Jerimaya 4 - Kịrịkẹnị Baịbụl

Si Ḅụ Vinpịkị Ḅe Chịn Ḅịpị

¹ Nyanaḅọ Ḅe nwọ ḅẹmẹ, “Izrẹl-a tomoni, ó nemikase vinpịkị ḍọkịmẹ nwọ ḅẹḅẹ, anịọkụma ó vinpịkị ị̀ damaḅo. Ó nemikase kuḅie-se-ị̀-ḅụgbana pịkị à taraka se wẹrịma oru ma tansin ọkụma,

² anị ómine na iḅiḅịa, ómine ị̀ya ẹrẹ ḅụ ye karịfịḅịa ọkụma. Anịsịkị sẹ mamgba ị̀ ḅẹḅịa à ḅẹlẹma se ini pịrị, se ini ị̀ tokoniḅịa.”

³ Nyanaḅọ Ḅe nwọ se Juda na Jerusalẹm-a tomonima ḅẹmẹ, “Sokuka kirima ọ́ nwọ soku; ómine ịga ma ḅie ọ́mịna ḍipiyemgbọlụ ma ḍipima.

⁴ Ómine ị̀rị̀ na fị ọḅọkụ mị mịẹ anị chịẹ, ọ́ Nyanaḅọ Ḅe, se ọ́mịna ojuma mịẹfịafịama ị̀ pịrị, ómine Juda na Jerusalẹm-a tomonima. Ó nemikase ọkọ mịẹkẹ ḅẹḅẹ, ị̀ya ịganị fịnị kọrị ọkụ kọrịḅịa ọ́ mịẹsa siaye ma gose. Anị kọrịḅịa se gbọrịḅọ sọ ofori-ẹ anị binmaḅịaḅọ.”

Ḅo Juda Kanḅịa Ẹrẹma Ḅịpị

⁵ Oḍu mị ofuro ama mị kelema! Iḅiọkụma oloku gelelema! Ḍuko Juda na Jerusalẹm-a tomonima pịrị ini mangị owuniaye sime amama mun.

⁶ Ḅara tụkụma Zaịyọn ateli da! Ḍumo mangị kọn! Sịkị famama! Nyanaḅọ Ḅe ọ̀ ḅụfụka na opu fa na ọkịḅo aḅẹ ọgọnọju ḅụ.

⁷ Chịrịḅa ḅe oria ḅọị nyọ ḅụ pakaḅo ọkụ, sẹ kanḅọ pakaḅosam. Ò ḅo Juda kan-ẹḅoaḅẹ. Juda ḅie opuamama kan kọsịḅịa, se gbọrịḅọ sọ ḅarị arịa ḅie anga ẹkẹ.

⁸ Anịẹrẹchị ómine okuru ḅiriaye ḅiri se owu oloku se pịkị kururu, anịatịḅị Nyanaḅọ Ḅe oria ḅalafama-kụrọ-ịganị mị ma anị Juda ḅie ḅụ pịkịma sokẹ.

⁹ Nyanaḅọ Ḅe ọkọ ḅẹmẹ, “Anị ene amanyanapụma na fịrịnwẹngịapụma na nyana kuḅie kụrọ ma faḅịa; agbamịẹapụ ḅụ kpịrịpụḅịa, pịkị ịkịankoroapụ ḅụ gbiripuḅịa.”

¹⁰ Anịeso à nwọ ḅẹmẹ, “Kụrọmamgba Nyana Tamụnọ, ị́ jokoma Jerusalẹm-a tomonima dairimasam! Ị́ kọkọ nwọḅẹ na dein ḅoḅịa, ọkụma mịọkụ kongo re inia pụkọ ololo ma ḅụ mgbẹsẹsam.”

¹¹ Sịkị ḅoaḅẹ ini ḍuko Jerusalẹm-a tomonima pịrịḅịa na, ye simaḅịa kụrọ fọrụ onwun ele ḅie sakị fie ini damaḅoḅịa. Anị papa deinma fie se osirosiroḅa ofurosinḅịa fọrụ kịkẹ ẹkẹ.

¹² Nyanaḅọ Ḅe tọn ḅaraḅụ ḅoḅịa fọrụ mị iḅiọkụma kụrọtẹịn dein fọrụ nẹngịḅịa! Nyanaḅọ Ḅe na mịnaḅụ na anị ḅarana mị ḅẹrẹ pẹlẹ oria tomonima pịrịarịye-ẹ.

Tarakapụ Juda Mị Kelemasam

¹³ Ḍiki, tarakaḅọ ḅe ò ḅoaḅẹ soḅuno ḅara. Oria owuni kporokporoma ajisaka fọrụ kịkẹmẹ, anịsịkị oria asụnma mangịtẹịn igo nẹngịmẹ. Wa iri fasam! Wa opu ḅụfụka ḅie sọsam!

¹⁴ Jerusalẹm, ị́ kuḅiemgbọlụ sime sima sịkịrịsin, mịẹso sịkị ị́ ḍụaḅọrọma nyanaḅịa ọkụ. Ị́ pa sikoroma nyanama mun nde sịkị laḅe?

¹⁵ Okunwẹngịapụ Danị opuama ḅie na Ifrem chịngịma ọgọnọ ḅụ na, si ḅẹrẹ mị ḍukopakụma aḅẹ.

¹⁶ Ini ḅo sẹma ḅerijinemẹ, se pịkị ḍuko Jerusalẹm pịrịmẹ na tarakapụ ḅọlọ sẹ ḅie wẹrị ḅoaḅẹ. Mịna tarakapụma ini Juda tịḅị olokuḅịa,

¹⁷ ini Jerusalẹm ḍẹkịkelemaḅịa, tomoni nyọ koru kelema ọkụ, anịatịḅị ini kọngọ kụrọma Nyanaḅọ Ḅe pịrịmẹ. Nyanaḅọ Ḅe ọkọ ḅẹmẹ.

¹⁸ Juda, ị́rị́ mịn mị dekiḅo ị́ ḅụ pịrịmẹ, ị́ ḅara wẹrịma anga ọkụ na yemịẹ ọkụ na. Ị́ya sima anị mịn tọrụsiọrị mị dekiḅoye-ẹ, anị ị́ kuḅie wẹrị ị́ temisam.

Jerimaya Ḅe Nyana Oria Tomoni Ma Pịrị Kururu

¹⁹ Ḅụakụ mị! Àrị ineda ḅụakụ mị inemakẹ! Ị̀ kuḅie! Ị̀ kuḅie anị siḅara se kpimkpim ma fieaḅẹ! Àrị ineda deinma sime ẹkẹ; Àrị oḍu ma ḅie na owuni paịn-a tịḅịḅie ma na naa aḅẹ.

²⁰ Gbọrị ḅụfụka jịn ḅụfụka ḍukomamẹ; bebe sẹ mị mgba gulugulusam. Ḅụnemika ḅaraḅụ mịna ikowarị mamgba kankorosam; arịa ḅọkọ kiki ḅịtẹ mamgba kankọsịsam.

²¹ À sime ma owuniayema ọrị mun nde sịkị laḅe pịkị oḍu-a tịḅịḅie ma naa mun che sịkị laḅe?

²² Nyanaḅọ Ḅe ọkọ ḅẹmẹ, “Ị̀ya tomonima ini oḅori sọmẹ; ini ị̀ lekirikẹ. Ini yenemika awọmẹnị kịkẹmẹ; ini yekaịnḅokẹ. Siye mịẹ ḅụ ini ọbịrịmẹ, ọkụma iḅiye mịẹ ḅụ ini ikulamẹ.”

Jerimaya Ḅe Tẹmẹ Ḅụ Ọrị Ḅo Àrị Fa Mị

²³ À tomonikiri mị ḍikimẹ—papa fịye chụaka nyọ-ẹ; sotọrụ—enekuḅu ofori-ẹ.

²⁴ À tụndụma ḍikimẹ—àrị jike aḅẹ, se chịngịma jike ọḅụ na tọrọkọ na da aḅẹ.

²⁵ Àrị ọrịmẹ na gbọrị mbuḅọ sọ ofori-ẹ; fenima sọ àrị fin sosam.

²⁶ Fịye-chụa kiri mị sọ ḅo onwun ele sọsam; anịa opuamama àrị kangulugulusam Nyanaḅọ Ḅe ḅalafama ịganị mị gose.

²⁷ (Nyanaḅọ Ḅe ò ḍukosam ḅẹ na bebe tomonikiri mị mgba ḅo papa eleogbo sọḅịa, ọkụma ọ̀ gbọtụma anị fama ẹkẹ.)

²⁸ Tomonikiri mị anị kururuḅịa; so mị anị kanakanaḅịa. Nyanaḅọ Ḅe ò ḍukosam ọ̀ pịkị ò kuḅie ḍinma ẹkẹ. Ọ̀ tọnpẹlẹsam ọ̀ pịkịḅịa ọkụ ofori-ẹ.

²⁹ Asụn-a-tomoni na lubu-a-tomoni na ḅe nyọ fiema ḅụ ḅẹḅọ ḅẹḅọ mangịsoḅịa. Dapụ mangị opu-a piri ma ḅie sọḅịa; dapụ ḍụparịma tanjịḅịa. Ama goyegoye papaḅụ sinḅịa, se arịa ḅie tomoni ḅarị anga ẹkẹ.

³⁰ Jerusalẹm, ị́ fịfasam! Ị́ che gose pulo-pulo ḅụchụaye chụa? Ị́ che gose yela-ọḍọ-aye ḅiri se ye se ị́ tọrụmgbọlụma tan? Ị́ papa sọye oforika ḅara se ị́ ḅụ mịẹfịafịamaḅẹ! Ị́rị́ na lekiria apụma ini ị́ sịkịsam se pịkị ị́ ḅaa ḍọkị aḅẹ.

³¹ Àrị owutịḅịḅie naa aḅẹ, simekọn se jike àrị eremeniḅọ ḅara, árịa tatarị tọkụ yiarị eremeniḅọ ḅie fie ọkụ. Ịnyọ ḍọkị àrị Jerusalẹm owupụkọ-ẹ, árị á ḅarama ịsụn pakụma se ḅẹ aḅẹ, “À fasam! Ini ḅo ị̀ ḅaa-ẹḅoaḅẹ!”