Izikịẹl 3 - Kịrịkẹnị Baịbụl

¹ Tamụnọ Ḅe nwọse ị̀ ḅẹmẹ, “Tomoniḅọ tọkụ, mịn fangala ḍiri mị fị, anịsịkị mun ḍuko Izrẹlapụma pịrị.”

² Anị àrị ị̀ ḅịpị finji se, ọ̀ fangala ḍiri mị se ị̀ pịrị se à fịye-ẹ.

³ Ọ̀ nwọse ị̀ ḅẹmẹ, “Tomoniḅọ tọkụ, à se ị́ pịrị fangala ḍiri mị nwọ fị; anị fị ị́ ḅụlọ ḅeinma.” Àrị anị fịmẹ, ḅẹịn ḅẹlẹ ọkụ anị nwọ ḅẹlẹmẹ.

⁴ Anịsịkị Tamụnọ Ḅe nwọ ḅẹmẹ, “Tomoniḅọ tọkụ, so Izrẹlapụma damamun se à ḍuko ị́ pịrịye goyegoye nwọ ḍuko ini pịrị.

⁵ Àrị ị́ se jịn kụrọ ọkwẹịn kọn àrị sẹ nwọ fịrịmakẹ, ọkụma Izrẹlapụ ma-ẹ.

⁶ Nemikase àrị ị́ se kịrị jịn-asẹ, ị́ naaka ḅụfụkama ọkwẹịn kọn àrị opu-a sẹ fịrịma ọkụma ini ị́ pokiḅịa.

⁷ Ọkụma Izrẹlapụma ini ị́ poki ḍụkụ ẹkẹ; ị̀rị̀ na mịnaḅụ na ini ị̀ poki ḍụkụkẹ; anịatịḅị inimgba ḅịpịpokika, pịkịna sitịḅịnyana apụ-ẹ.

⁸ Mịọkụ àrị ị́ mịẹḅịa inia kụrọ fụḅara ma na kụrọ kuḅiemgbọlụma na ị́ nwọ nyana.

⁹ Àrị ị́ mịẹḅịa ị́ ḅo ḍụparị kụrọ ọkụ kụrọḅịa, pịkị ị́ mịẹḅịa ị́ ḅo daịmọn sime ọkụ simeḅịa. Ini anị oloko kan apụ-ẹ, ngịsị ini ḍikiḅalafama.”

¹⁰ Tamụnọ Ḅe pịkịna nwọse ị̀ ḅẹmẹ, “Tomoniḅọ tọkụ, à ḍuko ị́ pịrịḅịa ye mamgba se ị́ kuḅie chụa, pịkịna ḅeri tokoloma ị̀ poki.

¹¹ Anịsịkị, so omoni ḅara ḅụ ini kụrọḅara se desin ị́ya ama apụma damamun, se nwọse ini ḅẹ, Mịn Kụrọmamgba Nyana Tamụnọ Ḅe ḍuko ọkụ-ẹ; ini ị́ poki-o ini ị́ pokika sọ.”

¹² Anị Tamụnọkụrọ ị̀ deki iwomaye-ẹ, se Nyanaḅọ Ḅe boma mị ḅụpakụma sịkị, ị̀ya ọḅụju gbọrị gele pụkọ à nwọ naamẹ, kiri kụrọma jike se nyọ fie ọkụ.

¹³ Sembe namama àrị pamba ma se jịnye jịnye nwọ lamamẹ, pịkị kporokporoma na nyọ mị fiema aḅẹ, kiri jike ọkụ.

¹⁴ Nyanaḅọ Ḅe kụrọ ḅo ḅakama ị̀ya ọgọnọ gbanamẹ, ọ̀ tẹmẹ mị ị̀ deki iwo somẹ, anị ị̀ ḅụosọ pịkị ị̀ ịganịmamẹ.

¹⁵ Anị à ḅo Tẹl Abib mị laye-ẹ, Kẹba Tọrụ mị aka sịkị ḅụ, anị omoni ḅaraḅụ-ini-kụrọḅara se desin apụma sime nyọ mị, se sọnọma ḍin à nwọse anị nyọ ḅụ simemẹ, à tọrụ se ọrị pịkị naa ayema ị̀ ḅụ gbiripumamẹ.

Nyanaḅọ Ḅe Izikịẹl Ḅe Se Nyọkoruḅọ Mịẹmẹ

¹⁶ Sọnọma ḍin ma ḅọrọ so sịkị, Nyanaḅọ Ḅe ọkwẹịn ị̀ pịrịmẹ.

¹⁷ “Tomoniḅọ tọkụ,” ọ̀ nwọ ḅẹmẹ, àrị ị́ se nyọkoruḅọ mịẹsam Izrẹl sẹ mị ḅie. À se ị́ pịrịḅịa ḅerijine ọkwẹịn ma ị́ nwọ da ḅọrọma ini pịrịḅịa.

¹⁸ À nemikase ḅẹmẹ na siyemịẹḅọ ḅe ọ̀ fị faḅịa, ọkụma ị́ ò ḅeri jineka se ori oria si-a mịẹmịẹaye ma ḅụ vinpịkịkẹ ḅẹḅẹ, ọ̀ kọkọma sime ḅie sime fịḅịa, anịsịkị, ị́ ḅara ḅụ anị ọ̀ tịḅị pulo mị à nwọ gbelaḅịaye-ẹ.

¹⁹ Ọkụma, ị́ nemikase siye mịẹḅọ ḅe ḅeri jinemẹ se oria simịẹmịẹaye ma ḅụ ò vinpịkị ḍụkụkẹ ḅẹḅẹ, ọ̀ kọkọma si ḅụ sime fịfaḅịa, anịsịkị ị́ ḍumo mị ị́ nwọ ḍụasam.

²⁰ “Karakaraye mịẹḅọ ḅe nemikase oria karakaraye mịẹ ḅụ pịkịma ḅo siye mịẹmẹ, anị mị ḅo mbimbile ḍụparị nwọsọ ọ̀ pịrịmẹ ḅẹḅẹ, ọ́ kọkọma fịfaḅịa; ị́ ò ḅeri jineka ọkụma, oria sima ḅie ọ̀ fịfaḅịa; ọ̀ mịẹ ḅọrọ sa karakara mịẹmịẹyema à ḅarị se ḅiekoroma ẹkẹ; ọkụma ọ̀ tịḅị pulo mị ị́ ḅara à gbelaḅịa.

²¹ Ị́ ḅarị nemikase karakaraye mịẹḅọ ḅe ḅerijine mẹ na ò siye mịẹma-ẹ, se ori ị́ pụkọ poki se siye mịẹkẹ ḅẹḅẹ, ò ḍumoḅịa, ị́rị́ sọnị ị́ ḍumoḅịa.”

Izikịẹl Ḅe Ọ̀ Ḅarị Ineda Ọkwẹịn Ẹkẹ

²² Nyanaḅọ Ḅe oria opu kụrọ mị à nwọ ọrịmẹ, à pịkịna ọ̀ pụkọ naamẹ nwọse ị̀ ḅẹmẹ, “Sịsẹ se so pẹsị nyọ mị ḅie mun. Àrị ọkwẹịn ị́ pịrịḅịa, anị nyọ ḅụ.”

²³ Anị à sịsẹ se so pẹsị nyọ mị ḅie munye-ẹ. Anị nyọ ḅụ à Nyanaḅọ Ḅe opu mị nwọ ọrịmẹ, anị Kẹba Tọrụ aka mị ḅụ, àrị anị ọrị ḅọrọsa ọkụ mị. À sokoro koro se ị̀ tọrụ se kiri iḅomẹ,

²⁴ ọkụma Tamụnọkụrọ ị̀ ḅie sọ se ị̀ dekichịẹmamẹ. Nyanaḅọ Ḅe nwọse ị̀ ḅẹmẹ, “So warị mun se ḅọkọ palị ị́ ḅụ pịrị.

²⁵ Ini ḍiki se ị́ fịnaḅịa, tomoniḅọ tọkụ, anịsịkị ị́ ḅarị ine pakaḅo ẹkẹ tomoni ogboku.

²⁶ Àrị ị́ ḅịpị ḅie ḅẹlẹ mị se ị́ ḅịpị ọgọnọ ḅụ oḅoloḅịa se ị́ ḅarị ineda mịna tịḅịḅie kụrọ apụma ḅeri jine ẹkẹ.

²⁷ Anị nyọ, à pịkị ọkwẹịn ị́ pịrịḅịa, pịkị ị́ se ọkwẹịnḅịa kụrọ se ị́ pịrịḅịa sịkị, ị́ ḍuko ini pịrịḅịa Ị̀rị̀, Kụrọmamgba Nyanaḅọ Ḅe, ḍukoarịye ma. Inia ḅie tọn apụ ị́ pokiḅịa, ọkụma tọn apụ ị́ ḍikisimaḅịa, anịatịḅị ini ma anị ḅịpị poki pokika sẹ-ẹ.”