Izikịẹl 8 - Kịrịkẹnị Baịbụl

Izikịẹl Ḅe Maịn-karama Tẹmẹḅụ Ọrịye Tamụnọ Ḅe Ḅụ (8.1—10.22) Izikịẹl Ḅe Jerusalẹm Ḅie Orutẹkẹ Mị Ọrịmẹ

¹ Ini kụrọḅara se wa sẹịnso, sonio karama kụra mị ḅie, sonio akalụ mị ḅie, sọnọ-a ḍin ene ḅụ, Juda apụ tịḅịnịma ḅụ ini kụrọḅara se sẹịnso apụma na, ị̀rị̀ na, ị̀ya warị ḅie kpọnjị sime waraḅẹ; ḅụnemika ḅụ, Kụrọmamgba Nyana Tamụnọ Ḅe ḅara mị ḅo ị̀ya ọgọnọ gbanamẹ.

² À tọrụdekichịẹma se gbọrị jaịnma ḅịa tomoniḅọ ọkụsimeye nwọ ọrịmẹ tẹmẹḅụ. Ò konjuḅiri ọkị iderima kọrị fịnị ḅịa ọkụ ḅịamẹ, anịsịkị ò konjuḅiri ḅụ ọkị iwoma mun, ini guro sa alapẹlẹka ikulele ḅịa ọkụ ḅịamẹ.

³ Ḅara ọkụ simeye ọ̀ nwọ sụma se ị̀ tịḅị inime ma ḅụ wẹrị ị̀ dekichịẹmamẹ. Anịsịkị tẹmẹ ḅụ Tamụnọ Ḅe ị̀ deki iwo so Jerusalẹm mun mẹ. Ori ị̀ se Oputẹkẹwarị mị ḅụ ọgọnọju daọrụ ḅụ ḅieju onu ḅọkọ mị mun mẹ. Anịnyọ ini ḅara-se-kara se tẹkẹ àrị oru omi-ẹ, anị opuma Tamụnọ Ḅe ịganịmarị yema.

⁴ Anịnyọ Izrẹlapụ Tamụnọ Ḅe oria boma mị ḅịarị ọkụ à nwọ ọrịmẹ, anị Kẹba Tọrụ mị akasịkị ḅụ à tatarị anị ọrị ọkụ mị.

⁵ Tamụnọ Ḅe nwọse ị̀ ḅẹmẹ, “Tomoniḅọ tọkụ, ọgọnọju daọrụ ḍiki.” À ḍikimẹ, se àrị ọrịmẹ na, agbamịẹ ẹbẹ mị anga ḅụ ọgọnọju daọrụ mị ḅụ, onu ḅọkọ mị toluḅọrọ mun la ḅie mị ḅụ opuma Tamụnọ Ḅe ịganịmarị oruma à nwọ ọrịmẹ.

⁶ Tamụnọ Ḅe nwọse ị̀ ḅẹmẹ, “Tomoniḅọ tọkụ, pakarịyema ị́ ọrị-ao? Izrẹlapụma mịanga mịẹarị ḅụgbẹịnkayema ḍiki, ini ị̀ya osiḅụ sime nyọ mị ḅụ ị̀ desin ḍọkị ọkụ ị́ ọrị? Mịn mị nẹngịma jịn-a ḅụgererematẹịn aye ị́ nwọ ọrịḅịa.”

⁷ Ori ị̀ se odo mị ḅọkọ nwọ mun mẹ se onu mị agbagba ḅụ gbọrị tolu nyọ nwọse ị̀ ḍiemẹ.

⁸ Se ọ̀ nwọse ị̀ ḅẹmẹ, “Tomoniḅọ tọkụ, mịanga onu mị tolu.” Àrị anị tolu mẹ se gbọrị ḅọkọ à nwọ ọrịmẹ.

⁹ Ori ị̀ ḅẹmẹ, “Ḅie sọmun ini anị nyọ mịẹarị ḅụgbẹịnka siamịẹayema nwọ ọrị.”

¹⁰ À sọmun se ọrịmẹ. Warị agbagba ma ḅụ oruwu na tọn-a fịafịaka nama na ini nwọ gịẹịnmẹ, pịkị Izrẹlapụma tẹkẹtẹkẹ jịn aye na.

¹¹ Izrẹlapụma ḅie tịḅịdapụ ḅụ kịnị-a tesi oyifịnjị anịnyọ omi-ẹ, inia ḅie gbọrịḅọ anị Jeazanaịya, Shefan yaḅe-ẹ. Inia ḅie gbọrịḅọ gbọrịḅọ insẹnsị dọkịmaye nwọ ọlọ waraḅẹ, kụnụ onwoin pịkị arịa ḅie soaḅẹ.

¹² Tamụnọ Ḅe nwọse ị̀ gbelamẹ, “Tomoniḅọ tọkụ, Izrẹl tịḅịnịma kanakana ḅie mịẹarịaye ma ị́ ọrị-ao? Ọrịḅọḅọ iniḅọ tẹmẹ oru ma se jukuru ḅie koroma se tẹkẹaḅẹ. Ini ḍukoarịye cheye: ‘Nyanaḅọ Ḅe ọ̀ wa ọrịkẹ! Ọ̀ sẹ mị sara koromasam.’”

¹³ Se Nyanaḅọ Ḅe nwọse ị̀ ḅẹmẹ, “Ị́ jokoma ini mịẹ mịn mị nẹngị ḅụgbẹịnkaye nwọ ọrịḅịa.”

¹⁴ Anị ori ị̀ se Oputẹkẹwarị mị ḅụ ọgọnọju daọrụ ḅụ sime onu ḅọkọ mị mun ye-ẹ, se anịju ḅụ oru Tamọz ḅe fị mị gose owuarị eremeni ma nwọse ị̀ ḍiemẹ.

¹⁵ Ọ̀ nwọse ị̀ gbelamẹ, “Tomoniḅọ tọkụ, mịn mị ị́ ọrị-ao? Ị́ jokoma sitẹịn mama nẹngịaye pịkị nwọ ọrịḅịa.”

¹⁶ Anị ori ị̀ se Oputẹkẹwarị odo mị ḅieju sọmunye-ẹ; anịnyọ, tẹkẹwarị mị sọḅịa nyọ mị na kpeki nyọ ḅụ, anị agbamịẹ ẹbẹ mị na kala warị mị na ogboku, pa sisọnọ-a owuapụ fịnjị laḅịa apụ omi-ẹ. Ini ọḅụ se tẹkẹwarị mị gbin, tọrụ se ịrụa paka ḅoḅo nyọ mị da se karakarama tịḅịtutu pakaḅoarị ịrụa mị tẹkẹ aḅẹ.

¹⁷ Nyanaḅọ Ḅe nwọse ị̀ ḅẹmẹ, “Tomoniḅọ tọkụ, mịẹarịye mị ị́ ọrị? Mịna Juda apụma mịanga ị́ ọrị ini mịẹarị ḅụgbẹịnka ayema ini tankẹ, ini pịkị mịẹ finji ma sẹ mị kelema àrị kụrọkụrọ siamịẹmịẹaye ma ị̀ ịganịmatẹịn aḅẹ. Ẹn-ẹn, ini gbọtụḅara ḅo ini ḅiaye ma mịẹkarama mị Oputẹkẹwarị ḅie. Ḍiki, ini iḅiọkụma ị̀ wọlọsam!

¹⁸ Anịẹrẹchị ị̀ya ịganị mị anịa iku la-ọkụ ini nwọ nemiḅịa, à ḅarasin ini pịrị ẹkẹ, à pịkị ini ḍikiḅụgerere ẹkẹ; ini oloku se owu ị̀ tẹkẹ ọkụ tẹkẹ ọkụ, à ḅifie ini pịrị ẹkẹ.”