Jerimaya 6 - Kịrịkẹnị Baịbụl

Tarakapụ Jerusalẹm Ḍẹkị Kelemasam

¹ Bẹnjamin-a tomoni, ó ḍumo mangị kọn! Jerusalẹm ḅie ọ́ pọkọso! Oḍu mị ofuro Tẹkoa ḅie, se Bẹt-Hakirẹm ḅie elekima fịnị tọnọ. Fị na fa na anị ọgọnọju ḅụ ḅoarịye-ẹ.

² Zaịyọn opuama mị ḍikitọrụgbẹịnmẹ, ọkụma ini anị kanḅịa;

³ amanyanapụ inia owunima na pikeḅịa anịnyọ. Ini inia ikowarịma nama opuama mị kelemaḅịa, se ọrụḅọḅọ iniḅọ ḅụḅẹlẹ nyọ pikesimeḅịa.

⁴ Ini nwọ ḅẹḅịa, “Ọ́ ḅụkarakarama Jerusalẹm dapaka! Ḅụkarakarama! Ene ogboin wa ḅarafiemaḅịa!” Ọkụma anịsịkị ini nwọ ḅẹḅịa, “Anị opuma ọḅụdasam, ene munsosam, se saso sọsam.

⁵ Ḍinḅụ wa ḅarafiemaḅịa; wa ama mị anịa owuni-a warịma kanḅịa.”

⁶ Nyanaḅọ Kụrọmamgba Nyana Tamụnọ Ḅe, kụrọ se mịna amanyanapụma pịrịsam, na ini eje mamgba pẹlẹgbin se chịngị nama, mịẹso sịkị ini Jerusalẹm mị jụḅịa ọkụ. Ori ọkọḅẹsam, “À fomuḅara se mị opuama mị pịrịḅịa anịatịḅị nweni pụnụma anịa ḅụ ḅakamẹ.

⁷ Olulu anịa mengi mịẹ ịwọma ọkụ mị Jerusalẹm mị anịa sima wẹrị ịwọma ọkụ-ẹ. À kụrọ-amịẹmịẹye na yesima na naamẹ ama mị ḅie; obi na ye-nweni-la na à nwọ ọrịmẹ.

⁸ Jerusalẹm tomoni, yema ḅụfụka ma ọ́mịna ḅerijineye nwọ sọ, anịka, àrị ọ́ sarakoromaḅịa; àrị ọ́mịna opuama mị pịkị onwun ele mịẹḅịa, anị gbọrịḅọsọ anga ẹka nyọ.”

Nyanaḅerenika Izrẹl

⁹ Kụrọmamgba Nyanaḅọ Ḅe, ọkọ se ị̀ ḅẹmẹ, “Ini Izrẹl mị se papaḅụ sinḅịa, irumịẹ chịnmgbọlụ ozu ḅie ḅụ tụmgbakị elelenda goyegoye ini nwọ kaịnfama ọkụ. Anịgose ị́ ineda tomoniḅọ goyegoye nwọ ḍụaḅịa sịkị pa sime wararị sịkị.”

¹⁰ À pẹkẹrẹmẹ, “Tụḅọ ị̀ pokiḅe à nemikase ọkwẹịn ini pịrị pịkị inia ḅerijine ọkụma? Ini ininachịnmẹ pịkị ị́ya oku mị poki ḍụkụkẹ; ini ị́ ị̀ ḅẹ ḍuko ini pịrị nwọ ḅẹ-aye ma ḍẹrịmẹ.

¹¹ Ị́ nyana ini pịrị ịganị mị ị̀rị̀ sọnị ị̀ kuḅie dọkịmamẹ, Nyanaḅọ, à pịkị ḅarị ineda ọlọchịẹma ẹkẹ.” Anị Nyanaḅọ Ḅe ị̀ ḅẹye-ẹ, “Ị̀ya ịganị ma ọsụnsara awọmẹnịma ọgọnọ, ateli ma ḅie na, asẹmẹnị ma na ọgọnọ inia koḅiria ma ḅie. Deapụ na ere na, ini ini sẹịnsoḅịa; opuma olomu apụma sọ, kọn ẹkẹ.

¹² Ini inia warịma se jịn apụ pịrịḅịa, anị anị pịkị sime inia ozuma na inia erema na pịrịḅịa ọkụ-ẹ. Àrị ama mị ḅie sime apụma tọrụsiọrịmaḅịa.

¹³ Nwenimgba, opu na kala na, furuḅaraḅụ igbiki mịẹ-aḅẹ; ịkịankoroapụma na agbamịẹapụma na sọnị nweni inumaḅẹ.

¹⁴ Ini ye àrị ḅara ị́ ḅẹḅịa na ị̀ya tomonima ḅụ ịnọ ma papa adaka-ẹ. ‘Arịmgba iḅimẹ,’ ini ọkọ ḅẹmẹ, anịsịkị arịmgba iḅikẹ.

¹⁵ Inia ḅụgerereka ini mịna tọrụsimaye ma mịẹarị sịkị? Ẹn-ẹn, ngịsị inia ḅụgererekẹ ini pịkị ḅụgerere nemikẹ. Anịgose ísíapụma ḅịkị ọkụ mị inisọ ḅịkịḅịa ọkụ-ẹ; àrị inia tọrụsiọrịmaḅịa anịsịkị, anị inia kuluma-ẹ. Ị̀rị̀, Nyanaḅọ Ḅe, ọkwẹịnsam.”

Izrẹlapụ Ma Tamụnọ Ḅe Ateli Sịkịmẹ

¹⁶ Nyanaḅọ Ḅe nwọse oria tomonima ḅẹmẹ, “Ọ́ tẹrẹ-a ichira ma ḅie chịẹ se ḍiki. Olomu ateli ma ọ́ nwọ gbela, se iḅitẹịn ateli mị ḍọkị. Anịa ḅie nwẹngị, se ó dein ḅie angaḅịa.” Ọkụma ini ọkọ ḅẹmẹ, “Ẹn-ẹn, wa ye ẹkẹ.!”

¹⁷ Mị Nyanaḅọ Ḅe nyọ koruapụ nwọ tọnye-ẹ, ini oḍu mị fiearị ḅerijine-aye ma poki. Ọkụma ini nwọ ḅẹmẹ, “Wa poki ẹkẹ.”

¹⁸ Anị Nyanaḅọ Ḅe ḅẹye-ẹ, “Ó poki, ómine sẹma, se ị̀ya tomonima ḅụ pakaḅịaye ma ọ́ nwọ ḍawọ.

¹⁹ Poki, tomonikiri! Ini tọn ayema ḅe fomuḅara ḅụ, opu fa à nwọse ḅo mịnapụma ọgọnọ gbana-ẹḅoaḅẹ, anịatịḅị, à se ini ḍieaye ma ini sịkịsam se ị̀ ḅịpị pokikẹ.

²⁰ Ini Shiba ọkịḅo insẹnsị mị anịkanịka ḅọlọ ama ḅụ ọkịḅo ye kụnụmaye mị à se cheyeḅe? Inia ḍiepịrịayema àrị ọkị ẹkẹ, anịkanịka à ḅieḅẹlẹ nyana inia agbama pịrịkẹ.

²¹ Anịgose à mịẹḅịa mịnapụma ḅụọ tọmbụlọ se ini ḅịkị. Ḍapụ na owuapụ awọ na fịḅịa, anị anị pịkị sime ikiapụ na palịangapụ na pịrịḅịa ọkụ-ẹ.”

Ọgọnọju Ḅoḅịa Owuni

²² Nyanaḅọ Ḅe ọkọ ḅẹmẹ, “Ọgọnọju gbọrị amapụ ḅoaḅẹ; ḅọlọju sime gbọrị opu kụrọ ama anịa ḅụ karakarama owu pịrị aḅẹ.

²³ Ini inia lubu ma na kongo ma na ọkịsam; ini akụ kuḅie nyanamẹ pịkị ḍikiḅụgerere nyanakẹ. Inia asụnma ọgọnọ ini nwẹngị ọkụma, ị́ chịnḅịa tọrụ ḅie fọrụ fieaḅẹ. Ini Jerusalẹm na owusọḅịa ẹrẹchị ḅụkarakarama waraḅẹ.”

²⁴ “Ḍukoaye ma wa naasam,” Jerusalẹm-a tomonima ọkọ ḅẹmẹ, “Se mịna ḅarama kẹkụmẹ, opu ḅalafa na ḅụakụ na wa gbẹịnmachịẹsam, yi-na-jike-arị eremeniḅọ ḅara.

²⁵ Wa dadama paka amama aka anịkanịka nwẹngị ateliogbo mun-ẹkẹ, anịatịḅị mine na tarakapụma ini owuniaye karakarama waraḅẹ, pịkị opu ḅalafamaye wa kelemamẹ.”

²⁶ Nyanaḅọ Ḅe nwọse oria tomonima ḅẹmẹ, “Ómine okuru ḅịtẹ kaka se fọn-ḅie kpeleki. Ngẹrị tọkụ gose kọnḅịa akụ owu ḅara nwọse owu, anịatịḅị ḅo ọ́ kan-ẹḅoḅọ ḅe ò pururuma pakaḅo ọ́ dapakaḅịa.

²⁷ Jerimaya, ị̀ya tomonima ḍaḍiki, ị́ ikulele ḍaḍikiḅịa ọkụ, se ḍọkịḅo ini che kịkẹ.

²⁸ Inimgba ininachịn nyanaḅerenikapụ-ẹ, alapẹlẹka na ikulele na kụrọ-ọkụ-kụrọ-apụ-ẹ. Inimgba simịẹmịẹye nyana apụ-ẹ, nwẹngịmaḅọrọ pịkị nweni-se-fiema ḅọrọ aḅẹ.

²⁹ Fịnị mị ḅalafama ḅara se kọrịmẹ, ọkụma ikulele ma sanịkorosokẹ. Anị sọye mịẹkẹ, ị̀ya tomonima mịẹfịafịama, anịatịḅị siapụma ini pa ini sikimakẹ.

³⁰ Ini ini chịnḅịa, sọye-ḅụ-oforika-fọn anịatịḅị Ị̀rị̀, Nyanaḅọ Ḅe àrị ini sịkịsam.”