Jerimaya 28 - Kịrịkẹnị Baịbụl

Jerimaya Ḅe Na Ịkịankoroḅọ Hananaya Ḅe Na

¹ Anị gbọrị kụra mị ḅie, Zẹdẹkaya ḅe, Juda amanyana inein karama kụra ḅie, sọnọ karama akalụ mị ḅie, anị Hananaya, Azọ tọkụ, Gibiọn ama ḅie ḅo ịkịankoroḅọ ḅe, ọkwẹịn ị̀ pịrịye-ẹ agbamịẹapụma na tomonima na tọrụkuḅu Oputẹkẹwarị ḅie. Ò ḍuko ị̀ pịrịmẹ na

² Kụrọmamgba Nyanaḅọ Ḅe, Izrẹl Tamụnọ Ḅe, ḍukosam, “Babilọn amanyanaḅọ ḅe kụrọ mị à ḅaasam.

³ Mama kụra ḅie àrị Oputẹkẹwarị ngọ mamgba amanyanaḅọ Nebukadneza ḅe dekiso Babilọn mun-aye ma na ọkị pịkị mịju ḅoḅịa.

⁴ À pịkị Juda amanyanaḅọ Jẹhoịakin, Jẹhoịakim tọkụ ḅe, ọkị pịkịma ḅoḅịa, Juda tomoni mamgba na anị sẹịnso-mị ḅie Babilọn mun-a tomonima. Iin, Babilọn amanyanaḅọ ḅe kụrọ mị à ḅaaḅịa. Ị̀rị̀, Nyanaḅọ Ḅe, ḍukosam.”

⁵ Anị agbamịẹapụma na chịẹsime-a tomonima na tọrụkuḅu Oputẹkẹwarị mị ḅie, àrị Hananaya ḅe ḅẹye-ẹ,

⁶ “Ḅụgbiripumamẹ! À chịnḅara Nyanaḅọ Ḅe mịn mị ọ̀ kọkọma mịẹḅịa! À jokoma koromamẹ ọ̀ mịẹḅịa ị́ koro ịkịan mị ḅo kọkọmaye sọ se Oputẹkẹwarị ḅie kokokoroma ngọ mamgba na ini ikoliapụ ḅaraḅụ ọkịso Babilọn mun apụma na ọkịḅo.

⁷ Ọkụma à ḍuko ị́rị́ na tomonima na pịrịarịye poki.

⁸ Ḅọrọsa ḅọlọ sịkịḅụ ọkwẹịn ịkịankoroapụma, tẹrẹrẹ ị́rị́ na ị̀rị̀ na sịkị ma laka sịkịḅụ, ọrị ḍukomẹ na ọmụ na, ḅuruḅaa na, obi na anị tọn-a sẹ na kụrọ amanyanakiri na ḅie sọḅịaye-ẹ.

⁹ Ọkụma dein ḅẹrẹ ḍuko ịkịankoroḅọ ḅe, ò ḍuko dein ḅẹrẹ mị kọkọma paka sịkị, anị tomoni ọkịḅịaye-ẹ na Nyanaḅọ Ḅe kọkọma ọ̀ fịrịmamẹ.”

¹⁰ Anị Hananaya ḅe ị̀ kọngọ kpọye mị sin se anị kankọsịmaye-ẹ,

¹¹ se tomoni mamgba tọrụkuḅu ḅẹye-ẹ, Nyanaḅọ Ḅe ḍukosam na mị ḅara anị ò se Nebukadneza ḅe se sẹ mamgba kọngọ kpọye ma kansinḅịa ọkụ-ẹ; mama kụra ḅie anị ọ̀ pịkị mịn mị mịẹḅịaye-ẹ. Mị à soye-ẹ.

¹² Sịkị ḅọrọ mị Nyanaḅọ Ḅe ḍuko ị̀ pịrịye-ẹ

¹³ na à mun ḍuko Hananaya ḅe pịrị, “Nyanaḅọ Ḅe, ò ḍukosam na ị́ ineda chịn kọngọ kpọye kankọsịmaḅịa, ọkụma ori ikulele kọngọ kpọye se anịa tịḅị ḍinmaḅịa.

¹⁴ Kụrọmamgba Nyanaḅọ Ḅe, Izrẹl Tamụnọ Ḅe, ò ḍukosam ori ikulele kọngọ kpọye se mịna sẹ mamgba ọgọnọ gbanaḅịa, se ini fịrịnwẹngị amanyanaḅọ Nebukadneza Babilọn ḅọ ḅe pịrịḅịa. Nyanaḅọ Ḅe ọ̀ pịkị ḍukosam na ọ̀ mịẹḅịa piri nama mamgba sọnị fịrịnwẹngị Nebukadneza ḅe pịrị.”

¹⁵ Anị à mịn mị ḍuko Hananaya ḅe pịrịye-ẹ, pịkị chụaye-ẹ, “Poki Hananaya! Nyanaḅọ Ḅe ori ị́ fịrịmakẹ, ị́ pịkị mịna tomonima mịẹ-aḅẹ ini iruo ḅereni.

¹⁶ Anịgose, Nyanaḅọ Ḅe na mịnaḅụ na ọkọ ḅẹmẹ ori ị́ sikimaḅịa ọ̀ ḅụ ḅụ tẹrẹrẹ mị kụra ḅọrọ, ị́ fịḅịa, anịatịḅị ị́ ḍuko tomonima pịrịsam ini kọngọ-kụrọma Nyanaḅọ Ḅe pịrị.”

¹⁷ Se Hananaya ḅe ọ̀ fịmẹ sọnọmẹ karama akalụ ḅie anị gbọrị kụra ḅie.