Jerimaya 26 - Kịrịkẹnị Baịbụl

Ini Jerimaya Ḅe Ọkị Ḅẹrẹchiri Ḅomẹ

¹ Josaya tọkụ, Jẹhoịakim ḅe Juda amanyanaḅọ sọ ḅọlọka simeogbo anị,

² Nyanaḅọ Ḅe, ị̀ ḅẹye-ẹ, “Oputẹkẹwarị mị ḅie kiri mị ḅie chịẹ se, à tọn ị́ pịrị na ḍuko nwọ ḅẹ aye mamgba ḍuko wasama Juda amama ḅie wẹrịḅo tẹkẹḅoapụ mamgba pịrị. Gbọrị ye sọ kọmama.

³ Sosi, tomonima ini pokiḅịa se inia siamịẹmịẹye ma ḅụ ḅarasinḅịa. Ini nemikase ḅarasinsin, anịsịkị re àrị ị̀ kuḅie ḍinmaḅịa, à tọn na à ḅo ini kansaraḅịa inia sitịḅị-chụa-mịẹmịẹaye ma gose.”

⁴ Nyanaḅọ Ḅe nwọ ḍuko ị̀ pịrịmẹ na à ḍuko tomonima pịrị, “Ị̀rị̀, Nyanaḅọ Ḅe, ḍukosam na ómine ị̀ ḅịpị poki nyanamẹ à se ó ḍiearịye ma ḅụ,

⁵ pịkị sịkịna sịkịna ḅụ, à se ọ́ sẹịnmarịapụ ma, ị̀ya fịrịnwẹngịapụ anị ịkịankoroapụma kọn àrị ọkwẹịn ma, ọ́ tọrụ se àrị ḍiki. Ini ḍukoaye ma ngịsị ọ́ mịẹkẹ.

⁶ Ó nemikase pa inia ḅịpị pokikẹ nwọ ḅẹḅẹ, anịsịkị à se Shịlo mị mịẹọkụ à nwọse mị Oputẹkẹwarị mị mịẹḅịa, se sẹkiri ḅie sime sẹ mamgba worinime se mị ama mị ẹrẹ pịrịḅịa.”

⁷ Agbamịẹapụma na, ịkịankoroapụma na, tomoni mamgba na, ị̀ naamẹ à ma ayema ḍukoarị sịkị Oputẹkẹwarị mị ḅie.

⁸ Se Nyanaḅọ Ḅe, ị̀ ḅẹ na à ḍuko nwọ ḅẹ ayema, à nwọ ḍuko so kirikiri, mị ini ị̀ kun se ini olokuye-ẹ, “Ini ị́ ḅaa gbẹịnmẹ mịn mị gose!

⁹ Ị́ cheye gose, Nyanaḅọ Ḅe ẹrẹ ḅụ ị́ ḍuko na mị Oputẹkẹwarị mị anị Shịlo mị sime ọkụ simeḅịa pịkị mị opuama mị anị kansaraḅịa se gbọrịḅọ sọ ḅarị anịa ḅie anga ẹkẹ?” Anị tomonima ị̀ gbori kelemaye-ẹ.

¹⁰ Juda tịḅịnịma pakaye mị naa sịkị, ini be amanyanaḅọ odo wẹrịso se Oputẹkẹwarị mị Ịwọ Onubu Ḅọkọ mun ịkasị ọkị simemẹ.

¹¹ Anị agbamịẹapụma na ịkịankoroapụma na nwọse tịḅịnịma na tomonima na ḅẹye-ẹ, “Ḅeḅọ ḅe, ini fị ḅẹrẹpẹlẹ ọ̀ pịrị gbẹịnmẹ, anịatịḅị ori ọkwẹịn ḅụ mịna opuama mị na tụḅụrụsam. Ọ́ ḅarana ḅeri se ò ḍukoaye ma naasam.”

¹² Mị à ḅo ḅẹye-ẹ, “Nyanaḅọ Ḅe, ị̀ fịrịmamẹ na mun mị Oputẹkẹwarị mị ḅụ na pịkị mị opuama mị ḅụ na ọ́ naa se à ḍukoarịye ma ḍuko wasama.

¹³ Gbarịmaka ḅaraḅụ ó ḍinma ómine anga àrị ḅaraḅụ na, pịkị ọ́ mịẹarịaye ma ḅụ na, se pịkị gbarịmaka ḅaraḅụ Nyanaḅọ ọ́mịna Tamụnọ Ḅe ḅịpị poki. Ó nemikase ọkọ yemẹ ḅẹḅẹ, ori ò kuḅie ḍinmaḅịa ò ḍuko na ò ḅo ọ́ kansinḅịa nwọḅẹye mị ḅụ.

¹⁴ Ị̀rị̀ ọkụma, àrị ọ́mịna kụrọ ḅie omi-ẹ! Ó koromaḅo na karakara mẹ nwọḅẹ ḅara, ọ́ nwọse ị̀ mịẹ.

¹⁵ Ọkụma ọ́ mịn mị se ḅiekoroma; ó nemikase ị̀ ḅaamẹ nwọ ḅẹḅẹ, ómine na mị opuama mị ḅie sime tomonima na, ḅẹrẹtịḅị nemikaḅọ-ḅaa-ḅẹrẹsi ọ́mịna tịḅị gbanaḅịa, anịatịḅị Nyanaḅọ Ḅe anị ị̀ fịrịmaye-ẹ na à ḅo mị ḅerijine ọkwẹịn mị ḍuko ọ́ pịrị.”

¹⁶ Anị tịḅịnịma na tomonima na, ịkịankoroapụma na nwọse agbamịẹapụma ḅẹye-ẹ, “Ḅeḅọ ḅe, Nyanaḅọ mịna Tamụnọ Ḅe ẹrẹ ḅụ mị ò ye ḍuko wa pịrịye-ẹ; ini ò se ḅaa ḅie chuma.”

¹⁷ Anị ḅọrọso, sẹnịapụma ḅie dapụ sịsẹ se anịju ḅo koḅirimapụ ma ḅẹye-ẹ,

¹⁸ “Hẹzekaya ḅe Juda amanyana sịkị, Morẹshẹt ḅie ḅo ịkịankoroḅọ, Maịka ḅe, ḍuko tomoni mamgba pịrịmẹ na, Kụrọmamgba Nyanaḅọ Ḅe ḍukosam, ‘Zaịyọn mị anị ozu kiri kịkẹḅịa se ini anị kọrịḅịa; Jerusalẹm mị anị ḅo kankọsị sara kiri sọḅịa, pịkị Oputẹkẹwarị chịngị mị anị opu piri sọḅịa.’

¹⁹ Amanyanaḅọ Hẹzekaya ḅe na Juda tomonima na ini Maịka ḅe se ḅaa ḅie chukẹ. Anịnakaraka, Hẹzekaya ḅe ọ̀ Nyanaḅọ Ḅe osi se ḅụkụrọma oria ḅẹlẹma nyọ nyanamẹ. Se Nyanaḅọ Ḅe anị ḅụ ò kuḅie ḍinmamẹ ọ̀ tọn na ò se ḅo oria ọgọnọ gbanaḅịa ḅẹ ḅụfụka mị kansinmẹ. Mịọkụ wa ḅalafama ḅụfụka deki mịnaḅụ pịrị-ẹtọn-aḅẹ.”

²⁰ (Jịn gbọrịḅọ omi-ẹ, Yuraya, Shẹmaịya tọkụ, Kiriat Jearim ḅọ ḅe ori anị Nyanaḅọ Ḅe ẹrẹ ḅụ, ọkwẹịn kọn tụḅụrụma mị opuama mị na sẹ mị na ọgọnọ gbana ḅọ-ẹ, Jerimaya ḅe mịẹọkụ mị.

²¹ Amanyanaḅọ Jẹhoịakim ḅe na owunima na, oria fịrịnwẹngịapụma na, Yuraya ḅe ḍukoye mị naa sịkị, amanyanaḅọ ḅe, ori ọ̀ ḅaa ḍọkịmẹ. Ọkụma Yuraya ḅe ye mị ọ̀ naamẹ; se ọ̀ mangị so Ijipt mun mẹ ḅalafa ḅụ.

²² Amanyanaḅọ Jẹhoịakim ḅe, anịsọ, Ẹlnatan, Akbọ yaḅe na jịn owuapụ na se Ijipt sẹịnmẹ na ini mun Yuraya ḅe kunḅo.

²³ Ini ori ọkịḅo amanyanaḅọ Jẹhoịakim ḅe pịrịmẹ, se ori ọ̀ ḅaa se oria oju mị se ḍụẹịn ḍipi kiri gbin wokumamẹ.)

²⁴ Ọkụma Ahaịkam, Shefan yaḅe, ị̀ mịẹkụrọmaye gose, ini ị̀ ḅọrọma tomonima pịrịkẹ se ini ị̀ ḅaa.