Jems 1 - Kịrịkẹnị Baịbụl

¹ Mịn fịrịfịrịma ḍiri mị Jems, Tamụnọ ḅe na pịkị Nyanaḅọ Jizọs Kraịst Ḅe na fịrịnwẹngịḅọ ḅe ḅara anị ḅomẹ: Kereniḅịpị sime wasama bebe tomonikiri mị kelema oyimaịn furo fịnjị mamgba pịrị.

Ḅereni na Nemi na

² Ị̀ya mịnapụ, iḅifụḅara nyanapụ ḅara ọ́ nwọse ọ́mịna ḅụ ma kịẹnma, ḍaḍiki tọrụ kịrịkịrị ḅo ọ́ lasịkị,

³ anịatịḅị ó nemimẹ na ye-inema ḅụ mị ọ́ ḅọrọ ọ́mịna ḅereni mị ḅe ḍaḍiki mị nẹngịmaḅịaye-ẹ.

⁴ Ọkụma ómine ọrị na, ọ́mịna ye-inema mị anga na anga na ḅụ mgba, anị ó se mun lamẹ, ngịsị ḅịkịka ḅara ḅụ, mịẹse ọ́ kara pịkị arịmgba ḅụ ḅeinḅịa ọkụ, mị re kele kọnmẹ nwọ ḅẹye ofori ẹka ḅara.

⁵ Ọkụma ọ́mịna ḅie nemi nyanakaḅọ omi-ẹ ḅẹḅẹ, ye ọ̀ Tamụnọ Ḅe tẹkẹ, anị se ọ̀ pịrịḅịa ḅọ ḅe; anịatịḅị Tamụnọ Ḅe ḅara kịkịmaka ḅaraḅụ papa pịrị ḍikiḅụgerere ḅụ anị se nwenimgba pịrịpịrịmẹ.

⁶ Ọkụma ọ́ tẹkẹarị sịkị ó ḅereni nyana, se ngịsị ómine mama kuḅie nyana ma. Mama kuḅie nyanaḅọ ḅe, tọrụ ogbo fọrụ sumama ḅọrọarị ambura simeọkụ mị ò simeọkụ-ẹ.

^7-8 Ye ọkọsime ḅọ koroma ma na Nyanaḅọ Ḅe ḅara iniḅọ ye nyanaḅoḅịa, anị mama kuḅie nyana pịkị gbọrị kiri chịẹka ḅọ ḅe.

Igwein Na Ala Na

⁹ Ye igwein mịnaḅọ ḅe ḅieḅẹlẹ Tamụnọ Ḅe ọ̀ dekichịẹma sịkị,

¹⁰ ye alakọn mịnaḅọ ḅe ḅieḅẹlẹ Tamụnọ Ḅe ori iderima sịkị. Anịatịḅị alakọn ḅọ ḅe piriḅie ngwengwe ḅọrọso ọkụ, mị ò se ḅọrọsoḅịa ọkụ-ẹ.

¹¹ Ịrụa mị anịa yedọkịma ọfịrị na ḅịa se chịn mị nwọ dọkịmasinmẹ; anịa ngwengwe ma sokoro koromẹ, se anịa iḅi mị famẹ. Anị ngọkọn ḅọ ḅe sọnị pịkị faḅịa ọkụ-ẹ ori oria fịrịnwẹngịarị ogbo.

Ḍaḍiki Na Telima Na

¹² Ḅieḅẹlẹ sime ori ḅọ ḅe pịrịmẹ ḍaḍiki sịkị ḅụ kuḅie se ḅụgbana gbẹịn ḍumokọn ḅọ ḅe, anịatịḅị ò nemikase ḍaḍiki mị ḅọrọmẹ ḅẹḅẹ, Tamụnọ Ḅe ḅereni ọ̀ ḅẹlẹma apụma pịrị ḍumo mị ọ̀ ḅara laḅịa.

¹³ Wa nemikase ọkọ sime ḍaḍiki ḅie sọmẹ ḅẹḅẹ, wa ḅẹ ma na, “Ọkọ sime ḍaḍiki mị Tamụnọ Ḅe ḅara ḅomẹ.” Anịatịḅị Tamụnọ Ḅe ini ineda siye se ọ̀ ḍaḍiki ẹkẹ, ori na mịnaḅụ na pịkị ḍaḍiki se gbọrịḅọ sọ pịrịpịrịkẹ.

¹⁴ Ọkụma tomonima ḅụḅẹlẹ se ini ḅiarị siye mị, anị ḍẹịn sọ ini jine mun ḍaḍiki ḅie chuye-ẹ.

¹⁵ Anịsịkị ini ḅi siye mị simekọn se si yi pakụmaḅomẹ, se si mị sẹnịḅo ḅaka sịkị anị fị ọkịḅomẹ.

¹⁶ Ị̀ ḅụ yela mịnapụ, ó ḅereni ma ini oḅori se ọ́ chịn!

¹⁷ Iḅi ḍiepịrịye na, pịkị karasa ḍiepịrịye goyegoye soḅie Tamụnọ Ḅe ḅara anị koroḅomẹ. Ori anị sotọrụ sime enekuḅu ma Tẹmẹḅọ Ḅe-ẹ, ò ḍinmaḍinmakẹ, anịkanịka ọḅụpịkị se kanakana mị pịrị-ẹkẹ.

¹⁸ Ò ḅi ḅara ḅụ ọ̀ mịẹse wa ḍumomẹ kọkọma ọkwẹịn mị ḅụ, mịẹse ọ̀ tẹmẹ ayema ḅie wa tatarị chịnmgbọlụ nwọ sọḅịa ḅara.

Naa Na Mịẹ Na

¹⁹ Ọ́ mịn mị se ḅiekoroma, ị̀ ḅụ yela mịnapụ! Tomoniḅọ goyegoye poki ḅụ obiri, ọkụma be ọkwẹịn ma pịkị be ịganị ma.

²⁰ Tomoniḅọ ịganị Tamụnọ Ḅe mịẹḅịa karakaraye mị nwọ nyanaḅoḅokẹ.

²¹ Anịẹrẹchị ịlọlị ḍumo na pịkị sitịḅị mịẹmịẹaye mamgba na ḅụ ọ́ ḅụsin. Ọ́ ḅụ iderima Tamụnọ Ḅe pịrị se ò se ọ́mịna kuḅie ḅụ ḍipi ọkwẹịn mị nwọ ọkị, ineda ọ́ ḍụaḅọrọmaḅịaye mị.

²² Ómine oḅori se ọ́mịna ḅụ chịnma, papa oria ọkwẹịn mị poki ḅụ, anịnakaraka, ómine anị se mịẹmịẹye ḅụ chu.

²³ Ọkwẹịn mị poki se anị se mịẹmịẹye ḅụ chuka ḅọ goyegoye, tẹmẹḍikiye ḅie mịnaḅụ simeọkụ ḍiki se ọrịḅọ simeọkụ, mị iniḅọ simeọkụ-ẹ.

²⁴ Ori iḅiọkụ se kweinma ọ̀ ḅụ ḍiki se somẹ se kirikiri ò sime ḅara mị nwọse ḅieḅaramamẹ.

²⁵ Ọkụma tomoniḅọ mịẹse iniḅọ mịna ḅụ nyanarị karagbasị sa oloko mị kweinma nwọ ḍiki, pịkị tọrụse anịa ḅụ wẹrị ḅọ ḅe, anị papa poki se anị se ḅiekoromaka ḅọ ḅekẹ, ọkụma anị se mịẹmịẹye ḅụ chu ḅọ ḅe-ẹ—Tamụnọ Ḅe ọ́ ḅẹlẹmaḅịa oria mịẹmịẹaye ma ḅụ.

²⁶ Ọ́mịna ḅie koroma na iniḅọ Tamụnọ nemimẹ nwọ ḅẹ ḅo omi? Se ori ineda ọ̀ ḅẹlẹ ọlọkẹ ḅẹḅẹ, oria Tamụnọ nemi mị papaye-ẹ, ọ̀ pịkị oḅori se ọ̀ ḅụ chịn aḅẹ.

²⁷ Fịafịa pịkị karakara Tamụnọ nemi, Tamụnọ Ḍaḅọ Ḅe nwọse chịnye anị mị mị-ẹ, ḍapụ na nyengiapụ na koroma fịsa awọma na, pịkị deapụ fịsa eremeni ma na nwọ ḍikiḍiki, inia tọrụsiọrị kiri ḅụ, se iniḅọ ḅụ ọlọ mịẹse tomonikiri mị iniḅọ pikirima mun si ḍumo ḅie chu ẹka ọkụ.