Jerimaya 31 - Kịrịkẹnị Baịbụl

Izrẹl Mị Ḅe Pịkịma Ama Ḅo

¹ Nyanaḅọ Ḅe nwọ ḅẹmẹ, “Sịkị ḅoaḅẹ, Ị̀rị̀ Izrẹl sẹ mamgba Tamụnọ nwọ sọḅịa, se ini ma ị̀ya tomoni nwọ sọḅịa.

² Onwun ele ḅie à ḍikiḅụgerere ḍiepakụma fịḅie-pịọrụ-pakaḅo-a tomonima pịrịmẹ. Izrẹl-a tomonima ịnyọsara ḍọkị sịkị,

³ Ị̀rị̀ anị wele nyọ ḅụ ḅụḍiepakụma ini pịrịye-ẹ. Izrẹl-a tomoni, àrị ọ́ ḅẹlẹmasam sịkịmamgba, anịḅụ àrị ị̀ya fafaka ḅẹlẹma mị se ó Ḍiemamun-aḅẹ.

⁴ Gbọrị sịkị à pịkị nwọse kpoto ọ́ namachịẹmaḅịa. Gbọrị sịkị ḅụ ọ́ pịkị nwọse ọ́mịna akwa ma deki farị se ḅieḅẹlẹ ḅaraḅụ sẹkịḅịa.

⁵ Gbọrị sịkị ọ́ pịkị nwọse Sameria chịngịma ọgọnọ irumịẹ chịnmgbọlụ ḍipiḅịa, se àrị ḍipi apụma pịkị irumịẹ chịnmgbọlụ ozu ḅie pakaḅo aye fịḅịa.

⁶ Iin, sịkị ḅoaḅẹ, nyọkoruapụ Ifrem chịngịma ọgọnọ olokuḅịa, ‘Ó ye wa iwo Zaịyọn mun, Nyanaḅọ mịna Tamụnọ Ḅe damamun.’”

⁷ Nyanaḅọ Ḅe nwọ ḅẹmẹ, “Ó ḅieḅẹlẹ ḅụ nime chu Izrẹl pịrị, sẹma ḅie ḍụḅatẹịn sẹ mị. Ọ́mịna boma nime ọ́ nwọ chu, ‘Nyanaḅọ Ḅe ori oria tomonima ḍụasam; inia ḅie kọn apụ mamgba ori ini ḍụapakụmasam.’

⁸ Àrị ini ọkịḅoḅịa ọgọnọju pịkịna ini koḅirima ḅoḅịa tomonikiri kuluma ịkọlị ma ḅie. Tọrụmgbọlụpụn-apụ ma na ikeliapụma na ini na ḅoḅịa, simekọn eremeni na yi-ẹtọn-arị-eremeni na. Tomoni mburusẹ pịkịmaḅoḅịa.

⁹ Ị̀ya tomonima ini owu na pịkịma ḅoḅịa, tẹkẹ ḅụ na àrị ini paḅoarị sịkị. Àrị ini se ideri mengi aka mọnị mọnị ateliogbo ḅọrọḅịa inia ḅụọ tọmbụlọ ẹka nyọ. Ị̀rị̀, Izrẹl ḍa-ẹ, pịkị Ifrem ḅe anị ị̀ya tatarị owutọkụ-ẹ.”

¹⁰ Nyanaḅọ Ḅe nwọ ḅẹmẹ, “Sẹ, ómine ị̀ poki se ị̀ya ọkwẹịn ma ḍuko wasa mun ḅọlọ tọrụ aka ma la. Ị̀rị̀ ị̀ya tomonima galagalamamẹ, ọkụma àrị ini koḅiriḅịa pịkị ọrụtọnma ini ḍikiḍikiḅịa, anana koruḅọ mịna anana ogbo ḍikiḍiki ḅara.

¹¹ À Izrẹl-a tomonima pọkọ pịkị ini ḍụasam, gbọrị opu sẹ ḅara ḅie.

¹² Ini ḅo se Zaịyọn Tụndụ ọgọnọ ḅieḅẹlẹ nime chuḅịa pịkị ị̀ya ḍiepịrịayema gose ḍorokuḅịa— anị mgbọlụ-a fịaye na iru na oliv pulo na anana na pịkị ike-nambulo na. Ini mengi lọkọlọkọma pisima ozu kiri nyọ kịkẹḅịa; ini ḅiye goyegoye ini nyanaḅịa.

¹³ Anịsịkị eremeni awọma ini sẹkịḅịa pịkị ḅieḅẹlẹḅịa, pịkị owuapụ na asẹmẹnị na sẹnịapụ na, ḍorokuḅịa. Àrị inia kuḅie deinmaḅịa se inia ḍụẹịn ḍin mị pịkị ḅieḅẹlẹ ḅie chuḅịa, inia kururu mị pịkị ḅieḅẹlẹ mịẹḅịa.

¹⁴ À yelatẹịn fịye se ḅakama agbamịẹapụ pịrịḅịa pịkịna ị̀ya tomonima ḍọkịye goyegoye inia ḅụ-na-deinḅịa. Ị̀rị̀, Nyanaḅọ Ḅe, ḍukosam.”

Nyanaḅọ Ḅe Ḍikiḅụgerere Izrẹl Ọgọnọ

¹⁵ Nyanaḅọ Ḅe nwọ ḅẹmẹ, “Gbọrị fiearị pụkọ nweni nwọ naamẹ Rema ḅie, akụ owu kọn àrị pụkọ-ẹ. Rechẹl ma arịa awọ gose owu aḅẹ; ini sosam, á pịkị ḍụkụkẹ nweni á kuḅie deinma.

¹⁶ Ị́ya owu mị ọlọchịẹma se ị́ tọrụ owu-a mengi ma gurosin. Ị́ mịẹ ị́ya awọma pịrịsaye mamgba papa gbẹịnka ḅụ ḅọrọso ẹkẹ; tarakaḅọ ḅe ḅara ḅie ini soḅoḅịa.

¹⁷ Kuḅie kụrọmaye tọrọkọju sime ị́ pịrị waraḅẹ; ị́ya awọma ini pịkịma warị ḅoḅịa. Ị̀rị̀, Nyanaḅọ Ḅe, ḍukosam.

¹⁸ “Àrị Izrẹl-a tomonima naamẹ kuḅiesi ḅụ ini ḅẹ aḅẹ, ‘Nyanaḅọ, wa yeḍawọka nama kịkẹmẹ, ọkụma ị́ ḅịpị poki se wa ḍiemẹ. Wa pịkịmaḅo; wa ḅụkarakaramasam vinpịkị ị́ damaḅo, Nyanaḅọ mịna Tamụnọ.

¹⁹ Wa ị́ ḅụ wẹrị ḍarịmamẹ, ọkụma ḅọlọ ẹkẹ wa ḍọkịmẹ wa pịkịma ị́ damaḅo. Ị́ fomuḅara se wa pịrị so sịkị, wa kuḅiesi ḅụ mịna tịḅị ma tumẹ. Mịna ḅụgerere mẹ, wa ḅarị pịkị tọrụ nyanakẹ anịatịḅị wa si mịẹmẹ wa ḅoka sịkịḅụ.’

²⁰ “Izrẹl, ị́rị́ anị ị̀ ḅụ yelatẹịn tọkụ ḅe-ẹ, à ḅẹlẹmatẹịn tọkụ. Àrị ị́ya ẹrẹ go sịkị go sịkị, ḅẹlẹma ḅụ àrị ị́ se ḅiekoromamẹ. Ị̀ kuḅie paka ị́ damaḅomẹ; à ḍikiḅụgerere nyanaḅịa.

²¹ Ómine elekima chịn pike se ateli ma tọn; ómine ama wẹrịso ateli mị ó kpoto nwọ ḍọkị. Ọ́ pịkịmaḅo, Izrẹl-a tomoni, ọ́ pịkịma ọ́ wẹrịso amama ḅo.

²² Ọ́mịna kuḅie maịn maịn tọn mun nde sịkị laḅe, kuḅie-se-ḅụgbanaḅịa ọkụ ofori-a tomoni? Àrị ịwọye pịkị kịrịye mịẹpakụmasam, owuḅọ-tẹrẹ-arị eremeniḅọ kịrị ọkụ kịrịye.”

Tamụnọ-a Tomoni Ma Ḅe Mịẹyeḅarasọ Tọrọkọju

²³ Kụrọmamgba Nyanaḅọ Ḅe, Izrẹl Tamụnọ Ḅe, nwọ ḅẹmẹ, “À tomonima pịkịmaḅo inia ama ḅie koroma sịkị, ini pịkị gbọrị sịkị ḅụ inia Juda na arịa ḅie sime amama na ḅie ḅẹḅịa, ‘Ye Nyanaḅọ Ḅe Jerusalẹm ḅie osi nyana tụndụ mị ḅẹlẹma, anị ori anga fịafịa nyọ mị.’

²⁴ Tomoni Juda ḅie na anị kelema ama mamgba ḅie na angaḅịa, pịkị ozu kọrịapụ simeḅịa, pịkị anana koru apụ na inia anana ogboma na.

²⁵ Ḅụlọkọ apụma, àrị ini mịẹ-ịwọmaḅịa, à pịkị ḅuru pụkọtarị ḅụ oju lọkọsapụ ma mịẹḅịa fịye ini na karaḅịa.

²⁶ Anịsịkị tomoni ḅẹḅịa, ‘À dein mọnọ kọn se oju sarasara ḅụ sịsẹmẹ.’

²⁷ “Ị̀rị̀, Nyanaḅọ Ḅe, nwọ ḅẹmẹ na sịkị mị ḅoaḅẹ, à tomoni na nama na se Izrẹl na Juda na ḅie ḅeinmaḅịa.

²⁸ À tọrụkweinma ini burasin ọkụ na ini sumagbin ọkụ na ini tanwokuma ọkụ na, ini sime ọkụ na ini kansin ọkụ na, mị à pịkị ini ḍipi pakụma pịkị ini namachịẹmaḅịa ọkụ-ẹ.

²⁹ Anịḅo anị sịkị lasịkị, tomoni ḅarị ḅẹ ẹkẹ, ‘Ḍapụ-ma-na-nyengiapụ-ma-na tụmgbakị gịda mị fịmẹ, Ọkụma awọmẹnịma pụkọḅie mị tụmgbakịye-ẹ.’

³⁰ Anịnakaraka, tụmgbakị gịda fịḅọ-fịḅọ, anịḅọ anị aka farịḅịaye-ẹ; pịkị ọrụḅọ-ọrụḅọ fịḅịa, iniḅọ mịẹ sima tịḅị gose.”

³¹ Nyanaḅọ Ḅe nwọ ḅẹmẹ, “Sịkị mị ḅoaḅẹ àrị Izrẹl-a tomonima na Juda tomonima na ịwọ ọḅọkụ fịḅịa.

³² Anị olomu sịkị à se inia ḅieju-aḍapụma na fị ọḅọkụ mị kịkẹ ẹkẹ, anị à ḅaraḅụ ini ọlọpakụmaḅo sịkị Ijipt ḅie. Inia ḅụ à deḅọ kịkẹ sọ, ini anị ọḅọkụ mị kokokẹ.

³³ Àrị Izrẹl-a tomonima na fịḅịa ịwọ ọḅọkụ mị, mị anị-ẹ; àrị ị̀ya olokoma se inia ḅie chuḅịa, se anị gịẹịnḅịa inia kuḅiemgbọlụma ḅie. Àrị inia Tamụnọ sọḅịa se ini ị̀ya tomoni sọḅịa.

³⁴ Inia ḅie gbọrịḅọ sọ se iniḅọ juo amaḅọ ḍie ẹkẹ, iniḅọ Nyanaḅọ Ḅe lekiriḅịa ọkụ, anịatịḅị inimgba ị̀ lekiriḅịa, bokatẹịnḅọ ḅụ sakị mun ḍụḅatẹịnḅọ la. Àrị inia sima ḅụ ḅarasinḅịa, se ḅarị inia nwẹngị irima ma se ḅiekoroma ẹkẹ. Ị̀rị̀, Nyanaḅọ Ḅe, ḍukosam.”

³⁵ Nyanaḅọ Ḅe ịrụa mị pakụmamẹ enekaka ḅụ ḅịaḅịa ẹrẹchị, akalụ mị na lolia ma na àrị ḍin ḅụ ḅịaḅịa ẹrẹchị. Ori tọrụ mị jikemẹ se anị fiemẹ; oria ẹrẹ anị Kụrọmamgba Nyanaḅọ.

³⁶ Ò ḅerenimẹ na, ò yetọn ḅara ye ọkọsimeḅịa nwọ ḅẹ sịkị goyegoye, Izrẹl mị anị sẹ ḅụ simeḅịa.

³⁷ Nemikase gbọrị eneḅụ nweni ineda ye se so mị la ọkụ tọnḅịa ọkụma pịkị tomonikiri mị chuku ḅie ḍọkịḅịa nwọ ḅẹḅẹ, anịsịkị re mị ori Izrẹl-a tomonima sịkịḅịaye-ẹ ini mịẹsaye mamgba tịḅị gose. Nyanaḅọ Ḅe ḍukosam.

³⁸ “Sịkị ḅoaḅẹ,” Nyanaḅọ Ḅe nwọ ḅẹmẹ, “Jerusalẹm mgba kpoto namachịẹmaḅịa ị̀ya opuama ẹrẹchị, Hananẹl Sokopi warị ḅụ sakị ịrụasọsọ nyọ ọkịmun Ịkọlị ḅụ sime Ḅọkọ mị la.

³⁹ Sẹ eke mị anị anịnyọ ịsụn ịrụasọsọ nyọ ḅọrọ mun Gerẹb chịngị la se kanama mun Goa lamẹ.

⁴⁰ Bebe pẹsịkiri nyọ mị anị ini fịapụ ḍipi pịkị sara wokuma nyọ mị, pịkị Kidrọn Ikpu ọgọnọ sime ele mamgba ọkịmun Asụn Ḅọkọ ḅụ ịrụapakapaka nyọ la, osiḅụ sime ị̀ pịrịḅịa. Opuama mị jenejene ḅarị kan ẹkẹ anịkanịka ḅịkị ẹkẹ.”