Jerimaya 37 - Kịrịkẹnị Baịbụl

Zẹdẹkaya Ḅe Jerimaya Ḅe Ḅara Ḅiye

¹ Babilọn Amanyanaḅọ Nebukadneza ḅe, Zẹdẹkaya, Josaya owutọkụ ḅe ọkị Juda amanyanaḅọ nwọ mịẹmẹ, ò se Jẹhoịakim owutọkụ, Jẹhoịakin ḅe kiri ḍinmaḅụ.

² Ọkụma Zẹdẹkaya ḅe anịkanịka oria fịrịnwẹngịapụma, anịkanịka tomonima, Nyanaḅọ Ḅe se ị̀ fịrịma oku mị ḅịpị pokikẹ.

³ Amanyanaḅọ Zẹdẹkaya ḅe, Jẹhukal Shẹlẹmaya owutọkụ ḅe na agbamịẹḅọ, Zẹfanaya, Measaya owutọkụ ḅe na, fịrịma ị̀ sẹịnmamẹ na iniḅo ị̀ ḅe à Nyanaḅọ mịna Tamụnọ Ḅe tẹkẹ mịna sẹ mị tịḅịgose.

⁴ Ma ini ị̀ se ikoli ḅie chukẹ, à pa tomonima ogboku nwẹngịma ḅọrọaḅẹ.

⁵ Babilọn owunima Jerusalẹm mị pụnụma aḅẹ, ọkụma iniḅo naa sịkị na Ijipt owunima Ijipt eke mị saḅasam nwọ ḅe sịkị, mị ini ọḅụdaye-ẹ.

⁶ Anị Nyanaḅọ, Izrẹl Tamụnọ Ḅe, ị̀ ḅẹye-ẹ

⁷ à ḍuko Zẹdẹkaya ḅe pịrị, “Ijipt owunima, iniḅo ḅarachụa ị̀ pịrị-ẹḅoaḅẹ, ọkụma ini pịkịma soḅịa.

⁸ Anịsịkị, Babilọn apụma pịkịma ḅo opuama mị gbẹịnmachịẹḅịa, se kụrọḅara se anị ọkị pịkị anị dọkịma kiri pịrịḅịa.

⁹ Ị̀rị̀, Nyanaḅọ Ḅe, ị́ ḅerijine-aḅẹ na oḅori-se-ị́-ḅụ-chịẹmama, se koromama na Babilọn apụma ini pịkịma ḅoẹkẹ, anịatịḅị iniḅoḅịa.

¹⁰ Nemikase, ọ́ Babilọn owunima inuma sọ, se inia ḅụ yela apụ kẹngẹ inia ikowarịma ḅie ḅọlọlọ sime sọ, ini owuapụma anị ḅụkụrọma sịsẹ se mịn opuama mị dọkịma kiri pịrịḅịaye-ẹ.”

Ini Jerimaya Ḅe Kun Ikoli Ḅie Chumẹ

¹¹ Babilọn owunima Jerusalẹm ḅie wẹrị ọḅụ damẹ, anịatịḅị, Ijipt owuni ogboma iniḅo kpeki aḅẹ.

¹² Mị ị̀rị̀ à sakị Jerusalẹm wẹrịso se mun Bẹnjamin ẹkẹpụ ḅie ị̀ya furo ḅie sime ị̀ pịrị ḍiekiri ọkị-ẹmunye-ẹ.

¹³ Ọkụma à Bẹnjamin Onu Ḅọkọ mị lasịkị, fịrịkiri sime owunima ḅie tịḅịnịḅọ, ini Iraịja nwọse chịnḅọ, Shẹlẹmaya owutọkụ, Hananaya ḅe ḅieju tọkụ, ị̀ kiki chịẹma se ị̀ ḅẹye-ẹ, “Ị́ mangị so mun Babilọn apụma ju sọ-ẹmun-aḅẹ!”

¹⁴ Àrị ọ̀ pẹkẹrẹmẹ, “Ọkọ pakakẹ! À mun-arị nyọ ofori-ẹ.” Ọkụma Iraịja ḅe ori ị̀ poki ḍọkịkẹ. Anịnakaraka ori ị̀ kun se ị̀ se fịrịnwẹngịapụma damamunmẹ.

¹⁵ Ini tọrụfụrụma ị̀ pịrị se ị̀ fomu, se ị̀ ọkị Jonatan, ḅẹrẹkọn-warị-ḍiri-gịẹịnḅọ ḅe warị, anị mịọkụ ini pịkị ikoliwarị mịẹ nyọ mị, mun se ị̀ ịkasị koromaye-ẹ.

¹⁶ Ini ị̀ se kirichuku ḅieju ikoliwarị ma ḅie ḅụ chu ḅọlọ sịkị lamẹ.

¹⁷ Anịeso, anị Amanyanaḅọ Zẹdẹkaya ḅe ị̀ fịrịma ọkị oria amanyanaḅọ odo munye-ẹ, se anịnyọ ọ̀ ḅọịma ị̀ gbelamẹ, “Nyanaḅọ Ḅe ḅara ḅo oku omi?” “Omi-ẹ,” àrị ọ̀ pẹkẹrẹmẹ se à pịkị se chụamẹ, “Ini ị́ saḅaḅọrọma Babilọn amanyanaḅọ ḅe pịrịḅịa.”

¹⁸ Anị àrị ò gbelaye-ẹ, “Che siye à nwọ se ị́ mịẹ anịkanịka ị́ya fịrịnwẹngịapụma mịẹ anịkanịka mịna tomonima mịẹ, se ị́ ị̀ se ikoli ḅie chu?

¹⁹ Cheye ị́ya ịkịankoroapụma ḅụ paka, anị ḍuko ị́ pịrị na Babilọn amanyanaḅọ ḅe ori owu se ị́rị́ na ị́ya sẹ mị na paka-ẹkẹ nwọḅẹ apụma?

²⁰ Mịọkụ, ị́ya amanyanakiri ḅụ, àrị ị́ tẹkẹmẹ, ị̀ poki, se àrị ị́ ḅara ḅiḅịaye mịẹ. Sisi, ḅarị ị̀ se Jonatan ikoliwarị ḅie sẹịnma. Ị́ nemikase ị̀ se sẹịn, pikipikiye ofori-ẹ, à fịḅịa anịnyọ.”

²¹ Anị Amanyanaḅọ Zẹdẹkaya ḅe ị̀ se amanyanaḅọ odo ḅie ḅẹrẹkọn warị nụngọ ḅie chuye-ẹ. Anịnyọ à simemẹ se eneḅeneḅene ini fịturu gbọrị okpokpo se ị̀ pịrị fịmẹ ọkị nweni fịturu opuama mị ḅie famẹ.