Hosia 9 - Kịrịkẹnị Baịbụl

Hosia Ḅe Sime Izrẹl Pịrị Fomuḅara Mị Ḍuko Pakụmamẹ

¹ Izrẹlapụ, ọ́ ḅarị oru tẹkẹ apụ ḅara se ọ́mịna alalị ma fịma. Ọ́mịna Tamụnọ Ḅe ḅụ ọ́ ḍarịmasam se ọ́ ḅarị kuḅie se ọ̀ ḅụgbanakẹ. Ama ḅiemgba ómine ọ́mịna ḅụ ma se Beal oru ḅe dẹrịsam, amanwẹngị eremeni ọkụ, pịkị ò se ómine fẹmẹ nwọḅẹ fịayemgbọlụ ma ḅẹlẹmasam!

² Ọkụma ḅọlọ ẹkẹ ọ́ ḅarị fịayemgbọlụ na oliv pulo na nyana ẹkẹ, pịkị iru ḅarị sime ẹkẹ.

³ Izrẹlapụma ini ḅarị Nyanaḅọ Ḅe ama mị ḅie sime ẹkẹ, ọkụma ini pịkịma Ijipt munḅịa, se ini fịfịka tọn tọn-a fịaye nwọ fịḅịa Asiria ḅie.

⁴ Àrị igoni amama ḅie ini ineda iru agba mịẹ Nyanaḅọ Ḅe pịrị ẹkẹ, anịkanịka inia agbama se ḅo ọ̀ pịrị ẹkẹ. Inia fịye mị, anị anị fịḅọ fịḅọ nwọ pụlamaḅịa, ḍụẹịn ḍipi nyọ ini fịfị fịye sime ọkụ. Se fịyepụkọtarị dachịẹma gose mị ini anị fịḅịaye-ẹ; anịa ḅụ gbọrịye sọ agbamịẹ ḅaraḅụ Nyanaḅọ Ḅe Oputẹkẹwarị mị ḅie sọ ẹkẹ.

⁵ Osi se Nyanaḅọ Ḅe pịrịḅịa ẹrẹchị ini tọn alalị ma sịkị, nde ini mịẹḅịa ọkụ?

⁶ Ḅụfụka mị ḅoḅịa sịkị, se tomoni mamgba galagalaḅịa sịkị, Ijipt apụma ini ini koḅirimaḅịa—ini koḅirima anịnyọ Mẹmfịs ḅie ḍipiḅịa ẹrẹchị! Inia seleḅa ngọma na, ini tatarị anga nyọma na, osueinma ịga piri na arịa ḅie sẹnịpakaḅịa.

⁷ Fomuḅara sịkị mị ḅosam, tomoni inia gbẹịnye nyanaḅịa sịkị mị. Anị ḅo pakaḅịa sịkị, Izrẹl mị anị nemiḅịa! “Ḅe ịkịankoroḅọ ḅe,” oḅoriḅọ-ẹ ọ́ nwọ ḅẹmẹ, “Ḅe tẹmẹḅụ ḅụ simeḅọ ḅe, ọ̀ nọmụaḅẹ.” Ómine opuma ị̀ ḍikiḅụnwọnwọmẹ anịatịḅị ọ́mịna si opuma ḅakamẹ.

⁸ Tamụnọ Ḅe ori ị̀ fịrịmamẹ ịkịankoroḅọ ḅaraḅụ ḅo oria tomoni Izrẹlapụma ḅerijineḅịa ẹrẹchị. Anịsọ, à mun nyọ mun nyọ, ḍẹịn tu feni pịrị ḅara ọ́ nwọse ḍẹịn tu ị̀ pịrịmẹ. Tamụnọ Oputẹkẹwarị mị ḅie sọ, tomonima anị ịkịankoroapụma na tarakapụ ma-ẹ.

⁹ Ini mịẹye ḅụ, ini yeḅụoforika siye mịẹapụ nwọsọmẹ, ini Gibia ḅie sime ọkụ mị Tamụnọ Ḅe ori inia sima se ḅiekoromaḅịa se anịaḅụ fomuḅara se ini pịrịḅịa.

Izrẹl Mị Anị Mịẹ Si Mị Ḅe Fomuḅara Daḅịa

¹⁰ Nyanaḅọ Ḅe nwọ ḅẹmẹ, “À tatarị Izrẹl ḍọkịpakụma ḅo sịkị anị onwun ele ḅie sẹnịpakarị tụmgbakị elelenda ḍọkịḅo ọkụ simemẹ. À tatarị ọ́mịna ḅieju-aḍapụma ọrị sịkị, ịwọma ḅịasa figi chịnmgbọlụ ọrị ọkụ simemẹ. Ọkụma ini ḅo Piọ Tụndụ mị lasịkị, ini sakị ḅo Beal ḅe tẹkẹmẹ, ini ḅo ị̀ ḅụnwọnwọmamẹ, ini ḅẹlẹma oru ma ị̀ ḅụnwọnwọma ọkụ.

¹¹ Izrẹl opu mị, anị finso ḅịa feni finso ọkụ, se ini ḅarị jịn awọ yi ini pịrị ẹkẹ; eremeni ḅarị fura ẹkẹ, awọmẹnị ḅarị simekọn ẹkẹ.

¹² Ọkụma ini awọmẹnị ḍikiḍiki sẹnịmasọ, àrị ini ọkị soḅịa se à gbọrịḅọ sọ ḍumoma ẹkẹ. À mịnapụma sarakoroma so sa ḅẹḅẹ, ḅalafamaye iniaḅụ pakaḅịa.”

¹³ Nyanaḅọ, àrị inia awọma ọrịmẹ ini ini kunkun ḅaa aḅẹ.

¹⁴ Àrị ị́ ḅara che ḅiḅe ị́ se mịnapụma mịẹḅịaye? Inia eremeni ma ḅụlọ ma pụnma ini ḅarị yi ma. Ini mịẹ ini ineda inia awọma ḍikiḍiki pakụma ma!

Nyanaḅọ Ḅe Ọ̀ Yekarịfịmẹ Na Ọ̀ Ḅụfụka Se Izrẹl Mị Pịrịḅịa

¹⁵ Nyanaḅọ Ḅe nwọ ḅẹmẹ, “Inia siamịẹmịẹaye mamgba Gilgalị ḅie mị àrị sakịye-ẹ. Anịju mị à sakị ini ḍikiḅụnwọnwọye-ẹ. Pịkị ini mịẹsa siaye ma gose, àrị ị̀ya ama ḅie ini desinḅịa. À ḅarị ini ḅẹlẹma ẹkẹ; inia tịḅịnị mamgba ini ị̀ dapakasam.

¹⁶ Izrẹlapụ samịna se ḅarị chịnmgbọlụ chụaka chịn ḅụ kuno sime ọkụ anị ini sime ọkụ-ẹ. Ini awọ nyana ẹkẹ, ọkụma nemikase ini awọ nyanamẹ nwọ ḅẹḅẹ, àrị iniaḅụ yela awọmẹnịma ḅaaḅịa.”

Ịkịankoroḅọ Ḅe Izrẹl Ḅụ Ye Ḍukomẹ

¹⁷ À fịrịnwẹngị pịrịarị Tamụnọ Ḅe, ori oria tomonima sịkịḅịa, anịatịḅị ini ọ̀ ḅịpị pokikẹ. Ini gelegelema ḅọrọḅịa, sẹma ḅie.