Jerimaya 23 - Kịrịkẹnị Baịbụl

Kuḅie Se Ḅa Ḅụgbana

¹ Ndende sime ḅalafama ḅara ḅẹrẹpẹlẹḅịpị Nyanaḅọ Ḅe nwọse ini ḅẹrẹtọn apụma tịḅị gbanaḅe, anị oria tomonima ḅaa, pịkị ini galagalamapụ ma!

² Mịn anị Nyanaḅọ, Izrẹl Tamụnọ Ḅe, ini-tọrụ-se-ḍiki, oria tomonima ḍikiḍiki nwọ ḅẹ ḅẹrẹtọn apụma ḅụ, ḍukoaye-ẹ: “Ma ọ́ tọrụ se ị̀ya tomonima ḅụ wẹrịkẹ, ómine ini galagalama se ini desinsam. Mịọkụ à fomuḅara se ọ́ pịrịḅịa ọ́ mịẹsa siye mị gose.

³ Àrị ị̀ya kọn-a tomonima koḅiriḅoḅịa anị àrị ini galagalama mun chu amama ḅie, se ini pịkịna inia amakiri ḅoḅịa. Ini tọn-a awọ nwọ nyanaḅịa, se inia kịẹnḅịpị iwoḅịa.

⁴ À ḅẹrẹtọn apụ tọnḅịa ini ḍikiḍikiḅịapụ. Ị̀ya tomonima ini ḅarị ḅalafa nyana ẹkẹ, anịkanịka ye inia ḅalafama ẹkẹ, à pịkị ḅarị fomuḅara se ini pịrị ẹkẹ. Ị̀rị̀, Nyanaḅọ Ḅe ọkọ ḅẹmẹ.”

⁵ Nyanaḅọ Ḅe nwọ ḅẹmẹ, “À Devid furo ḅie karakaraye mịẹḅịa amanyanaḅọ sẹlẹḅịa sịkị ḅoaḅẹ. Ori amanyanaḅọ ḅe, ò nemi ḅụ karakara na mịẹgbẹịn ḅara na nwọse bebe sẹ mị ḍikiḍikiḅịa.

⁶ Ori amadaḅịa sịkị, Juda tomonima ini ḍụaḅọrọma nyanaḅịa, pịkị Izrẹlapụma ini deinma ḅụ angaḅịa. Ini se ọ̀ chịnḅịa ye anị ‘Nyanaḅọ Mịna Ḍụaḅọrọmaḅọ.’

⁷ “Sịkị mị ḅoaḅẹ,” Nyanaḅọ Ḅe nwọ ḅẹmẹ, “tomoni ḅarị ḍumo Tamụnọ ḅaraḅụ ị̀ karịfị ẹkẹ, Ijipt ama ḅie Izrẹl-a tomonima ḍụapakụmaḅọ ḅe.

⁸ Anịnakaraka, ini ị̀ karịfịḅịa ḍumo Tamụnọ ḅaraḅụ, anị Izrẹl-a tomonima ọkịpakụmaḅoḅọ ḅe, ọgọnọju amama ḅie àrị ini galagalama sẹịn amama ḅie na. Anịsịkị mị ini inia amama ḅie angaḅịaye-ẹ.”

Jerimaya Ḅe Ịkịankoro Apụ Ma Ḅụ Nyana Oku Mị

⁹ Ị̀ kuḅie kọsịmẹ, à pịkị geregereaḅẹ. Nyanaḅọ Ḅe tịḅị gose, Nyanaḅọ Ḅe oria osiḅụ sime ọkwẹịn ma gose, àrị iru-ḅu-tọrụḅamaḅọ kịkẹmẹ, opuma iru-ḅu-tọrụḅamaḅọ.

¹⁰ Ama mị ḅie kuḅie se Nyanaḅọ Ḅe ḅụgbanakapụ ḅeinmẹ; ini sitịḅịnyana ḍumo kọnmẹ pịkị inia kụrọ se fịrịnwẹngị irimamẹ. Nyanaḅọ Ḅe oria worinime gose ama mị kururumẹ se osuein mamgba samịnamẹ.

¹¹ Nyanaḅọ Ḅe nwọ ḅẹmẹ, “Ịkịankoroapụma na agbamịẹapụma na ini Tamụnọ nemikẹ; àrị ini kunsam ini Oputẹkẹwarị ḅie siaye mịẹarị ogbo.

¹² Ini ḅọrọarị ateli ma sịnịnị-sịnịnịḅịa pịkị kanakanaḅịa; àrị ini mịẹḅịa inia ḅụọ tọmbụlọ se ini ḅịkịḅịa. À ḅụfụka ọkịḅo ini pụnụma-ẹmuaḅẹ; inia fomuḅara ini laḅịa sịkị ḅoaḅẹ. Ị̀rị̀, Nyanaḅọ Ḅe, ọkọ ḅẹmẹ.

¹³ Sameria ịkịankoroapụma inia sima àrị ọrịsam; ini Beal ḅe ẹrẹ ḅụ yeḍuko se ị̀ya tomonima dairimasam.

¹⁴ Ọkụma à pịkị Jerusalẹm ḅie sime ịkịankoroapụma ọrịsam sitẹịnye nwọ mịẹ ḅụ: ini sẹfị pịkị iruo kọnmẹ; ini ḅarachụa siye mịẹapụ pịrịye gose, tomoni ḅarị siyemịẹ ḅụ dachịẹkẹ. Ị̀ ḅụ, inimgba ini Sọdọm na Gomọra na kịkẹmẹ siyemịẹ ḅụ.

¹⁵ “Anịẹrẹchị, mịn Ị̀rị̀, Kụrọmamgba Nyanaḅọ Ḅe, ḍukoye-ẹ, Jerusalẹm ịkịankoroapụma ḅụ: Àrị akụ ịnyanya se ini pịrịḅịa ini fị, pịkị nweniḅa ḍiri se ini pịrịḅịa ini ḅu, anịatịḅị ịkịankoroapụma ḅụḅụ Tamụnọ osika ama mị mgba kelema sam.”

¹⁶ Kụrọmamgba Nyanaḅọ Ḅe nwọse Jerusalẹm-a tomonima ḅẹmẹ, “Ịkịankoroapụma ini ḍukoaye ma ó pokima; ini iruo kọn ọ́mịna kuḅie ma kụrọma aḅẹ. Inia kuḅie koromaye anị ini ḍuko ọ́ pịrịarịye-ẹ; Ị̀rị̀ ḍukoyekẹ.

¹⁷ À ḍukoaye ma pokika apụma kuḅie ini nwọ kụrọma se nwọ ḅẹaḅẹ na yemamgba ini na iḅiḅara munḅịa. Ini pịkị ḍuko ininachịnḅọ goyegoye pịrịmẹ na gbọrị ḅụfụka sọ ọ́ la-ẹkẹ.”

¹⁸ À nwọ ḅẹmẹ, “Mịna ịkịankoroapụma ḅụ gbọrịḅọ sọ Nyanaḅọ Ḅe ḅọị-a koroma ma nemikẹ. Inia ḅụ gbọrịḅọ sọ ma oria oku mị naa, anịkanịka anị kaịnḅokẹ, anịkanịka anị poki, anịkanịka tọrụ pịkị ò ḍukoye mị dakẹ.

¹⁹ Oria ịganị mị anị irisi-ẹ, sitịḅịnyanapụma tịḅị ọgọnọ fieḅọrọḅịa kụrọ fọrụ-ẹ,

²⁰ anị pịkị kuluma ẹkẹ ọkịmun ọ̀ tọn se ọ̀ mịẹḅịaye ma ọ̀ nwọ yesoka simeogbo. Tọrọkọju ḅoḅịa enema ḅie mị oria tomonima ḅelema mịn mị kaịnḅoḅịaye-ẹ.”

²¹ Nyanaḅọ Ḅe nwọ ḅẹmẹ, “Ị̀rị̀ mịna ịkịankoroapụma fịrịmakẹ, ọkụma anịsọ ini munmẹ. À gbọrị oku sọ se ini pịrịkẹ, ọkụma anịsọ ini ị̀ya ẹrẹḅụ ọkwẹịnmẹ.

²² Ini nemikase ị̀ya ḅọị-a koroma ma lekiri ọkụma, mgbọkụ ini ị̀ya oku mị ḍuko ḅelema ị̀ya tomonima pịrịsam, se ini inia ḍumo ḅụ, inia siamịẹmịẹye ma na sitịḅị ma na ḅụ ḅarasinsam.

²³ “Ị̀rị̀ anị nyọ mamgba ḅụ sime Tamụnọ-ẹ, à gbọrị nyọ kẹngẹ ḅụ simesimekẹ.

²⁴ Gbọrịḅọ sọ ofori-ẹ ọ̀ ḅọị sime se àrị ori ọrịka nyọ. Ị́ nemika na nyọ mamgba ḅụ àrị omi-ẹ, so mị ḅie na tomonikiri mị ḅie na?

²⁵ Anị ịkịankoroapụma ḍukoaye ma à nemimẹ, anị ị̀ya ẹrẹ se iruoaye ḍukoma ḅọrọarịapụ ma, na ḍawọju àrị ị̀ya oku se ini fịrịmamẹ.

²⁶ Anị ịkịankoroapụma ini tẹmẹḅọ iruo ma se ị̀ya tomonima dairima mun nde sịkị laḅe?

²⁷ Ini nwọ chịnmẹ na ini ḍukoarị ḍawọ ma ineda ị̀ya tomonima mịẹse ini ị̀ se ḅieḅaramaḅịa, anị inia ḍapụma ị̀ se ḅieḅarama se Beal ḅe daọkị-ọkụ-mị.

²⁸ Ḍawọ kọn ịkịankoroḅọ ḅe ò ḅereni ọkị na papa ḍawọ mị ọ̀ kọnye-ẹ, ọkụma ị̀ya oku naa ịkịankoroḅọ ḅe, ori ị̀ya oku mị ḍuko wasamaḅịa kuḅie se ḅụgbana ḅaraḅụ. Osirosiroḅa se ịpịamgba mgbọlụma na otoma mị che iḅi mịẹ ḅe?

²⁹ Ị̀ya oku mị anị fịnị na ineda ḍụparị na ḅaa kọsịmaḅịa amana na kịkẹmẹ.

³⁰ Jụmḅọ jụmḅọ ḅịpị ọkwẹịn ọkịse ḅẹ na, ị̀ ḅara ḅomẹ nwọḅẹye ḍukowasamarị ịkịankoroapụma àrị ini na tụḅụrụmẹ.

³¹ À pịkịna inia ịkịankoroapụma na tụḅụrụmẹ nwọ inia kuḅie tọn ayema ḍuko se ḅẹmẹ na ị̀ ḅara ḅomẹ nwọḅẹ apụma.

³² Ị̀rị̀ Nyanaḅọ Ḅe ḍukoarịye mị poki! Àrị inia ịkịankoroapụma na tụḅụrụmẹ, nwọ inia ḍawọ ma se ḅakama iruokọn-arị-apụ ma. Ini mịna ḍawọ ma ḍuko se ị̀ya tomonima dairimamẹ inia iruo ma na inia ḅụboma ma na ḅụ. Àrị ini fịrịmakẹ, anịkanịka tọn ini pịrịkẹ na ini mun, ini pịkị ḅarachụa tomonima pịrịarị ẹmbẹ ngịsị ofori-ẹ. Ị̀rị̀, Nyanaḅọ Ḅe ọkọ ḅẹmẹ.”

Nyanaḅọ Ḅe Oria Iku Fomuḅara

³³ Nyanaḅọ Ḅe nwọse ị̀ ḅẹmẹ, “Jerimaya, ị̀ya tomonima ḅie gbọrịḅọ, anịkanịka ịkịankoroḅọ, anịkanịka agbamịẹḅọ ị́ gbela na, ‘Nyanaḅọ Ḅe oku mị che oku?’ Ị́ ḍuko ọ̀ pịrịḅịa, ‘Ị́ ikuye sọ Nyanaḅọ Ḅe pịrịmẹ, ọ̀ pịkị ị́ dalasin-ẹmun-aḅẹ.’

³⁴ Nemikase ị̀ya tomonima ḅie gbọrịḅọ, anịkanịka ịkịankoroḅọ, anịkanịka agbamịẹḅọ, ọkwẹịn na ‘Nyanaḅọ Ḅe ikuye,’ nwọ ḅẹḅọ, à fomuḅara se oriḅọ ḅe na oria furo na pịrịḅịa.

³⁵ Anịnakaraka, ọrụḅọḅọ nụḅọ ikiapụ na mịnapụ na gbela, ‘Che pẹkẹrẹḅịpị Nyanaḅọ Ḅe ọ̀ nwọ pịrịsa? Cheye, Nyanaḅọ Ḅe ọ̀ nwọ ḅẹsa?’

³⁶ Anịḅụ ini ḅarị anị ọkwẹịn mị kọn ẹkẹ na ‘Nyanaḅọ Ḅe ikuye,’ anịatịḅị, nemikase anị ọkwẹịn kọnḅọ simesime, à jokoma ị̀ya oku mị mịẹ ikuma nụḅọ pịrịḅịa. Tomonima ini inia Tamụnọ Ḅe ọkwẹịn ma pịkị-iḅosam, ḍumo Tamụnọ Ḅe, Kụrọmamgba Nyanaḅọ Ḅe.

³⁷ Jerimaya, ịkịankoroapụma gbela, ‘Che pẹkẹrẹḅịpị Nyanaḅọ Ḅe, ọ̀ nwọse ọ́ pịrị? Nyanaḅọ Ḅe, ò che ḅẹ?’

³⁸ Se, ini nemikase ị̀ ḅịpị pokikẹ se anị ọkwẹịn mị, ‘Nyanaḅọ Ḅe ikuye,’ anịọkụma ḍuko ini pịrị na

³⁹ àrị ini sẹlẹ se gelema ị̀ ḅụ ḍarịma gbinḅịa, ini na, à se inia-ḅieju-aḍapụ ma pịrị opuama mị na.

⁴⁰ À kuluma nyanaka ḅụgerere ọkịḅo inia ọgọnọ gbanaḅịa, nweni ineda se ḅieḅaramakaye.”