Jerimaya 18 - Kịrịkẹnị Baịbụl

Jerimaya Ḅe Ḅẹlẹtẹmẹḅọ Ḅe Warị Mun Mẹ

¹ Nyanaḅọ Ḅe nwọse ị̀ ḅẹmẹ,

² “Ḅẹlẹtẹmẹḅọ ḅe warị mun, àrị ị̀ya oku se ị́ pịrịḅịa nyọ mị.”

³ Anịḅụ àrị anị nyọ mun mẹ se pịkị ḅẹlẹtẹmẹḅọ ḅe ọrịmẹ oria fịrị kiri ḅụ.

⁴ Ọ̀ tẹmẹ ḅẹlẹ mị kpaịnka sịkị goyegoye, ori aḅaịn mị ọkị jịn kịrịye tẹmẹḅịa.

⁵ Anịsịkị Nyanaḅọ Ḅe nwọse ị̀ ḅẹmẹ,

⁶ “Àkụrọ nyanaka, ḅẹlẹtẹmẹḅọ ḅe se aḅaịn mị mịẹ ọkụ se ómine Izrẹl-a tomonima mịẹ? Ómine ị̀ ḅara ḅie omi-ẹ, aḅaịn mị ḅẹlẹtẹmẹḅọ ḅe ḅara ḅie sime ọkụ.

⁷ À nemikase gbọrị sịkị ḅụ ḅe na à mun gbọrị sẹ anịkanịka amanyanakiri burasin anịkanịka kankoromaḅịa, anịkanịka simaḅịa ọkụma,

⁸ se anịsịkị anị sẹ mị anịa sima ḅie pịkị ọkụma à tọn na à se ini mịẹḅịaye mị, à ḅarị mịẹ ẹkẹ.

⁹ Jịn ḅaraḅụ ọkị, à nemikase ḅẹ na, à mun yeḍipiḅịa, anịkanịka sẹ anịkanịka amanyanakiri namapakụmaḅịa ọkụma,

¹⁰ ọkụma anị sẹ mị ị̀ ḅịpị pokikẹ, se siye mịẹ ọkụma, à ḅarị à tọn na à mịẹḅịaye nwọḅẹye mị mịẹ ẹkẹ.

¹¹ Mịọkụ mịn mị gose, ḍuko Juda na Jerusalẹm na ḅe-a tomonima pịrị à mịẹ-ẹtọn-aye mị. Ini dapaka pịkị ḅụkarakarama ḅe fomuḅara à nwọse ini pịrị-ẹ mun aḅẹ. Ini ḅẹ ini si ḍumo ḅụ dachịẹ se inia mịẹmịẹaye ma na atelima na tẹlịma.

¹² Ini pẹkẹrẹḅịa, ‘Ẹn-ẹn, anị cheye gose? Mine mgba wa pa ininachịnḅịa pịkị si ḅie simeḅịa wa ḅi ḅaraḅụ.’”

Tomoni Ma Nyanaḅọ Ḅe Sịkịmẹ

¹³ Nyanaḅọ Ḅe nwọ ḅẹmẹ, “Sẹ goyegoye gbela, jene nwọ simeye pakasa-otuḅo. Izrẹl-a tomonima ini ḅalafamaye mịẹsam!

¹⁴ Lẹbanọn gele ḍụparị tụndụma àrị kụrọ ene mgbọlụ chụaka sịkị omi? Arịa dein tụndụ ideri mengi ma jene samịnasa?

¹⁵ Anịsọ ị̀ya tomonima ini ị̀ se ḅieḅaramasam; ini insẹnsị dọkịma oru ma pịrịmẹ. Inia ḅụọ tọmbụlọsam ini ḅọrọḅịa ateli ma ḅụ; ini ḅarị olomu ateli ma ḅọrọkẹ; elekima oforika nyọma mị ini ḅọrọye-ẹ.

¹⁶ Ini mịn ama mị se ḅalafama nyọ mịẹsam, tomoni ḍikisima gbasoḅịa nyọ. Nwẹngị ḅọrọ apụ goyegoye ḅụgbiripu nyana ini ọrịye pịrịḅịa; ḅụgbiripu ḅụ ini inia tịḅị ma jikeḅịa.

¹⁷ Àrị ị̀ya tomonima galagalamaḅịa inina-tarakapụma tọrụkuḅu, saḅakoro fọrụ fọn ofurosin ọkụ. Àrị ọḅụ pịkị ini gbinḅịa; à ḅarachụa ini pịrị ẹkẹ ḅụfụka mị ḅoḅịa sịkị.”

Ḅẹrẹḅia Jerimaya Ḅe Pịrị Mị

¹⁸ Anịsịkị tomonima nwọ ḅẹmẹ, “Ó ye wa Jerimaya ḅe ḅụ gbọrị ḅara mịẹ! Sịkịmamgba agbamịẹapụ pakaḅo ye se wa ḍieḅịa, yenemi apụ wa tetemaḅịa, pịkị ịkịankoroapụ Tamụnọ oku ḍuko finjimaḅịa. Ó ye wa yeḍuko ọ̀ tịḅị gbana se ḅarị ò ḍukoḅịaye pokima.”

¹⁹ Anịẹrẹchị à tẹkẹmẹ, “Nyanaḅọ, à ḍukoarịye ma naa pịkị ị̀rị̀na-tarakapụ ma ị̀ ḅụ ḍukoarịye ma poki.

²⁰ Si mị iḅiye mị ḅe gbẹịnye nọ? Anịsọnị ini olulu soku ị̀ pịrịsam, à sokoro ḅie sọḅịa ọkụ. Se ḅiekoroma inia tịḅị gose àrị ị́ damaḅo ọkụ, ị́ya ịganị mị nwọ ọlọchịẹma ḅụ.

²¹ Ọkụma mịọkụ, Nyanaḅọ, ye inia awọma ḅuruḅaa ḅụ sime fị; ye ini ini ḅaa owu ḅie. Ye eremeni ma deapụ na awọ na nyanakapụ sọ; ye owuapụma obi ḅụ fị, pịkị ini asẹmẹnị ma ḅaa owu ḅie.

²² Nweni ogbo se fịrịma ini mun inia warịma ọfọịn ḅụnemika ḅụ; ini mịẹ ini ḅalafa ḅụ owu pakụma. Ini olulu soku ị̀ pịrịsam na à sokoro ḅie sọ, pịkị ḍẹịntu ị̀ pịrịsam ị̀ kunḅịa ẹrẹchị.

²³ Ọkụma, Nyanaḅọ, ini ị̀ ḅaaḅịa ẹrẹchị ini tọn aye mamgba ị́ nemimẹ. Inia si-a mịẹmịẹaye ma na nwẹngị irima ma na ḅụ ḅarasin ini pịrịma. Ini sumagbin se ini na sọ, ị́ya ịganị ḅụ.”