkị tịḅịtu yeḅụoforika jịn ama oru ma pịrịarị sịkị?”

²⁰ Tomonima ini oloku owumẹ, “Ịrụakpoin ḅọrọsam, soku sịkị ḅọrọsam, ọkụma wa pa ḍụaḅọrọma nyanakẹ.”

²¹ Ị̀ kuḅie kankọsịsam anịatịḅị ị̀ya tomonima ini ini kankọsịmasam; à ḍụẹịn ḍinmẹ; à gbọtụma kpọtọnịsarasam.

²² Giledị ḅie nweni gwọ ḍiri ofori? Anịnyọ ḅịrịapụ ofori? Anịọkụma, cheye gose, ị̀ya tomonima ineda pa gwọka?