Biblia Todo Logo
Bìoball air-loidhne

- Sanasan -

Jerimaya 39 - Kịrịkẹnị Baịbụl


Jerusalẹm Mị Ḅe Ḅịkị

1 Zẹdẹkaya ḅe Juda ama nyana ḅe esenie-a karama kụra ḅụ oyi akalụ ḅie, anị Babilọn Amanyanaḅọ Nebukadneza ḅe, oria owunima se ḅo Jerusalẹm gbẹịnmachịẹye-ẹ.

2 Zẹdẹkaya ḅe ama nyana ḅe oyigbọrị kụra fịnjị ḅe inein karama akalụ ḅie esenia-a ḍin ene, mị opuama mị kelema onu ma ini nwọ kantoluye-ẹ.

3 (Ini kụrọḅarase Jerusalẹm ọkị sịkị, Babilọn amanyanaḅọ ḅe opu fịrịnwẹngịapụ mamgba ḅo inia kirima ọkịmẹ, Ogboku Onu Ḅọkọ ḅie, ini anị Nagaị Sarẹza ḅe na, Samga Nebo ḅe na, Sasekim ḅe na, jịn Nagaị Sarẹza ḅe na.)

4 Amanyanaḅọ Zẹdẹkaya ḅe na oria owuni mamgba na ḅo paka arịye ma ọrị sịkị, mị ini ḅụkụrọma ḍin ḅụ opuama mị ḅie mangị pakasoye-ẹ. Ini ḅọrọ ama mị wẹrịso nyọ anị, amanyanaḅọ ngwengwe ozu ḅie ḅọrọ mun ama mị kelema mama-onu-ma-gboloma onu ḅọkọ mị la, se ḅọrọ Jọdan-Pẹsịkiri-nyọ-ḍuko mun ateli mị-ẹ.

5 Ọkụma Babilọn owunima ini ḍuko mun se Zẹdẹkaya ḅe kunmẹ, Jẹriko na kpeki sẹrẹrẹkiri nyọ ḅụ. Anị ini ḅo ori ọkị Amanyanaḅọ Nebukadneza ḅe damamunye-ẹ. Hamat ẹkẹpụ ḅie sime Ribla opuama ḅie, se anịnyọ Nebukadneza ḅe ḅẹrẹpẹlẹ ọ̀ pịrịmẹ.

6 Ribla ḅie ọ̀ Zẹdẹkaya owuapụ awọma se fịḅie chumẹ, Zẹdẹkaya ḅe chịẹ ini ḍikiarịogbo, se ọ̀ pịkị Juda fịrịnwẹngịapụma tịḅị ma pẹlẹsinmẹ.

7 Anị ḅọrọso ini Zẹdẹkaya ḅe tọrụmgbọlụma sọkịsin se ikoli se ori ịkasị se ò se Babilọn mun mẹ.

8 Ma sịkị ma ḅụ, Babilọn apụma amanyanaḅọ odo mị dọkịma kiri pịrịsam, pịkịna tomonima warịma na, pịkịna Jerusalẹm kelema onu ma sọ ini suma gbinsam.

9 Anịḅe kuluma, Nebuzaradan, owu kụlọdaḅọ ḅe, ikoliapụ ḅaraḅụ, ama ḅie kọn-a tomonima na, inia ḅie so ọ̀ damamun apụma na ọkịso Babilọn mun mẹ.

10 Juda ḅie ye nyanaka se igweintẹịn apụma ḅụ dapụ mị ò se koromaye-ẹ, ori irumịẹ chịnmgbọlụ ḍipi ozu na ele na se ini pịrịmẹ.


Jerimaya Ḅe Kun Ḅụ Pọkọ Mị

11 Ọkụma Amanyanaḅọ Nebukadneza ḅe kụrọ se Nebuzaradan, owu kụlọdaḅọ ḅe pịrịmẹ na ò mun mayema ḍuko kụrọma:

12 “Mun Jerimaya ḅe ḍọkị se iḅi ḅara se ò ḍikiḍiki. Ye se ọ̀ lamama ọkụma, ò ḅiyeḅiye mịẹ ọ̀ pịrị.”

13 Anị Nebuzaradan ḅe na ọḅụ sọ opu fịrịnwẹngịapụma na Nebushazban ḅe na Nagaị Sarẹza ḅe na ísí Babilọn amanyanaḅọ fịrịnwẹngịapụ mamgba na,

14 amanyanaḅọ ḅẹrẹkọn warị nụngọ ḅie ị̀ sinpakụmaḅoye-ẹ. Ini ị̀ se Shefan Gẹdalaya, anị Ahaịkam owutọkụ pịkị Shefan ḅe ḅieju-tọkụ ḅe, ḅara chụamẹ, anị ḍọkịḅo ọrị na à dein ḅaraḅụ ḅo ama lamẹ nwọ ḅẹḅọ ḅe-ẹ. Se àrị anịnyọ tomonima na simemẹ.


Sime Ebẹdmẹlẹk Ḅe Pịrị Kuḅie Kụrọ

15 Anị amanyanaḅọ-odo-ḅẹrẹkọn-warị nụngọ ikoli ḅie à pa sime àrị sịkị, Nyanaḅọ Ḅe ḍuko ị̀ pịrịmẹ na

16 à ḍuko Ebẹdmẹlẹk Sudanḅọ ḅe pịrị na, Kụrọmamgba Nyanaḅọ Ḅe, Izrẹl Tamụnọ Ḅe ḅẹsam, “À ḍukosa ḅaraḅụ, à mịẹḅịa; à yesima nwọ ọkịḅo mị opuama mị ọgọnọ saraḅịa, mịẹye ḅarasọka. Se mịn mị pakaḅịa sịkị, ị́ anịnyọ sime anị ọrịḅịa.

17 Ọkụma Ị̀rị̀, Nyanaḅọ Ḅe, ị́ ḍikiḍikiḅịa, se ini ị́ saḅama ị́ ḍikiḅalafa-arị-apụ ma pịrị ẹkẹ.

18 Àrị ị́ kokoḅịa, ị́ pịkị fịḅie sọ ẹkẹ. Ị́ ḍumoḅịa anịatịḅị ị́ kuḅie se ị̀ ḅụgbanasam. Ị̀rị̀, Nyanaḅọ Ḅe, ḍukosam.”

The Bible Society of Nigeria

Bible Society of Nigeria
Lean sinn:



Sanasan