Jerimaya 30 - Kịrịkẹnị Baịbụl

Nyanaḅọ Ḅe Ḅereni Mẹ Na Ori Oria Tomoni Ma Ḍụaḅịa

¹ Nyanaḅọ Ḅe, Izrẹl Tamụnọ Ḅe,

² ị̀ ḅẹmẹ, “Gịẹịn gbọrị ḍiri ḅie koroma à ḍuko ị́ pịrịye goyegoye,

³ anịatịḅị sịkị ḅoaḅẹ àrị ị̀ya tomoni, Izrẹlapụma na Juda mị na, pịkịmaḅoḅịa. Àrị ini ọkịḅo se ini ḅo à se inia ḅieju-aḍapụma pịrị nyọ laḅịa se ini pịkị anị ọkị nyanaḅịa. Ị̀rị̀, Nyanaḅọ Ḅe ḍukosam.”

⁴ Nyanaḅọ Ḅe, Izrẹl na Juda na ḅe-a tomonima ḅẹmẹ,

⁵ “À ḅalafama owupụkọ naamẹ, ḅalafama owu-ẹ deinma owukẹ.

⁶ Mịọkụ dachịẹ, se koroma! Owuḅọ ineda tọkụ yi pakụmaḅe? Nde à gose owuḅọ goyegoye ọrị arịye, iniḅọ ḅara se iniḅọ ḅụlọ gbana waraḅẹ yi-jike-arị-eremeniḅọ ḅara? Cheye gose nwenimgba pàmá ḅịa-ao?

⁷ Ḅalafama ene ḅoaḅẹ; se anị otomaḅịa jịn ene ofori-ẹ— ị̀ya tomonima ḅe kuḅiesi sịkị, ọkụma ini ḍumoḅịa.”

⁸ Kụrọmamgba Nyanaḅọ Ḅe, nwọ ḅẹmẹ, “Anị ene mị ḅo sịkị, inia kọngọ kpọ ye mị àrị anị kanḅịa, se inia ikoli ma sinḅịa, se ini ḅarị pịkị omoniapụ sọ igoniapụ pịrị ẹkẹ.

⁹ Anịnakaraka, ini fịrịnwẹngị ị̀ pịrịḅịa, Nyanaḅọ inia Tamụnọ Ḅe, pịkị Devid ḅe furo ḅie pakaḅoḅọ ḅe, anị à se amanyanaḅọ mịẹḅịa ḅọ-ẹ.

¹⁰ “Ị̀ya tomoni ọ́ ḅalafama; Izrẹl-a tomoni, ye ọ́ tẹmẹ fama. Àrị ọ́ ḍụaḅịa anị ḅọlọ ama ḅie, anịnyọ ḅụ, ómine ikoliapụ sọ nyọ mị. Ó so ama ḅoḅịa se deinma angaḅịa; àrị ó ḍikiḍikiḅịa, se ọ́ ḅalafamaḅịaḅọ ofori-ẹ.

¹¹ Àrị ọ́ damaḅoḅịa se ọ́ ḍụaḅịa. Àrị ọ́ galagalama sẹịn sẹ mamgba àrị àrị kankọsịmaḅịa, ọkụma àrị ọ́ ḅaa ẹkẹ. Àrị ọ́ wẹrịso ẹkẹ ó fomuḅara daka ḅaraḅụ, ọkụma à fomuḅara se ọ́ pịrịḅịa sịkị, à karakaraye mị mịẹḅịa. Ị̀rị̀, Nyanaḅọ Ḅe, ḍukosam.”

Nyanaḅọ Ḅe Ḅereni Mẹ Na Ori Oria Tomoni Ma Gwọḅịa

¹² Nyanaḅọ Ḅe nwọse oria tomonima ḅẹmẹ, “Ọ́ laye ma ineda ḅịa ẹkẹ, ómine laye ma ineda gwọ ẹkẹ.

¹³ Ómine kpaḅịa gbọrịḅọ sọnị ofori-ẹ, ọ́mịna ịnọ ma àrị gwọḅịaye ofori-ẹ, ọ́ ḅụ iḅiḅịa ḅe kuḅie kụrọ ofori-ẹ.

¹⁴ Ómine ḅẹlẹmapụ mamgba ini ó se ḅieḅaramasam; ini ḅarị ómine abalakẹ. À tarakapụ ḅarase ọ́ dapakasam; ọ́mịna fomuḅara owoimẹ anịatịḅị ọ́mịna sima ḅakamẹ pịkị ọ́mịna sitịḅị mị ḅakamẹ.

¹⁵ Ọ́ ḅarị ọ́ laye ma se nweni suama; ọ́ gwọ nyanakẹ. À mị ḅara se fomuḅara se ọ́ pịrịmẹ anịatịḅị ọ́mịna sima ḅakamẹ pịkị ọ́mịna sitịḅị mị ḅakamẹ.

¹⁶ Ọkụma mịọkụ, ómine mịnịapụ mamgba ini ini mịnịḅịa, pịkị ómine-na-tarakapụ mamgba ini ini ọkị soḅịa ikoliapụ ḅaraḅụ. Ọ́ pụndapụ mamgba ini ini pụndaḅịa, pịkị ómine ọfọịn apụ mamgba ini ini ọfọịnḅịa.

¹⁷ À kpoto iḅiọkụma ọ́ tẹlịmaḅịa; ómine laye ma àrị gwọḅịa, ómine na tarakapụma nwọ ḅẹmẹ sọ, ‘Zaịyọn mị nweni ḅarị sịkịnyana pịrịka ama-ẹ; anị gbolomaye abalaḅọ sọ ofori-ẹ.’ Ị̀rị̀, Nyanaḅọ Ḅe ḍukosam.”

¹⁸ Nyanaḅọ Ḅe, nwọ ḅẹmẹ, “Àrị ị̀ya tomonima pịkịma inia ama ḅoḅịa se ḍikiḅụgerere nyana furo furo pịrịḅịa; Jerusalẹm mị kpoto namaḅịa, se anịa amanyanaḅọ odo mị pịkịna chịẹḅịa.

¹⁹ Anịnyọ anga tomonima boma nime chuḅịa; ini ḅieḅẹlẹ ḅụ ḍorokuḅịa. Ị̀ya ḅẹlẹma ḅụ, inia kịẹnḅịpị sẹnịḅịa; ị̀ya ḅẹlẹma kụn dekiḅo ini pịrịḅịa.

²⁰ À sẹ mị nyana olomu kụrọ pịkịmaḅoḅịa pịkị anị mịẹchịẹmaḅịa; ini pụnụmapụ mamgba à fomuḅara se ini pịrịḅịa.

^21-22 Ḅẹrẹtọn ini pịrịḅịaḅọ ḅe inia sẹ ḅie ḅọ-ẹ, inia amanyanaḅọ tọkụ ḅe inia tomonima ḅie pakaḅoḅịa. Ori ị̀ kpekimaḅịa à chịnḅịpị se ọ̀ pịrị sịkị, anịka tụḅọ ineda ḅoḅe àrị iniḅọ chịnka ọkụma? Ini ị̀ya tomoni sọḅịa, se àrị inia Tamụnọ sọḅịa. Ị̀rị̀, Nyanaḅọ Ḅe, ḍukosam.”

^23-24 Nyanaḅọ Ḅe ịganị mị irisi-ẹ, sitịḅịnyanapụma tịḅịogbo fieḅịa fọrụ-ẹ. Anị bin ẹkẹ ọkịmun ò ḅietọn se ọ̀ mịẹḅịaye ọ̀ nwọ mịẹsoka simeogbo. Ḅoḅịa enema ḅie oria tomonima ḅelema mịn mị kaịnḅoḅịa.