Jerimaya 5 - Kịrịkẹnị Baịbụl

Jerusalẹm Mị Mịẹ Si

¹ Jerusalẹm-a tomoni, ọ́mịna ateli ma ḅie ọ́ ḅọrọ mangị! Ó ḍiki kelema! Ómine ḅarana ḍiki! Ọ́ fẹ chiri ma ḅie ḍiki! Ómine ineda gbọrịḅọ ọrịḅịa anị karakaraye mịẹ se kuḅie se Tamụnọ ḅụgbanaḅọ? Ómine inemẹ ḅẹḅẹ, Nyanaḅọ Ḅe ò siḅụ ḅarasin Jerusalẹm mị pịrịḅịa.

² Ị́ ḅereni ọkịmẹ na ị́ Nyanaḅọ Ḅe tẹkẹmẹ nwọḅẹ sọ, ị́ ḅẹye ị́ nwọ mịẹkẹ.

³ Kọkọmaye-ẹ kuḅie-se-ḅụgbana anị Nyanaḅọ Ḅe ọ̀ ḍọkịarịye-ẹ. Ori ị́ ḅakụmẹ, ọkụma ị́ tọrụ kweinmakẹ; ori ị́ kọsịmamẹ, ọkụma ị́ yeḍawọ ḍụkụkẹ. Ị́ ininachịnmẹ, pịkịna ị́ya sima ḅie ị́ pịkị ḍụkụkẹ.

⁴ Se à ḅo koromamẹ, “Mịnapụ ma anị igwein pịkị yenemikapụ kẹngẹ-ẹ. Ini oḅorisọ ḅara se ye mịẹmẹ; inia Tamụnọ Ḅe ḅiarịye ini nemikẹ, Nyanaḅọ Ḅe ḅi na ini mịẹ nwọḅẹye mị.

⁵ À kụrọ mị ḅara sime apụma damamun se ini na ọkwẹịnḅịa. Kọkọmaye-ẹ ini anị ini Nyanaḅọ Ḅe ḍọkịarịye mị nemiye-ẹ, Nyanaḅọ Ḅe ḍọkị na ini mịẹ nwọḅẹye.” Ọkụma inimgba ini Nyanaḅọ Ḅe kụrọ mị sịkịsam se ḅarị ọ̀ ḅịpị pokikẹ.

⁶ Anịẹrẹchị piri ḅie pakaḅo chịrịḅama ini ḅaaḅịa; onwun ele ḅie pakaḅo piri obiri ini kanịkọsịḅịa se chịrị inia amama ḅie nwẹngịma ḅọrọḅịa. Iniapụ ma nemikase pakamẹ nwọ ḅẹḅẹ, ini ini kanịkọsịḅịa anịatịḅị inia sima ḅakamẹ se sịkịna-sịkịnaḅụ ini Tamụnọ Ḅe ḅụ pịkịsam.

⁷ Nyanaḅọ Ḅe gbelamẹ, “Nde à gose ị̀ya tomonima sima ḅụ ḅarasinḅịa ọkụ? Ini ị̀ sarakoroma se jokoma tamụnọkaye ma tẹkẹmẹ. À fịye se ị̀ya tomonima koko nweni inia ḅụlọ ḅeinmẹ, ọkụma ini sẹfịmẹ se inia sịkị famamẹ sẹfịapụ ma na.

⁸ Ini iḅiọkụma koko pakụma asụn kịkẹmẹ, anị mịnaḅụ ma opuma sịsẹ se ḅo iniḅọ-na-palịa angaḅọ ta ḍọkịḅịa ẹrẹchị.

⁹ À mayema tịḅị gose fomuḅara se ini pịrị ẹka se nwọ sime sẹ ḅụ sowuḅi ẹka?

¹⁰ À tarakapụ se sẹịnḅịa ini mun ị̀ya tomonima irumịẹ chịnmgbọlụ ozuma pẹlẹgbinḅịa, ọkụma gbọtụma ini simaka ḅaraḅụ. À ḍuko ini pịrịḅịa ini ịkpangị ma anyịmasin, anịatịḅị àrị ịkpangị ma ị̀yayekẹ.

¹¹ Izrẹl na Juda na-a tomonima ini gbọtụma ị̀ dẹrịsam. Ị̀rị̀, Nyanaḅọ Ḅe ọkwẹịnsam.”

Nyanaḅọ Ḅe Izrẹl Mị Sịkịmẹ

¹² Nyanaḅọ Ḅe oria tomonima ini ò piki se ḅẹsam, “Ò jokoma mịẹḅịaye ofori-ẹ. Wa ḅụfụka sịkị nyana ẹkẹ; wa ọmụ na ḅuruḅaa na nyana ẹkẹ.”

^13-14 Ini ḍukosam na ịkịankoroapụma ini ye ḅụ ofori-ẹ, ọkụma fọrụ akpa-ẹ, ini Nyanaḅọ Ḅe ḅara daḅo oku sọ ofori-ẹ. Nyanaḅọ Kụrọmamgba Nyana Tamụnọ Ḅe, ị̀ ḅẹmẹ, “Jerimaya, mịna tomonima ma ayema ḍuko ẹrẹchị, àrị ị̀ya ọkwẹịn ma se fịnị mịẹ ị́ ḅịpị ḅie chụaḅịa. Tomonima fịnị pẹkẹrẹ kịkẹḅịa, se fịnị mị ini dọkịmasinḅịa.”

¹⁵ Izrẹl-a tomoni, Nyanaḅọ Ḅe ḅọlọju ọ̀ gbọrị sẹ ọkịḅo aḅẹ ḅo ọ́ dapakaḅịa. Anị ma anị kụrọ pịkị olomu sịkị sẹ-ẹ, anịa ọkwẹịn ọ́ nwọ nemika sẹ-ẹ.

¹⁶ Inia lubu-a tomonima anị opu owuni-ẹ, ini anị ḍikiḅụgerere nyanaka ḅara se nweni ḅaarịapụ-ẹ.

¹⁷ Ọ́mịna ḍipi ayema na fịaye mamgba na ini burasinḅịa, ọ́mịna owuapụ awọma na eremeni awọma na ini ini ḅaaḅịa. Ini ọ́mịna ananama na nama ogboma na ḅaaḅịa se ọ́mịna irumịẹ chịnmgbọlụ ozuma na figi chịnma na kọsịmaḅịa. Ó kuḅie-se-ḅụgbana owuni-a warị mamgba inia owunima àrị kansinḅịa.

¹⁸ Nyanaḅọ Ḅe ọkọ ḅẹmẹ, “Anị-ẹ nwọḅẹ sọ, àrị enema ḅie, à gbọtụma ị̀ya tomonima ḅaa fama ẹkẹ.

¹⁹ Ini gbela na cheye gose à mamgba mịẹ nọ nwọḅẹ sịkị, ḍuko ini pịrị, Jerimaya, ini ị̀ wẹrịso se jịn sẹ oru tẹkẹ ḅaraḅụ inia ama ḅie, anị ini jịn sẹ oru tẹkẹḅịa ọkụ-ẹ inia amaka ama ḅie.”

Tamụnọ Ḅe Oria Tomoni Ma Ḅerijinemẹ

²⁰ Nyanaḅọ Ḅe ọkọ ḅẹmẹ, “Ḍuko Jekọb ḅe ḅụ pakaḅo apụma pịrị, ḍuko Juda-a tomonima pịrị:

²¹ Tọrụ kweinma, ómine oḅorisọ yenemika tomonima, anị tọrụmgbọlụ nyana, ọkụma nyọ ọrịka pịkị ḅeri nyana ọkụma yenaakapụ ma.

²² Ị̀rị̀ anị Nyanaḅọ Ḅe-ẹ, ó che gose ị̀ ḍikiḅalafaka? Ó che gose ị̀ tọrọkọ ḅụgeregereka? Àrị onwun se tọrụ ḅụ eke mịẹmẹ, fimaẹka eke anị ineda saḅa ḅọrọ ẹka ye mị. Tọrụ mị anị ineda jikeḅịa, ọkụma anị ineda anị saḅa ẹkẹ; ambura ma àrị ineda ekereaḅịa ọkụma àrị ineda toluḅọrọ-ẹkẹ.

²³ Ọkụma ómine tomonima! Ómine ininachịn pịkị oloko kan apụ-ẹ; ọ́ ḅụ se anga pịrị se ị̀ wẹrịsosam.

²⁴ Jenejene ó koromakẹ, kụn nyana ị̀ pịrị, à kala ene na opu ene na pịkị fịaye soku sịkị kụra goyegoye se ọ́ sẹịnmamẹ nwọ ḅe sọnị.

²⁵ Anịnakaraka, ọ́mịna sima àrị ma iḅiaye ma dachịẹmamẹ ọ́mịna ḅụ.

²⁶ “Simịẹapụ ị̀ya tomonima ogboku angamẹ; ini ḅọlọlọ korumẹ ịgbọ se feni kunḅịaḅọ koru ọkụ, ọkụma ini inia ḍẹịn ma tumẹ tomoni gose.

²⁷ Namatẹịnḅọ, feni se oria feni-warị ḅeinma ọkụ, ini ọfọịnḅo aye se inia warịma ḅeinmasam. Anị ini gose kụrọ pịkị ngọkọnye-ẹ,

²⁸ ini gose kpokoro pịkị oju iḅi nyanaye-ẹ. Inia siyemịẹ mị anị eke nyanakẹ. Ini kiri se ḍapụ na nyengiapụ na koroma fịsa awọma pịrịkẹ anịkanịka karakara ḅẹrẹkọn se ini pụndarị apụma pịrịkẹ.

²⁹ “Ọkụma Ị̀rị̀, Nyanaḅọ Ḅe, à fomuḅara se ini pịrịḅịa mayema gose; à gbẹịn-fịye fịḅịa mị sẹ mị ḅara.

³⁰ Ḅalafama pịkị ḅụgbiripumaye mị ama ḅie pakasam:

³¹ ịkịankoroapụma ḍukoye ofori-ẹ iruo sikima, agbamịẹ apụma, ịkịankoroapụma tọn ayema anị ini mịẹarịye-ẹ, se ị̀ya tomonima ini anị na tụḅụrụkẹ. Ọkụma ini che mịẹḅe arịmgba ḅo kulumaḅịa sịkị?”