Jems 5 - Kịrịkẹnị Baịbụl

Sime Alakọn Apụ Ma Pịrị Ḅerijine

¹ Se mịọkụ alakọn apụma, ómine ị̀ poki! Ómine oloku se owu, ḅo ọ́mịna ọgọnọ gbana-ẹ ḅoarị ḅụfụka ma gose!

² Ọ́mịna ngọma àrị ḅụrụsosam, ọ́mịna ḅiriaye ma akakaraḅa àrị pẹịsosam.

³ Ajarị ọ́mịna goli ma na seleḅa ma na gbẹịnsam, se ma ajarị ma pịkị ómine na tụḅụrụ onye nwọ chịẹḅịa, se fịnị ye dọkịma ọkụ se ọ́mịna ojumịnị ma dọkịmaḅịa. Ma kuluma enema ḅie, ómine ngọ koḅirima koromasam.

⁴ Ngịsị ma ọ́ gbẹịnye seni ọ́mịna ozuma ḅie fịrịnwẹngị ọ́ pịrị apụma pịrịkẹ. Ini suarị ḅẹrẹ ma ọ́ nwọ poki! Ó ḍipi ayema soku apụma kọn owu ma, Tamụnọ Ḅe ḅeri ma lasam anị Kụrọmamgba Nyana Ọmụtịḅịda Ḅọ Ḅe.

⁵ Ọ́mịna ḍumo ma tomonikiri ḅe lọkọlọkọ na ḅụtima na ḅieḅẹlẹ na arịa ḅie ḅeinmẹ. Ómine ọ́ ḅụ borima ini ọ́ ḅaaḅịa ene mị wẹrịmasam.

⁶ Ọ́ ḅẹrẹkọn siye mịẹka ḅọ ḅe ḅara sima se pịkị ọ̀ ḅaasam, ọ̀ pịkị ómine na kụrọye mịẹkẹ.

Ye-inema Na Tẹkẹ Na

⁷ Anịọkụma ó ye-inema ị̀ya mịnapụ, ọkịmun Nyanaḅọ Ḅe ḅoḅịa sịkị la. Yeḍipiḅọ ḅe ye-inema ọkụ ḍiki, ò korumun oria ozu mị yela chịnmgbọlụ nwọ pakụmaḅoḅịa sịkị lamẹ. Ori ịnyọḅa koru wẹrị-i mun ịrụakpoin na fọngụ sịkị enema sọnị nwọ lamẹ.

⁸ Ómine sọnị ọkọ se ye-inema, pịkị kụrọkuḅie nyana anịatịḅị Nyanaḅọ Ḅe ḅoḅịa enema kpekisam.

⁹ Ọ́ jịnḅọ jịnḅọ se ịkpẹịn ma ị̀ya mịnapụ, mịẹse Tamụnọ Ḅe ḅẹrẹkọn ọ́ pịrị ẹka ḅara. Ḍiki Ḅẹrẹkọn ḅọ ḅe ḅọkọkọ ọ̀ chịẹ waraḅẹ, ḅụpakụmaḅịa ẹrẹchị.

¹⁰ Ị̀ya mịnapụ, Nyanaḅọ Ḅe ẹrẹ se ọkwẹịn kọn ịkịankoroapụma ọ́ nwọse ḅiekoroma. Tọrụsiọrị ḅie ikirima na ye-inema na ḅụ ḍikiḍaḅịa apụ ḅara ọ́ nwọse ini ọkị.

¹¹ Ḅieḅẹlẹ nyana apụ wa nwọse ini chịnmẹ, anịatịḅị ini inema nyanamẹ. Job ḅe ye-inema mị sọnị ọ́ naasam, ọ́ pịkị Nyanaḅọ Ḅe anị ḅe kuluma mịẹ ọ̀ pịrịye nwọ nemimẹ. Anịatịḅị Nyanaḅọ Ḅe ḍikiḅụgerere na ḍikitịḅịfoin na ọ̀ ḅụ ḅeinmẹ.

¹² Yemamgba nẹngịye, ị̀ya mịnapụ, ó yekarịfịma ó ye ḅereni àrị sịkị. So mị sọnị, anịkanịka tomonikiri mị sọnị anịkanịka ḅọrọ jịnye sọnị se yekarịfịma. Ye ị́ya “Iin” mị “Iin” ḅụ sime, “Ẹn-ẹn” mị pịkị “Ẹn-ẹn” ḅụ sime. Anịọkụma Tamụnọ Ḅe oria ḅẹrẹkọn ḅarị sime ị́ pịrị ẹkẹ.

¹³ Ọ́mịna ḅie ḅụfụka ḅie sime ḅọ omi? Ye iniḅọ tẹkẹ. Ḅieḅẹlẹarị ḅọ omi? Ye iniḅọ tokoni nime nwọ chu.

¹⁴ Obiarị ḅọ omi? Ye iniḅọ chọchị mị ḅe sẹnịapụma nwọ chịn, se ini tẹkẹ ọ̀ pịrị se Nyanaḅọ Ḅe ẹrẹ ḅụ pulo se ori ọmbị.

¹⁵ Ḅereni ḅụ wẹrị kọn tẹkẹ mị obi ḅọ ḅe gwọḅịa, Nyanaḅọ Ḅe mịẹse tomoniḅọ ḅe ḅụ pịkị iḅiḅịa, se iniḅọ mịẹ sa sima ḅụḅarasin iniḅọ pịrịḅịa.

¹⁶ Anịẹrẹchị, ómine ọ́mịna sima ḍukopakụma jịnḅọ jịnḅọ pịrị, pịkị tẹkẹ jịnḅọ jịnḅọ pịrị mịẹse ọ́mịna ḅụ deinḅịa ḅara, karakaraḅọ ḅe tẹkẹ mị anị kụrọ fịrịnwẹngị nwẹngịmẹ.

¹⁷ Ịlaịja ḅe mịna juo tomoniḅọ-ẹ, ọ̀ kụrọma tẹkẹmẹ na ene koro ma tẹrẹ-a kụra na pẹkẹrẹ na ḅụ, ene pịkị koro kiri lakẹ.

¹⁸ Ọ̀ pịkị jịn gbọrị sịkị ḅụ tẹkẹmẹ, se so mị anịa ḅie sime ene mị koromamẹ, se kiri mị pịkị anịa ḅie sime fịayema nwọ pakụmaḅomẹ.

¹⁹ Ị̀ya mịnapụ! Ọ́mịna ḅie gbọrịḅọ nemikase kọkọmaye mị ḅụ ateli irifa aḅẹ, se jịnḅọ iniḅọ ọkị vinpịkị ḅomẹ ḅẹḅẹ,

²⁰ ọ́ mịn mị nwọse ḅiekoroma na, si ḅọ mịẹse iniḅọ mịẹirima ḅụ vinpịkị ḅọ goyegoye, ori ḅọ ḅe ò si ḅọ ḅe tẹmẹ mị nwọ ḍụaḅọrọmaḅịa fịḅụ, pịkị tọn-a si ḅụḅarasin pịrị nwọ ọkịḅoḅịa.