Izikịẹl 2 - Kịrịkẹnị Baịbụl

¹ Ọ̀ nwọse ị̀ ḅẹmẹ, “Tomoniḅọ tọkụ, sịsẹ chịẹ. Àrị ị́rị́ na ọkwẹịn ḍọkịmẹ.”

² Pụkọ mị pa ọkwẹịn àrị sịkị ḅụ, kụrọ ị̀ ḅie ḅụ sọ se ị̀ dekichịẹmamẹ; à pa ọkwẹịn àrị pụkọ mị naa aḅẹ,

³ “Tomoniḅọ tọkụ, àrị ị́ se Izrẹlapụma sẹịnmaḅẹ. Ini ḅarị ị̀ ḅịpị pokikẹ, ini pịkịna ọḅụ pịkị ị̀ gbinsam, inia ḍapụma mịẹọkụ mị.

⁴ Inia tịḅịḅiekụrọmẹ, ini ḅarị osi nyana ị̀ pịrịkẹ; anị gose àrị ị́ se ini sẹịnmaḅẹ. Ḍuko ini pịrị na mị Ị̀rị̀ Kụrọmamgba Nyanaḅọ Ḅe ḍuko ọkụ-ẹ.

⁵ Ini anị tịḅịḅiekụrọ apụ-ẹ, ọkụma ini ị́ poki ḍụkụ-o, ini ị́ poki ḍụkụka-o, ini nemiḅịa na ịkịankoroḅọ inia ogboku ḅụ omi-ẹ.

⁶ “Ọkụma ị́rị́, tomoniḅọ tọkụ, ngịsị ini ḍikiḅalafama, anịkanịka ini ḍukoḅịaye ma sọnị. Ini ịga na ḅụtemiye na sọ se ị́ pịrịḅịa; inia ogboku pirikambulo sime ọkụ anị ị́ simeḅịa ọkụ-ẹ; anịatịḅị, ini anị ḅịpịpokika apụ-ẹ, ini ḍikiḅalafama, ini ḍukoḅịaye ma sọnị poki ma.

⁷ Àrị ị́ ḅẹ na ḍuko nwọ ḅẹye goyegoye anị ị́ ḍukoḅịaye-ẹ, ini poki-o ini poki ḍụkụka sọ. Se ḅiekoroma na, ini anị ḅịpịpoki-pokika apụ-ẹ.

⁸ “Tomoniḅọ tọkụ, à ḍuko ị́ pịrịarịye mị poki. Ini ị̀ ḅịpịpokika ḅara nwọse ye mịẹma. Ị́ ḅịpị finji se à se ị́ pịrị-ẹmun-arị ye mị fị.”

⁹ À ḅo ị̀ tọrụ dekichịẹma se gbọrị ḅara nwọ ọrịmẹ sụma ị̀ damaḅo aḅẹ, anị fangala ḍiri nwọ ọlọ waraḅẹ.

¹⁰ Ḅara mị fangala ḍiri mị finji mẹ, à ḅo ọrịmẹ na ḍiri mị tọrọkọ na ọḅụ na ḅụ ye gịẹịn waraḅẹ—ngịrị ḅe owupụkọ na kururu na pịkị ḅiefie na.