Jerimaya 29 - Kịrịkẹnị Baịbụl

Jerimaya Ḅe Gịẹịn Babilọn Ḅie Sime Juapụ Ma Sẹịnma Ḍiri

¹ À fịrịfịrịma ḍiri gịẹịn agbamịẹapụ na, ịkịankoroapụ na, tomonima na, tịḅịnịma na, jịn apụ na, anị Nebukadneza ḅe Jerusalẹm ḅie, ikoli ḅaraḅụ, ọkịso Babilọn munsapụ ma sẹịnmamẹ.

² Àrị anị gịẹịn sịkị anị Amanyanaḅọ Jẹhoịakin ḅe na, nyọngọrọma na, amanyanaḅọ odo fịrịnwẹngịapụma na, Juda na Jerusalẹm tịḅịnịma na ḅarafịrịnwẹngịapụ ma na, pịkịna fịrịnwẹngị ḅụ ḍinsapụ ma na, ini nwọ sẹịn so sịkị mị-ẹ.

³ Ḍiri mị à se Ẹleasa, Shefan tọkụ ḅe na Gẹmaraya Hilkaya tọkụ ḅe na anị Juda Amanyanaḅọ Zẹdẹkaya ḅe se Amanyanaḅọ Nebukadneza ḅe fịrị-ma-arị-apụ ma pịrịmẹ. Anị nwọ ḅẹmẹ:

⁴ “Kụrọmamgba Nyanaḅọ Ḅe, Izrẹl Tamụnọ Ḅe, ḍuko inia tomoni mamgba, anị ò ḅereni Nebukadneza ḅe pịrị ori ikoliapụ ḅaraḅụ, Jerusalẹm ḅie ọkịso Babilọn mun apụma pịrịmẹ:

⁵ ‘Ọ́ warị nama se sime. Ye ḍipi se anịa ḅie pakaḅoye ọ́ nwọ fị.

⁶ Ama-na-ere-na, ó sime se ómine awọ yi. Se ye ọ́mịna awọma jịn apụ jịn apụ sime se pịkị awọ yi. Kịẹnḅịpị ḅụ ọ́ ḅaka, ómine iderimama.

⁷ À ḅereni ọ́ pịrị ó mun ikoli sọ nwọ ḅe-a opuamama iḅi gose, ọ́ fịrịnwẹngị. Ómine ị̀ tẹkẹ, ini gbolomaye ḅụ, anịatịḅị ye nemikase ini na iḅimẹ nwọ ḅẹḅẹ, ómine sọ anị iḅi ọ́ pịrịḅịa.

⁸ Ị̀rị̀, Nyanaḅọ Ḅe, Izrẹl Tamụnọ Ḅe, ó ḅerijine aḅẹ, ó ḅerenima, ọ́mịna ḅie anga ịkịankoroapụma, anịkanịka jịn apụ oḅori-se-ọ́-chịẹma. Ini anị ḅereni-ọkị-arịapụ ma-ẹ na ini ineda tọrọkọju pakaḅịaye ọrịḍukoḅịa. Ọ́ tọrụpịkị inia ḍawọ ma ḍikima.

⁹ Ini ị̀ya ẹrẹ ḅụ iruokọn ọ́ pịrịaḅẹ. Ị̀rị̀ ini fịrịmakẹ. Ị̀rị̀, Kụrọmamgba Nyanaḅọ Ḅe, ḍukosam.’

¹⁰ “Nyanaḅọ Ḅe, ọkọ ḅẹmẹ, ‘Babilọn ḅie ó sime mun kụra tesioyifịnjị ma ḅọrọ sịkị, àrị ọ́mịna ḅụ omi-ọkụ à nwọse ó ḍieḅịa, se à ḅereniye mị mịẹḅịa na àrị ómine ọkị warị ḅoḅịa.

¹¹ Ị̀rị̀ kẹngẹ anị à tọn ọ́ wẹrịmaye ma nemiye-ẹ; mịẹye ḅarasọ ọkịḅo, ọkụma ḅụfụkakẹ; ọ́ tọrụseḍikiarị kuḅie-dein mị ọkịḅo.

¹² Anịsịkị ómine ị̀ damaḅoḅịa, ómine ị̀ damaḅo pịkị ị̀ tẹkẹḅịa, à pịkị ọ́ pẹkẹrẹḅịa.

¹³ Ómine ị̀ ḍọkịḅịa ọ́ pịkị ị̀ ọrịḅịa, anịatịḅị ọ́mịna kuḅiemgba ọ́ nwọse ị̀ ḍọkịḅịa.

¹⁴ Iin, à ḍukomẹ ómine ị̀ ḍọkịḅịa, à pịkị ọ́ pịkịma ọ́mịna ama ḅoḅịa. Àrị ọ́ galagala mun la gbọrị ama gbọrị ama ḅie na nyọ nyọma ḅie na ómine ọkịḅo ó sime se àrị ó depakụma ama mị laḅịa. Ị̀rị̀, Nyanaḅọ Ḅe, ḍukosam.’

¹⁵ “Ọ́ nwọ ḅẹmẹ na Nyanaḅọ Ḅe, ori ịkịankoroapụ se ọ́ pịrịsam Babilọn ḅie.

¹⁶ Nyanaḅọ Ḅe ḍukoye poki, Devid ḅe daḅọrọso amanyanakiri mị da amanyanaḅọ ḅe ḅụ, pịkị mị opuama mị ḅe-a tomonima ḅụ, anị ọ́mịna mịnapụ ọ́mịna ḅie ḅụ ini ikoliapụ ḅaraḅụ ọkịsokapụ ma gbakịmaye.

¹⁷ Kụrọmamgba Nyanaḅọ Ḅe, nwọ ḅẹmẹ, ‘Àrị ọmụ na ḅuruḅaa na obi na ọkị inia ọgọnọ gbana-ẹḅoaḅẹ. Àrị ini mịẹḅịa ini, opuma ḅụrụ-se-tomoni ineda fịẹka figi kịkẹ.

¹⁸ Ọmụ na ḅuruḅaa na, obi na, à nwọse ini ḍukoḅịa, se sẹkiri ḅie sime-a sẹ mamgba ḅalafa ini ọrịye pịrịḅịa. Àrị ini galagalama munyọ munyọ, tomoni-a tịḅị foinḅịa inia ḅụ pakaye ma gose. Tomoni ini se ḍẹrịye mịẹḅịa se ini worinime se inia ẹrẹ pịrịḅịa.

¹⁹ Mịn mị iniaḅụ pakaḅịa, anịatịḅị ị̀ya fịrịnwẹngị ịkịankoroapụma ḅụ à ḅọrọ sịkịna sịkịna ḅụ ini sẹịnmarị oku ma ini pokikẹ. Ini poki ḍụkụkẹ.

²⁰ Ómine ini sẹịnso Babilọn mun apụ mamgba, Ị̀rị̀, Nyanaḅọ Ḅe ḍukoye ọ́ nwọ poki.’

²¹ “Kụrọmamgba Nyanaḅọ Ḅe, Izrẹl Tamụnọ Ḅe, Ehab, Kolaya tọkụ ḅe ḅụ na Zẹdẹkaya Measaya tọkụ ḅe ḅụ na, Yeḍukosam, anị oria ẹrẹ ḅụ iruokọn ọ́ pịrịarịapụ ma-ẹ. Ò ḍukosam na ori ini ḅọrọma Nebukadneza, Babilọn amanyanaḅọ ḅe kụrọ mị pịrịḅịa, anị ini ḅaaḅịa ḅọ ḅe ọ́mịna tọrụkuḅu.

²² Ini ikoliapụ ḅaraḅụ Jerusalẹm ḅie ọkị so Babilọn mun apụma, worinime se dapụ woriḅịa sịkị, ini ḅẹḅịa, ‘Ye Nyanaḅọ Ḅe, Zẹdẹkaya ḅe na Ehab ḅe na mịẹọkụ ọ̀ nwọse ọ́ mịẹ, anị Babilọn amanyanaḅọ ḅe, fịkaḅụ-fọị-apụ ma!’

²³ Mịn anị ini ḅereniḅoye-ẹ, anịatịḅị ini opuma ḅalafamaye mịẹirima ḅẹrẹsi nyanamẹ—ini sẹfị pịkị Nyanaḅọ Ḅe ẹrẹ ḅụ iruokọnmẹ. Mịn anị Nyanaḅọ Ḅe ọ̀ tọn ayema na tụḅụrụaye-ẹ; ini mịẹye, ori mị nemiye-ẹ, ọ̀ pịkị tụḅụrụma onyechịẹ ini pịrịmẹ. Nyanaḅọ Ḅe ḍukosam.”

Shimẹaị Ḅe Fịrịfịrịma Ḍiri Mị

^24-25 Kụrọmamgba Nyanaḅọ Ḅe, Izrẹl Tamụnọ Ḅe, oku se ị̀ fịrịmamẹ se Shẹmaịya, Nehilam amaḅọ ḅe fịrịma, anị mịna ḅarakuḅu ḍiri se Jerusalẹm-a tomoni mamgba na Zẹfanaya, Measaya tọkụ, agbamịẹḅọ ḅe na, pịkị ísí agbamịẹapụ mamgba sẹịnmaḅọ ḅe. Mịn ḍiri ḅie Shimẹaị ḅe gịẹịn Zẹfanaya ḅe sẹịnmamẹ:

²⁶ “Nyanaḅọ Ḅe ị́ se agbamịẹḅọ mịẹmẹ Jẹhoịada kiri ḅụ, mịọkụ ị́rị́ anị pịkị tịḅịda fịrịnwẹngịḅọ-ẹ Oputẹkẹwarị ḅie. Ị́ya fịrị-ẹ ḍọkịḅo ọrị na nọmụ-elekima se ịkịankoroḅọ goyegoye, ị́ iniḅọ kun ịkasị, se ikulele ikoli se iniḅọ kọngọ kpọ kelema.

²⁷ Ị́ che gose ma mị ḅara se Jerimaya, Anatọtḅọ ḅe mịẹka, anị ịkịankoroḅọ ḅara se ọkwẹịn tomonima pịrịarịḅọ ḅe?

²⁸ Ini ò kiki, anịatịḅị Babilọn ḅie ò ḍuko tomonima pịrịmẹ, ini ikoli ḅie sime ḅọlọmaḅịa, anị gose ini warị nama angaḅịa, pịkị ozu ḍipi se ḍipiye ma soku fịḅịa.”

²⁹ Zẹfanaya ḅe ḍiri mị go ị̀ pịrịmẹ,

³⁰ se Nyanaḅọ Ḅe ḍuko ị̀ pịrịmẹ

^31-32 mị Shẹmaịya ḅe kpakịma oku mị à se Babilọn ḅie sime ikoliapụ mamgba sẹịnma: “Ị̀rị̀, Nyanaḅọ Ḅe, fomuḅara se Shimẹaị ḅe na ò furo ḅie pakaḅo apụ mamgba na pịrịḅịa. Àrị ọ̀ fịrịmakẹ, ọkụma ori ịkịankoroḅọ ḅara se ọkwẹịn ọ́ pịrịmẹ, ọ̀ pịkị mịẹse ómine iruo aye ḅerenimẹ. Ọ́mịna ḅie ó furo ḅie pakaḅoḅịapụ ḅarị paka ẹkẹ. Ò ḍumo sime se à mịẹ ị̀ya tomonima pịrịḅịa iḅiaye ma ori ọrị ẹkẹ, anịatịḅị ori ini ḅẹmẹ ini nyana ḅereni ị̀ pịrịma. Ị̀rị̀, Nyanaḅọ Ḅe, ḍukosam.”