Jerimaya 35 - Kịrịkẹnị Baịbụl

Jerimaya Ḅe Na Rikab Apụ Ma Na

¹ Josaya tọkụ, Jẹhoịakim ḅe Juda amanyanaḅọ sọ sịkị, Nyanaḅọ Ḅe ị̀ ḅẹmẹ,

² “Mun ọkwẹịn Rikab ẹkẹpụ ḅie furo apụma pịrị. Se ini ọkị Oputẹkẹwarị mị ḅe gbọrị ḅie ḅụ ḅo, se iru se ini pịrị.”

³ Anịḅụ à Rikab ẹkẹpụmgba—Jeazanaịya (jịn Jerimaya tọkụ, Habazinaịya ḅe yi ḅọ) na oria owuapụ mịnapụma na owuapụ awọ mamgba na—

⁴ ọkị Oputẹkẹwarị mị ḅie ḅomẹ. Àrị ini ọkị ịkịankoro Hanan, Igdalaịya tọkụ ḅe, ọḅụḍukoapụma jukuru ḅie ḅomẹ. Mịn jukuru ḅie mị anị Measaya, Shalọm tọkụ ḅe oria ḅie mị ọgọnọ simeye mị-ẹ. Ori anị Oputẹkẹwarị ḅie opu fịrịnwẹngịḅọ-ẹ; oria ḅie mị anị ísí-a fịrịnwẹngịapụma ḅie na kpekimẹ.

⁵ Anị à ḅo iru-ḅie-ḅein ọmọngọ ma se Rikab apụma tọrọkọ koromaye-ẹ, “Ómine iruḅu.”

⁶ Ọkụma ini pẹkẹrẹmẹ, “Wa iru ḅuḅukẹ. Mịna ḅieju ḍaḅọ, Jonadab, Rikab tọkụ ḅe ḍuko mine pịrịmẹ na, mine anịkanịka mịna furo ḅie koroḅo apụ jenejene iru ḅuma.

⁷ Ọ̀ pịkị ḍuko wa pịrịmẹ na ma wa warị namama anịkanịka ozu kọrịma pịkịna irumịẹ chịnmgbọlụ ḍipima anịkanịka fẹma. Ọ̀ tọn wa pịrịmẹ na wa sịkịmamgba ikowarị ḅie anga, mịẹso sịkị wa igoniapụ anga ḅara nwọse mịn ama mị anga.

⁸ Jonadab ḅe tọn wa pịrịaye mamgba wa arịa ḅịpị pokisam. Mine na mịnaḅụ na, wa iru ḅuḅukẹ, pịkịna mịna erema sọ, mịna owuapụ awọma sọ, anịkanịka mịna eremeni awọma sọ.

^9-10 Wa anga warị namanamakẹ—ikowarị ḅie anị wa anga-angaye-ẹ—pịkịna irumịẹ chịnmgbọlụ ozu, mgbọlụ fịaye na ozu na wa nyana-nyanakẹ. Wa ḅeinma mịna ḅieju ḍaḅọ Jonadab ḅe tọn wa pịrịayema ḅịpị pokisam.

¹¹ Ọkụma Amanyanaḅọ Nebukadneza ḅe sẹ mị jụ sịkị, wa ḍukopẹlẹmẹ na wa Jerusalẹm ḅoḅịa, welema Babilọn na Siria na owunima ḅụ sikima. Mị gose wa Jerusalẹm ḅie angaḅẹ.”

^12-13 Anịeso mị Kụrọmamgba Nyanaḅọ Ḅe, Izrẹl Tamụnọ Ḅe, ḍuko ị̀ pịrịye-ẹ à mun ḍuko Juda na Jerusalẹm na tomonima pịrị, “Ị̀rị̀, Nyanaḅọ Ḅe, ó gbela aḅẹ, ó cheye gose ị̀ poki ḍụkụka pịkị ị̀ya tọn ayema ḅịpị pokika?

¹⁴ Jonadab ḅe furo ḅie koroḅo apụma ini ọ̀ ḅịpị poki se iru ḅukẹ, pịkịna ọkịḅo mịmgba la, iniaḅụ gbọrịḅọ sọ gbọrị iru sọ ḅukẹ. Ọkụma à sịkịmamgba ọkwẹịn-ọkwẹịn ọ́ pịrịaḅẹ, ọ́ pa ị̀ ḅịpị pokikẹ.

¹⁵ À pa ị̀ya fịrịnwẹngịapụ mamgba na ịkịankoroapụma na se ọ́ sẹịnma aḅẹ se ini ḍuko ọ́ pịrịsam na ómine ọ́mịna si-a nwẹngị ma ḅụ ḅarasin se karakaraye mịẹ. Ini ó ḅerijinemẹ na ọ́ tịḅịtu se fịrịnwẹngị jịn-a oru pịrịma, mịẹso sịkị ọ́ pa à se ómine na ọ́mịna ḅieju-aḍapụma na pịrị ama mị ḅie anga ma munḅịa ọkụ. Ọkụma ómine ị̀ poki ḍụkụkẹ anịkanịka tọrụ se ị̀ ḍikikẹ.

¹⁶ Jonadab ḅe furoḅie koroḅo apụma inia ḅieju ḍaḅọ ḅe tọn ini pịrịayema ini arịa ḅịpị pokimẹ, ọkụma ómine ị̀ ḅịpị pokikẹ.

¹⁷ Anịgose mịọkụ, Ị̀rị̀, Kụrọmamgba Nyanaḅọ Ḅe, Izrẹl Tamụnọ Ḅe, à ḅereni ọ́ pịrị yesima mị ọkịḅo ómine Juda na Jerusalẹm na tomonima pịrịḅịa. À mịn mị mịẹḅịa anịatịḅị ó poki ḍụkụkẹ àrị ọkwẹịn ọ́ pịrị sịkị, pịkịna ómine ị̀ pẹkẹrẹkẹ àrị ọ́ chịn sịkị.”

¹⁸ Anị à ḍuko Rikab sẹ mị pịrịye na Kụrọmamgba Nyanaḅọ Ḅe, Izrẹl Tamụnọ Ḅe, ḍukosam, “Ómine ọ́mịna ḅieju ḍaḅọ Jonadab ḅe tọn ọ́ pịrịaye mamgba, ó pokimẹ; ọ̀ tọn ọ́ pịrịaye mamgba ómine àrị ḍukonwẹngịsam, pịkị ò ḍukoaye mamgba ọ́ mịẹsam.

¹⁹ Anịgose, Ị̀rị̀, Kụrọmamgba Nyanaḅọ Ḅe, Izrẹl Tamụnọ Ḅe, ḅerenimẹ na Rikab tọkụ, Jonadab ḅe, ọ̀ sịkịmamgba ò furoḅie pakaḅo owutọkụ nyanaḅịa fịrịnwẹngị ị̀ pịrịḅịaḅọ.”