Jerimaya 48 - Kịrịkẹnị BaịbụlMoab Mị Ḅe Kan 1 Mịn anị Kụrọmamgba Nyanaḅọ Ḅe Moab ḅụ ḍukoaye-ẹ: “Nebo apụma ini ḍikiḅụgerere— inia ama kansam! Ini kụrọḅara se Kiriateim ọkịsam, anịa opu owuni kụrọwarị mị ini kangbinsam, se ini inia tomonima se ḅụgerere ḅie chusam; 2 Moab iḅi mị ḅọrọsam. Tarakaḅọ ḅe ọ̀ kụrọḅara se Hẹshbọn mị ọkịsam se ḅiaḅẹ ò Moab sẹ mị kan. Nọmụ apụ ama mị anị yawụḅịa; owuni nwẹngị anị dapakaḅịa. 3 Horoneim-a tomonima oloku pakụmamẹ, ‘Kụrọ mịẹmịẹaye! Yesima!’ 4 “Moab kansam; awọmẹnịma poki, ini owuaḅẹ. 5 Inia sima ma poki ateli ḅie ọkịmun Luhit la, kuḅie sima owu ma ateli ḅụ ideri mun Horoneim la. 6 ‘Be, mangị ọ́mịna ḍumo gose!’ ini ọkọ ḅẹmẹ. ‘Eleogbo owoi yepụra asụn ḅara se mangị!’ 7 “Moab, ị́ kuḅie se ị́ya kụrọ na ngọma na ḅụgbanamẹ, ọkụma mịọkụ ị́rị́sọ ini inumaḅịa; ị́ya oru Kimọsh ḅe ò desin ḅie sọḅịa, oria awọ na agbamịẹapụ na. 8 Gbọrị ama sọ kanka ḅaraḅụ pịọrụ so ẹkẹ; pẹsị nyọ na sẹrẹrẹ nyọ na arịmgba ini kanḅịa. Ị̀rị̀, Nyanaḅọ Ḅe, ḍukosam. 9 Moab ẹrẹ ḅụ agbambuapụ apụ tẹmẹ; ḅọlọ ẹkẹ ini anị kansinḅịa. Arịa ama mamgba sara sọḅịa, se anịnyọ ma ḅụ gbọrịḅọ sọ anga ẹkẹ.” 10 (Worinime sime ini apụma pịrị nwọ inia kuḅie se Nyanaḅọ Ḅe fịrịnwẹngịkapụ ma! Worinime sime ini apụma pịrị nwọ pẹlẹḅaa ḍụkụkapụ ma!) Moab Opuama Ma Àrị Kanmẹ 11 Nyanaḅọ Ḅe ọkọ ḅẹmẹ, “Maob mị anị sịkịmamgba iḅiọkụma kokoḅaraḅụ simemẹ, pịkị ma jenejene desin ḅie sọkẹ. Moab mị kịkẹye anị inise-gbẹlẹma-koroma iru, kpọkpọ gbọrịye sọ laka deinma-ẹngẹma iru, gbọrị ojongo ḅie saḅama jịn ojongo ḅie sarapakụmaka iru. Anịa kụnụ ḍinmakẹ anịa ḅẹlẹ pịkị iḅigbasomẹ. 12 “Anịḅụ mịọkụ, sịkị mị ḅoaḅẹ à nweni fịrịma mun iru sara ḅara nwọse Moab mị sarasinḅịa. Ini anịa iru ojongo ma sara kụnụnụ se ojongo ma ḅaakọsịmaḅịa. 13 Anịsịkị, Moab apụma inia oru Kimọsh ḅe ḅụ ḅụgerere nyanaḅịa, Izrẹlapụma Bẹtẹl ḅe ḅụ ḅụgerere nyana ọkụ, anị ini kuḅie-se-gbana oru ḅe. 14 “Moab owuapụ, ó che gose kụrọapụ se ọ́ ḅụ chịn, ọmụ ḅie ini ḍaḍiki owuni? 15 Moab na anịa opuamama na kansam; anịa iḅitẹịn asẹmẹnị ma ini ini ḅaasosam. Ị̀rị̀ anị amanyanaḅọ ḅe-ẹ, Kụrọmamgba Nyanaḅọ Ḅe-ẹ, à pịkị ḍukosam. 16 Moab ḅịkị mị ḅoaḅẹ; anịa kansara mị ḅọlọka sịkị ḅoaḅẹ. 17 “Ọ́ ḍụẹịn ḍin anị sẹ mị pịrị, ómine anị na kpekima angapụma, óminemgba anịa ẹrẹso mị nemi apụma. Ḍuko, ‘Anịa kụrọ ḅẹrẹtọn mị ini anị ḅaasam; anịa boma na ịnyọ na ḅarị ofori-ẹ.’ 18 Ómine Dibọn angapụma, ó koroḅo anị osi nyana nyọ ḅụ se ḅo kiri fọn ḅie sime; Moab kanḅọ ḅe ọ̀ mị ju omi-ẹ ọ̀ pịkị anịa ọmụ warịma kansarasam. 19 Ómine Aroa angapụma, ateli aka ọ́ chịẹ koru; ọ́ mangị so arịapụ ma gbela, ómine ini gbela nemi cheye pakasa. 20 ‘Moab ḅịkịsam,’ ini pẹkẹrẹḅịa, ‘ómine owu anị pịrị, ini anịa ḅụgereremasam. Anọn Tọrụ aka ḍukopakụma na Moab kansam!’ 21 “Ḅẹrẹkọn ḅo chịngị ọgọnọ opuamama lasam: Holọn na, Jaza na, Mẹfat na, 22 Dibọn na, Nebo na, Bẹt-Ḍibiatem na, 23 Kiriateim na, Bẹt-Gamọl na, Bẹt-Miọn na, 24 Kirịọt na, pịkị Bozra na. Ḅẹrẹkọn ḅo Moab opuama mamgba lasam, ḅọlọnyọ na kpeki-nyọ na. 25 Ini Moab imgbe mị dẹkịdẹkịmasam; anịa kụrọ ini ḅaasam. Ị̀rị̀, Nyanaḅọ Ḅe, ḍukosam.” Moab Anị Ḅụiderimaḅịa 26 Nyanaḅọ Ḅe, ọkọ ḅẹmẹ, “Mịẹ iru Moab mị tọrụsọ, anịatịḅị anị kọngọ kụrọma ị̀ pịrịmẹ. Moab mị anị ọsụn saraye ma ọgọnọ imbibileḅịa, se tomoni ḍẹrịḅịa. 27 Moab, ị́ se ḅiekoroma, ị́ Izrẹl-a tomonima se kpọti ọkụ? Ị́ ini mịẹ ḅara, ị́ ḅẹḅịa na, ini furuapụ ogbo na ini na kunmẹ. 28 “Ómine nwọ Moab ḅie angapụma, ómine ọ́mịna amama wẹrịso! Ó mun tụndụ akama ḅụ anga! Pẹsị-nyọ aka ḅụ oria warị nama okuku ḅe sime ọkụ sime. 29 Moab mị anị opuma opuayemịẹ ḍinmẹ! À naasam tomonima opuayemịẹ ḍin ọkụ, ḅụdekichịẹma ḍin ọkụ, pịkị ḅụseḅụchịn ḍin ọkụ, ini koroma kọn iniaḅụ pịrị la-ọkụ. 30 Ị̀rị̀, Nyanaḅọ Ḅe, inia ḅụdekichịẹma mị nemimẹ. Inia ḅụboma ma laye ofori-ẹ, se ini pịkị mịẹarịye ma ḍin la ẹkẹ. 31 Anịẹrẹchị àrị owu Moab ḅie sime apụ mamgba pịrịḅịa, pịkịna Kị Hirẹs-a tomonima pịrịḅịa. 32 Àrị owu Sibma tomonima pịrịḅịa, owu ini pịrịtẹịn Jiza tomonima nẹngịḅịa. Sibma opuama, ị́ irumịẹ chịn kịkẹmẹ, anị anịa ịkpangị ma Fị Tọrụ mị ḅụ saḅakoro mun Jiza mị la ọkụ simemẹ. Mịọkụ ị́ya ịrụakpoin chịnmgbọlụma na tụmgbakị elelenda ma na ini àrị pẹlẹsinsam. 33 Ḅieḅẹlẹ na ḍoroku na ini ọkịsosam fịye pakụma Moab ama mị ḅie. À mịẹsam iru ḅarị iru chịn ḅie iderikẹ; irumịẹ se ḅieḅẹlẹ ḅụ olokuḅịa gbọrịḅọ sọ ḅarị ofori-ẹ. 34 “Hẹshbọn na Ẹliele-a tomonima na ini owu pakụmamẹ, pịkịna inia owu-a tịḅịḅie ma mun Jehaz lamẹ; Zoa sọ mun lamẹ, se tomoni àrị naamẹ; ọkịmun Horoneim na Ẹglat Shẹlishiya lamẹ. Nimrim kala-mengi mị samịnasam. 35 Moab apụma àrị ini dachịẹmaḅịa inia tẹkẹ-a nyọma ḅụ, ini pịkị ḅarị dọkịma agbamịẹ inia oru ma pịrị ẹkẹ. Ị̀rị̀, Nyanaḅọ Ḅe, ḍukosam. 36 “Anịgose ị̀ kuḅie ḍụẹịn ḍin Moab pịrịmẹ pịkịna Kị Hirẹs-a tomonima na, tomoniḅọ oḍu se fịapụ nime chu ọkụ simemẹ, anịatịḅị ini nyanaye goyegoye fasosam. 37 Inimgba inia tịḅị inime ma sẹịn pịkị inia ọgụrẹ ma sẹịnsam. Ini inia ḅarama pusam se ọrụḅọḅọ okuru ḅụchụaye chụaḅẹ. 38 Moab warị ochu mamgba ọgọnọ ḅụ na ama ogbo mamgba na ị́ ọrịḅịaye jịnyekẹ ḍụẹịn ḍin sikima, anịatịḅị à Moab mị ḅaasam, nweni-se-yechịnka ojongo ḅara. 39 Moab mị anị kankọsịsam! Oloku pakụma! Ini Moab mị ḅụgereremasam. Anị sara sọsam, pịkị anị kelema ama mamgba anị se kpọtimẹ. Ị̀rị̀, Nyanaḅọ Ḅe, ḍukosam.” Moab Mị Pịọrụ Ḅọrọ Soḅịa Nyọ Ofori-ẹ 40 Nyanaḅọ Ḅe ḅerenisam na gbọrị sẹ, igo mịna pamba ma finjima ḅara se ḅo Moab ọgọnọ koroḅịa, 41 se amama na ọmụ-a warịma na ini kụrọ ḅarase ọkịḅịa. Anị ene Moab owunima, yi jikearị eremeniḅọ ḅalafa ọkụ se ḅalafaḅịa. 42 Moab kanḅịa se anị ḅarị sẹ sọ ẹkẹ, anịatịḅị ini kọngọ kụrọma ị̀ pịrịmẹ. 43 Ḅalafamaye na, olulu na, ḍẹịn na Moab-a tomonima koruaḅẹ. Nyanaḅọ Ḅe ḍukomẹ. 44 Kpalakpala se ḅụkụrọma ḅalafamaḅọ ḅe ḅara pịọrụ pakaḅọ, iniḅọ olulu ḅie koroḅịa, pịkị olulu ḅie tanjị pakaḅoḅọ ḍẹịn ḅie koroḅịa, anịatịḅị Nyanaḅọ Ḅe ò Moab mị kanḅịa sịkị mị ọ̀ tọn gbasịmasam. 45 Mịẹḅịa-ọkụ-ofori se ịnyasọ-apụ ma ḅụkụrọma Hẹshbọn opuama mị ḅie ḍụaḅọrọma nyanaḅịa-ọkụ ḍọkịmẹ, anị gbọrị sịkị, Amanyanaḅọ Saịhọn ḅe da ama mị, ọkụma orumo anịa tịḅị ogbo soaḅẹ. Fịnị Moab tụndụ aka ma na tụndụ-a tịḅị ma na dọkịmasam, owu ḅẹlẹma-a tomoni ama mị. 46 Ḍikiḅụgerere nyana Moab-a tomonima pịrị! Anị Kimọsh mị tẹkẹtẹkẹapụ ma ini ini ḅaasinsam se inia owuapụ awọma na eremeni awọma na ini nwọ kunsosam ikoliapụ ḅaraḅụ. 47 Ọkụma ḅoḅịa enema ḅie, Nyanaḅọ Ḅe Moab mị mịẹse mịẹmịẹye pịkị anị na deinḅịa. Mamgba anị Nyanaḅọ Ḅe ḍukosaye-ẹ Moab ḅụ pakaḅịaye. |
The Bible Society of Nigeria
Bible Society of Nigeria