Jerimaya 40 - Kịrịkẹnị Baịbụl

Jerimaya Ḅe Gẹdalaya Ḅe Na Simemẹ

¹ Nyanaḅọ Ḅe ọkwẹịn ị̀ pịrịmẹ, Nebuzaradan, owu kụlọdaḅọ ḅe, ị̀ ḅụḅarasin sịkị Rema ḅie. Ini ikoli ma se ị̀ ịkasị anịnyọ mun mẹ, ísí-a tomonima, anị Jerusalẹm na Juda na ḅie ini ikoli ḅaraḅụ ọkịso Babilọn-mun-arịapụ ma na se ị̀ ḅụ chụa.

² Owu kụlọdaḅọ ḅe ị̀ ọlọ sikima se ị̀ ḅẹmẹ, “Nyanaḅọ ị́ Tamụnọ Ḅe, yesima se mị ama mị ẹrẹmamẹ,

³ pịkịna mịọkụ ò ḍuko ḅara ọ̀ mịẹsam. Mamgba gose pakaye anị, ị́ya tomonima Nyanaḅọ Ḅe ḅụ si mịẹmẹ se pịkị ọ̀ ḅịpịpokikẹ.

⁴ Mịọkụ àrị ị́ ḅara ikoli ma finma aḅẹ se ị́ ḅụḅarasin aḅẹ. Ị́ nemikase ị̀ ḅụ so Babilọn mun ḍọkịḍọkị, ị́ ineda ọkọ mịẹḅịa se àrị ị́ ḍikiḍikiḅịa. Ọkụma nemikase ị́ mun ḍọkịkẹ ḅẹḅẹ, ị́ mun ẹkẹ. Sẹ mamgba ị́ ḅara omi-ẹ, ị́rị́ sẹlẹ-ḍiki se ị́ ḅụḅẹlẹ-nyọ-ḅụḅẹlẹ-nyọ ị́ ineda munḅịa.”

⁵ À nwọ pẹkẹrẹka sịkị, Nebuzaradan ḅe ọkọ ḅẹmẹ, “Pịkịma Gẹdalaya ḅe damamun, anị Ahaịkam tọkụ pịkị Shefan ḅe ḅieju tọkụ ḅe, anị Babilọn amanyanaḅọ ḅe se gọvịna mịẹ Juda ḅie sime ama mamgba pịrịḅọ ḅe. Ị́ ineda ori na sime se tomonima na angaḅịa. Anịkanịka, ị́ ineda ị́ ḅụḅẹlẹ ị́ mun ḍọkị nyọ munḅịa.” Anị ò ḅo ye se ḍie ị̀ pịrịye-ẹ pịkị fịaye na àrị ọkị so à munḅịa nyọ mun.

⁶ À mun Gẹdalaya ḅe na Mizpa ḅie simemẹ se ama ḅie kọn apụma na angamẹ.

Gẹdalaya, Juda Gọvịna Ḅe

⁷ Juda fịrịnwẹngịapụ na owunima na ḅụ dapụ ma ḅịkịkẹ. Ini naamẹ na Babilọn amanyanaḅọ ḅe, Gẹdalaya ḅe se gọvịna mịẹsam se ori mịọkụ ma so Babilọn munkapụma ḍikiḍikiḅịa pịkị igweintẹịn apụma na.

⁸ Anị, Netanaya tọkụ Ishmẹl ḅe na Karea tọkụ Johanan ḅe na, Tanhumẹt tọkụ, Sẹraịya ḅe na, Nẹtofaḅọ Efaị awọma na, Meaka ḅo Jezanaya ḅe na, inia tomonima na, Mizpa ḅie Gẹdalaya ḅe damamunmẹ.

⁹ Gẹdalaya ḅe ini ḅẹmẹ, “À ḍuko ọ́ pịrịaḅẹ na à gose Babilọn apụma ḍikiḅalafa se ḅịkị ini pịrịḅịaye ofori-ẹ. Ọ́ mịn ama ḅie sime se fịrịnwẹngị Babilọn amanyanaḅọ ḅe pịrị, se yemamgba ómine na iḅiḅịa.

¹⁰ Ị̀rị̀ na mịnaḅụ na, Mizpa ḅie à simeḅịa, ọ́mịna tịḅịgose à chịẹḅịa Babilọn apụma mịọ ḅoḅịa sịkị. Ọkụma ómine ineda iru na chịnmgbọlụ na oliv pulo na koḅiri se ọ́mịna anga amama ḅie koko koromaḅịa.”

¹¹ Mịsịkịḅụ, Moab na Amọn na Idọm na jịn amama na ḅie sime Izrẹlapụma naasam na Babilọn amanyanaḅọ ḅe ò ḅereni da Izrẹlapụ pịrịsam na ma ini Juda ḅie sime-ẹ, na ọ̀ pịkịna Gẹdalaya ḅe se inia gọvịna mịẹsam.

¹² Mị ḅụ, ini ini galagalama koroma nyọma ḅie, ini pịkịmaso Juda mun mẹ. Ini Mizpa, Gẹdalaya ḅe damamunmẹ se anịnyọ ini iru na chịnmgbọlụ na koḅirimamẹ.

Gẹdalaya Ḅe Ini Nwọ Ninimẹ

¹³ Mị ḅọrọso, Johanan ḅe na ma ḅịkịka owuni tịḅịnịma na Gẹdalaya ḅe, damamunmẹ Mizpa ḅie

¹⁴ se nwọse ọ̀ ḅẹmẹ, “Ị́ nemika na Amọn amanyanaḅọ, Bealis, ḅe Ishmẹl ḅe fịrịmasam na ò ḅo ị́ ḅaa-ẹ?” Ọkụma Gẹdalaya ḅe ori anị ḅerenikẹ.

¹⁵ Johanan ḅe ḅọịma ọ̀ ḅẹye-ẹ, “Ye à mun Ishmẹl ḅe ḅaa, se gbọrịḅọ sọ nemi ẹkẹ anị mịẹḅọ. Cheye gose ini ḅereni ọ̀ pịrị se ò ḅo ị́ ḅaaḅe? Anị ineda mịẹse iniḅo ị́ gbori Juapụ mamgba galagalamaḅịa, se anị ḅụfụka ọkịḅo Juda ḅie simekọn-a tomoni mamgba pịrịḅịa.”

¹⁶ Ọkụma Gẹdalaya ḅe pẹkẹrẹmẹ, “Ye ma! Ishmẹl ḅe ḅụ ị́ ḍukoarịye mị karakarayekẹ!”