Jerimaya 2 - Kịrịkẹnị Baịbụl

Tamụnọ Ḅe Izrẹl Mị Ḍikiḍiki Ḅara

¹ Nyanaḅọ Ḅe nwọse ị̀ ḅẹmẹ

² na à mun mịn oku mị ḍuko kelema ḅẹḅọ ḅẹḅọ pịrị Jerusalẹm mị ḅie. “À se ḅiekoromamẹ, ị́ kala tọkụ ḅụ sime sịkị, ị́ kuḅie se ḅụgbana-na-gbẹịnḅọ-sọ ọkụ, wa tatarị ama-na-ere-na sime kọn sịkị ị́ ị̀ ḅẹlẹma ọkụ; onwun ele ḅie ị́ ị̀ ḍukonwẹngịmẹ, ma ini ye ḍipika kiri ḅụ ị́ ị̀ ḍukonwẹngịmẹ.

³ Izrẹl, ị́ sime ị̀rị̀ kẹngẹ pịrịmẹ; ị́rị́ anị ị̀ya osiḅụ sime chịnmgbọlụ-ẹ. À tọrụsiọrị na sifụḅara na se yese ị́ lamapụ goyegoye sẹịnmamẹ. Mị anị Ị̀rị̀, Nyanaḅọ Ḅe, ḍukosaye-ẹ.”

Izrẹl Ḅieju-a Ḍapụ Ma Tamụnọ Ḅe Tọrụkuḅu Mịẹ Si Ma

⁴ Nyanaḅọ Ḅe oku mị poki, ómine Jekọb ḅe ḅụ pakaḅo apụma, ómine Izrẹl sẹ apụma.

⁵ Nyanaḅọ Ḅe nwọ ḅẹmẹ: “Ọ́mịna ḅieju-aḍapụma cheaye ini nwọ ḍuko ị̀ tịḅị gbana? Cheye mịẹse ini ị̀ wẹrịso? Ini tịḅịtu yeḅụsọka oru ma pịrịmẹ se ini na mịnaḅụ na ḅarị yeḅụsọkẹ.

⁶ Ini ị̀ abalakẹ, àrị Ijipt ḅie ini ḍụapakụmaḅomẹ nwọḅẹ sọ pịkị onwun ele ḅie ini ḅọrọmaḅomẹ nwọḅẹ sọ: anị onwun ele ḅie onwun pokolo ma na kiri mị, anị samịna pịkị yese-nweni lama kiri mị, gbọrịḅọ sọ angaka, pịkị ḅọrọḅọrọka nyọ mị.

⁷ Àrị ini ọkịḅo lọkọlọkọ kiri lamẹ, se anịa ḅie ini ḅo fịayesoku na jịn iḅiaye na ḅe tọrụḅẹlẹ nyọ nyanaye-ẹ. Ọkụma anịnakaraka ini ị̀ya kiri mị simamẹ; ini à se ini pịrị sẹ mị pụlamamẹ.

⁸ Agbamịẹapụma ini gbelakẹ, ‘Nde Nyanaḅọ Ḅe?’ Ị̀ya agbamịẹapụma ini ị̀ lekirikẹ. Ḅẹrẹtọn apụma kọngọ kụrọma ị̀ pịrịmẹ; ịkịankoroapụma Beal ẹrẹ ḅụ ọkwẹịnmẹ se tịḅịtu yeḅụoforika oru ma pịrịmẹ.

Nyanaḅọ Ḅe Ọ̀ Ḅẹrẹ Nyana Se Oria Tomoni Ma Pịrịmẹ

⁹ “Nyanaḅọ Ḅe pịkị nwọḅẹmẹ, à nyana tomonima pịrị ḅẹrẹ mị ḍuko ḅelemaḅịa. Inia ḅụ paka ḅo apụma, à ḍuko inia tịḅị gbanaḅịaye ma à nwọ ọkịḅoḅịa.

¹⁰ Ịrụasọsọ nyọ ḅọrọ so Saịprọs chọ mị mun, se nweni se ịrụapakapaka nyọ Kida ama mị sẹịn. Ị́ ọrịḅịa na mịn mị kịkẹmaye jịn enema pakakẹ.

¹¹ Jịn gbọrị sẹ sọ ofori-ẹ inia oru ma ḍinma, àrị jokoma karakaraka tamụnọ-ẹ nwọḅẹ sọ. Ọkụma ị̀ya tomonima ini ị̀ se ineda gbọrịye sọ mịẹ ẹka oru ma ḍinmasam, anị kụn ọkịḅo ini pịrị Tamụnọ Ḅe, anị ineda gbọrịye sọ mịẹ ini pịrị-ẹka oru ma.

¹² Anịgose à tọn so mị pịrịmẹ anị ḅalafama ḅara se jike, se inia ḅụbuanma pịkị inia ḅụgbiripuma,

¹³ anịatịḅị ị̀ya tomonima mama si ini nwọ mịẹsam: ini ị̀ ḅụ wẹrị sikimasam, anị ideri ḅumengi ḅie, se ini pịkị mengi chụaye sokumẹ, anị firi se ineda ngịsị mengi ọlọ-ẹkaye ma.

Izrẹl Mị Anị Fomuḅara Damẹ Anịa Kuḅie Se Ḅụgbanaka Mị Gose

¹⁴ “Izrẹl ḅe omoniḅọkẹ; ini pịkị omoniḅie ò yikẹ. Anịọkụma cheye gose ori-na-tarakapụ ma ò kungbin-ao?

¹⁵ Chịrịḅa ma oloku ọkụ ini ọ̀ tịḅị olokusam; ini oria ama se onwun ele mịẹsam, se oria amama àrị kangulugulu, nweni koromaso nyọ sọsam.

¹⁶ Iin, Mẹmfịs na Tapanhiz na owuapụma ọ̀ tịḅị okpolokpo mị fomupusam.

¹⁷ Izrẹl, ị́rị́ mịn mị dekiḅo ị́ ḅụ pịrịmẹ! Ị́ ị̀ wẹrịsomẹ Ị̀rị̀ ị́ Nyana Tamụnọ Ḅe, àrị ateli ḅụ ị́ pamun-arị sịkị.

¹⁸ Ị́ koroma ḅara che sọye ị́ nwọ nyanaḅe mun Ijipt ḅie Naịl mengi mị ọkị ḅu ḅụ? Ị́ koroma ḅara che sọye ị́ nwọ nyanaḅe mun Asiria ḅie Yufretis mengi mị ọkị ḅu ḅụ?

¹⁹ Ị́ mịẹ si anị fomuḅara se ị́ pịrịḅịaye-ẹ, pịkị ị́ ị̀ ḅụpikima so mị anị ḅẹrẹkọn ị́ ḅarasimaḅịa. Ị́ ọrị ḅoḅịa na ị̀ sarakoroma mị akụ pịkị iḅika ọkụ, Ị̀rị̀ Nyanaḅọ ị́ Tamụnọ Ḅe, se ḅarị kuḅie-se-ḅụgbana ḅaraḅụ sime ị̀ pịrịkẹ. Ị̀rị̀ Kụrọmamgba Nyanaḅọ Ḅe àrị ọkwẹịnsam.”

Izrẹl Mị Anị Ḅarị Nyanaḅọ Ḅe Tẹkẹ Ḍụkụkẹ

²⁰ Kụrọmamgba Nyana Tamụnọ Ḅe nwọ ḅẹmẹ, “Izrẹl, ḅọlọsa sịkị ngịsị ị́ ị̀ya kụrọ mị sịkịmẹ; ị́ ị̀ ḅịpị poki se ị̀ tẹkẹ ḍụkụkẹ. Gele chịngịma ọgọnọ ḅụ goyegoye na pịkị eje chuku ma na ḅụ ị́ fịye pakụma oru ma tẹkẹmẹ.

²¹ Sẹlẹ sikima chịnmgbọlụ-a fịaye kịkẹ ḅara anị àrị iḅitẹịn ḍipiyemgbọlụ ḅụ ị́ sẹlẹ se ị́ ḍipi ọkụ-ẹ. Ọkụma ị́ ḅo sime ọkụ ḍiki! Ị́ ḅụrụsa yeḅụoforika chịnmgbọlụ fịaye kịkẹmẹ.

²² Nemikase kụrọtẹịn saḅaị ị́ nwọse mengi ḅiriso sọ, à pa ị́ ḅụ oḅolo ḅẹrẹḅarasi mị ọrịḅịa.

Izrẹl Mị Anị Fịafịakẹ Anịatịḅị Anị Oru Tẹkẹaḅẹ

²³ Nyanaḅọ Ḅe nwọse Izrẹl mị gbelamẹ: Nde ị́ ineda ḅẹḅịa ọkụ na ma ị́ ḅụ pụlamakẹ, na jenejene ma ị́ Beal ḅe tẹkẹkẹ? Ị́ ị̀ simịẹ ọkụ ḍiki pẹsịkiri mị ḅie; ị́ mịẹye ọrị. Mangị sịkị ḅụ piri ike-nambulo ị́ nwọ kịkẹmẹ, tịḅịtọnka ḅara se mangịma ḅọrọ,

²⁴ mangị onwun ele ma ḅie sọaḅẹ. Tụḅọ ineda á dachịẹmaḅe mangị sịkị ḅụ? Mịnaḅụ fụkama se á ḍọkịḅịa owoi-nambulo sọ ofori-ẹ; sịkịmamgba àrị owoi-nambulo na gbolomaḅịa gose ḅụkarakaramamẹ.

²⁵ Izrẹl, mịẹ ị́ ḅụọma ḅụ ịnyọ fama, anịkanịka ị́ pụkọ mị ḅo samịna oru ḍuko ḅụ. Ọkụma ị́ pa ḅẹaḅẹ, ‘Ẹn-ẹn! Àrị ineda pịkị ẹkẹ. À jịn ama oru ḅẹlẹmasam, à pịkị àrị ḍukoḅịa.’”

Izrẹl Mị Anị Fomuḅara Da Gbẹịnmẹ

²⁶ Nyanaḅọ Ḅe nwọḅẹmẹ, “Furuḅọ ḅe, ini ò kun se ọ̀ ḅụgererema gererema ọkụ, anị ini ómine Izrẹlapụ mamgba ḅụgererema ḅịa ọkụ-ẹ—ọ́mịna amanyanapụma na, fịrịnwẹngịapụma na, agbamịẹapụma na, pịkị ịkịankoroapụma na.

²⁷ Ómine mgba ini ọ́ ḅụgereremaḅịa, ómine eje mị anị ọ́mịna ḍa-ẹ, anịsịkị ḍụparị mị anị ọ́mịna nyengi-ẹ nwọḅẹ apụma. Mịn mị mịẹḅịa, anịatịḅị ọ́ tọrụ pịkị ị̀ da-na-karaka ómine ọ́ tọrụsinmẹ ị̀ ḅụ. Ọkụma ọ́ ḅụfụka ḅie sọsịkị ómine ị̀ ḅẹḅịa à ḅo ọ́ ḍụa.

²⁸ “Ọ́ mịẹ ọ́mịna ḅụ pịrị-a oru ma nde àrị? Ọ́ ḅụfụka ḅie sọsịkị, ye àrị ọ́ ḍụa-ge, àrị inedaḅịa ḅẹḅẹ! Juda, ị́ opuamama nyana ḅakama ọkụ anị ị́ pịkị oru ma nyana ọkụ-ẹ.

²⁹ Nde ị́ya ḅụḅalaḅala? Nde ị́ gose kọngọ kụrọma ị̀ pịrịye?

³⁰ À fomuḅara se ị́ pịrịmẹ, ọkụma anị mịẹ iḅiye ofori-ẹ; ị́ ḅereni ị̀ pịrịkẹ àrị ị́ datekerema. Opuma ịganịarị chịrịḅa ḅara, ị́ nwọse ị́ya ịkịankoroapụma ninisam.

³¹ Izrẹl-a tomoni, à ḍuko-ẹtọn-arịye ọ́ nwọ poki. Àrị onwun ele kịkẹye sọ ọ́ pịrịsa, kanakana ḅụfụka pịrị kiri kịkẹye? Anịọkụma cheye gose ọ́ ḅẹ-ao na ómine ó ḅietọnye nwọ mịẹḅịa, na ọ́ ḅarị ngịsị ị̀ damaḅo ẹkẹ?

³² Jene iremeniḅọ árịa ḅiriaye ma se ḅieḅaramasa, anịkanịka owuḅọsimeḅịa eremeniḅọ á se chọchị ḅie owuḅọ yaḅịa ḅụchụayema se ḅieḅaramasa? Ọkụma ị̀ya tomonima, ineda kịẹnḅịa ọkụ oforika ene nwọse ị̀ se ḅieḅaramasam.

³³ Ó jokoma nemimẹ ini lekiria ḅẹḅẹ ọkụ. Sitẹịn eremeni ma pembe ineda ọ́mịna ḅara anị ḍawọḅịa.

³⁴ Igwein apụma na ḅẹrẹsi nyanakapụma na pulo anị ọ́mịna ḅụchụayema ịlọlịmaye-ẹ, furuapụ pulokẹ. “Ọkụma mamgba sikima,

³⁵ ị́rị́ ọkọ ḅẹmẹ, ‘À nemiye ofori-ẹ; kọkọmaye-ẹ Nyanaḅọ Ḅe ọ̀ ḅarị ị̀ ḍikiḅieḅukẹ.’ Ọkụma Ị̀rị̀, Nyanaḅọ Ḅe, àrị ị́ fomuḅịa, anịatịḅị ị́ pikimẹ na ị́ si mịẹka-ẹ.

³⁶ Ị́ ị́ḅụ mịẹiderimasam ị́ nwọ tọrụpịkị jịn-a sẹ oru ma dasa sịkị. Ijipt mị ḅụ ị́ ḅietọnye ị́ ḅieḅaraḅịa, Asiria ḅụ ị́ sime se anị paka ị́ pịrị ọkụ mị.

³⁷ Ijipt mị ḅụ ị́ tọrụpịkịḅịa, ị́ ḅụgerere ḅụ ị́ tọrụtuḅịa. Ị̀rị̀, Nyanaḅọ Ḅe, ị́ kuḅie-se-ḅụgbanapụ ma sịkịsam, inia ḅara ị́ nyanaḅoḅịa gbọrị sọye sọ ofori-ẹ.”