Jerimaya 15 - Kịrịkẹnị Baịbụl

Sime Juda Tomoni Ma Pịrị Ḅụfụka

¹ Anịsịkị Nyanaḅọ Ḅe nwọse ị̀ ḅẹmẹ, “Nemikase Moziz ḅe na Samụẹl ḅe na mịanga chịẹ se ị̀ tẹkẹaḅẹ nwọḅẹ sọ, à gbọrị ḍikiḅụgerere sọ nyana mịnapụma pịrị ẹkẹ. Ye ini so, ye ini ị̀ tọrọkọ ḅụsikima.

² Ini ị́ gbela na ini nde ju munḅịa nọ nwọ ḅẹḅẹ, ḍuko ini pịrị na mị aḅẹ ọkụ-ẹ: “Fị sime dapụ pịrịsam obi ḅụ— anị ini ḅọrọḅịaye-ẹ! Ísíapụma fị sime ini pịrịmẹ ọmụ ḅie— anị ini ḅọrọḅịaye-ẹ! Fị sime dapụ pịrịmẹ ḅuruḅaa ḅụ— anị ini ḅọrọḅịaye-ẹ! Ísíapụma ini ini kun soḅịa ikoliapụ ḅaraḅụ— anị ini ḅọrọḅịaye-ẹ!

³ Ị̀rị̀, Nyanaḅọ Ḅe, à ḍuko pẹlẹsam na inein-a ḅalafamaye paka ini pịrịḅịa: ini ọmụ ḅie ini ḅaaḅịa; obiri inia ojuma fọnọ soḅịa; feni ini pẹịḅịa, pịkị piri-a nama kọn ayema kanịpẹịḅịa.

⁴ À bebe sẹkiri-a tomoni mamgba mịẹḅịa ini ḅụgbiripumaḅara-se-iniaḅụ ḅalafa nyana; anịatịḅị Hẹzekaya ya, Manasẹ ḅe dekimịẹye ma gose Jerusalẹm ḅie, ò Juda sẹ mị ḅie amanyanaḅọ sọ sịkị.”

⁵ Nyanaḅọ Ḅe nwọ ḅẹmẹ, “Tụḅọ ó ḍikiḅụgerere ḅe, Jerusalẹm-a tomoni, se tụḅọ ọ́ tịḅị gose kururuḅe? Tụḅọ kele sịkị fama se gbelaḅe nde ó sime ọkụ?

⁶ Ómine ị̀ sịkịsam; ómine ọḅụ pịkị ị̀ gbinsam. Anịgose àrị ị̀ ḅụ pakụma se ọ́ kọsịmamẹ anịatịḅị ịnyọ ị̀ tanmẹ ị̀ya ịganị mị ọlọchịẹma ḅụ.

⁷ Sẹ mị ḅie sime ama goyegoye ḅie àrị ó se fọrụ ḅie gbinmẹ osirosiroḅa kịkẹ ḅara. Àrị ọ́ kankọsịmaḅịa, ómine ị̀ya tomonima, àrị ọ́mịna awọma ḅaamẹ anịatịḅị ọ́mịna siamịẹmịẹaye ma ḅụ ọ́ dachịẹ ḍụkụkẹ.

⁸ Ọ́mịna amama ḅie deapụ oforika eremeni ḅakatẹịn tọrụ aka onwun ma nẹngịmẹ. Àrị ọ́mịna ayamburama asẹmẹnịma ḅaamẹ se inia nyengi apụma se tekele pịrịmẹ. Ḅụakụ na ḅalafa na à nwọse ḅụnemika ḅụ ini ḅakụgbinmẹ.

⁹ Árị sọnọma awọma fama nyengiḅọ ma á fụmụsam, ịnyọ fa ḅụ. Arịa enekaka mị anị pịkịmaḅo kanakana sọsam; ini á ḅụgereremasam, á kuḅie pịkị sisam. À mịẹḅịa ómine-na-tarakapụma ọ́mịna ḅie ḅụ pa ḍumoarịapụ ma nwọ ḅaa. Ị̀rị̀, Nyanaḅọ Ḅe, ọkọ ḅẹmẹ.”

Jerimaya Ḅe Ḅẹrẹ Se Nyanaḅọ Ḅe Suamẹ

¹⁰ Ị̀rị̀ ndende sime ḅieḅẹlẹ nyanaka tomoniḅọ! Cheye gose ị̀ nyengima ị̀ ọkị mị sẹkiri ḅo? À kamụ se nwenimgba pakaḅịa pịkị ini na ḅẹrẹ nụnụaḅịa ama ḅie. Ma àrị igbiki se ḅọlọ pịrịkẹ anịkanịka jụmḅọ ḅara igbiki ḅọlọkẹ; anịsọ nwenimgba ị̀ worimẹ.

¹¹ Nyanaḅọ, ye inia woria ḅịpị ma ḅo kọkọmaye sọ, nemikase ma àrị iḅiọkụma fịrịnwẹngị ị́ pịrịkẹ nwọ ḅẹḅẹ, ma à pịkị ị̀rị̀na-tarakapụ ma tịḅị gose, ị́ tẹkẹkẹ nwọ ḅẹḅẹ, ini ḅụfụka ḅie sime, pịkị kuḅiesi nyana sịkị ḅụ.

¹² (Ineda ikulele anyịmaḅịaḅọ ofori-ẹ, anịtẹịn-anga ọgọnọju ḅo ikulele mị, anị ini alapẹlẹka se gwaye mị.)

¹³ Nyanaḅọ Ḅe nwọse ị̀ ḅẹmẹ, “À tarakapụma se sẹịnḅịa ini mun ị̀ya tomonima ngọma na igbiki ma na dekiso, mịẹse ini fomuḅara nwọ nyana inia sima ama mị kelemaye gose.

¹⁴ Àrị ini mịẹḅịa ini fịrịnwẹngị inina-tarakapụma pịrị, ini gbọrịye sọ nemika ama ḅie, anịatịḅị ị̀ya ịganị mị anị fịnị kịkẹmẹ, anị pịkị kọrị gbasoḅịa.”

¹⁵ Se à nwọ ḅẹmẹ, “Nyanaḅọ, ị́ kaịnḅomẹ. Ị̀ se ḅiekoroma se ḅarachụa ị̀ pịrị. Ye à sowuḅi nwọ ḅụọ-se-ị̀-chụarịapụ ma ḅụ. Ḅụlọkọma ini pịrịma ini ḅofa ẹmbẹ nyana ḅo ị̀ ḅaa. Se ḅiekoroma na ị́ tịḅị gose mị à tọrụsiọrịarịye-ẹ.

¹⁶ Ị́ ọkwẹịn ị̀ pịrịmẹ, à pịkị ọkwẹịn mamgba pokimẹ. À sime ị́ pịrịmẹ, Kụrọmamgba Nyana Tamụnọ, anịḅụ ị́ya ọkwẹịn ma ị̀ kuḅie ḅein pịkị ị̀ ḅieḅẹlẹmamẹ.

¹⁷ Àrị ị̀ya sịkị fama jịn apụ na ḍẹrịma ḅọrọkẹ tọrụḅẹlẹḅụ. Ị́ ḅịpị poki ḅụ, àrị ị̀ ḅụ se ọrụtọn koromamẹ, kuḅiesi na.

¹⁸ À cheye gose tọrụsiọrị-ao? Cheye gose ị̀ya oju ịnọ ma pa ineda gwọka? Cheye gose àrị ḅịa ẹka? Ị́ ị̀ mịẹlọkọma ḍọkị-ao, ideri mengi ḅo ịrụakpoin sịkị samịna ọkụ?”

¹⁹ Nyanaḅọ Ḅe, mịn mị pẹkẹrẹmẹ, “Ị́ nemikase vinpịkị ḅomẹ nwọ ḅẹḅẹ, àrị ị́ ọkịḅịa, se ị́ pịkị ị̀ya fịrịnwẹngịḅọ sọḅịa. Ị́ nemikase tịḅịnyanakaye ḍuko na karaka, se yeḅụsọ oku ị́ nwọ ḍuko pakụmamẹ ḅẹḅẹ, ị́ pịkị ị̀ya ịkịankoroḅọ nwọ sọḅịa. Tomonima ini ị́ damaḅoḅịa, se ị́ ḅarị ini damamun ḍọkị ẹkẹ.

²⁰ Àrị ị́ mịẹḅịa ị́ kụrọ alapẹlẹka warị agbagba kịkẹ ini na gbolomaye ḅụ. Ini ị́rị́ na owusọḅịa, ọkụma ini ineda ị́ inuma ẹkẹ. Àrị ị́rị́ na simeḅịa, ị́ koko pịkị ye-ị́-la-ẹka ḅara se ị́ ḍikiḍikiḅịa inia ḅaraḅie.

²¹ À kụrọ apụ na sitịḅịnyanapụ na ḅaraḅie ị́ ḍụaḅịa. Ị̀rị̀, Nyanaḅọ Ḅe, ọkwẹịnsam.”