Jerimaya 14 - Kịrịkẹnị Baịbụl

Ḅalafama Ịrụakpoin Mị

¹ Nyanaḅọ Ḅe nwọse ị̀ ḅẹmẹ, ịrụakpoin mị na gbolomaye ḅụ,

² “Juda mị anị ḍụẹịn-ḍin ḅụ omi-ẹ; anịa opuamama àrị fịaḅẹ, anịa tomonima kururu ḅụ kiri ḅọlọlọmẹ, se Jerusalẹm mị ḅarachụa ḅi ḅụ oloku owumẹ.

³ Ngọ nyanapụma inia fịrịnwẹngịapụma fịrịmamẹ mengi gose; ini mengi kokonyọ ma mun mẹ, ọkụma ini mengi ọrịkẹ; ini inia yeḅieoforika ojongo ma na pịkịma ḅomẹ. Kuḅie lọkọ na ḅụḅalaḅala na ḅụ, ini inia tọrụ ma ḅọịmẹ.

⁴ Ene koroka ẹrẹchị, pịkị kiri mị sọ nwọ samịna sịkị, ozu ḍipi apụma ḅụgerere inia tọrụ sọmẹ; se ini inia tọrụ ma ḅọịmẹ.

⁵ Ele ogbo ịwọma yi ịrọrọ tụḅụra ḅe oria tọkụ sara koromamẹ anịatịḅị osuein ofori-ẹ.

⁶ Piri yepụra asụnma chịngịma ọgọnọ chịẹmẹ se arịa ḅịpị finji ọwụ saramẹ piri obiri ḅara; arịa tọrụ sọ iḅiọkụma nyọ ọrịkẹ anịatịḅị àrị fịye nyanakẹ.

⁷ Ị̀ya tomonima oloku owu ị̀ pịrịmẹ, ‘Mịna sima ḅẹrẹkọn wa pịrịsọ, ḅarachụa wa pịrị, Nyanaḅọ, ị́ ḅereni ḅara ḅụ. Ḅaka sịkị ḅụ wa ị́ ḅụ wẹrị sikimamẹ; wa ị́ mịẹ simasam.

⁸ Ị́rị́ kẹngẹ anị Izrẹl mị tọrụ se ḍikiarịye-ẹ; ị́rị́ anị ḅụfụka ḅie wa ḍụaḍụaḅọ ḅe-ẹ. Cheye gose ị́ igoniḅọ kịkẹ mịna ama ḅie, gbọrị ḍin kẹngẹ se simeḅịa nyọmun-arịḅọ ḅara?

⁹ Ị́ cheye gose pururuma pakaḅo ḅọ kịkẹ, anị ineda ịnyọ nyana ḅarachụa ẹka owuniḅọ ḅara? Kọkọmaye-ẹ, Nyanaḅọ, ị́ mine na omi-ẹ! Mine ị́ya tomoni-ẹ; wa sarakoromama.’”

¹⁰ Nyanaḅọ Ḅe nwọ ḅẹmẹ mịna tomonima ḅụ, “Ini ị̀ ḅụ mangịso ḅẹlẹmamẹ, se pịkị ineda inia ḅụ kekekẹ. Anịgose àrị ini ḍiki ḅieḅẹlẹkẹ. Ini mịẹsa siaye ma à nwọ se ḅiekoroma se fomuḅara se ini pịrịḅịa, inia sima gose.”

¹¹ Nyanaḅọ Ḅe nwọse ị̀ ḅẹmẹ, “Ḅarachụa mịna tomonima pịrị nwọse ị̀ ḅẹma.

¹² Ini ḅurukụnma sọ, àrị inia owu ma poki ẹkẹ, ḅarachụa ini pịrị ḅụ, se ini dọkịma agba na fịayemgbọlụ agba na se ị̀ pịrị sọ, à ḅieḅẹlẹ nyana ini pịrị ẹkẹ. Anịnakaraka, àrị owu ḅie na, ḅuruḅaa ḅụ na, obi ḅụ na ini ḅaaḅịa.”

¹³ Anịsịkị à nwọ ḅẹmẹ, “Kụrọmamgba Nyanaḅọ, ị́ nemimẹ na ịkịankoroapụma ini ḍuko tomonima pịrị aḅẹ na owu koro ẹkẹ anịkanịka ḅuruḅaa ḅo ẹkẹ, anịatịḅị ị́ ḅerenimẹ, ini nwọ ḅẹmẹ, na dein kẹngẹ anị mịna ama ḅie simeḅịaye-ẹ.”

¹⁴ Ọkụma Nyanaḅọ Ḅe pẹkẹrẹmẹ, “Ịkịankoro apụma ini ị̀ya ẹrẹḅụ iruo kọn aḅẹ; àrị ini fịrịmakẹ, anịkanịka gbọrị kụrọ sọ se ini pịrịkẹ, anịkanịka gbọrị ọkwẹịnsọ kọn ini pịrịkẹ. Ini ḅẹrẹḅẹ tẹmẹḅụ-ọrịaye ma ị̀ ḅaraḅokẹ; tọrọkọ pakaḅịa ini nwọḅẹ ayema anị inia yeḅụsọka koroma-ẹ.

¹⁵ Ị̀rị̀, Nyanaḅọ Ḅe, ḍuko ị́ pịrịmẹ à se ini ịkịankoroapụma mịẹḅịaye, anị à fịrị se fịrịmaka se mun ị̀ya ẹrẹḅụ ḍuko na owu na ḅuruḅaa na mị ama la ẹkẹ nwọḅẹ apụ ma—àrị ini ḅaaḅịa owu ḅie na ḅuruḅaa ḅụ na.

¹⁶ Anị gbọrị ḅaraḅụ ini ma ịkịan ma koro pịrị-a tomonima sọ, àrị ini ḅaaḅịa. Inia fị ojuma ini àrị se Jerusalẹm ateli ma ḅie gbin saraḅịa, se àrị ḍipiḅịa gbọrịḅọ sọ ofori-ẹ. Mị inimgba ḅụ pakaḅịaye-ẹ—inia erema na, inia owuapụ awọma na inia eremeni awọma na se chụa. Àrị ini mịẹse ini inia sitịḅị ma ḅe-gbẹịn-aye nyanaḅịa.”

¹⁷ Nyanaḅọ Ḅe tọn ị̀ pịrịmẹ, àrị ị̀ya kururu mị ḅe-sime-ọkụ ḍuko tomonima pịrị se ḅẹ-ẹ: “Ye owu mengi ị̀ tọrụmgbọlụma ḅụ ideri enekaka na ḍin na ḅụ, ye ngịsị owu ị̀ ḅụ kunoma, anịatịḅị ị̀ya tomonima ye ikuma ini lasam, inia ḅụ opuma akụmẹ.

¹⁸ À paka ele ogbo mun sịkị, à tọn-a fị oju akpakpa ọrịmẹ owu ḅie ini ḅaapụ; àrị amama ḅie sọ sịkị, à tomoni ọrịmẹ ḅuruḅaa ḅie fịarịapụ. Ịkịankoroapụ na agbamịẹ apụ na inia fịrịma nwẹngịaḅẹ, ọkụma ini mịẹarịye ini nemikẹ.”

Tomoni Ma Nyanaḅọ Ḅe Tẹkẹmẹ

¹⁹ Nyanaḅọ, ị́ gbọtụma Juda mị sịkịsa? Ị́ taraka se Zaịyọn-a tomonima wẹrịma? Cheye gose ị́ mị ḅaramgba se ye se wa lama so ọkụma wa ineda gwọ ẹka ḅara sime? Wa dein ḍọkịmẹ, ọkụma iḅiye pakaḅokẹ; wa tọrụ se ḅụ gwọ ḍikimẹ, anịnakaraka ḅalafa anị ḅoye-ẹ.

²⁰ Wa si se ị́ mịẹsam, Nyanaḅọ; wa mịna sima na pịkị mịna ḅieju-aḍapụma sima na ḍukopakụmasam.

²¹ Ị́ ḅereniaye ma se ḅiekoroma se wa ḍiki simama; ḅụgerere se ḅo Jerusalẹm tọrụ chụama, anị ị́ya boma amanyana-ngada nyọ mị. Ị́ mine na fị ọḅọkụ mị kanma.

²² Sẹ ma ḅie sime oru ma ḅụ ineda ene koromaḅịa oru ofori-ẹ; so mị ngẹrị mịnaḅụ na ineda nwẹnẹnwẹnẹ ene koroma ẹkẹ. Mịna kuḅie wa se ị́ ḅụgbanasam, Yei Nyanaḅọ, mịna Tamụnọ, anịatịḅị ị́rị́ anị mayema mịẹye-ẹ.