Jerimaya 34 - Kịrịkẹnị Baịbụl

Sime Zẹdẹkaya Ḅe Pịrị Oku

¹ Nyanaḅọ Ḅe ọkwẹịn ị̀ pịrịmẹ, anị Babilọn Amanyanaḅọ Nebukadneza ḅe na oria owunima na, ò chuku ḅie sime sẹ mamgba na tomoni-kịrịkịrị-apụ mamgba, ọ̀ mịẹkụrọmarị sịkị, ò Jerusalẹm na anị na kpeki amama na gbẹịnmachịẹarị ogbo.

² Nyanaḅọ, Izrẹl Tamụnọ Ḅe, ḍuko ị̀ pịrịmẹ na à mun Zẹdẹkaya, Juda amanyanaḅọ ḅe ḅẹ, “Ị̀rị̀, Nyanaḅọ Ḅe mịn opuama mị ḅọrọma se Babilọn amanyanaḅọ ḅe pịrịḅịa se ori anị dọkịma koromaḅịa.

³ Ị́ pịọrụ-so-ẹkẹ; ini ị́ kun se ị́ saḅaḅọrọma ọ̀ pịrịḅịa. Ị́ tọrụna-tọrụna ori ọrịḅịa pịkị ḅarana orina-ọkwẹịnḅịa; anịsịkị ị́ so Babilọn munḅịa.

⁴ Zẹdẹkaya, àrị ị́ ḅụ ḍukoye poki. Owu ḅie ini ị́ ḅaa-ẹkẹ.

⁵ Ị́ deinma fịḅịa se tomoni ị́ya ḅieju-aḍapụma amanyanaḅọrọsapụ ma ḍipi sịkị ini insẹnsị dọkịma ọkụ anị gbọrị ḅara mị ini insẹnsị dọkịma ị́ pịrịḅịa ọkụ-ẹ. Ini ḍụẹịn ḍin ị́ pịrịḅịa se ḅẹḅịa, ‘Mịna amanyanaḅọ ḅe, ọ̀ fịsam!’ Ị̀rị̀, Nyanaḅọ Ḅe, ḍukosam.”

⁶ Anịsịkị à mịn oku mị se Amanyanaḅọ Zẹdẹkaya ḅe pịrịmẹ, Jerusalẹm ḅie

⁷ anịsịkị Babilọn amanyanaḅọ ḅe owunima, opuama mị gbẹịnmachịẹaḅẹ. Owuni ma ini pịkị Juda ḅie, ịkịan ma kọn ini mịẹkụrọma amama, Lekish na Azika na, sọnị nwọ gbẹịnmachịẹaḅẹ.

Oḅori Se Omoni Chịẹma Ḅe Amịẹye

⁸ Amanyanaḅọ Zẹdẹkaya ḅe na Jerusalẹm-a tomonima na ḅịpị-se-ogbo-chụamẹ na ini inia

⁹ Hibru omoni ma ḅụ ḅarasinḅịa, eremeni na owuapụ na, mịẹso sịkị gbọrịḅọ sọ ḅarị ò juo Izrẹl ḅọ se omoniḅọ mịẹ ẹka ọkụ.

¹⁰ Tomoni mamgba na inia tịḅịnịma na, ḅerenimẹ na ini inia omoni ma ḅụ ḅarasinḅịa se ḅarị ini se omoniapụ mịẹ-ẹkẹ. Ini kọkọma ini wẹrịsomẹ,

¹¹ ọkụma ọḅụkọ ini inia kuḅie ḍinmamẹ, ini pịkịmaḅo se pịkị ini se omoniapụ mịẹmẹ.

¹² Anị Nyanaḅọ,

¹³ Izrẹl Tamụnọ Ḅe, ḍuko ị̀ pịrịye-ẹ, à ḍuko tomonima pịrị; “Àrị ọ́mịna ḅieju-aḍapụma na ọḅọkụ fịmẹ, àrị Ijipt ini ḍụapakụmaḅo se ini omoni ḅaraḅie pọkọ sịkị. Àrị ini ḅẹmẹ na

¹⁴ sọnọma kụra goyegoye ini Hibru omoniḅọ ḅụ ḅarasin anị sonio-a kụra se fịrịnwẹngị ini pịrịsaḅọ. Ọkụma mịna ḅieju-aḍapụma tọrụse ị̀ ḍiki ḍụkụkẹ anịkanịka à ḍukoye pokikẹ.

¹⁵ Ḅọrọsa kalasịkị ḅụ ómine ọ́mịna kuḅie ḍinma se ị̀ ḅieḅẹlẹmaye mịẹmẹ. Óminemgba ḅerenimẹ na ómine ọ́mịna juo Izrẹlapụma ḅụ ḅarasinḅịa se ị̀ tọrụkuḅu, ini chusin ị̀ pịrịarị Oputẹkẹwarị ḅie, ọḅọkụ fịmẹ.

¹⁶ Ọkụma, ọḅụkọ ọ́ pịkị ó kuḅie ḍinmamẹ se ḅarị kụn se ị̀ pịrịkẹ. Óminemgba pịkịna ọ́ ḅarasinsa omoniapụ mamgba ọkịḅo pịkị omoniapụ mịẹsam.

¹⁷ Anịgose, mịọkụ, Ị̀rị̀, Nyanaḅọ Ḅe, ḅẹmẹ na ómine ị̀ ḅịpị pokikẹ, ọ́mịna juo Izrẹlapụma ḅụ ḅarasin ini pọkọso mị ma ó ḅereni ini pịrịkẹ. Anịọkụma ị̀rị̀ à ḅereni se ọ́ pọkọso ḅịa pọkọso ḅereni ọ́ pịrịse ó mun owu ḅie fị, obi, na ḅuruḅaa na ḅie sọḅịa. À mịẹḅịa, sẹkiri ḅie sẹma la-ọkụ ḅụgbiripu nyana, à se ọ́ mịẹḅịaye na ḅụ.

^18-19 Juda na Jerusalẹm na ḅie fịrịnwẹngịapụ na amanyanaḅọ odo ḅie fịrịnwẹngịapụma na se chụa, agbamịẹapụma na pịkị tịḅịnị mamgba na, ị̀rị̀ na ọḅọkụ fịmẹ, anị ini se mama ikiḅa woli nambulo ḅe, mama ikiḅa ma ogboku nwẹngị ḅọrọ mị ḅụ. Ọkụma ini ọḅọkụ mị kanmẹ pịkị anị ḍukoye mị mịẹkẹ. Anịẹrẹchị, mịna apụma ini nambulo ḅe mịẹọkụ à nwọse ini mịẹḅịa.

²⁰ Àrị ini ḅọrọma ini ḅaa ḍọkịarị tarakapụma pịrịḅịa se feni na piri-a nama na inia ḍụẹịn ma pẹịḅịa.

²¹ À pịkị Juda Amanyanaḅọ Zẹdẹkaya ḅe na oria fịrịnwẹngịapụma na ḅọrọma ini ḅaa ḍọkịarịapụ ma pịrịḅịa. À pịkị ini ḅọrọma Babilọn owunima pịrịḅịa, anị ómine gbẹịnmachịẹ mị ọlọchịẹmasapụ ma.

²² À kụrọ pịrị ḅịpị mị pịrịḅịa, se ini pịkịma mị opuama mị ḅoḅịa. Ini owuse-anị pakaḅịa, anị ọkị se anị dọkịma gbinḅịa. À Juda amama mịẹḅịa àrị nweni angaka onwun ele kịkẹḅịa. Ị̀rị̀, Nyanaḅọ Ḅe, ḍukosam.”