Jerimaya 47 - Kịrịkẹnị Baịbụl

Nyanaḅọ Ḅe Oku Mị Filistia Ḅụ

¹ Tẹrẹrẹ Ijipt amanyanaḅọ ḅe Gaza gbẹịnmachịẹ, Nyanaḅọ Ḅe Filistia na kpakịmaye ḍuko ị̀ pịrịmẹ.

² Ori ọkọ ḅẹmẹ: “Ḍiki! Mengi sẹnị aḅẹ ọgọnọju se anị opu mengi mangị ideri ọkụ ideriḅịa. Àrị ama mị na anịa ḅie simeye goyegoye ḅilemaḅịa, opuamama na anịnyọ anga tomonima na. Tomoni ḅarachụapụ ḍọkịḅịa; tomonikiri sime apụ goyegoye opuma owuḅịa.

³ Ini asụn-a ḅụọ ḅie naaḅịa, kporokporo kiri, nwẹngị-arụ ḅụọ ḅie. Ḍapụ inia awọma gose pịkị ẹkẹ; inia ḅarama inia agaga ḅie so ẹkẹ.

⁴ Filistia mị kanḅịa sịkị lasam, Taya na Saịdọn ḅụ anị pẹlẹsin kọn ḅarachụa ma ḅụmgba ḅụ. Ị̀rị̀, Nyanaḅọ Ḅe, à Filistia apụma kanḅịa, ini Krit tọrụ akaka ḅo apụ mamgba.

⁵ Opu kururu ḅo Gaza tomonima lasam, se Ashkẹlọn-a tomonima ini ḅifiekẹ. Kọn Filistia apụma ini kururu mun che sịkị laḅe?

⁶ Ị́rị́ oloku owu, ‘Nyanaḅọ Ḅe kongo! Ị́ pẹlẹ mun che sịkị laḅe? Vinpịkị mun ị́ya lubu mị ḅie sọ, anịnyọ sime ịnyọsara!’

⁷ Ọkụma nde anị ịnyọsaraḅịa ọkụ, anị nwẹngịḅịa fịrị à nwọse anị pịrịsa sịkị? À tọn anị pịrịsam anị Ashkẹlọn na dama pịkịna tọrụ aka anga tomonima na.”